རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཕྱི་ལོ་ ༢༠༢༣ ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྙན་ཐོ་བཏོན་པའི་ནང་རྒྱ་ནག་གཞུང་གི་དྲག་གནོན་སྲིད་ཇུས་འོག་བོད་དང་ཡུ་གུར། ཧོང་ཀོང་། རྒྱ་རིགས་མི་མང་བཅས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་ཐེབས་མུས་ཡིན་སྐོར་བརྗོད་འདུག
དེ་རིང་ཕྱི་ཚེས་ ༡༢ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། མགོ་བརྗོད་དུ་ཕྱི་ལོ་ ༢༠༢༣ ལོའི་ལོ་འཁོར་བསྐྱར་ཞིབ་སྙན་ཐོ་ཞེས་འཁོད་ཅིང་ཕྱི་ལོ་ ༢༠༢༢ ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་རྒྱས་བསྡུས་སྙན་ཐོ་འདོན་ཐེངས་ ༣༣ པ་དེ་བཏོན་འདུག་པ་དང་། སྙན་ཐོའི་ནང་འཛམ་གླིང་རྒྱལ་ཁབ་དང་ས་ཁུལ་མི་འདྲ་བ་བརྒྱ་ལྷག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་ཞིབ་འཇུག་བྱས་པའི་གྲུབ་དོན་བཏོན་ཡོད་པ་རེད།
སྙན་ཐོའི་ནང་རྒྱ་ནག་སྤྱི་དང་དམིགས་བསལ་རྒྱ་ནག་གི་བཙན་དབང་འོག་གནས་པའི་བོད་དང་ཡུ་གུར། ཧོང་ཀོང་བཅས་ནང་གི་འགྲོ་བ་མིའི་ཐོབ་ཐང་གི་གནས་སྟངས་གཙོ་འདོན་བྱས་འདུག་ཅིང་། བོད་ནང་མུ་མཐུད་ཆོས་དད་རང་དབང་དང་སྨྲ་བརྗོད་རང་དབང་། འགྲོ་འདུག་སྤྱོད་གསུམ་གྱི་རང་དབང་སོགས་མེད་པའི་ཁར། བོད་ཀྱི་ཞིང་འབྲོག་མང་ཚོགས་གྲོང་ཁྱེར་དང་དེང་རབས་ཅན་དུ་བསྒྱུར་རྒྱུ་ཡིན་ཟེར་བའི་གནས་སྤོ་སྲིད་ཇུས་དང་བོད་ཀྱི་ཁོར་ཡུག་གཏོར་བཅོམ་གཏོང་མུས་ཡིན་ཞིང་། བོད་མི་ཚོས་ཏང་གི་ཁྲིམས་ལ་བརྩི་འཇོག་དགོས་པ་དང་བོད་མི་ནང་ཁུལ་དུ་དངུལ་སྤྲད་ནས་སོ་མྱུལ་བ་བཞག་སྟེ་ཏང་ལ་དགྲའི་འདུ་ཤེས་འཛིན་པ་དང་དམར་ཤོག་ཚོགས་པའི་ཁྲིམས་མི་བརྩི་མཁན་རྣམས་རྩིས་སྤྲོད་བྱེད་དུ་འཇུག་གི་ཡོད་སྐོར་དང་། དྲ་ལམ་སྟངས་འཛིན་དོ་ནན་བྱེད་བཞིན་པའི་གནས་སྟངས་འོག་ཆོས་ཕྱོགས་ཀྱི་བྱེད་སྒོ་ཁག་བཀག་སྡོམ་བྱེད་མུས་ཡིན་པ་མ་ཟད། རྒྱ་ནག་གིས་བཅད་བགོ་བྱས་པའི་སི་ཁྲོན་ཞིང་ཆེན་གྱི་བོད་མིའི་ས་ཁུལ་ཁག་ཅིག་གི་ནང་ལྷ་ཁང་དང་སྐུ་རྟེན་སོགས་གཏོར་བཤིག་བཏང་ཡོད་སྐོར་བརྗོད་འདུག
དམིགས་བསལ་སྙན་ཐོའི་ནང་། བོད་ཀྱི་ཆོས་དང་རིག་གཞུང་ཐོག་ཕྱག་ལས་གནང་མཁན་གྱི་བོད་མི་མང་པོ་ཞིག་འཛིན་བཟུང་བྱས་ཏེ། བཙོན་ཁང་དུ་ཚུལ་མིན་གྱི་ཉེས་རྡུང་ཚབས་ཆེན་བཏང་བའི་ཁྲོད། སྒོ་ཤེས་རབ་རྒྱ་མཚོ་ལགས་དང་རོང་བོ་དགེ་འདུན་ལྷུན་འགྲུབ། ཐུབ་བསྟན་བློ་གྲོས་སམ་ས་བུ་ཆེ་སོགས་ཡོད་པ་དང་། འདས་ལོའི་ཕྱི་ཟླ་ ༣ ནང་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་པོ་ཏ་ལའི་མདུན་ཐང་དུ་རྒྱ་གཞུང་ལ་ངོ་རྒོལ་གྱིས་རང་ལུས་མིར་བསྲེགས་བཏང་ཡོད་སྐོར་དང་། ཕྱི་ལོ་ ༢༠༡༦ ལོ་ནས་ཞི་ཅིན་ཕིན་གྱི་བཀོད་འདོམ་འོག་ནང་བསྟན་ཆོས་ལུགས་ལ་དམ་དྲག་བྱས་པ་ཁོ་ན་ཙམ་མ་ཡིན་པར་ནང་བསྟན་ཆོས་ལུགས་དམར་ཤོག་ཚོགས་པའི་ལྟ་གྲུབ་དང་མཐུན་པར་བྱས་ཏེ། ཞི་ཅིན་ཕིན་སྲོག་ཤིང་ཡིན་པའི་དམར་ཤོག་ཚོགས་པའི་ལྟ་གྲུབ་རྒྱ་སྐྱེད་དང་མཐོར་འདེགས་ལ་དམིགས་ཡོད་སྐོར་སོགས་བརྗོད་འདུག
གཞན་ཡང་སྙན་ཐོའི་ནང་རྒྱ་ནག་གཞུང་གིས་ཏོག་དབྱིབས་གཉན་རིམས་གཙང་སེལ་ཟེར་བའི་སྲིད་ཇུས་ལག་བསྟར་བྱས་ཏེ། མི་མང་ས་ཡ་མང་པོ་ཁྱིམ་སྡོད་བཀག་རྒྱའི་འོག་བཅུག་སྟབས། མི་མང་ལ་ཉིན་རེའི་ཟས་ཐུན་གསུམ་གྱི་དཀའ་ངལ་འཕྲད་པའི་གནས་སྟངས་བྱུང་བ་མ་ཟད། སི་ཁྲོན་ཞིང་ཆེན་ནང་ས་ཡོམ་གྱི་གོད་ཆག་ཤོར་སྐབས་ཀྱང་མི་མང་རང་ཁྱིམ་ནས་ཕྱིར་ཐོན་ཆོག་གི་མེད་པ་སོགས་དམ་དྲག་ཤུགས་ཆེན་བྱས་ཡོད་པ་དང་། དམིགས་བསལ་བོད་དང་ཡུ་གུར་མི་རིགས་རང་སྐྱོང་ཟེར་བའི་ནང་ཏོག་དབྱིབས་ཀྱི་བཀོག་སྡོམ་ཚབས་ཆེན་བྱས་ཏེ་ཐོབ་ཐང་མང་པོ་ཞིག་ལ་རྡོག་རོལ་བཏང་ཡོད་སྐོར་དང་། ཧོང་ཀོང་གི་འགྲོ་བོ་མིའི་ཐོབ་ཐང་ལ་མུ་མཐུད་རྡོག་རོལ་བཏང་བ་དང་། ཧོང་ཀོང་གི་ཆར་གདུགས་གསར་བརྗེའི་ལས་འགུལ་ཐོག་དྲག་གནོན་བྱེད་མཁན་ཇོན་ལི་ཟེར་བ་ཧོང་ཀོང་སྤྱི་ཁྱབ་ལ་བསྐོ་གཞག་བྱས་ཡོད་སྐོར། དེ་བཞིན། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་གནས་སྟངས་ལ་གཞིགས་ནས། འཛམ་གླིང་རྒྱལ་ཁབ་བརྒྱད་ཀྱིས། རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ལ་གཞུང་འབྲེལ་ཐོག་ནས་ངོ་རྒོལ་བྱས་ཡོད་པ་དང་། འདས་ལོའི་ཕྱི་ཟླ་ ༦ ནང་ཤིན་ཅང་ནས་ཕྱིར་འདྲེན་བྱས་པའི་ཐོན་རྫས་དག་བཙན་དབང་འོག་ཡུ་གུར་བའི་ངལ་རྩོལ་ལ་བརྟེན་ནས་བྱུང་བ་ཡིན་པས། ཨ་རིས་ཤིན་ཅང་ཁུལ་ནས་ཐོན་པའི་དངོས་རྫས་རིགས་ཕྱིར་འདྲེན་ཉོ་ཚོང་མི་ཆོག་པའི་(UFLPA) ཁྲིམས་གཏན་འབེབ་བྱས་ཡོད་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
