ཏོག་དབྱིབས་ཉེན་བརྡ་ཐོག་མ་གཏོང་མཁན། སྨན་པ་ལི་ཝིན་ཉིང་།

—–འདི་ག་དུས་བབ་གསར་ཁང་གི་འཛམ་གླིང་ཐོག་གནོད་སྐྱོན་ཆེ་ཤོས་ཀྱི་ནད་འབུ་ཞེས་པའི་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་སྐོར་གྱི་དམིགས་བསལ་ཚགས་པར་ལས་འདིར་བཀོད།

ཕྱི་ལོ་ ༢༠༡༩ ཟླ་ ༡༢ ཚེས་ ༣༠ ཉིན་རྒྱ་ནག་ཝུའུ་ཧན་དབུས་སྨན་ཁང་གི་སྨན་པ་ལི་ཝིན་ཉིང་ (Li Wenliang) ཞེས་པ་དེས་རྒྱུན་ལྡན་གྱི་ནད་པར་བརྟག་དཔྱད་བྱེད་སྐབས། ཕྱི་ལོ་ ༢༠༠༢ ལོར་རྒྱ་ནག་ནང་ཁྱབ་གདལ་བྱུང་བའི་སར་སི་ (SARS) ཡི་ནད་རྟགས་དང་འདྲ་བོ་ཡོད་པའི་ནད་པ་ཞིག་ལ་འཕྲད་ཡོད་པ་དང་། ཉིན་དེའི་དགོང་མོར་ཁོང་གིས་ཝུའུ་ཧན་སློབ་ཆེན་ ༢༠༠༤ འཛིན་གྲྭ་ཞེས་པའི་སློབ་གྲོགས་ཀྱི་སྐད་འཕྲིན་ཚོགས་པ་ (Wuhan University Clinical Medicine 2004) ཞེས་པ་ཞིག་གི་ནང་དུ། ཧྭ་ནན་ཤིང་ཏོག་དང་མཚོ་ཟས་ཁྲོམ་ར་ནས་ཡིན་པའི་ནད་པ་ ༧ ལ་སར་སི་ (SARS)དང་འདྲ་བའི་ན་ཚ་ཞིག་བྱུང་འདུག་ཅེས་ནད་པའི་བརྟག་དཔྱད་གྲུབ་འབྲས་ཀྱི་པར་དང་གློག་པར་ (CT scan) གྱི་བརྙན་སོགས་བསྐུར་ཡོད་པ་མ་ཟད། ད་ལྟའི་ཆར་གཉན་སྲིན་དེའི་ཐོག་ལ་ཞིབ་འཇུག་བྱེད་མུས་ཡིན་སྐོར་དང་།  ཚོགས་མི་རྣམས་ནས་རང་ཉིད་ཀྱི་ཕ་མ་དང་གྲོགས་པོར་བརྡ་ལན་སྤྲད་དེ་ཚང་མས་བདེ་འཇགས་ལ་ཡིད་གཟབ་དགོས་པའི་དྲན་སྐུལ་གནང་བ་དང་སྦྲགས། འཕྲིན་ཐུང་དེ་བརྒྱུད་སྐུལ་གང་བྱུང་བྱེད་མི་རུང་སྐོར་ཡང་བརྗོད་ཡོད་འདུག

སྨན་པ་ལི་ལ་ནག་ཉེས་བཙུགས།

སྨན་པ་ལིས་བརྒྱུད་སྐུལ་བྱས་པའི་འཕྲིན་ཐུང་དང་པར་རིས་རྣམས་སྤྱི་ཚོགས་དྲ་ལམ་ཁག་ཏུ་ཁྱབ་སྤེལ་ཤུགས་ཆེར་ཕྱིན་རྗེས། ཝུའུ་ཧན་དབུས་སྨན་ཁང་གི་རྟོག་ཞིབ་སྡེ་ཚན་ (supervision department) ནས་ཛ་དྲག་གི་ཚོགས་འདུ་བསྐོངས་ཏེ། ལི་ཝིན་ཉིང་གིས་སར་སི་ (SARS) དང་འདྲ་བའི་ནད་རྟགས་ཐོན་ཡོད་པའི་གནས་ཚུལ་རྫུན་བསྒྲགས་བྱས་ཡོད་པའི་སྐྱོན་འཛུགས་བྱས་ཡོད་པ་མ་ཟད། ཕྱི་ལོ་ ༢༠༢༠ ཟླ་ ༡ ཚེས་ ༣ ཉིན་ཝུའུ་ཧན་གྲོང་ཁྱེར་ཝུའུ་ཁྲང་ཉེན་རྟོག་ཡན་ལག་ཁང་། གྲོང་ནན་ཁྲོམ་གཞུང་མངག་གཏོང་ཁང་གིས་ལི་ཝིན་ཉིང་ལ་འདྲི་ཞིབ་བྱས་ཏེ་ཕྱིས་སུ་ཚིག་ཐོ་ཕྱིར་བསྒྲགས་བྱས་པའི་ནང་དུ། ཕྱི་ལོ་ ༢༠༡༩ ཟླ་ ༡༢ ཚེས་ ༣༠ ཉིན་ལི་ཝིན་ཉིང་གིས་སྐད་འཕྲིན་ཚོགས་པ་དེའི་ནང་སར་སི་ (SARS) དང་འདྲ་བའི་ནད་རྟགས་ཅན་ ༧ ཡོད་ལུགས་ཀྱི་དངོས་བདེན་མིན་པའི་གནས་ཚུལ་སྤེལ་ཡོད་ཚུལ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་དོ་དམ་བཅའ་ཁྲིམས་དང་འགལ་ཏེ་སྤྱི་ཚོགས་ནང་དངོས་བདེན་མིན་པའི་གནས་ཚུལ་སྤེལ་རྐྱེན། སྤྱི་ཚོགས་ཀྱི་སྒྲིག་གཞི་དཀྲུག་པ་དང་གནས་ཚུལ་བརྒྱུད་བསྒྲགས་ཀྱི་ཁྲིམས་སྒྲིག་དང་འགལ་ཡོད་ལུགས་བསྒྲགས་ཡོད་པ་མ་ཟད། སྨན་པ་ལི་ཡིས་ཉེན་རྟོག་ཁང་གི་ཉེན་བརྡ་དྭང་ལེན་བྱས་ཚུལ་དང་མུ་མཐུད་ནས་ཁྲིམས་འགལ་གྱི་བྱ་སྤྱོད་སྤེལ་རྒྱུ་མིན་ལུགས་ཀྱི་མིང་རྟགས་དང་མཛུབ་ཐེལ་བརྒྱག་ཏུ་བཅུག་ཡོད་ལུགས་ཀྱི་ཡི་གེ་ཞིག་ཕྱི་བསྒྲགས་བྱས་ཡོད་པ་རེད། ཡིན་ནའང་། ཡི་གེ་དེའི་ནང་དུ་ལི་ཝིན་ཉིང་གི་མིང་ཙམ་མ་གཏོགས་མང་པོ་ཞིག་ནག་གསུབ་བཏང་ཡོད་སྟབས། ཡི་གེ་དེ་དངོས་བདེན་ཡིན་མིན་གྱི་དོགས་སློང་བྱེད་མཁན་མང་པོ་བྱུང་ཡོད་པ་མ་ཟད། རྒྱ་ནག་གཞུང་གིས་བཙན་ཤེད་ཀྱིས་ཉེས་མིང་དྭང་ལེན་བྱེད་དུ་བཅུག་ཡོད་པའི་གླེང་གཞི་ཆེན་པོ་བྱུང་ཡོད་པ་རེད།

སྨན་པ་ལི་ལ་གཉན་རིམས་འགོས།

སྨན་པ་ལི་ནི་ཝུའུ་ཧན་དབུས་སྨན་ཁང་གི་མིག་ནད་སྨན་པ་ཞིག་ཡིན་སྟབས། ཕྱི་ལོ་ ༢༠༢༠ ཟླ་ ༡ ཚེས་ ༧ ཉིན་ཁོང་གིས་མིག་སྐྱ་སྒྲིབ་ (Glaucoma) བྱུང་བའི་ནད་པ་ཞིག་ལ་སྨན་བཅོས་བྱས་པའི་ཕྱི་ཉིན་ཏེ། ཕྱི་ཚེས་ ༨ ཉིན་སྨན་པ་ལི་ལ་ཚ་བ་རྒྱས་ཡོད་པ་དང་།  ཕྱི་ཚེས་ ༡༠ ཉིན་སྔར་ལས་ཚ་བ་རྒྱས་ཤིང་གློ་བརྒྱབ་པ་སོགས་ནད་གཞི་ཚབས་ཆེ་རུ་ཕྱིན་ཡོད་འདུག

སྐབས་དེར་རྒྱ་ནག་ཀྲེ་ཅང་ཞིང་ཆེན་ (Zhejiang) ནས་ཝུའུ་ཧན་གྲོང་ཁྱེར་དུ་ཆེད་གཏོང་བྱས་པའི་ཆེད་ལས་སྨན་པ་ཡི་ཁྲིན་པོ་ (Yu Chengbo) ཞེས་པ་ཞིག་གིས་ཕྱིས་སུ་གསར་འགོད་པར་བརྗོད་པ་ལྟར་ན། ཕྱི་ཟླ་ ༡ ཚེས་ ༧ ཉིན། ལི་ཝིན་ཉིང་གིས་བརྟག་དཔྱད་བྱས་པའི་མིག་སྐྱ་སྒྲིབ་ཀྱི་ནད་པ་དེ་ནི། ཝུའུ་ཧན་ཧྭ་ནན་ཤིང་ཏོག་དང་མཚོ་ཟས་ཁྲོམ་རའི་ (Wuhan Huanan Seafood Wholesale Market) ཚོང་པ་ཞིག་ཡིན་ཞིང་། ཁོང་ལ་གློ་ཚད་ (pneumonia)ནད་རྟགས་ཚབས་ཆེན་ཐོན་ཡོད་སྟབས། ནད་པ་དེ་བརྒྱུད་ནས་ལི་ཝིན་ཉིང་ལ་འགོས་ཡོད་པའི་ཚོད་དཔག་བྱས་འདུག

 ལི་ཡི་སྨན་བཅོས་ཀྱི་བརྒྱུད་རིམ།

ཕྱི་ཟླ་ ༡ ཚེས་ ༡༢ ཉིན་སྨན་པ་ལི་ཝུའུ་ཧན་ཧོ་ཧུ་རྫོང་སྨན་ཁང་ (Houhu Hospital District) དུ་བསྐྱལ་ཏེ་ཟུར་བཀག་སྨན་བཅོས་བྱས་ཡོད་པ་དང་། སྐབས་དེར་ཁོང་གི་སྨན་པས་བརྟག་དཔྱད་གྲུབ་འབྲས་ཡི་གེར་བཀོད་པའི་ནང་དུ། ལི་ཝིན་ཉིང་གི་སེམས་ཀྱི་འཕྲོད་བསྟེན་ཞན་པས་སེམས་གཅོང་ (depressive state) ཡོད་ལུགས་དང་། ཁོང་ལ་ཟས་ཀྱི་དང་ག་མེད་པ་དང་། མཚན་མོར་གཉིད་ཁུག་མ་ཐུབ་པའི་དཀའ་ངལ་འཕྲད་ཡོད་སྐོར་སོགས་བྲིས་ཡོད་འདུག

སྨན་པ་ལི་ལ་ཟུར་བཀག་སྨན་བཅོས་བྱེད་བཞིན་པའི་སྐབས་ཏེ། ཕྱི་ཟླ་ ༡ ཚེས་ ༢༧ ཉིན་རྒྱ་ནག་གི་གསར་ཁང་ཞིག་གིས་གསང་བའི་ཐོག་ནས་ཁོང་ལ་བཅར་འདྲི་ཞིག་བྱས་པའི་ནང་དུ། ཁོང་གིས་ནད་ཡམས་དང་འབྲེལ་བའི་གནས་ཚུལ་འབྱུང་རིམ་དང་། ཁོང་ལ་ཉེན་རྟོག་ཁང་ནས་ནག་ཉེས་ཇི་ལྟར་བཙུགས་པ་སོགས་འགྲེལ་བརྗོད་བྱས་ཡོད་འདུག དེ་བཞིན་ཕྱི་ཟླ་ ༡ ཚེས་ ༣༡ དང་ཕྱི་ཟླ་ ༢ ཚེས་ ༡ ཉིན་ནེའུ་ཡོག་དུས་བབ་ཀྱིས་ཁོང་ལ་སྐད་འཕྲིན་བརྒྱུད་དམིགས་བསལ་བཅར་འདྲི་ཞིག་ ( https://www.nytimes.com/2020/02/07/world/asia/Li-Wenliang-china-coronavirus.html)བྱས་ཡོད་པ་དང་། སྐབས་དེར་ཁོང་གིས། མིག་སྐྱ་སྒྲིབ་ (Glaucoma) ཕོག་པའི་ནད་པ་དེའི་ནང་མིར་ནད་ཡམས་འགོས་རྗེས་ཁོ་རང་ཡང་ནད་པ་ཆགས་ཡོད་སྐོར་དང་། སྐབས་དེ་དུས་ནད་ཡམས་དེ་ཁྱབ་སླ་བ་ཞིག་ཡིན་པ་ཤེས་རྟོགས་བྱུང་ཞིང་། ནད་པར་བརྟག་དཔྱད་བྱེད་སྐབས། ནད་པ་དེར་ནད་རྟགས་གང་ཡང་མེད་པས། ཁོང་གིས་ཁ་རས་གྱོན་པ་སོགས་སྔོན་འགོག་གི་ཐབས་ལམ་བེད་སྤྱོད་མ་བྱས་པར་ལྷོད་གཡེང་ཤོར་བར་བརྟེན། ཁོ་རང་ལ་ནད་ཡམས་འགོས་ཡོད་སྐོར་བརྗོད་འདུག ཕྱི་ལོ་ ༢༠༡༩ ལོའི་ལོ་མཇུག་ནས་རྒྱ་ནག་ནང་ནད་ཡམས་ཁྱབ་བཞིན་ཡོད་སྟབས། ཁོང་ཚོ་ལས་རོགས་ནང་ཁུལ་དུ་སར་སི་ (SARS) ནད་ཡམས་བསྐྱར་དུ་བསླེབས་ཡོད་པས། ཚང་མས་གྲ་སྒྲིག་གང་ལེགས་བྱས་ཏེ། སྔོན་འགོག་གི་ཐབས་ལམ་ལག་བསྟར་བྱ་དགོས་པའི་སྐོར་ལ་གྲོས་བསྡུར་བྱེད་བཞིན་ཡོད་སྐོར་དང་། གལ་ཏེ་རྒྱ་ནག་གཞུང་གིས་སྔ་ས་ནས་ནད་ཡམས་སྐོར་གྱི་གནད་དོན་ཁྱབ་སྤེལ་བྱས་ཚེ་ཡག་པོ་ཡོང་ཡོད་པ་རེད་བསམ་གྱི་ཡོད་སྐོར་དང་། གནད་དོན་དེ་དག་ཕྱི་གསལ་ནང་གསལ་དགོས་པ་གལ་ཆེ་བ་སོགས་བརྗོད་འདུག

ཡང་བཅར་འདྲི་དེའི་ནང་ཁོང་གིས། ཉེན་རྟོག་པས་ནད་འབུ་དེ་སར་སི་ (SARS) ཡིན་པའི་ངེས་པ་མེད་པས། ངས་ནད་ཡམས་དང་འབྲེལ་བའི་དཀྲོག་གཏམ་སྤེལ་གྱི་ཡོད་སྐོར་བརྗོད་དེ། ནག་ཉེས་ངོས་ལེན་བྱས་བཅུག་སོང་། སྐབས་དེ་དུས་ང་ལ་དྲང་པོ་བྱས་མེད་པའི་ཚོར་སྣང་བྱུང་། འོན་ཀྱང་། ངས་ངོས་ལེན་བྱ་དགོས་ཁེལ་བྱུང་། དོན་དངོས་སུ་མི་མང་པོའི་ནང་མི་གཉེན་ཉེ་བཅས་འདས་གྲོངས་སུ་ཕྱིན་པ་མཐོང་དུས་སེམས་པ་ཧ་ཅང་སྐྱོ་བྱུང་།  ངའི་བྱིས་པ་ཆེ་བ་ལོ་ ༤ དང་ཟླ་ ༡༠ སོན་ཡོད་པ་དང་། བྱིས་པ་གཅིག་ད་ལྟ་སྐྱེ་རྒྱུ་རེད། ངས་ནང་མི་རྣམས་དྲན་གྱི་འདུག ངས་ནང་མི་དང་མཉམ་དུ་བརྙན་ཐོག་ནས་སྐད་ཆ་བཤད་ཀྱི་ཡོད། ཅེས་དང་། ཕྱི་ཟླ་ ༡ ཚེས་ ༡༠ ཉིན་ནས་ང་ལ་གློ་བརྒྱག་མགོ་བཙུགས་སོང་། རིམས་ནད་ལས་དྲག་པར་ད་དུང་ཉིན་ ༡༥ ཡང་ན་དེ་ལས་མང་བ་འགོར་སྲིད་པ་རེད། དྲག་སྐྱེད་བྱུང་རྗེས་ནད་ཡམས་ལ་སྔོན་འགོག་དང་ནད་པར་ལྟ་སྐྱོང་སླད། སྨན་པའི་སྡེ་ཚན་ནང་ལས་ཀ་གཉེར་རྒྱུ་ཡིན། དེ་ངའི་འགན་འཁྲི་རེད། ཅེས་བརྗོད་འདུག

སྨན་བཅོས་བྱེད་རིང་སྨན་པ་ལི་ཡིས་བཅར་འདྲི་ཁག་ཅིག་དྭང་ལེན་བྱས་པ་དང་། སྒེར་གྱི་སྤྱི་ཚོགས་དྲ་ལམ་དུ་འཕྲིན་ཐུང་སྤེལ་བར་བརྟེན།  ཕྱི་ལོ་ ༢༠༢༠ ལོའི་ཕྱི་ཟླ་ ༡ ཚེས་ ༢༧ ཉིན་སྨན་པ་ལིར་དང་ཐོག་ལས་ཀ་སྤྲོད་མཁན་གྱི་སྨན་པ་དེ་ཡིས་དགོངས་སེལ་ཞུ་ཡིག་

https://www.nytimes.com/interactive/2022/10/05/world/asia/li-wenliang-letter.html ཅིག་འབྲི་རུ་བཅུག་འདུག

ཟླ་དེའི་ཕྱི་ཚེས་ ༣༡ ཉིན་སྨན་པ་ལི་ཡིས་ཝེ་པོ་བརྒྱུད་ངོས་ལེན་ཡི་གེ་དེའི་པར་དང་ཉེན་རྟོག་ལས་ཁུངས་ནང་ཡོད་པའི་སྐབས་ཀྱི་མྱོང་ཚོར་བཅས་སྤེལ་ཡོད་པ་མ་ཟད། སྲོག་རླུང་རྔུབ་བཞིན་ནད་ཁྲིའི་ཐོག་ཏུ་ཉལ་ཏེ་ཁོང་གིས། གང་མགྱོགས་དྲག་སྐྱེད་བྱུང་རྗེས། མདུན་དུ་ཐོན་ནས་སྨན་བཅོས་ཀྱི་ལས་ཀ་མུ་མཐུད་དུ་བྱ་རྒྱུ་ཡིན་ཞེས་བརྗོད་པར་བརྟེན། སྨན་པ་ལི་ཝིན་ཉིང་འཛམ་གླིང་མི་མང་གིས་དོ་སྣང་བྱ་ཡུལ་ཞིག་ཏུ་གྱུར་བ་མ་ཟད།  ཏོག་དབྱིབས་ཀྱི་ཉེན་བརྡ་ཐོག་མ་གཏོང་མཁན་གྱི་ལྷའི་ཕོ་ཉའམ་དམངས་ཁྲོད་ཀྱི་དཔའ་བོ་ (folk hero) ཞེས་པའི་མཚན་སྙན་ཐོགས།

སྨན་པ་ལི་ཡི་ཆེས་མཐའ་མཇུག་གི་ཉིན་གྲངས་ ༣༩།

སྨན་པ་ལི་ལ་ཚ་བ་རྒྱས་ཤིང་གློ་བརྒྱབ་ནས་ཉིན་གྲངས་ ༢༡ ཙམ་འགོར་རྗེས་ཏེ། ཕྱི་ལོ་ ༢༠༢༠ ཟླ་ ༡ ཚེས་ ༣༠ ཉིན་གཞི་ནས་སྨན་ཁང་གིས་ཁོང་ལ་ནད་ཡམས་གསར་པ་དེ་འགོས་ཡོད་ལུགས་ཀྱི་བརྟག་འབྲས་བཏོན་ཡོད་པ་དང་།
ཕྱི་ཟླ་ ༢ ཚེས་ ༥ ཉིན་ནས་བཟུང་དབུགས་འབྱིན་རྔུབ་བྱེད་པར་དཀའ་ངལ་ཆེན་པོ་འཕྲད་དེ་གནས་སྟངས་ཛ་དྲག་ཏུ་གྱུར།

འབྲེལ་ཡོད་ནས་ནེའུ་ཡོག་དུས་བབ་གསར་ཁང་ལ་མཁོ་སྤྲོད་བྱས་ཡོད་པའི་ཕྱི་ལོ་ ༢༠༢༠ ཟླ་༢ ཚེས་ ༦ ཉིན་གྱི་སྔ་དྲོར་ལི་ཡི་ཆེད་གཉེར་སྨན་པས་བརྟག་འབྲས་ཡི་གེར་བཀོད་པ་དེའི་ནང་དུ། སྨན་པ་ལིའི་དབང་པོ་མང་པོའི་ནུས་པ་ཉམས་འགྲོ་བའི་ཉེན་ཁ་འདུག ཅེས་བྲིས་ཡོད་པ་དང་། ད་དུང་སྨན་བཅོས་ཡིག་ཚགས་དེའི་ནང་།  སྔར་ནས་ཁོང་ལ་སྲོག་རླུང་སྦུ་གུ་དང་དབུགས་གསབ་མཆུ་ཁེབས་གཡོགས་ཡོད་ལུགས་དང་། ཕྱི་ལོ་ ༢༠༢༠ ཟླ་ ༡ ཚེས་ ༡༩ ཉིན་ཁོང་ལ་དབུགས་གསོག་འཕྲུལ་ཆས་ (non-invasive ventilator) བརྒྱུད་སྲོག་རླུང་སྤྲོད་ཐབས་བྱས་ཡོད་ཀྱང་། ནད་པས་བཟོད་སྲན་མ་ཐུབ་པའི་རྐྱེན་གྱིས་བེད་སྤྱོད་བྱེད་ཐུབ་མེད་ལུགས་བྲིས་ཡོད་འདུག

ད་དུང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། བརྟག་འབྲས་ནང་ཕྱི་ལོ་ ༢༠༢༠ ཟླ་ ༢ ཚེས་ ༦ ཉིན་གྱི་དགོང་མོའི་ཆུ་ཚོད་ ༧།༢༠ ཡས་མས་ལ་སྨན་པ་ལི་ཡི་སྙིང་གི་འཕར་ལྡིང་(cardiac arrest) མཚམས་ཆད་མེད་ལུགས་དང་། ཁོང་ལ་ལྟ་རྟོག་བྱེད་མཁན་གྱི་སྨན་པའི་སྡེ་ཚན་གྱིས་སྙིང་འཕར་ཛ་དྲག་མྱུར་སྐྱོབ་ (Cardiopulmonary resuscitation) ཀྱི་ཐབས་ལམ་དེ་ཆུ་ཚོད་ ༧ ལྷག་རིང་སྤྱད་ཡོད་ཀྱང་། ལི་ཝིན་ཉིང་གི་སྙིང་རྩ་འཕར་ལྡིང་གཏན་དུ་འགག་ཡོད་སྐོར་བཀོད་འདུག་ལ། སྐབས་དེ་དུས་སྨན་པ་ལི་ཡི་སྙིང་དང་གློ་བའི་བྱེད་ནུས་གོང་སྤེལ་ཆེད་ (extracorporeal membrane oxygenation) ཟེར་བ་བེད་སྤྱོད་བཏང་ཡོད་སྐོར་སོགས་བྲིས་ཡོད་ཀྱང་། ཚེ་སྲོག་གི་ཆེས་མཐའ་མར་བསླེབས་པའི་ཆུ་ཚོད་འགའ་ཡི་རིང་སྨན་པ་ལི་ཡི་འགྲམ་དུ་ཡོད་པའི་ཁོ་རང་གི་ལས་རོགས་སྨན་པ་མིང་ཚབ་ (B) ཅན་ཞིག་གིས་ནེའུ་ཡོག་དུས་བབ་ཀྱི་གསར་འགོད་པར་བརྗོད་པ་ལྟར་ན། ཕྱི་ཚེས་ ༦ ཉིན་གྱི་དགོང་མོའི་ཆུ་ཚོད་ ༩ པ་ཙམ་ལ་ཁོང་སྨན་པ་ལིའི་ལྟ་སྐྱོང་ཚན་པའི་ནང་དུ་འཛུལ་སྐབས། སྨན་ཁང་གི་འགན་འཛིན་དང་ཁོང་ལ་ལྟ་རྟོག་བྱེད་མཁན་གྱི་སྨན་པའི་སྡེ་ཚན་གྱིས་ལི་ཝིན་ཉིང་ལ་དེང་དུས་འཕྲུལ་ཆས་ (Extracorporeal membrane oxygenation) བེད་སྤྱོད་བཏང་སྟེ་ཐབས་ཤེས་ཡོད་རྒུ་བཏོན་པའི་རྣམ་པ་བསྟན་ཡོད་ཀྱང་། རྟོག་ཞིབ་བྱེད་མཁན་གྱི་སྨན་པའི་སྡེ་ཚན་ནང་ཁུལ་དུ་སྐབས་དེར་ཛ་དྲག་མྱུར་སྐྱོབ་འཕྲུལ་ཆས་དེ་བེད་སྤྱོད་བཏང་བ་ཕྱི་དྲགས་པའི་རྩོད་གླེང་བྱེད་བཞིན་ཡོད་པ་དང་། རྗེས་སུ་སྨན་པ་གཞན་ ༦ གིས་ཀྱང་དེ་ལྟར་བརྗོད་དེ། སྙིང་གི་འཕར་ལྡིང་མཚམས་བཞག་ཟིན་པའི་ཕུང་པོ་ཞིག་ལ་དེ་ལྟར་བྱེད་པ་ནི་མཐོང་ཆུང་དང་ཁྱད་གསོད་ལྟ་བུ་ཡིན་པའི་སྐྱོན་བརྗོད་བྱས་འདུག

ཕྱི་ཟླ་ ༢ ཚེས་ ༧ ཉིན་གྱི་ཞོགས་པའི་ཆུ་ཚོད་ ༤ པ་ཙམ་ལ་ཝུའུ་ཧན་དབུས་སྨན་ཁང་གིས། ཕྱི་ཚེས་ ༧ ཉིན་གྱི་ཞོགས་སྔ་ཆུ་ཚོད་ ༢།༥༨ (2:58am) སྟེང་སྨན་པ་ལི་འདས་གྲོངས་སུ་ཕྱིན་ཡོད་སྐོར་བསྒྲགས་ཡོད་ཀྱང་། སྐབས་དེར་ཁོང་གི་ཉེ་འཁོར་གྱི་སྨན་པ་དང་ལས་རོགས་སོགས་ནས་བརྗོད་པ་ལྟར་ན། ཕྱི་ཚེས་ ༦ ཉིན་གྱི་དགོང་མོའི་ཆུ་ཚོད་ ༧ ཡས་མས་ནས་འདས་གྲོངས་སུ་ཕྱིན་ཟིན་ཡོད་འདུག

ཁོང་གི་གྲོངས་རྐྱེན་ཐད་དོགས་སློང་མང་པོ་བྱེད་བཞིན་ཡོད་ཀྱང་།  ནེའུ་ཡོག་དུས་བབ་ལ་མཁོ་སྤྲོད་བྱས་པའི་སྨན་པ་ལི་ཡི་སྨན་བཅོས་ཡིག་ཚགས་དང་། ལས་རོགས་སྨན་པར་བཅར་འདྲི་བྱས་པ་བཅས་ལ་སྨན་གྱི་ཆེད་ལས་མཁས་པ་བརྒྱད་ཀྱིས་ཞིབ་འཇུག་བྱས་རྗེས། སྨན་པ་ལི་ལ་ཏོག་དབྱིབས་གཉན་རིམས་ཕོག་ཡོད་པ་ངེས་གཏན་ཡིན་པའི་སྡོམ་ཚིག་བརྒྱབ་ཡོད་པ་རེད། སྐབས་དེར་རྒྱ་ནག་ནང་ཏོག་དབྱིབས་འགོས་ཏེ་འདས་གྲོངས་སུ་ཕྱིན་པའི་སྨན་པ་ལི་ཝིན་ཉིང་ཙམ་མིན་པར་མང་པོ་ཞིག་ལ་ན་ཚ་འགོས་ཏེ་ནད་མནར་དང་འཆི་སྐྱོན་བྱུང་ཡོད་འདུག ཕྱི་ལོ་ ༢༠༢༠ ཟླ་ ༨ ཚེས་ ༡༨ ཉིན། རྒྱ་ནག་གཞུང་འབྲེལ་མི་མང་ཉིན་རེའི་ཚགས་པར་ཁང་གིས། རྒྱ་ནག་གི་སྨན་པའི་ཉིན་མོར། ཏོག་དབྱིབས་ལ་རྒོལ་འཛིང་བྱེད་བཞིན་པའི་གོས་དཀར་ཅན་གྱི་འཕྲོད་བསྟེན་ཞབས་ཕྱི་བ་རྣམས་ལ་གུས་འདུད་ཞུ་ཞེས་པའི་གསར་འགྱུར་ཞིག་སྤེལ་ཡོད་པའི་ནང་། ཕྱི་ལོ་ ༢༠༡༩ ཟླ་ ༡༢ ཚེས་ ༢༩ ཉིན་ཆེས་ཐོག་མར་ཝུའུ་ཧན་ནས་སྨན་པ་ ༧ ལ་ཏོག་དབྱིབས་འགོས་པའི་གནས་ཚུལ་ཐོན་རྗེས། ཕྱི་ལོ་ ༢༠༢༠ ཟླ་ ༢ ཚེས་ ༡༡ བར་དུ་རྒྱལ་ཡོངས་ནས་འཕྲོད་བསྟེན་ཞབས་ཕྱི་བ་ཁྱོན་ ༡༧༡༦ ལ་ཏོག་ནད་འགོས་ཡོད་པ་དང་། དེའི་ཁྲོད་ནས་མི་གྲངས་ ༡༡༠༢ ཝུའུ་ཧན་གྲོང་ཁྱེར་རང་ནས་ཡིན་སྐོར་བརྗོད་ཡོད་ཀྱང་། སྨན་པ་དང་སྨན་ཞབས་པ་སོགས་རྐྱེན་འདས་སུ་ཕྱིན་པའི་གྲངས་འབོར་ཕྱིར་བསྒྲགས་བྱས་མེད་པ་རེད།

དགོངས་སེལ་དང་གཟེངས་རྟགས།

སྨན་པ་ལི་ཉུང་མཐར་ཟླ་གཅིག་དང་ཉིན་གྲངས་ ༡༠ ཡས་མས་རིང་སྨན་ཁང་དུ་ཉལ་ཏེ་འདས་གྲོངས་སུ་ཕྱིན་པའི་གནས་ཚུལ་ཐོན་རྗེས། རྒྱ་ནག་ནང་ལོགས་དང་རྒྱལ་སྤྱིའི་ཐོག་ནས་རྒྱ་ནག་གཞུང་གིས་སྔ་གཞུག་ཏུ་སྨན་པ་ལི་གཙོ་བོར་གྱུར་བའི་ཏོག་དབྱིབས་ཉེན་བརྡ་གཏོང་མཁན་ལ་ཉེས་མེད་ཉེས་འཛུགས་བྱས་པ་དང་། མཐར་འཆི་ལམ་དུ་དེད་པར་སྐྱོན་བརྗོད་ཤུགས་ཆེན་བྱས་པ་མ་ཟད། སྐབས་ཐོག་དེར་རྒྱ་ནག་གཞུང་གིས་དགོས་ངེས་ཀྱི་འགོག་སྲུང་བྱ་བ་བསྒྲུབ་ཡོད་ཚེ། འཛམ་གླིང་མི་གྲངས་ས་ཡ་ ༦ ལྷག་ལ་འཆི་སྐྱོན་བྱུང་མེད་པའི་འཁང་རའང་བྱེད་ཀྱི་ཡོད་པ་རེད། རྒྱ་གཞུང་ཉེན་རྟོག་ཁང་གིས་ཕྱིས་སུ་སྨན་པ་ལི་ལ་གནས་ཚུལ་རྫུན་བསྒྲགས་བྱས་པའི་ཉེས་མིང་གཡོགས་པ་ཕྱིར་འཐེན་བྱས་ཏེ། ཁོང་གི་ཁྱིམ་མིར་དགོངས་སེལ་ཞུས་ཡོད་འདུག ཡིན་ནའང་། ཉེན་རྟོག་པ་གཉིས་ཀྱིས་སྨན་པ་ལི་ཡི་གྱོད་དོན་ཞུ་གཏུག་ཐད་ཐེ་གཏོགས་བྱས་ཡོད་པའི་ཉེས་མིང་འོག་ལས་གནས་ནས་གནས་དབྱུང་བཏང་བ་སོགས་ཀྱི་གནས་ཚུལ་བྱུང་འདུག

ཕྱི་ལོ་ ༢༠༢༠ ཟླ་ ༤ ཚེས་ ༢ ཉིན་རྒྱ་ནག་གཞུང་གིས་ཏོག་དབྱིབས་གཉན་རིམས་འགོས་ཁྱབ་སྐབས་གདོང་མཆོང་གིས་བྱས་རྗེས་ཆེན་པོ་བཞག་པའི་ངོས་འཛིན་འོག རྒྱ་ནག་གི་སྨན་པ་དང་ཉེན་རྟོག་པ། དྭང་ཞབས་པ།  སེམས་ཁམས་སློབ་སྟོན་པ་སོགས་མི་གྲངས་ ༣༤ ལ་ལྔ་བཞི་གཞོན་ནུའི་གཟེངས་རྟགས་ཞེས་པ་སྤྲད་ཡོད་པ་དང་། དེའི་ཁྲོད་དུ་སྨན་པ་ལི་ཝིན་ཉིང་ལ་དཔའ་བོ་ཞེས་པའི་མཚན་སྙན་ཐོག་གཟེངས་རྟགས་དེ་ཕུལ་འདུག

ཕྱི་ལོ་ ༢༠༢༠ ཟླ་ ༦ ཚེས་ ༡༢ ཉིན་མི་མང་གིས་ཡང་བསྐྱར་སྐྱོ་གདུང་གི་ངང་ནས་སྨན་པ་ལི་ཝིན་ཉིང་གླེང་དགོས་བྱུང་། དེ་ནི་འཇིག་རྟེན་འདི་ནས་བཞུད་ཟིན་པའི་སྐྱེས་པ་ཞིག་གིས། རང་ཉིད་ཀྱི་ཚེ་རོགས་ལ་ཆེས་མཐའ་མཇུག་གམ་ཐོག་མཐའ་མེད་པའི་མི་ཚེ་འདིར་ལེགས་སྐྱེས་སུ་ཕུལ་བའི་བུ་ཆུང་སྙིང་རྗེ་བོ་ཞིག་ཝུའུ་ཧན་གྱི་སྨན་ཁང་ཞིག་ཏུ་སྐྱེས་ཡོད་པ་དང་། བུ་ཆུང་གི་ཨ་མ་ཧྥུའུ་ཞེ་ཇེ་ལགས་ཀྱིས་སྨན་ཁང་དུ་བུ་ཆུང་བང་དུ་བཟུང་སྟེ། རྒད་པོ། ཁྱེད་ཀྱིས་བདེ་བ་ཅན་ནས་མཐོང་གི་འདུག་གམ། ཁྱེད་ཀྱིས་ང་ལ་ཆེས་མཐའ་མཇུག་ཏུ་སྤྲད་པའི་ལེགས་སྐྱེས་བཟང་པོ་དེ་དེ་རིང་སྐྱེས་བྱུང་། ངས་ཁོང་གཉིས་ལ་བདག་སྐྱོང་ལེགས་པོ་ཞིག་བྱེད་ཁོ་ཐག་ཡིན། ཞེས་བྲིས་པའི་པར་དང་ཡིག་ཆུང་ཞིག་དྲ་ལམ་གང་སར་ཁྱབ་སོང་། མ་གཞི་སྨན་པ་ལི་ལ་ནད་མནར་བྱུང་སྟེ་ཉིན་གྲངས་ ༤༠ ལྷག་རིང་ཟུར་བཀག་ཏུ་སྡོད་སྐབས་ཁོང་གི་ཆུང་མར་མངལ་སྦྲུམ་ནས་ཟླ་ ༤  ལྷག་འགོར་ཟིན་ཡོད་འདུག་ལ། དུས་ཡུན་དེར་དྲ་ལམ་གྱི་ཁ་བརྡ་ཙམ་མ་གཏོགས་དངོས་སུ་ཐུག་པའི་གོ་སྐབས་བྱུང་མི་འདུག ཁོང་སྨན་ཁང་དུ་ཡོད་སྐབས་ཁོང་གི་ཕ་མ་གཉིས་ལའང་རིམས་ནད་བྱུང་ཡོད་ཀྱང་ཕྱིས་སུ་དྲག་སྐྱེད་བྱུང་ཡོད་འདུག

ཏོག་དབྱིབས་ཀྱི་ཉེན་བརྡ་ཐོག་མ་གཏོང་མཁན་ལི་ཝིན་ཉིང་ནི། ཕྱི་ལོ་ ༡༩༨༦ ཟླ་ ༡༠ ཚེས་ ༡༢ ཉིན་རྒྱ་ནག་ལོའུ་ལིན་ཞིང་ཆེན་ (Liaoning) གྱི་པའེ་ཀྲིན་གྲོང་ཁྱེར་གྱི་ལས་བཟོ་བའི་ཁྱིམ་ཚང་དབུལ་པོ་ཞིག་ཏུ་སྐྱེས་ཤིང་། ཕྱི་ལོ་ ༢༠༠༤ ལོར་པའེ་ཀྲིན་མཐོ་རིམ་སློབ་གྲྭ་ (Beizhen High School) ནས་མཐོ་རྒྱུགས་ཀྱི་སྐར་མ་ ༦༠༩ བླངས་ཏེ། ཝུའུ་ཧན་སྨན་གྱི་གཙུག་ལག་སློབ་ཆེན་དུ་ཚུད་དེ་ཉེ་བའི་རབ་འབྱམས་པ་དང་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༢༠༡༡ ནས་ ༢༠༡༤ བར་ཤཱ་མིན་གཙུག་ལག་སློབ་ཆེན་ (Xiamen University) གྱི་མིག་གི་ཆེད་ལས་སློབ་གླིང་ (Xiamen Eye Centre) དུ་མིག་སྨན་ཆེད་སྦྱོང་བྱས་རྗེས། ཝུའུ་ཧན་གྲོང་ཁྱེར་གྱི་དབུས་སྨན་ཁང་དུ་ཕྱག་ལས་གནང་ཡོད་པ་དང་། གཞུང་རྒྱུད་དྲང་ཞིང་གཏན་ཚིགས་ཆེ་བའི་ན་གཞོན་དེའི་བྱ་སྤྱོད་ཀྱིས་ནད་པ་དང་ལས་རོགས་མང་པོའི་ཡིད་སེམས་དབང་མེད་དུ་བཀུག་ཡོད་འདུག

གསར་འགོད་པ། བསྟན་འཛིན་ཕུར་བུ།