དུས་རབས་འདིའི་ནང་ལ་བཀྲ་ཤིས་པའི་ཉི་མ་ཤར་རྒྱུའི་མགོ་འཛུགས་ཀྱི་ཡོད་པར་སྣང་བས་དེ་གཞིར་བཟུང་ཚང་མས་ཐུགས་སྨོན་གནང་རོགས།

དེ་རིང་གནས་མཆོག་རྡོ་རྗེ་གདན་དུ་དགེ་ལུགས་ཀྱི་ཆོས་བརྒྱུད་འཛིན་པ་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་།

༧གོང་ས་རྒྱལ་བ་རིན་པོ་མཆོག་གིས། དེ་རིང་མ་འགྲིག་ལྷུན་འགྲུབ་རང་རེད་གདའ། ཕྱི་ལོའི་ལོ་གསར་ལོ་བརྒྱ་ཕྲག་གཅིག་མགོ་བཙུགས་པ་ཞིག་རེད། ཁྱེད་རང་ཚོས་གནས་ཁྱད་པར་ཅན་རྡོ་རྗེ་གདན་ལ་བརྟན་བཞུགས་གནང་བ་དང་། བརྟན་བཞུགས་གནང་མཁན་ཁྱེད་རང་ཚོ་སེར་འབྲས་དགའ་གསུམ་དང་། ས་སྐྱ། བཀའ་བརྒྱུད། རྙིང་མ་བཅས་རེད། དེ་དག་དངོས་གནས་དྲང་གནས་ཀྱིས་བོད་ཀྱི་བསྟན་པའི་འཁུར་བཞེས་མཁན་དེ་དག་དེ་རིང་འདིར་ཆེད་མངགས་ཕེབས་ཏེ་བརྟན་བཞུགས་གནང་གི་ཡོད་པ་རེད། རྟེན་འབྲེལ་མཐུ་བཙན་པོ་ཡིན་དུས་ཏན་ཏན་ནུས་པ་ཞིག་ཐོན་ཡོད་རེད། ང་རང་ལ་ཆ་བཞག་ནའང་ལོ་བརྒྱ་ཕྲག་གི་རིང་ལ་སོ་སོའི་ལུས་རྟེན་འདིའི་སྟེང་ནས། སྤྱིར་སངས་རྒྱས་ཀྱི་བསྟན་པ། ཡང་བསྒོས་བོད་གངས་ཅན་གྱི་བསྟན་པ་དང་འགྲོ་བའི་དོན་དེ་དག་གཞན་དོན་རྒྱ་ཆེན་པོ་བསྒྲུབ་ཐུབ་རྒྱུ་ཞིག་ངོས་རང་གིས་སྨོན་ལམ་བརྒྱབ་པ་དང་དམ་བཅའ་བཞག་གི་ཡོད། ཆེ་ས་ནས་བཤད་ན་ཇི་སྲིད་ནམ་མཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་པ་དེ་ངོས་ཀྱིས་རྟག་པར་སྨོན་ལམ་རྒྱག་གི་ཡོད། བྱེ་བྲག་ཏུ་བོད་གངས་ཅན་གྱི་ལྗོངས་ཀྱི་ད་ལྟའི་གནས་སྟངས་དཀའ་ངལ་ཞིག་གི་ནང་ལ་བསྡད་ཀྱི་ཡོད་པས། ཆོལ་ཁ་གསུམ་གྱི་བོད་རྒྱ་ཆེ་མི་མང་དང་། དེ་དང་ཆབས་ཅིག་ཧི་མ་ལ་ཡའི་རི་རྒྱུད་ཀྱི་བོད་ཀྱི་ཆོས་དང་རིག་གཞུང་གཅིག་གྱུར་ཡིན་པ་དེ་དག་ཚང་མས་སྙིང་ཁོངས་རུས་པའི་གཏིང་ནས་༧རྒྱལ་བ་རིན་པོ་ཆེ་སྐུ་ཚེ་ཡུན་དུ་བརྟན་པ་ཞིག་གི་ཐོག་ནས་བོད་གངས་ཅན་གྱི་བདེན་མཐའ་མྱུར་དུ་གསལ་རྒྱུ་ཞིག་ཚང་མས་སྙིང་ཁོངས་རུས་པའི་གཏིང་ནས་རེ་འདུན་དེ་འདྲ་འཆང་གི་ཡོད་པ་རེད། ཅེས་གསུངས་སོང་།

ཡང་༧གོང་ས་མཆོག་ནས། གནས་ཁྱད་པར་ཅན་འདིར་བོད་ཀྱི་རིས་སུ་མ་ཆད་པའི་ཆོས་བརྒྱུད་ཀྱི་བླ་ཆེན་རྣམ་པ་ཚོས་བརྟན་བཞུགས་གནང་གི་ཡོད་པ་རེད། བརྟན་བཞུགས་ཀྱི་ནུས་པ་ཏན་ཏན་ཡོང་གི་རེད། ངོས་རང་ཡང་སེམས་ཤུགས་སྐྱེད་བསྡད་ཀྱི་ཡོད། ཁ་སང་ཞུས་པ་རེད། ངོས་ཀྱི་རྨི་ལམ་ལ་ལོ་བརྒྱ་དང་བཅུ་གྲངས་ཤིག་བསྡད་རྒྱུའི་མཚན་མ་དེ་འདྲ་བརྟན་པོ་བྱུང་། ལས་དང་སྨོན་ལམ་གྱི་འབྲེལ་བ་ཤུགས་ཆེན་པོ་ཡོད་པ་ཡིན་དུས་ངོས་རང་གི་ཚེ་ལོ་བརྒྱ་དང་བཅུ་གྲངས་སྡོད་ཐུབ་རྒྱུའི་ཕྱི་ནང་གི་རྟེན་འབྲེལ་ཞིག་འཛོམས་བསྡད་པའི་ཟོལ་ཞིག་འདུག ངོས་ཀྱིས་སྨོན་ལམ་བརྒྱག ཁྱེད་རང་ཚོས་ཀྱང་དེ་དེ་བཞིན་དུ་སྨོན་ལམ་ཡག་པོ་ཞིག་རྒྱོབས། ཞེས་དང་། དེང་སང་འཛམ་བུ་གླིང་འདིའི་སྒང་ལ་ནང་པའི་ཆོས་ཀྱི་མཐོང་དེ་ཆེ་རུ་འགྲོ་ཡི་ཡོད་པ་རེད། ནུབ་ཕྱོགས་རྒྱལ་ཁབ་ལ་བར་སྐབས་ཤིག་ནས་ནང་པའི་ལྟ་གྲུབ་ལ་དོ་སྣང་སླེབས་པ་ཞིག་ཡོང་སྡོད་ཀྱི་ཡོད་པ་རེད། སྔ་མོ་ཡིན་ན་ནང་པའི་ཆོས་ (Buddhism) ལབ་དུས་ཨེ་ཤ་ཡ་རྐྱང་རྐྱང་གོ་བསྡད་ཀྱི་ཡོད་རེད། དེ་རིང་ཁ་སང་འཛམ་བུ་གླིང་ཀུན་ལ་ནང་པ་སངས་རྒྱས་པའི་ལྟ་གྲུབ་དང་སེམས་ཁམས་རིག་པ་དེ་ཚོའི་ཐོག་ལ་དམིགས་བསལ་གྱིས་དོ་སྣང་བྱས་ཤིང་། ཚན་རིག་པའང་མང་པོ་ཞིག་གིས་དོ་སྣང་བྱེད་ཀྱི་འདུག དེར་བརྟེན་ང་ཚོ་བོད་གངས་ཅན་པ་གཅིག་པོ་མ་རེད། ཐད་ཀར་རྒྱ་ནག་ལ་ཆ་བཞག་ན། སྔར་ནང་པའི་ལུང་པ་ཞིག་རེད། བར་སྐབས་ནང་པའི་ཆོས་ལ་རྡུང་རྡེག་དམིགས་བསལ་བཏང་ཡོད་རེད། དེང་སང་གཞི་ནས་རྒྱ་ནག་ནང་ལ་ནང་པའི་ཆོས་ལ་དོ་སྣང་གསར་པ་ཞིག་སླེབ་ཀྱི་ཡོད་པ་རེད། དེར་བརྟེན། དུས་རབས་ཉི་ཤུ་རྩ་གཅིག་པ་འདིའི་ནང་ལོགས་ལ་འགྱུར་བ་མང་པོ་ཞིག་ཏན་ཏན་ཡོང་ཐུབ་རྒྱུ་རེད་འདུག ངོས་རང་གི་ངོས་ནས་སེམས་ཤུགས་སྐྱེད་པ་དང་ལྷག་བསམ་རྒྱུན་དུ་བཅངས་ནས་སྡོད་ཀྱི་ཡོད། ད་དུང་ངོས་རང་ལ་ཆ་བཞག་ནའང་གཟུགས་པོ་བདེ་ཐག་ཆོད་ཡོད། ངོས་ཀྱིས་ལབ་ཆོག་ན་ཀླད་པའང་གྲུང་ཐག་ཆོད་ཡོད། དེར་བརྟེན་གཟུགས་པོ་བདེ་ཐང་དང་ཀླད་པ་གྲུང་པོ། ག་དུས་ཡིན་ནའང་འཛུམ་ཤིག་ཤིག་བྱས་ནས་སྡོད་ཀྱི་ཡོད། འདི་མུ་མཐུད་དུ་ལོ་བཅོ་ལྔ་ལྷག་ཅིག་ཏན་ཏན་བསྡད་ཀྱི་རེད། ཁྱེད་རང་ཚོ་ཚང་མའི་སེམས་སྤྲོ་སིང་ངེའི་ངང་ནས་སྙིང་སྟོབས་གོང་ནས་གོང་དུ་འཕེལ་བ་ཞིག་གནང་དགོས། ཞེས་གསུངས་སོང་།

བོད་ཀྱི་སངས་རྒྱས་པའི་ཆོས་དང་འབྲེལ་ཏེ་༧གོང་ས་མཆོག་ནས། བོད་གངས་ཅན་གྱི་ལྗོངས་ལ་མཁན་ཆེན་ཞི་བ་འཚོ་ནས་བྱུང་བསྡད་པའི་བོད་ཀྱི་སངས་རྒྱས་པའི་ཆོས་འདི་ན་ལེནྜའི་ཆོས་བརྒྱུད་དྲི་མ་མེད་པ་ཧ་ཅང་གིས་ཡག་པོ་རེད་འདུག དེང་སང་སེམས་ཁམས་རིག་པ་སྨྲ་མཁན་གྱིས་དོ་སྣང་གསར་པ་བྱ་རྒྱུ་ཞིག་ཆགས་ཀྱི་ཡོད་པ་རེད། དེར་བརྟེན། ང་ཚོ་བོད་རྒྱ་ཆེ་མི་མང་གཙོ་བོར་གྱུར་བའི་བོད་ཀྱི་ཆོས་དང་རིག་གཞུང་ལ་དམིགས་བསལ་གྱིས་དོ་སྣང་ཡོད་མཁན་ཚང་མས་སེམས་ཤུགས་སྒྲིལ་ནས་བསྟན་པ་རིང་དུ་གནས་རྒྱུར་ཚང་མས་སྨོན་ལམ་བརྒྱག་གི་ཡོད་རེད་ལ། དེ་འདྲའི་རེ་འདུན་ཞིག་ཡོད་པ་རེད། ངོས་ལ་ཆ་བཞག་ནའང་ད་ལྟ་བར་དུ་ཧུར་ཐག་བྱས་པ་ཡིན། འཛམ་བུ་གླིང་འདིའི་སྒང་ལ་ངོས་རང་གི་མིང་འདི་འཛམ་གླིང་གང་སར་ཏཱ་ལའི་བླ་མ་ལབ་དུས་རྒྱུས་ཡོད་པ་ཞིག་དང་། ངོས་རང་གི་བསམ་ཚུལ་ཇི་འདྲ་ཡོད་པ་དེ་དག་ཕལ་ཆེར་ག་ས་གང་ནས་ཤེས་བསྡད་པ་དང་དོ་སྣང་གསར་པ་བྱ་རྒྱུ་ཞིག་ཆགས་ཀྱི་ཡོད་པ་རེད། བོད་ཁ་བ་གངས་ཅན་གྱི་ལྗོངས་ལ་རྐྱེན་ངན་མང་པོ་ཞིག་བྱུང་ཡོད་པ་རེད་དེ། རྐྱེན་ངན་གྲོགས་སུ་ཤར་བ་ནང་བཞིན་འཛམ་བུ་གླིང་འདིའི་སྒང་ལ་བོད་ཀྱི་ཆོས་དང་རིག་གཞུང་ལབ་དུས་དོ་སྣང་གསར་པ་བྱ་རྒྱུ་ཞིག་སླེབ་ཀྱི་ཡོད་པ་རེད། ངོས་ནས་ཧུར་ཐུག་བྱེད་ཀྱི་རེད། ཁྱེད་རང་ཚོ་ཚང་མས་ཧུར་ཐག་གནང་ཤོག ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ལྟ་བ་ཉམས་བཞེས་གཟབ་གཟབ་བྱས་ནས་གནང་། སྤྱི་ཡོངས་ཀྱི་ཆ་ནས་བོད་ཀྱི་ཆོས་དང་རིག་གཞུང་དེ་འཛམ་བུ་གླིང་གི་གཅེས་ནོར་ཡིན་བསམ་པའི་ཐོག་ནས་ཉམས་པ་སོར་བཅུད་མི་ཉམས་གོང་སྤེལ་ཡོང་རྒྱུའི་ཐད་ཚང་མས་ཐུགས་འཁུར་སྐྱེད་རོགས་གནང་ཞུ་རྒྱུ་དང། དུས་རབས་འདིའི་ནང་ལ་བཀྲ་ཤིས་པའི་ཉི་མ་ཤར་རྒྱུ་ཞིག་མགོ་འཛུགས་ཀྱི་ཡོད་པ་ཞིག་ཕལ་ཆེར་ངོས་རང་གི་བློར་ཡོང་གི་འདུག་ལ། རྣམ་པ་ཚོའི་ཐུགས་ལའང་དེ་འདྲ་འཆར་གྱི་རེད་ལ། དེ་དོན་གཞིར་བཟུང་གིས་ཐུགས་སྨོན་མཚམས་སྦྱོར་གནང་རོགས་གནང་ཞུ་རྒྱུ་ཡིན། ཞེས་སོགས་གསུངས་སོང་།

གནས་མཆོག་རྡོ་རྗེ་གདན་ནས་གསར་འགོད་པ་བསྟན་འཛིན་ཕུར་བུས་སྤེལ།