ཉི་ཧོང་ནང་དུ་ཡོད་པའི་བོད་ཕྲུག་སློབ་གཉེར་བ་དང་ལས་ཀ་བྱེད་བཞིན་པའི་གཞོན་སྐྱེས་ཁག་ཅིག་ལ་རང་ཉིད་ཀྱི་ངོ་བོ་སྲུང་སྐྱོབ་དང་བོད་དོན་ཆེད་གདོང་ལེན་བྱེད་ཕྱོགས་སོགས་ཀྱི་སྐོར་ནས་ཟབ་སྦྱོང་ཞིག་གོ་སྒྲིག་གནང་ཡོད་འདུག
དེ་རིང་ཉི་ཧོང་གི་རྒྱལ་ས་ཊོག་ཡོ་རུ་རྟེན་གཞི་བྱས་ཡོད་པའི་བོད་ཀྱི་ཁང་པས་གོ་སྒྲིག་འོག བོད་ཁང་གི་ཚོགས་ཁང་ནང་དུ། ཉི་ཧོང་ནང་སློབ་གཉེར་བྱེད་བཞིན་པའི་བོད་པའི་སློབ་མ་དང་ལས་ཀ་བྱེད་མཁན་ན་གཞོན་ཁག་ཅིག་ལ་ཟབ་སྦྱོང་འཚོགས་ཡོད་པ་དང་། ཟབ་སྦྱོང་དེ་ནི་གཙོ་བོ་ཉི་ཧོང་ནང་ཡོད་པའི་བོད་པའི་གཞོན་སྐྱེས་རྣམས་ཀྱིས་རང་ཉིད་ཀྱི་ངོ་བོ་སྲུང་སྐྱོབ་དང་། བོད་དོན་ཆེད་གདོང་ལེན་བྱེད་ཕྱོགས་སོགས་ཡར་རྒྱས་སུ་གཏོང་བར་དམིགས་པ་ཞིག་ཡིན་འདུག
ཉི་ཧོང་སྐུ་ཚབ་དོན་གཅོད་ཨརྱཱ་ཚེ་དབང་རྒྱལ་པོ་ལགས་ཀྱིས། བོད་ནང་གི་བོད་མི་རྣམས་ཀྱི་མངོན་འདོད་དང་རེ་བ་ཡིད་ལ་དྲན་པའི་ཐོག་ནས་བོད་པའི་སློབ་མ་རྣམས་ཀྱིས་རླབས་ཆེན་གྱི་འོས་འགན་འཁུར་ནས་བོད་ནང་གི་དྲང་བདེན་དང་རང་དབང་བསྐྱར་གསོ་བྱ་དགོས་པ་དང་། ༧གོང་ས་མཆོག་ནས་གསོལ་རས་གནང་བའི་བོད་ཀྱི་དམངས་གཙོའི་གལ་གནད་དང་། དམངས་གཙོའི་ལས་དོན་ལག་བསྟར་བྱ་རྒྱུ་ནི་སྤྱི་ཚོགས་ཡར་རྒྱས་འགྲོ་བ་དང་བོད་དོན་འཐབ་རྩོད་དོན་འཁྱོལ་ཡོང་བར་ཕན་ཐོགས་ཆེ་སྐོར་གཏམ་བཤད་གནང་འདུག
ཟབ་སྦྱོང་ཐོག་ཨརྱ་ཚེ་དབང་རྒྱལ་པོ་ལགས་ཀྱིས་བརྩམས་པའི་འབྲུག་གི་དུག་རླངས་ལ་གདོང་གཏོད་པ།(Harnessing the Dragon’s Fume)་ཞེས་པའི་ནང་གི་བོད་ཀྱི་ཆབ་སྲིད་ཀྱི་ལོ་རྒྱུས་མདོར་བསྡུས་འགྲེལ་བརྗོད་གནང་ཡོད་པ་དང་། བོད་མི་ཚང་མས་བོད་ཀྱི་ལོ་རྒྱུས་ཤེས་རྟོགས་བྱ་རྒྱུ་ཧ་ཅང་གལ་འགངས་ཆེན་ཡིན་པ་དང་། རྒྱ་ནག་གིས་ག་དུས་ཡིན་ནའང་ལོ་རྒྱུས་ལ་འཁྱོག་བརྗོད་བྱེད་བྱེད་པར་གདོང་ལེན་ཇི་ལྟར་བྱེད་དགོས་པ་སོགས་ཀྱི་སྐོར་ལམ་སྟོན་གནང་ཡོད་འདུག་ལ། ཚོགས་བཅར་བ་རྣམས་ཀྱིས་ཕན་ཚུན་སློབ་སྦྱོང་དང་ལས་དོན་སོགས་ཀྱི་སྐོར་ངོ་སྤྲོད་བཅས་བྱས་ཡོད་འདུག
ཉི་ཧོང་ནི་བོད་དོན་ཐོག་རྒྱབ་སྐྱོར་གནང་མཁན་གཙོ་གྲས་ཤིག་ཆགས་ཡོད་པ་དང་། ཉེ་སྔོན་ཟླ་འདིའི་ཕྱི་ཚེས ༥ ཉིན་ཉི་ཧོང་གྲོས་ཚོགས་ཁང་དུ། ཉི་
སྤྱིར་ད་ལྟའི་ཆར་ཉི་ཧོང་ནང་བོད་ནས་ཐད་ཀར་ཡོང་བ་དང་། རྒྱ་གར་སོགས་ནས་ཕེབས་པའི་བོད་རིགས་སློབ་གཉེར་བ་དང་གཏན་སྡོད་བྱེད་མཁན་གང་འཚམ་ཡོད་འདུག་ལ། སྐུ་ཚབ་དོན་གཅོད་ཀྱི་ཁོངས་སུ་བོད་མི་གྲངས་ ༡༦༠ ལྷག་ཡོད་འདུག
གསར་འགོད་པ། བྱམས་པ་ཚེ་རིང་།
