འཛམ་གླིང་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་ཀྱི་སྐར་ཆེན་དེ་སུ་ཡིན་ནམ།

གསར་འགོད་པ། དཔལ་ལྡན།

ཕྱི་ལོ ༢༠༢༢ ལོའི་ཟླ ༡༢ ཚེས ༡༨ ཉིན་གྱི་དགོང་མོར་དཀྱིལ་ཤར་ཨེ་ཤ་ཡའི་ཁཱ་ཊར་རྒྱལ་ཁབ་ཏུ་བསྡུས་པའི་རྒྱལ་སྤྱིའི་རྐང་སྤོལ་འགྲན་ཚོགས་ཀྱི་རྟིང་རྩོད་འགྲན་སྡུར་ཁྲོད། ལྷོ་ཨ་མེ་རི་ཁའི་རྒྱལ་ཁབ་ཨར་ཇིན་ཊི་ན་རྩེད་འགྲན་ལས་རྣམ་པར་རྒྱལ་ཏེ་རྒྱལ་སྤྱིའི་རྐང་སྤོལ་གྱི་གསེར་བུམ་ཐེངས་གསུམ་པ་དེ་བཀྱགས་ཡོད་པ་རེད། དེ་ནི་རྩེད་འགྲན་པ་མེ་སི་ཡིས་བླངས་པའི་གཡུར་དུ་ཟ་བའི་གྲུབ་འབྲས་ཆེ་ཤོས་ཤིག་ཏུ་བརྩིས་ཡོད་ལ། རྒྱལ་སྤྱིའི་རྐང་སྤོལ་རྩེད་འགྲན་གྱི་གར་སྟེགས་ཆེ་འབྲིང་ཆུང་གསུམ་དུའང་མེ་སེ་ནི་དུས་རབས་འདིའི་ཆེས་གཟེངས་སུ་ཐོན་པའི་ཕུལ་བྱུང་རྩེད་འགྲན་པ་དེ་ཡིན་པའི་གླེང་སློང་སྔར་ལས་ཤུགས་ཆེ་རུ་ཕྱིན།

མེ་སི་ཡི་བྱིས་དུས། 

ད་ལྟ་རང་ལོ་ ༣༥ ཡིན་པའི་ལི་ནོལ་མེ་སི་ (Lionel Andrés Messi) ནི་ཕྱི་ལོ ༡༩༨༧ ཟླ ༦ ཚེས ༢༤ ཉིན་ཕ་ཇོར་ཇི་མེ་སི་( Jorge messi) དང་མ་སི་ལ་ཡོ་( Celia Cuccittini) གཉིས་ཀྱི་བུ་རུ་ཨར་ཇིན་ཊི་ནའི་རོ་སི་རོ་ཡ་(Rosario) གྲོང་ཁྱེར་དུ་སྐྱེས་ཤིང་། ཁོང་གཉིས་ལ་ཕྲུ་གུ་བཞི་ཡོད་པ་ལས། མེ་སི་ནི་ཕྲུ་གུ་གསུམ་པ་དེ་ཡིན་འདུག ཁོང་གི་ནང་མི་ཚང་མ་རྐང་སྤོལ་ལ་དོ་དབྱིངས་ཡོད་མཁན་ཤ་སྟག་ཡིན་སྟབས། མེ་སི་ཕྲུ་གུའི་དུས་ནས་རྐང་སྤོལ་ལ་འཐམ་འཁྱུད་བྱས་ཏེ་དུས་འདའ་བར་བྱས་ཤིང་། རང་ལོ་བཞི་ཡི་ཐོག་ཁོང་གྷན་ཌོ་ལི་ (Grandoli) ཞེས་པའི་བྱིས་པའི་རུ་ཁག་ཅིག་ཏུ་མཉམ་ཞུགས་བྱས་ཡོད་འདུག་ལ། རུ་ཁག་དེའི་རྩེད་རིགས་ལམ་སྟོན་དང་སྣེ་ཁྲིད་པ་ནི་ཁོང་གི་ཨ་ཕ་ཡིན་འདུག  ཁོང་གིས་རུ་ཁག་དེ་ནས་རྐང་སྤོལ་གྱི་རྒྱུན་ཤེས་སྐོར་ལ་སློབ་སྦྱོང་བྱས་ཡོད་པ་དང་། དེ་ནས་རང་ལོ་དྲུག་གི་ཐོག་རོ་སི་ཡོ་རུ་ཁག (Rosario club ) ཏུ་ཞུགས། སྐབས་དེར་ལོ་ན་དྲུག་ལ་སོན་པའི་བྱིས་པ་རྣམས་ཀྱི་ཁྲོད་ནས་ཆེས་ཕུལ་བྱུང་གི་རྩེད་འགྲན་པ་ཞིག་ཏུ་གྱུར། འོན་ཀྱང་། མི་ཚེ་ནི་སྐྱིད་སྡུག་འདྲེས་མའི་དངོས་བྲིས་འཁྲབ་གཞུང་རིང་མོ་ཞིག་ཡིན་པས། མེ་སི་རང་ལོ ༡༠ ལ་སོན་སྐབས་སྐྱེས་འཕེལ་ ( Growth hormone ) ནུས་པ་ཧ་ཅང་ཆུང་བའི་ན་ཚ་ཞིག་ཡོད་པ་ཤེས་རྟོགས་བྱུང་། སྐབས་དེར་ཕ་མ་གཉིས་དང་རེ་བའི་མིག་འབྲས་ཁོང་ལ་གཏད་པའི་རུ་ཁག་མང་པོ་ཞིག་གི་མགོར་གནམ་ལྕགས་ཐོག་གིས་བརྒྱབ་པ་བཞིན་ཅི་བྱ་གཏོལ་མེད་དུ་གྱུར། ཡིན་ནའང་།  ཁོང་གི་ཕ་མ་གཉིས་ཀྱིས་རང་གི་བུ་ཆུང་གི་མ་འོངས་པའི་ཕུགས་འདུན་ཁོ་ནར་བསྙེགས་ཏེ། ཁོང་ལ་མ་མཐར་ཟླ་བ་གཅིག་གི་རིང་ལ་ཨ་སྒོར་ ༡༠༠༠ ལྷག་བཏང་ནས་སྨན་བཅོས་བྱས་ཡོད་ལ། གཞུང་སྒེར་མང་པོ་ཞིག་གིས་ཀྱང་ཁོང་ལ་རོགས་འདེགས་བྱས་ཡོད་ཀྱང་། ཕན་འབྲས་དམིགས་བསལ་ཞིག་གཏན་ནས་མ་བྱུང་། ཡིན་ནའང་། ཁོང་གིས་མུ་མཐུད་ནས་རྐང་རྩེད་སྤོ་ལོའི་ཆེད་མཁས་པ་ཞིག་ཏུ་འགྱུར་བའི་རྨི་ལམ་གཏན་ནས་མ་དོར་བར་འབད་འབུངས་ཁྲི་མ་འབུམ་བྱས་མཐར། ཕྱི་ལོ ༢༠༠༠ ལོའི་ཟླ ༡༢ ནང་སི་པེན་ནང་ཆེས་སྐད་གྲགས་ཆེ་བའི་བྷར་སི་ལོ་ན( Barcelona) རུ་ཁག་གི་ན་གཞོན་སློབ་གྲྭར་འདེམས་ཐོན་བྱུང་། ཁོང་གིས་བྷར་སི་ལོ་ནའི་ན་གཞོན་རུ་ཁག་དང་། རུ་ཁག་གཉིས་པའི་ནང་རྩེད་འགྲན་བྱས་པ་ལས། རྩེད་འགྲན་རུ་ཁག་དང་པོའི་ནང་བདམས་མེད་པ་རེད། གང་ལྟར་ཁོང་རྐང་སྤོལ་གྱི་ཆེད་ལས་ལམ་བུར་དེ་ལྟར་ཞུགས།

ཆེད་ལས་ཀྱི་ལམ་བུ་དང་གྲུབ་འབྲས།

མེ་སི་རང་ལོ་བཅོ་བརྒྱད་ཀྱི་ཐོག་བྷར་སི་ལོ་ནའི་རུ་ཁག་དང་པོར་བདམས་ནས། ཁོང་གིས་ཕྱི་ལོ ༢༠༠༥ ནས་ ༢༠༢༡ བར་མི་ལོ་ ༡༦ ལྷག་གི་རིང་བྷར་སི་ལོ་ནའི་རྩེད་འགྲན་རུ་ཁག་དང་པོའི་ནང་རྩེད་འགྲན་བྱས། མི་ལོ་དེ་དག་གི་རིང་ལ་ཁོང་གིས། སི་པེན་རྒྱལ་ཁབ་ཀྱི་རྐང་སྤོལ་རྩེད་འགྲན་ལ་ལི་གྷ་( laliga ) ཐེངས་བཅུ་བཀྱགས་ཡོད་པ་དང་། ཡུ་རོབ་ནང་ཆེས་སྐད་གྲགས་ཆེ་བའི་ཆེམ་བྷེན་སི་ལིག (Champions League) ཐེངས་བཞི་བཀྱགས་ཡོད་འདུག་ལ། ཕྱི་ལོ ༢༠༠༩ ལོར་བྷར་སི་ལོ་ནས་ཡུ་རོབ་ནང་གི་རྩེད་འགྲན་ཚང་མ་ལས་རྣམ་པར་རྒྱལ་ཏེ། ཡུ་རོབ་ནང་གི་རུ་ཁག་རྩེ་ཕུད་དུ་གྱུར་ཡོད་ཅིང་། སྐབས་དེར་མེ་སི་ཡིས་རྒྱལ་སྤྱིའི་རྐང་རྩེད་སྤོ་ལོའི་གསེར་གྱི་སྤོ་ལོ་( Ballon D’or) ཆེས་ཐོག་མ་དེ་བཀྱགས་ཡོད་པ་མ་ཟད། ལོ་དེར་ཁོང་ལ་རྒྱལ་སྤྱིའི་ཧྥི་ཧྥའི་ལོ་གཅིག་གི་ཕུལ་བྱུང་རྩེད་འགྲན་པའི་(FiFa world player of the  year award) ཆེས་མཐོའི་གཟེངས་རྟགས་ཀྱང་ཐོབ། ཕྱི་ལོ ༢༠༡༢ ལོར་མེ་སི་ཡིས་ལ་ལི་གྷའི་རྩེད་འགྲན་གཅིག་པུར་སྤོ་ལོ་ ༥༠ བླུགས་ཏེ། ལོ་དེའི་སྤོ་ལོ་མང་ཤོས་བླུག་མཁན་གྱི་མི་སྣར་བདམས་ནས་གསེར་ལྷམ་ ( golden shoe) ཐོབ་ཡོད་འདུག་ལ། ད་བར་ཁོང་གིས་ཡུ་རོབ་ཀྱི་གསེར་ལྷམ་ཐེངས་ ༥ དང་། རྒྱལ་སྤྱི་རིམ་པའི་གསེར་གྱི་སྤོ་ལོ་( Ballon D’or) ཐེངས་དྲུག་བཀྱགས་འདུག་པས། མེ་སི་ལགས་ནི་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་རྒྱལ་སྤྱིའི་གསེར་གྱི་སྤོ་ལོ་ཐོབ་མཁན་ཆེས་མང་ཤོས་ཀྱི་རྩེད་འགྲན་པ་དེ་ཡིན་འདུག

ཕྱི་ལོ ༢༠༢༡ ལོར་ཏོག་དབྱིབས་རིམས་ནད་ཀྱི་རྐྱེན་གྱིས་བྷར་སི་ལོ་ནའི་རུ་ཁག་གི་དཔལ་འབྱོར་ལ་གོད་ཆག་ཆེན་པོ་བྱུང་ནས། མེ་སི་ཧྥ་རན་སིའི་ཕི་ཨེ་སི་ཇུ( PSG) རུ་ཁག་ཏུ་མ་འགྲོ་ཐབས་མེད་དུ་གྱུར་སྟབས། ཕྱི་ལོ ༢༠༢༡ ཟླ ༨ ཚེས ༨ ཀྱི་ཉིན་མོར་ཁོང་གིས་རྩེད་འགྲན་པ་རྣམས་ལ་བདེ་མོ་བཞག་པའི་གསར་འགོད་གསལ་བསྒྲགས་ཤིག་གི་སྟེང་། དྲང་མོ་བཤད་ན་རུ་ཁག་མང་པོ་ཞིག་གིས་ང་དང་གན་རྒྱ་འཇོག་འདོད་ཡོད་ཀྱང་། ངས་མོས་མཐུན་བྱས་མེད།  འོན་ཀྱང་། ད་ལྟ་ང་ཚོའི་བར་བསྐྱར་དུ་གླེང་སློང་བྱེད་མུས་ཡིན། ངས་རང་གི་རུ་ཁག་དང་རྩེད་འགྲན་པ་རྣམས་ལ་བདེ་མོ་འཇོག་དགོས་སྣང་ཞིག་དྲན་མ་མྱོང་ལ། རྩེད་འགྲན་ཐང་ཆེན་གྱི་ཀི་སྒྲ་དང་ཆེས་མཐའ་མཇུག་གི་རྩེད་འགྲན་དུ་ཞུགས་འདོད་པ་ལས། འདི་ལྟར་བྱུང་བ་ཞིག་སེམས་སུ་གཏན་ནས་འཁོར་མ་མྱོང་། ངས་རིམས་ནད་སྐབས་ཀྱི་ཀི་སྒྲ་དང་མི་ཚོགས་མེད་པའི་རྩེད་འགྲན་དག་དྲན་ལ། ངས་ཀི་སྒྲ་དང་བྷར་སི་ལོ་ནའི་རྒྱབ་སྐྱོར་བས་ཁེངས་པའི་རྩེད་ཐང་ནས་ཚང་མར་བདེ་མོ་འཇོག་འདོད་ཀྱང་། ངས་འདི་ལྟར་ཚང་མར་བདེ་མོ་འཇོག་དགོས་བྱུང་བ་ནི་ཆེས་སྐྱི་གཡའ་བ་དང་། ཞེ་སེམས་སྨྲེང་བ་ཞིག་རེད་ཅེས་བརྗོད་མཐར། ཨུ་ཚུགས་ཀྱིས་བསྲན་ཡང་འགོག་ཐབས་བྲལ་བའི་མིག་ཆུ་ཡང་ཡང་འཐོར་བས། ཁོང་གི་རུ་ཁག་གི་རྩེད་འགྲན་པ་དག་ཡིད་སེམས་སྨྲེང་ཞིང་མིག་མཐའ་མཆི་ཞགས་ཀྱིས་ཁེངས་ཀྱང་། མེ་སི་ལ་ཆེས་མཐའ་མཇུག་གི་བདེ་མོ་གཞག་རྒྱུ་ལས་ཐབས་གང་ཡང་མ་རྙེད། དེ་ནི་ཁོང་མི་ལོ་ ༡༦ རྗེས་སུ་རང་གི་གཞིས་ཁྱིམ་དུ་འབོད་པའི་དྲོད་ལམ་ལམ་གྱི་གནས་མལ་ཞིག་ནས་ས་མཐར་ཆས་པ་དང་གཉིས་སུ་མ་མཆིས།

བརྩེ་དུང་གི་གཏམ་རྒྱུད། 

མེ་སི་དང་ཁོང་གི་ཆུང་མ་ཨེན་ཐོ་ནི་ལ་ (Antonela Roccuzzo) གཉིས་ནི་ཆུང་བྱིས་པའི་དུས་ནས་ངོ་ཤེས་ཤིང་། སྐབས་དེར་མེ་སི་དང་ཁོའི་གྲོགས་པོ་ལུ་ཁ་སི (Lucas) གཉིས་ཀྱིས་ (Newell’s Old Boy) བྱིས་པའི་རུ་ཁག་ཏུ་རྐང་སྤོལ་རྩེ་ཡི་ཡོད། ཁོ་མོ་ནི་ལུ་ཁ་སི་ཡི་སྲིང་མོ་ཡིན་པས། དབྱར་དུས་ཀྱི་ཉིན་ཞིག་མེ་སི་གྲོགས་པོ་ལུ་ཁ་སི་ཡི་ནང་མི་དང་ལྷན་གླིང་ག་གཏོང་བར་ཕྱིན། སྐབས་དེར་མེ་སི་དང་ཁོ་མོ་མཐུན་པོར་གྱུར་ནས་ཆེས་དྭངས་གཙང་གི་བྱིས་པའི་བརྩེ་འདང་ཞིག་ལྷུན་གྱིས་ཆགས། དེ་དུས་མེ་སི་ལོ་དགུ་ཡིན་པ་རེད། དུས་དེ་ནས་བཟུང་ཁོང་གཉིས་ནི་སྐྱིད་སྡུག་གི་ཁུར་བོ་མཉམ་དུ་ཁུར་བའི་རྩེད་གྲོགས་ཞིག་ཏུའང་གྱུར་ཏེ། ཉིན་ལྟར་སྲང་ལམ་དང་གླིང་ག་སོགས་སུ་རྩེད་འཇོར་རོལ། མེ་སི་རང་ལོ ༡༡ ཙམ་ལ་སི་པེན་དུ་གནས་སྤོར་བྱས། དེར་སྨན་བཅོས་དང་བྷར་སི་ལོ་ནའི་ཟུར་སྦྱོང་སོགས་སུ་ཚུད་ཀྱང་། ཁོང་གི་དགའ་མ་ཨེན་ཐོ་ནི་ལ་ཨར་ཇིན་ཊི་ནར་ལུས།

ཕྱི་ལོ་ ༢༠༠༥ ལོར་ཨེན་ཐོ་ནི་ལ་ཡིས་སྨན་གྱི་སློབ་སྦྱོང་བྱེད་བཞིན་པའི་སྐབས་སུ། ཁོང་མོའི་གྲོགས་མོར་འགྲིམ་འགྲུལ་དོན་རྐྱེན་བྱུང་ནས་འདས་གྲོངས་སུ་གྱུར་བས། མོའི་ལུས་སེམས་གཉིས་ལ་དཀའ་ངལ་ཤུགས་ཆེན་འཕྲད་པར་བརྟེན། མེ་སི་སི་པེན་ནས་ཐད་ཀར་ཨར་ཇིན་ཊི་ནར་ཕྱིན་ནས་རང་གི་ཆེས་བློར་བབ་པའི་མི་མོ་དེར་སླར་ཡང་ཐུག དེ་ནས་ཁོང་མོའི་རང་གི་ཕ་ཡུལ་དང་། སློབ་སྦྱོང་། ཕ་མ་སོགས་རྒྱབ་ལ་བསྐྱུར་ནས་མེ་སི་དང་ལྷན་དུ་སི་པེན་དུ་ཕྱིན་ནས་སྐྱིད་སྡུག་འདྲེས་མའི་འཚོ་བ་གསར་པ་ཞིག་གི་སྣེ་མོར་འཇུས། ཕྱི་ལོ ༢༠༡༢ ཟླ ༡༡ ཚེས ༢ ཉིན་ཁོང་གཉིས་ལ་མཐའ་ཡས་གྷོ་མེ་སི་ (Thiago messi)  ཞེས་པའི་བུ་ཞིག་སྐྱེས། ད་ལྟ་རང་ལོ་ ༣༤ ཡིན་པའི་ཨེན་ཐོ་ནི་ལ་དང་མེ་སི་གཉིས་ལ་རང་ལོ་བཅུ་ཡིན་པའི་བུ་མཐའ་ཡས་སྒོ་མེ་སི་དང་། རང་ལོ་བདུན་ཡིན་པའི་མཱ་ཊོ་ཡི་མེ་སི་(Mateo Messi) རང་ལོ་བཞི་ཡིན་པའི་སི་རོ་མེ་སི་(Ciro messi) བཅས་བུ་གསུམ་ཡོད་འདུག་ཀྱང་། ཁོང་གཉིས་དངོས་སུ་གཉེན་སྒྲིག་བྱས་ནས་མི་ལོ ༧ ལས་འགོར་མེད་པ་རེད།

རྒྱལ་སྤྱི་རིམ་པའི་རྩེད་འགྲན་དང་གྲུབ་འབྲས།

ཕྱི་ལོ ༢༠༠༣ ཙམ་ནས་ཁོ་ཨར་ཇིན་ཊི་ན་(Argentine) ཡི་ལོ་བཅུ་བདུན་མན་གྱི་རྐང་སྤོལ་རུ་ཁག་ཏུ་བདམས་ནས་རྩེད་འགྲན་མང་པོའི་ནང་ཞུགས།  ཕྱི་ལོ ༢༠༠༥ ལོར་རྒྱལ་སྤྱི་རིམ་པའི་ལོ་བཅུ་དགུ་མན་གྱི་བུའི་རྩེད་འགྲན་རིམ་པར་གྲུབ་འབྲས་མི་དམན་པ་ཞིག་བླངས།  ཕྱི་ལོ ༢༠༠༧ ལོར་ཁོ་པ་ཨ་མེ་རི་ཁ་ (Copa America) ཡི་རྩེད་འགྲན་གྱི་རྟིང་རྩོད་འགྲན་སྡུར་དུ་ཚུད་ཡོད་ཀྱང་། མཐའ་མའི་རྟིང་རྩོད་སྐབས་བྷར་ཛིལ་གྱིས་སྤོ་ལོ་གསུམ་བླུགས་ནས་རྒྱལ་ཁ་བླངས། ཕྱི་ལོ ༢༠༠༨ ལོར་རྒྱ་ནག་རྒྱལ་ས་པེ་ཅིན་དུ་འཚོགས་པའི་རྒྱལ་སྤྱིའི་ཨོ་ལིམ་ཕིག་གི་རྩེད་འགྲན་ཐོག་མེ་སི་ཡིས་སྣེ་ཁྲིད་པའི་ཨར་ཇིན་ཊི་ནའི་རུ་ཁག་གིས་རྩེད་འགྲན་དུ་མ་ལས་རྒྱལ་ཁ་བླངས་ནས་མཐའ་མའི་རྟིང་རྩོད་འགྲན་སྡུར་དུ་ཚུད་ཡོད་ཅིང་། མཐའ་མའི་རྟིང་རྩོད་ཀྱི་འགྲན་སྡུར་དེ་ཨ་ཧྥི་རི་ཁའི་ན་ཇི་རི་ཡ་(Nigeria) དང་ཨར་ཇིན་ཊི་ནའི་བར་རྩེད་འགྲན་བྱས་མཐར། ཨར་ཇིན་ཊི་ནས་སྤོ་ལོ་གཅིག་བླུགས་ནས་རྣམ་པར་རྒྱལ་ཏེ་ཨོ་ལིམ་ཕིག་གི་གསེར་གྱི་རྟགས་མ་བླངས་ཡོད་ལ། མེ་སི་ལ་ཕུལ་བྱུང་རྩེད་འགྲན་པའི་བྱ་དགའ་དེའང་ཐོབ་འདུག ཕྱི་ལོ ༢༠༡༤ ལོར་ཨར་ཇིན་ཊི་ནའི་རུ་ཁག་རྒྱལ་སྤྱིའི་གསེར་བུམ་རྟགས་མའི་འགྲན་སྡུར་གྱི་རྟིང་རྩོད་དུ་ཚུད་དེ་ཕམ་ཉེས་བྱུང་ཡང་། མེ་སི་ལ་རྩེད་འགྲན་པ་ཆེས་ཡག་ཤོས་ཀྱི་བྱ་དགའ་ཐོབ། ཕྱི་ལོ ༢༠༡༦ ལོའི་ཁོ་པ་ཨ་མེ་རི་ཁའི་རྟིང་རྩོད་འགྲན་སྡུར་སྟེང་། མེ་སི་ཡིས་མཐའ་མའི་མདུན་བཀག་མེད་པའི་རྡོག་རྡེག་ (Penalty) གཞུ་སྐབས། སྤོ་ལོ་སྒོ་རའི་ཕྱི་རོལ་དུ་གཡུགས་ནས་ཅི་ལི་སྤྱི་མཐུན་རྒྱལ་ཁབ་ལ་རྒྱལ་ཁ་ཐོབ། དེ་བཞིན་ཕྱི་ལོ ༢༠༡༨ ལོའི་ཨུ་རུ་སུར་འཚོགས་པའི་རྒྱལ་སྤྱིའི་གསེར་བུམ་རྟགས་མའི་འགྲན་ཚོགས་དང་ཁོ་པ་ཨ་མེ་རི་ཁ་གཉིས་ལ་གྲུབ་འབྲས་དམིགས་བསལ་བླངས་ཐུབ་མེད། མེ་སི་ལ་ཁོ་པ་ཨ་མེ་རི་ཁ་དང་རྒྱལ་སྤྱིའི་གསེར་བུམ་རྟགས་མའི་རྩེད་འགྲན་གཉིས་ལ་རྒྱལ་ཁ་ཐོབ་མེད་པ་མ་གཏོགས། དེ་ལས་གཞན་པའི་རྩེད་འགྲན་གྲགས་ཆེ་བ་ཕལ་མོ་ཆེ་ལས་རྣམ་པར་རྒྱལ་ཟིན་པས། ཁོས་རྩེད་འགྲན་དེ་གཉིས་ལས་རྣམ་པར་རྒྱལ་རྒྱུ་ནི་ཆེས་མཐའ་མཇུག་གི་རེ་བ་ཁོ་ན་ཡིན།

མེ་སི་ཡི་རྨི་ལམ་མངོན་གྱུར།

ཕྱི་ལོ  ༢༠༢༡ ལོར་ཨ་མེ་རི་ཁའི་གླིང་ཕྲན་རྒྱལ་ཁབ་ཁག་གི་ཆེས་མཐོ་བའི་ཁོ་པ་ཨ་མེ་རི་ཁའི་རྩེད་འགྲན་ཁྲོད། མེ་སི་ཡིས་ཨར་ཇིན་ཊི་ནའི་རུ་དཔོན་གྱི་དཔུང་རྟགས་བཏགས་ནས་རྩེད་འགྲན་རིམ་པའི་བཞུད་ལམ་དུ་ཆས་མཐར། ཨར་ཇིན་ཊི་ན་དང་བྷར་ཛིལ་གཉིས་ཀྱིས་མཐའ་མའི་རྩེད་འགྲན་གྱི་རྒྱལ་ཕམ་བརྩད་དེ། ཨར་ཇིན་ཊི་ནར་སྤོ་ལོ་གཅིག་གིས་རྒྱལ་ཁ་ཐོབ་ཅིང་། དེ་ནི་མེ་སི་ཡི་ཆེས་མཐའ་མཇུག་གི་རྨི་ལམ་གཅིག་མངོན་གྱུར་བྱུང་བ་རེད།  ཕྱི་ལོ ༢༠༢༢ ལོའི་ཁཱ་ཊར་དུ་འཚོགས་པའི་རྒྱལ་སྤྱིའི་གསེར་བུམ་རྟགས་མའི་རྐང་སྤོལ་འགྲན་ཚོགས་སྟེང་། རྩེད་རིགས་དབྱེ་ཞིབ་པ་མང་པོ་ཞིག་གིས། ཐོག་མའི་རྩེད་འགྲན་གྱི་རིམ་པ་དང་།   རྩེད་འགྲན་པ་རྣམས་ཀྱི་ནུས་རྩལ་དང་དྲག་འདེམས་ཀྱི་རིམ་པ། རུ་ཁག་གི་སྤྱི་ཡོངས་ཀྱི་རྩེད་འགྲན་པ་རྣམས་ལ་གཞིགས་ནས།  འདས་ལོའི་རྒྱལ་སྤྱིའི་ཧྥི་ཧྥ་གསེར་གྱི་རྟགས་མ་དེ། ཧྥ་རན་སི་ ( France )དང་། བྷི་རཱ་ཛིལ  (Brazil ) འཇར་མ་ནི( Germany) སི་པེན (Spain) ཨར་ཇིན་ཊི་ན( Argentina) དབྱིན་ཡུལ་གང་རུང་ཞིག་ལ་འཐོབ་རྒྱུའི་ཚོད་དཔག་བྱས་ཡོད་ལ། རྩེད་རིགས་དབྱེ་ཞིབ་པ་མང་པོ་ཞིག་གིས། འདས་ལོའི་ཐོག་མའི་རྩེད་འགྲན་གྱི་རིམ་པ་ལས་ཨར་ཇིན་ཊི་ནར་ཕམ་ཁ་གཅིག་ཀྱང་མ་བྱུང་བར་ཐེངས་ ༣༦ ལ་འགྲན་རྒྱལ་བྱུང་ཡོད་པས། མེ་སི་ཡི་རྒྱལ་སྤྱི་རིམ་པའི་མཐའ་མཇུག་གི་རྩེད་འགྲན་དེར་ཨར་ཇིན་ཊི་ནར་རྒྱལ་ཁ་འཐོབ་རྒྱུར་རེ་བ་བཅངས་ཡོད་ཀྱང་། རྒྱལ་སྤྱིའི་གསེར་བུམ་རྟགས་མའི་ཐོག་མའི་རྩེད་འགྲན་སྐབས་སི་དྷའེ་ཨ་རབ་བྷི་ཡས་(Saudi Arabia) ཨར་ཇིན་ཊི་ན་ཕམ་པར་བྱས་ཡོད་སྟབས། དེ་ནི་ལྟད་མོ་བ་རྣམས་ཡིད་ཆེས་དཀའ་བའི་གནས་སུ་གྱུར། འོན་ཀྱང་། ཨར་ཇིན་ཊི་ནས་རྩེད་འགྲན་གྱི་རིམ་པ་དུ་མ་བརྒྱུད་མཐར། ཕྱི་ལོ ༢༠༢༢ ལོའི་འཛམ་གླིང་རྐང་སྤོལ་གྱི་གསེར་བུམ་དེ་བཀྱགས་ཡོད་པ་མ་ཟད། མེ་སི་ལ་རྩེད་འགྲན་པ་ཡག་ཤོས་ཀྱི་གསེར་གྱི་སྤོ་ལོའི ( golden ball) བྱ་དགའ་ཐོབ། མེ་སི་ཡི་རྒྱལ་སྤྱིའི་གསེར་བུམ་རྟགས་མའི་མཐའ་མཇུག་གི་རྩེད་འགྲན་ལས་རྣམ་པར་རྒྱལ་བ་ནི། ལྷ་ཆེན་གང་ཞིག་གིས་གོ་སྒྲིག་བྱས་པ་ཞིག་གཏན་ནས་མིན་པར། ཁོས་མི་ཚེ་གཅིག་གི་འབད་འབུངས་ལས་བླངས་པའི་རྒྱལ་ཁ་ཆེ་ཤོས་དེ་ཡིན་ལ། དེ་ནི་མེ་སི་ཡིས་རྒྱལ་སྤྱི་རིམ་པའི་རྐང་སྤོལ་གར་སྟེགས་སུ་བཞག་པའི་འོད་ལམ་ལམ་གྱི་བཞུད་ལམ་དང་། ཆེས་མཐའ་མཇུག་གི་གཡབ་མོ་དེའང་ཡིན་སྲིད།

མེ་སི་དང་རོ་ནལ་ཌོ་ཡི་ཁྱད་པར།

འཛམ་གླིང་རྐང་སྤོལ་རྩེད་འགྲན་གྱི་ཉེ་རབས་ལོ་རྒྱུས་ཀྱི་ཁྲོད་དུ་མེ་སི་དང་རོ་ནལ་ཌོ་ཡིས་གནས་བབ་མཐོ་པོ་བླངས་ཡོད་པའི་ཁར། ཁོང་གཉིས་ནི་དེང་རབས་ཀྱི་རྐང་སྤོལ་རྩེད་འགྲན་ཁྲོད་ཀྱི་སྐར་ཆེན་གཉིས་སུ་རྩི་མུས་ཡིན་འདུག་ལ། མི་ཚོགས་ཕལ་མོ་ཆེས་ཁོང་གཉིས་ཀ་དུས་རབས་འདིའི་ཆེས་ཕུལ་བྱུང་གི་རྩེད་འགྲན་པ་ (Greatest  Of All Time) རུ་མགྲིན་གཅིག་གིས་ངོས་འཛིན་བྱས། ཁོང་གཉིས་ཀྱི་སི་པེན་ཀྱི་ལ་ལི་གྷ་ (Laliga) ཡི་རྩེད་འགྲན་གར་སྟེགས་ཐོག་ཏུ་མི་ལོ་བཅོ་ལྔ་ལྷག་གིས་རིང་ལ་ཕན་ཚུན་ངོ་གདོང་གཏད་ནས་འགྲན་སྡུར་བྱས་ཡོད། མི་ལོ་གསུམ་གྱི་གོང་དུ་བྷི་ཊི་རྩེད་རིགས་( BT sport ) ཤིག་གིས་བརྙན་རིས་ཤིག་སྤེལ་བའི་ནང་། རོ་ནལ་ཌོས་གསར་འགོད་པར། ང་དང་མེ་སི་ཡིས་མི་ལོ་བཅོ་ལྔའི་རིང་ལ་སྡིངས་ཆ་གཅིག་གི་ཐོག་ཏུ་རྩེད་འགྲན་བྱས་ཡོད་ཅིང་། ངས་མི་གཉིས་ཀྱིས་སྡིངས་ཆ་གཅིག་གི་ཐོག་ཏུ་མི་ལོ་བཅོ་ལྔ་ལྷག་གི་རིང་ལ་རྒྱལ་ཕམ་བརྩད་ནས་བསྡད་པ་ཞིག་རྐང་སྤོལ་གྱི་རྩེད་འགྲན་ལོ་རྒྱུས་ཁྲོད་བྱུང་ཐུབ་མིན་མི་ཤེས་ལ། དེ་ཧ་ཅང་དཀའ་མོ་ཞིག་ཡིན་ཡང་།  ངེད་གཉིས་ཀྱི་བར་དུ་འབྲེལ་ལམ་ཡག་པོ་ཡོད། ཡིན་ནའང་། ངེད་གཉིས་ཀྱིས་ལྷན་གཅིག་ཏུ་ནུབ་ཟས་ཤིག་རོལ་མྱོང་མེད་སྟབས། མ་འོངས་པར་ངེད་གཉིས་ཀྱིས་ལྷན་གཅིག་ཏུ་ནུབ་ཟས་ལ་རོལ་རྒྱུར་རེ་བ་འཆང་མུས་ཡིན་ཞེས་བརྗོད་འདུག རོ་ནལ་ཌོ་ནི་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་སྤོ་ལོ་མང་ཤོས་བླུག་མཁན་དེ་ཡིན་ཡང་། རོ་ནལ་ཌོ་ལ་གསེར་གྱི་སྤོ་ལོ་(Ballons d’Or ) ལྔ་དང་། གསེར་ལྷམ་ལྔ་ལས་ཐོབ་མེད། མེ་སི་ལ་གསེར་གྱི་སྤོ་ལོ་ ༧ དང་གསེར་ལྷམ་ ༦ བཅས་ཐོབ་ཡོད་འདུག་པས། མེ་སི་ནི་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་ཀྱི་སྐར་ཆེན་དེ་དང་། ཧ་ཅང་བབ་ཆགས་པའི་རྩེད་འགྲན་པ་གཉོམ་ཆུང་ཞིག་ཀྱང་ཡིན་འདུག

དེ་བས་མེ་སི་ནི་དུས་རབས་ཉེར་གཅིག་པའི་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་ཀྱི་ཆེས་ཕུལ་བྱུང་གི་རྩེད་འགྲན་པ་ཞིག་དང་། ཀུན་གྱི་མིག་དབང་བཀུག་པའི་གྷོ་ཁྲི་  G.O.A.T ལའང་ངོས་འཛིན་བྱེད་ཀྱིན་འདུག