གནས་མཆོག་རྡོ་རྗེ་གདན་གྱི་ཉིན་གྲངས་གསུམ་རིང་གི་བཀའ་ཆོས་ལེགས་པར་གྲུབ།

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྒྲོལ་མ་ཉེར་གཅིག་གི་རྗེས་གནང་བཀའ་དྲིན་བསྩལ་བ་དང་བྱང་ཆུབ་ཀྱི་སེམས་ཉམས་ལེན་བྱེད་དུས་ལུས་བདེ་བ་དང་སེམས་སྐྱིད་པ། ད་དུང་ཚེ་རིང་པོ་ཡོང་བར་ཕན་ཐོགས་ཏན་ཏན་ཡོང་གི་ཡོད་པའི་སྐོར་གསུངས་སོང་།

༧གོང་ས་རྒྱལ་བ་རིན་པོ་ཆེ་མཆོག་གིས། བྱང་ཆུབ་ཀྱི་སེམས་གལ་ཆེ་ཤོས་རེད། རང་དོན་བསྒྲུབ་ནའང་བྱང་ཆུབ་ཀྱི་སེམས། གཞན་དོན་བསྒྲུབ་ནའང་བྱང་ཆུབ་ཀྱི་སེམས། འཕྲལ་དུ་བདེ་བའང་བྱང་ཆུབ་ཀྱི་སེམས། ཕུགས་ཐམས་ཅད་མཁྱེན་པའི་གོ་འཕང་མངོན་དུ་བྱ་རྒྱུ་དེའང་བྱང་ཆུབ་ཀྱི་སེམས། མདོར་ན་རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཞེས་པ་དེ་དངོས་གནས་དྲང་གནས་ཀྱིས་དོན་དང་ལྡན་པ་ཞིག་ཆགས་ཀྱི་ཡོད་པ་རེད། གང་ལྟར་ང་ཚོ་བོད་གངས་ཅན་གྱི་ཆོས་བརྒྱུད་མཁན་ཆེན་ཞི་བ་འཚོ་ནས་བྱང་ཆུབ་ཀྱི་སེམས་སོགས་ཉམས་ལེན་བྱ་རྒྱུ་དེ་ནན་ཏན་བྱས་ནས་གསུངས་འདུག ང་ཚོ་བོད་གངས་ཅན་གྱི་ལྗོངས་ཀྱི་ས་དགེ་བཀའ་རྙིང་རིས་སུ་མ་ཆད་པར་ཚང་མས་བྱང་ཆུབ་སེམས་ཀྱི་ཉམས་བཞེས་གནང་། བྱང་ཆུབ་ཀྱི་སེམས་ཉམས་ལེན་བྱེད་དུས་འཕྲལ་དུ་ལུས་བདེ་བ་དང་སེམས་སྐྱིད་པ། དེའི་སྒང་ནས་ཚེ་སྒྲུབ་ཀྱང་རེད་འདུག སེམས་ལ་དངོས་གནས་དྲང་གནས་ཀྱིས་ཞི་བདེ་ཡོང་བའི་སྐབས་སུ་ལུས་ཀྱི་འབྱུང་བ་དེ་དག་སྙོམས། དེ་ལ་བརྟེན་ནས་ལུས་བདེ་ཐང་དང་ཚེ་རིང་པོ་ཡོང་རྒྱུ་ལའང་ཕན་ཐོགས་ཡོད་པ་ཞིག་ཏན་ཏན་རེད་འདུག འཕྲལ་དུ་བྱང་ཆུབ་ཀྱི་སེམས་ལ་བསམ་བློ་གཏོང་ན་གཉིད་ཡག་པོ་ཁུག་ཐུབ་ཀྱི་ཡོད་པ་རེད། སེམས་ཁྲལ་དང་ཞེ་སྡང་སོགས་ཁྱོན་ནས་མེད་པར་སེམས་ལྷོད་ཤིག་གེར་བསྡད་ནས་ཉིན་བདེ་བ། མཚན་བདེ་བ། དེ་བཞིན་རང་དོན་བསྒྲུབ་རྒྱུ་དང་དེ་ལ་བརྟེན་ནས་གཞན་དོན་བསྒྲུབ་རྒྱུ་དེ་ལས་ལྷག་པ་མི་འདུག ཅེས་གསུངས་སོང་།

མུ་མཐུད་དུ་༧གོང་ས་མཆོག་ནས། བྱང་ཆུབ་ཀྱི་སེམས་ཟེར་བའི་དོན་དག་ཡག་པོ་ཤེས་པར་སྒྲིབ་པ་སྤངས་པའི་བྲལ་བའི་ཡོན་ཏན་དེར་བསམ་བློ་གཏང་དགོས་རེད། གནས་ལུགས་མཐོང་བའི་ཤེས་རབ་ཀྱིས་སྒྲིབ་བསྡད་ན་ཡིད་ལ་ཆུབ་ཐུབ་པ་ཞིག་ཡོད་མ་རེད། སྤྱིར་བཏང་བྱང་ཆུབ་སེམས་པར་འགྱུར་བའི་མདོ་སྡེ་པ་དང་སེམས་ཙམ་པ། དབུ་མ་པ་བཅས་ཡོད་པ་རེད། ཡིན་ནའང་། དབང་པོ་རྣོན་པོའི་དབང་དུ་བྱས་ནས་བྱང་ཆུབ་ཀྱི་སེམས་ཀྱི་ཉམས་ལེན་ཡག་པོ་ཡོང་བར་སྟོང་ཉིད་ཀྱི་ལྟ་བ་དེ་ཧ་ཅང་གལ་ཆེན་པོ་རེད་འདུག དེ་རིང་ང་ཚོ་གནས་ཁྱད་པར་ཅན་འདིར་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏང་རྒྱུ་ཧ་ཅང་གི་གལ་ཆེན་པོ་རེད། ད་ལྟ་སྐབས་སུ་བབས་པ་དེ་སྒྲོལ་མ་ཉེར་གཅིག་གི་རྗེས་གནང་བྱ་རྒྱུ་དེ་རེད། ཟུར་བཀོལ་ནང་ལའང་ཡོང་གི་འདུག་ལ་རིན་འབྱུང་ནང་ལའང་ཐོན་ཡོང་གི་འདུག ངོས་རང་གིས་ལྷ་ས་ནས་སྟག་བྲག་རིན་པོ་ཆེའི་སྐུ་མདུན་ནས་རིན་འབྱུང་བརྒྱ་རྩའི་ནང་གི་སྒྲོལ་མ་ཉེར་གཅིག་གི་རྗེས་གནང་ཞུས་པ་གསལ་པོ་དྲན་གྱི་འདུག བྱིན་རླབས་དང་དབང་ཡང་མང་པོ་ཞུས་ཡོད་པ་རེད། སྟག་བྲག་རིན་པོ་ཆེའི་སྐུ་མདུན་ནས་ངོས་ལ་དཔེ་ཆ་ཁྲིད་རྒྱུ་ཞེ་དྲགས་མེད་ནའང་། དབང་དང་བྱིན་རླབས་མང་པོ་ཞིག་ཐོབ་ཡོད་པ་རེད། ཟུར་ཁ་བརྒྱ་རྩ་འདི་ཟུར་འདོན་ལྟ་བུ་ཞིག་ཡོད་པར་བརྟེན། འདི་སྟག་བྲག་རིན་པོ་ཆེའི་སྐུ་མདུན་ནས་ཞུས་པ་ཞིག་དྲན་གྱི་མི་འདུག དེ་འདྲ་སོང་ཙང་རྒྱ་གར་ནང་བསླེབས་ནས་༧སྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་ནས་ཟུར་ཁ་བརྒྱ་རྩའི་བྱིན་རླབས་ཐོབ་ཡོད། ཅེས་གསུངས་ཏེ་སྒྲོལ་མ་ཉེར་གཅིག་གི་རྗེས་གནང་བསྩལ་ཏེ་ཐེངས་འདིའི་བཀའ་ཆོས་ལེགས་པར་གྲུབ་སོང་།

སང་ཉིན་གནས་མཆོག་རྡོ་རྗེ་གདན་དུ་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག་དགེ་ལྡན་པ་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད།

གསར་འགོད་པ་བསྟན་འཛིན་ཕུར་བུས་གནས་མཆོག་རྡོ་རྗེ་གདན་ནས་སྤེལ།