བོད་མི་ཞིག་གིས་རྒྱ་གཞུང་ལ་ངོ་རྒོལ་བྱས་ནས་རང་ཤི་བརྒྱབ།

མཚོ་སྔོན་ཞིང་ཆེན་སྐྱེ་རྒུ་མདོ་ཁུལ་ཆུ་དམར་ལེབ་རྫོང་ནས་བོད་མི་ཞིག་གིས་རྒྱ་ནག་གི་ཁྱིམ་སྡོད་བཀའ་རྒྱ་མ་བཟོད་པར་ངོ་རྒོལ་བྱས་ནས་རང་ཤི་བརྒྱབ།

ཕྱི་ཚེས་ ༨ ཉིན་མཚོ་སྔོན་ཞིང་ཆེན་སྐྱེ་རྒུ་མདོ་ཁུལ་ཆུ་དམར་ལེབ་རྫོང་ནས་ཡིན་པའི་རང་ལོ་ ༥༠ ཡིན་པའི་མིང་ལ་སྐར་རྣམ་ཞེས་པ་ཞིག་གིས། ས་གནས་སུ་ཁྱིམ་སྡོད་བཀའ་རྒྱ་བསྡམས་ཏེ་ཁྱིམ་མི་ཚོར་བཟའ་ཆས་མ་རག་པའི་དཀའ་ངལ་འཕྲད་དེ་ས་གནས་ཀྱི་མགོ་འཁྲིད་ཚོར་ཐེངས་མང་ཞུས་ཡོད་ཀྱང་། ཁ་ཡ་མ་བྱས་པར་བརྟེན། ཕྱི་ཟླ་ ༡༢ ཚེས་༨་ཉིན་གྱི་མཚན་དཀྱིལ་ཙམ་ལ་ཁོང་འུ་ཐུག་ཐབས་ཟད་ཀྱིས་ཆུ་དམར་ལེབ་རྫོང་རྩེད་ཐང་གི་གློག་སྒྲོན་ངོས་སུ་སྐེ་བཏགས་ནས་རང་ཤི་བརྒྱབ་ཡོད་འདུག

ཞོགས་པར་ཉེན་རྟོག་པས་ཤེས་རྟོགས་བྱུང་སྟེ་ཕུང་པོ་བཙན་འཁྱེར་བྱས་ནས་ཁྱིམ་མིར་སྤྲད་མེད་པ་མ་ཟད། ཁྱིམ་མི་ཚོར་མི་སུ་ལའང་སྐད་ཆ་སྣ་ཚོགས་བཤད་མི་ཆོག་པའི་བཀའ་རྒྱ་བཏང་ཡོད་པ་མ་ཟད། འགྲོ་འོང་ལ་དམ་དྲག་ཆེན་པོ་བྱས་ཏེ་དཀའ་ངལ་ཆེན་པོ་འཕྲད་བཞིན་ཡོད་འདུག

སྐར་རྣམ་ནི་ནམ་རྒྱུན་ནས་བཟོ་ལས་རིགས་ལ་ཧ་ཅང་མཁས་པ་མ་ཟད། དམིགས་བསལ་ཤིང་བཟོ་དང་ཚེམ་བཟོ་སོགས་ལ་བྱང་དུ་ཆུབ་པ་ཞིག་ཡིན་འདུག ད་དུང་ཁྱིམ་མཚེས་དང་ས་གནས་མི་མང་ལ་རོགས་རམ་མང་པོ་བྱས་ཡོད་འདུག  སྐར་རྣམ་ནི་ཆུ་དམར་ལེབ་རྫོང་རྫ་སྐྱ་སྡེ་བ་ནས་ཡིན་ཞིང་། ནམ་རྒྱུན་ཁོ་རང་གི་ལག་ཤེས་བཟོ་ལས་བརྟེན་ནས་ཁྱིམ་མིའི་འཚོ་བ་སྐྱེལ་བཞིན་ཡོད་པ་དང་། ཁོང་གི་བཟའ་ཟླ་རང་ལོ་ ༤༠ ཙམ་ཡིན་འདུག  ཁོང་གཉིས་ལ་རང་ལོ་ ༢༠  ཙམ་ཡིན་པའི་བུ་ཕྲུག་གཉིས་དང་། ལོ་ན་༨༠ ལྷག་ཡིན་པའི་ཨ་ཕ་ཞིག་ཀྱང་ཡོད་འདུག