དེ་རིང་ཞོགས་པ་ཆུ་ཚོད་ ༨ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་གནས་མཆོག་རྡོ་རྗེ་གདན་གྱི་མཆོད་རྟེན་རིན་པོ་ཆེར་གནས་གཟིགས་སུ་ཕེབས་ཡོད་པ་དང་། སྐབས་དེར་༧གོང་ས་མཆོག་གིས། དེ་རིང་སྐལ་བ་བཟང་པོ་ཞེ་དྲགས་བྱུང་། བཅོམ་ལྡན་འདས་སྐུ་ངོ་མས་བྱིན་རླབས་གནང་བཞག་པའི་གནས་མཆོག་རྡོ་རྗེ་གདན་ལ་རྟེན་འབྲེལ་སྨོན་ལམ་འདོན་རྒྱུ་དེ། དངོས་གནས་དྲང་གནས་ཀྱིས། བསྟན་པ་རིན་ཆེན་མཆོག་གིས་མ་ཁྱབ པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག ། ཅེས་གསུངས་པ་ལྟར་དེང་སང་འཛམ་བུ་གླིང་ཧ་ཅང་འཁྲུག་པོ་ཞིག་དང་། དངོས་པོ་ཡར་རྒྱས་ཞེ་དྲགས་ཕྱིན་ཡོད་རེད་དེ། སེམས་འཁྲུག་པོ་དང་ཆགས་སྡང་ཞེ་དྲགས་ཡོད་པ་ཞིག་རེད། དེ་ལྟ་བུའི་དུས་སུ་སྟོན་པ་བཅོམ་ལྡན་འདས་ཀྱི་བྱམས་བརྩེ་དང་རྟེན་འབྱུང་གི་དེ་ཁོ་ན་ཉིད་ཅེས་པའི་བསླབ་བྱ་འདི་ཧ་ཅང་རྩ་ཆེན་པོ་རེད། དེ་རིང་འདིར་རྟེན་མཆོག་དྲུང་དུ་ངོས་ཀྱིས་སྨོན་ལམ་བརྒྱབ་པ་ཡིན། ཞེས་གསུངས་འདུག
༸མགོན་པོ་གང་ཉིད་མཆོག་གིས། བོད་ནང་གི་བོད་མི་རྣམས་ལུས་པོའི་ཆ་ནས་ང་ཚོ་དང་ཁ་ཁ་རེད། ཡིན་ནའང་ནང་བསམ་བློའི་ཆ་ནས་དད་པ་དང་ཞེན་ཁོག་གཅིག་གྱུར་ཆགས་ཀྱི་ཡོད་པ་རེད། ཧི་མ་ལ་ཡའི་རྒྱུད་ཀྱི་མི་མང་ཆ་ཚང་ཧ་ལས་པའི་དད་པ་དང་ཞེན་ཁོག་ཡོད་བསྡད་པ་ཞིག་རེད། ངོས་ཀྱིས་སྨོན་ལམ་རྒྱག་གི་ཡོད། ཁོ་རྣམ་པས། གངས་རི་ར་བས་བསྐོར་བའི་ཞིང་ཁམས་སུ།། ཞེས་པ་སོགས་ཀྱི་ཚིག་འདི་སེམས་ནང་གསལ་པོར་ཉར་སྡོད་ཀྱི་ཡོད་པ་རེད། ངོས་ཀྱིས་རྟག་པར་སྨོན་ལམ་རྒྱག་གི་ཡོད། ག་ལེར་ག་ལེར་བདེན་པའི་མཐའ་སེལ་ཡོང་རྒྱུ་ཞིག་ཏན་ཏན་ཡོང་གི་རེད། ཅེས་བཀའ་བསྩལ་འདུག
མཛད་འཆར་ལྟར་ན། ཟླ་འདིའི་ཕྱི་ཚེས་ ༢༩ ནས་ ༣༡ བར་ཉིན་གྲངས་གསུམ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་ཆོས་འབྲེལ་བཀའ་དྲིན་བསྐྱང་རྒྱུ་དང་། ཕྱི་ལོ་ ༢༠༢༣ ཟླ་ ༡ ཚེས་ ༡ ཉིན་དགེ་ལུགས་ཆོས་བརྒྱུད་འཛིན་པ་ཡོངས་ནས་ཇི་ལྟར་གསོལ་བ་བཏབ་པ་ལྟར་༸གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
