གནས་མཆོག་རྡོ་རྗེ་གདན་གྱི་བྱང་ཆུབ་སེམས་འགྲེལ་གྱི་བཀའ་ཆོས་ཉིན་དང་པོར་༧གོང་ས་མཆོག་ནས་རང་དོན་དང་གཞན་དོན་གཉིས་ཀ་ཕན་ཚུན་འདྲེས་ནས་ཡོད་པ་དང་ཅི་ཙམ་གྱིས་གཞན་དོན་རྒྱ་ཆེ་ས་ནས་བསམ་བློ་གཏང་ན་རང་དོན་ཞོར་ལ་ཡོང་རྒྱུ་ཞིག་རེད་འདུག་ཅེས་གསུངས།
དེ་རིང་སྔ་དྲོའི་ཆུ་ཚོད་ ༨ པ་ཙམ་ལ་གནས་མཆོག་རྡོ་རྗེ་གདན་གྱི་གསུང་ཆོས་ར་བའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་རྒྱལ་ཁབ་ ༦༠་ལྷག་ནས་ཕེབས་པའི་དད་ལྡན་དོན་གཉེར་བ་རྣམས་པ་བྱང་ཆུབ་སེམས་འགྲེལ་སྐོར་གྱི་བཀའ་ཆོས་དབུ་འཛུགས་གནང་སོང་བ་དང་། བཀའ་ཆོས་ཀྱི་ཐོག་མར་༧གོང་ས་རྒྱལ་བ་རིན་པོ་ཆེ་མཆོག་གིས། བཅོམ་ལྡན་འདས་མངོན་པར་རྫོགས་པའི་སངས་རྒྱས་སའི་གནས་ཁྱད་པར་ཅན་དུ་ཀླུ་སྒྲུབ་ཡབ་སྲས་དང་ཐོགས་མེད་སྐུ་མཆེད་ཡབ་སྲས་ལ་སོགས་པ་ཚང་མས་ཞབས་བཅགས་ཡོད་པ་རེད། ཐུགས་སྨོན་རྒྱ་ཆེན་པོ་གནང་ཡོད་པའི་གནས་ཁྱད་པར་ཅན་ཞིག་ཆགས་ཀྱི་ཡོད་པ་རེད། དེ་བཞིན་འཛམ་བུ་གླིང་ཡོངས་གྲགས་ལའང་གནས་མཆོག་རྡོ་རྗེ་གདན་ཟེར་བ་དེ་ནང་པའི་གནས་ཐུན་མོང་མ་ཡིན་པ་ཞིག་ལ་བརྩི་ཡི་ཡོད་པ་རེད། དེ་རིང་ངོས་ཀྱིས་བྱང་ཆུབ་སེམས་དཔའི་སྡོམ་པ་གསུང་རྒྱུའི་འཆར་གཞི་ཡོད། ནང་པ་སངས་རྒྱས་པའི་གནས་ཀྱི་སྙིང་པོ་དེ་རྡོ་རྗེ་གདན་བརྩི་ཡི་ཡོད་པ་དང་། ཆོས་ཀྱི་སྙིང་པོ་དེ་བདེན་བཞི་མི་རྟག་སོགས་བཅུ་དྲུག་དང་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་སོགས་རྒྱ་ཆེན་པོ་ཡོད་རེད་དེ། སྙིང་པོ་དེ་སེམས་རྒྱུད་འདུལ་དགོས་པ་ནི་ཆོས་ཀྱི་སྙིང་པོ་དེ་རེད། བྱང་ཆུབ་སེམས་ཟེར་བ་དེ་དངོས་གནས་དྲང་གནས་ཀྱིས་སེམས་ཀྱི་གཏིང་ནས་གཞན་གཅེས་པར་འཛིན་རྒྱུ་ཞིག་ལ་ཟེར། དེ་ཡང་རང་ཟེར་ན་གཅིག་དང་གཞན་ཟེར་ན་མཐའ་ཡོད་མ་རེད། དེར་བརྟེན། མཐའ་ཡས་པའི་སེམས་ཅན་ཚོའི་དོན་དུ་སེམས་བཟང་པོ་ཞིག་སྐྱེས་པ་ཡིན་ན། རང་དོན་ཞོར་ལ་སྒྲུབ་སྡོད་པ་ཞིག་རེད། དེ་རིང་ང་ཚོས་འདིར་བྱང་ཆུབ་སེམས་དཔའི་སྡོམ་པ་གསུང་རྒྱུའི་ཆོས་འགྲེལ་སྤྱི་བཤད་ཀྱི་ཡོད། ངོས་རང་ལ་ཆ་བཞག་ནའང་ཉིན་རེ་བཞིན་དུ་ཞོགས་པར་ལངས་པ་དང་བྱང་ཆུབ་ཀྱི་སེམས་སྒོམ། དེ་ནས་བྱང་ཆུབ་ཕྱོགས་སུ་སེམས་བསྐྱེད་དེ། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི་ཟེར་བ་དེ་ཉིན་ལྟར་བསམ་བློ་གཏོང་གི་ཡོད། སེམས་བསྐྱེད་ཀྱི་བློ་ལ་བསམ་བློ་ཡག་པོ་གཏོང་དུས། ཞེ་སྡང་དང་ང་རྒྱལ་སོགས་ཀྱིས་སེམས་མ་སྐྱིད་པ་བཟོ་ཡི་ཡོད་པ་རེད། དེར་བརྟེན་སེམས་བསྐྱེད་ཟེར་བ་དེ་གཞན་དོན་ལ་གཙོ་བོ་བསམ་བློ་བཏང་སྟེ། ག་ལེ་ག་ལེར་བློ་སྒོམ་དུས་རང་བདེ་བར་ཐོབ་གཞན་གཅེས་པར་འཛིན་ཟེར་བ་དེ་བློ་སྦྱོང་རྒྱུ་རེད། དེ་ལྟར་བྱུང་ཚེ་དངོས་གནས་དྲང་གནས་ཀྱིས་མི་ཚེ་འདིའི་ནང་དུ་ཉིན་རེ་བཞིན་དུ་སེམས་ལ་ཞི་བདེ་ཡོང་རྒྱུ་དང་། རང་ལ་སྐྱོན་བརྗོད་བྱེད་མཁན་བྱུང་ནའང་། དེ་དག་ལ་ལྷག་པར་དུ་བྱམས་བརྩེ་བློ་བསྐྱེད་རྒྱུ་སོགས་སྤྱོད་འཇུག་ནས་གསུངས་པ་ལྟར་རེད། ཅེས་གསུངས།
ཡང་མགོན་པོ་གང་ཉིད་མཆོག་ནས་རང་དོན་དང་གཞན་དོན་གཉིས་ཀ་ཕན་ཚུན་འདྲེས་ནས་ཡོད་པ་རེད། ཅི་ཙམ་གྱིས་གཞན་དོན་རྒྱ་ཆེ་ས་ནས་བསམ་བློ་གཏང་ན། རང་དོན་ཞོར་ལ་ཡོང་རྒྱུ་ཞིག་རེད་འདུག ཅེས་དང་། གནས་ཁྱད་པར་ཅན་རྡོ་རྗེ་གདན་དུ་ངོས་རང་ལ་མཚོན་ནའང་བྱང་ཆུབ་ཀྱི་སེམས་སྒོམ་རྒྱུ་གཙོ་བོ་བྱེད་བཞིན་ཡོད། དེ་དང་འབྲེལ་ནས་སྟོང་ཉིད་ཀྱི་ལྟ་བ་རྟག་ཏུ་སྒོམ་བཞིན་ཡོད། དེ་སེམས་ལ་ཧ་ཅང་ཕན་གྱི་འདུག ཅེས་དང་། ཚེ་འདི་ཙམ་མིན་པར་ཚེ་རབས་ནས་ཚེ་རབས་སྐལ་པ་ནས་སྐལ་པ། གང་ལྟར་མཐའ་ཡས་པའི་སེམས་ཅན་ཐམས་ཅད་ཀྱི་ཆེད་དུ་གཞན་དོན་འབའ་ཞིག་བསྒྲུབ་བསམ་པ་ཞིག་སྙིང་ཁོངས་རུས་པའི་གཏིང་ནས་དམ་བཅའ་བརྟན་པོ་བཟུང་བ་དང་། ཉིན་རེའི་ལུས་ངག་ཡིད་གསུམ་གྱིས་སེམས་བསྐྱེད་བཟུང་ཡོང་དུས། དགེ་བ་རླབས་ཆེན་འཕར་འགྲོ་ཡི་ཡོད་པ་རེད། ཚང་མས་འདི་ལྟར་དགོངས་པ་བཞེས་དགོས་ཞེས་བཀའ་སློབ་བསྩལ།
ཡང་༧གོང་ས་མཆོག་ནས། ཁེ་ཉིན་ནང་པའི་ལྷ་ཁང་ཞིག་ཏུ་མདུན་ངོས་ཀྱི་རྩིག་པར་སྟོན་པ་བཅོམ་ལྡན་འདས་ཀྱི་འདྲ་པར་ཡོད་པ་ལ་བསམ་བློ་གཏོང་དུས་སྣང་བ་རྦད་དེ་འཁྲུལ་ནས་བཅོམ་ལྡན་འདས་ཀྱི་ངོས་རང་གི་མགོ་ལ་བྱིལ་བྱིལ་གནང་སྟེ་མཉེས་པོ་ཞེ་དྲགས་གནང་གི། བཅོམ་ལྡན་འདས་ཀྱི་མཐའ་སྐོར་ལ་བྱི་རིལ་ཁ་ཤས་འདུག དེའི་ནང་ནས་ངོས་ལ་ chocolate (ཅོག་ལེ་ཊི་)གཅིག་གསོལ་རས་གནང་བྱུང་། དེའི་སྣང་བ་གསལ་པོ་ཞེ་དྲགས་བྱུང་། བཅོམ་ལྡན་འདས་ཀྱི་རྗེས་འབྲང་རྣལ་མ་ཞིག་བྱས་ནས་སོ་སོས་ཉམས་ལེན་ཧུར་ཐག་བྱས་པ་ཡིན་ན། སྟོན་པའི་བྱིན་རླབས་འབྲལ་མེད་བྱས་ཏེ་ཡོང་བ་ཧ་ཅང་གསལ་པོ་རེད། དེ་རིང་འདིར་ཁྱོད་རང་ཚོར་ཞུ་རྒྱུ་ནི་ང་ཚོའི་དཔེ་ཆའི་ནང་དུ་ཡོད་པ་ལྟར་རེད་ཅེས་བཤད་པ་ཙམ་མ་ཡིན་པར། སོ་སོར་དངོས་གནས་ཚོར་བ་སོས་པ་བསླེབས་ཡོང་གི་འདུག ཅེས་དང་། ཚང་མས་སེམས་ཡག་པོ་བསྐྱེད་དེ། ཟབ་པ་དང་རྒྱ་ཆེ་བའི་ཆོས་འཁོར་ལ་བསམ་བློ་ཡག་པོ་བཏང་ནས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཉམས་ལེན་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།
གནས་མཆོག་རྡོ་རྗེ་གདན་ནས་གསར་འགོད་པ་བསྟན་འཛིན་ཕུར་བུས་སྤེལ།
