ཚེ་རིང་དབྱངས་འཛོམས་ལགས་ལ་རྩོམ་རིག་བྱ་དགའ་ཐོབ།

ཁེ་ན་ཌའི་ནང་གནས་སྡོད་བུད་མེད་རྩོམ་པ་པོ་ཚེ་རིང་དབྱངས་འཛོམས་ཀྱི་བརྩམས་ཆོས་ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ཞེས་པར་ཕྱི་ལོ་ ༢༠༢༣ ལོའི་རྟོག་སྒྲུང་བརྩམས་ཆོས་ཀྱི་བྱ་དགའ་ཐོབ་ཡོད་འདུག

བོད་རིགས་ན་གཞོན་མང་པོས་ནུབ་ཕྱོགས་རྒྱལ་ཁབ་ཁག་ཏུ་རྩོམ་རིག་གི་སྡིངས་ཆ་སྙེག་མུས་ཡིན་པ་ལྟར། ཉེ་ལམ་བོད་ཀྱི་ན་གཞོན་རྩོམ་པ་པོ་བུད་མེད་ཚེ་རིང་དབྱངས་འཛོམས་ལགས་ཀྱི་བརྩམས་ཆོས་ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་(We Measure the Earth with Our Bodies) ཞེས་པར་ཕྱི་ལོ་ ༢༠༢༣ ལོའི་རྟོག་སྒྲུང་བརྩམས་ཆོས་ཀྱི་བྱ་དགའ་ཐོབ་ཡོད་འདུག

དེའི་ཐད་ཁོང་མོ་སྒེར་གྱི་ཨིན་སི་ཊི་ར་གྷ་རམ་ (Instragram ) སྟེང་དུ་ཁོང་མོའི་བརྩམས་ཆོས་ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ལ་རྟོག་སྒྲུང་བརྩམས་ཆོས་ཀྱི་བྱ་དགའ་ཐོབ་པར་དགའ་སྤོབས་ཆེ་བ་མ་ཟད། དེ་ནི་ཁོང་མོའི་ཆེས་དགའ་སའི་རྩོམ་པ་པོ་དག་གི་བཞུད་ལམ་དེད་པའི་ལམ་བུ་ཞིག་ཡིན་སྐོར་བརྗོད་ཡོད་འདུག་ལ། དེ་བཞིན་བོད་ཀྱི་ན་གཞོན་རྩོམ་པ་པོ་ཚེ་རིང་དབྱངས་འཛོམས་ལགས་ཀྱི་བརྩམས་ཆོས་དེ། ཕྱི་ལོ་ ༢༠༢༢ ལོའི་ཟུར་མིག་ཁྲོད་ཀྱི་ཆབ་སྲིད་དྲག་པོ་ (Political Violence at a Glance) ཞེས་པའི་ཆབ་སྲིད་དང་འབྲེལ་བའི་བརྩམས་ཆོས་ལེགས་ཤོས་ལྔའི་ཁོངས་སུ་ཚུད་ཡོད་འདུག་ལ། ཁོང་མོའི་བརྩམས་ཆོས་ལ་ཕྱི་ལོ་ ༢༠༢༢ ལོའི་ཁེ་ན་ཌའི་གྷི་ལེར་ (Giller Prize) རྩོམ་རིག་བྱ་དགའི་ཁྲོད་བརྩམས་ཆོས་༡༥༠ ནང་ནས་ལེགས་ཤོས་ལྔའི་ཁོངས་སུའང་ཚུད་ཡོད་འདུག

ལྡི་ལིའི་ཨིན་དྷི་ར་པར་ས་ཊ་བུད་མེད་མཐོ་སློབ་ (Indraprastha College for Women ) ཏུ་དབྱིན་ཡིག་སློབ་དཔོན་ཆེན་པོའི་ལས་གནས་གཉེར་མྱོང་མཁན། ད་ལྟ་ཁེ་ན་ཊར་གནས་སྡོད་རྩོམ་པ་པོ་དང་སྙན་ངག་མ་སྐལ་བཟང་དབྱངས་འཛོམས་ལགས་ཀྱིས་བྲིས་པའི་ཚེ་རིང་དབྱངས་འཛོམས་ཀྱི་བརྩམས་ཆོས་དང་འབྲེལ་བའི་དཔྱད་བརྗོད་ནང་།  ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ཞེས་པའི་བརྩམས་ཆོས་འདི་ནི་བོད་མིས་བྲིས་པའི་དབྱིན་རྩོམ་ཇེ་མང་དུ་འགྲོ་བཞིན་པའི་སྡེ་ལ་ཁ་སྣོན་ཁྱད་པར་བ་ཞིག་རེད། སྒྲུང་ནི་སྒྲུང་ཙམ་ཞིག་གཏན་ནས་མིན་པར། དེས་ཁྱེད་ལ་དོན་དག་མང་པོ་ཞིག་ཚོར་ཐུབ་པ་དང་། མཐོང་བ། ཐོས་འཇུག་པའི་ནུས་པ་ཡོད་པ་མ་ཟད། ཁྱེད་རང་རྒྱ་ཆེ་བའི་འཛམ་གླིང་འདིར་གཅིག་པུ་མིན་པ་ཡང་ཤེས་སུ་བཅུག་ཡོད་ལ།  རྩོམ་རིག་གི་སྡིངས་ཆའི་སྟེང་བོད་པའི་མིང་འོག་ཏུ་དམར་རྟགས་རྒྱག་བཞིན་ཧ་ལམ་ཕྱི་མི་ཡིན་པའི་རྣམ་པ་སྟོན་བཞིན་པའི་སྐབས་སུ། སྒྲུང་རྩོམ་འདིའི་ནང་བོད་པའི་མིང་མི་འདྲ་བ་མང་པོ་མཐོང་ཐུབ་པ་ནི་སེམས་འགུལ་ཐེབས་པ་ཞིག་རེད།  ཅེས་དང་། ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ནི་མདོར་བསྡུས་ན་ང་ཚོར་བཤུ་གཞོག་ཇི་འདྲ་བྱེད་མིན་ལ་ལྟོས་པར་སྟོབས་ཆེན་དགྲ་བོར་ཁ་གཏད་ནས་མུ་མཐུད་རང་དབང་འཐབ་རྩོད་བྱེད་པའི་མིའི་རིགས་ཀྱི་འཚོ་གནས་དང་རེ་འདུན་གྱི་སྙིང་སྟོབས་འགྱུར་བ་མེད་པ་དེ་གསལ་པོ་མཚོན་པར་བྱས་པའི་བརྩམས་ཆོས་ཤིག་ཡིན། ཞེས་བརྗོད་ཡོད་འདུག

བོད་ཀྱི་ན་གཞོན་རྩོམ་པ་པོ་ཚེ་རིང་དབྱངས་འཛོམས་ལགས་ཀྱི་བརྩམས་ཆོས་ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ཞེས་པའི་ནང་། ཕྱི་ལོ་ ༡༩༦༠ ལོར་བོད་ཀྱི་ནང་མི་ཞིག་གི་འཚོ་བའི་གནས་བབ་མཚོན་ཐབས་བྱས་ཡོད་ཅིང་། སྐྱབས་བཅོལ་ནང་མི་དེས་བོད་ནས་རང་ཁྱིམ་བཞག་སྟེ་བལ་ཡུལ་གྱི་སྐྱབས་བཅོལ་གཞིས་སྒར་དང་། དེ་ནས་ཁེ་ན་ཌར་གནས་སྤོར་བྱས་སྐོར་སོགས་བྲིས་ཡོད་ལ། བརྩམས་ཆོས་ཀྱི་མགོ་མཇུག་བར་གསུམ་དུ་བཙན་བྱོལ་བོད་མི་ཞིག་གི་ངེས་གཏན་མེད་པའི་དཀའ་སྡུག་གི་འཚོ་བ་གསལ་སྟོན་བྱས་ཡོད་ལ།   རྒྱལ་ཁབ་དང་ཕ་ས་ཕ་ཡུལ་གཞན་ལག་ཏུ་ཤོར་བའི་མི་རིགས་ཤིག་གི་ལོ་རྒྱུས་ཀྱི་ན་ཟུག་རེ་རེ་འབྲི་ཐབས་བྱས་ཡོད།

རྩོམ་པ་པོ་ཚེ་རིང་དབྱངས་འཛོམས་ལགས་ནི་བལ་ཡུལ་དུ་སྐྱེས་འཚར་བྱས་ཡོད་ཅིང་།  ཕྱིས་སུ་ཁེ་ན་ཌར་གནས་སྤོས་བྱས་ཏེ། གསར་རྩོམ་དང་རྒྱལ་སྤྱིའི་འབྲེལ་ལམ་ཐོག་རིག་གནས་རབ་འབྱམས་པའི་ལག་ཁྱེར་བླངས།  ཁོང་མོར་ཁོ་ལོམ་བྷི་ཡ་གཙུག་ལག་སློབ་གཉེར་ཁང་ (Columbia University) ནས་སྒྱུ་རྩལ་རྩོམ་རིག་ (Master of Fine Arts) ཐོག་གཙུག་ལག་རབ་འབྱམས་པའི་སློབ་གཉེར་གནང་།  ཁོང་མོའི་བརྩམས་ཆོས་ང་ཚོའི་ལུས་པོས་སའི་གོ་ལའི་རྒྱ་ཁྱོན་འཇལ་བ་ལ་རྩོམ་པ་པོ་དང་སྙན་ངག་པ་མང་པོ་ཞིག་གིས་གདེང་འཇོག་མི་ཉུང་བ་ཞིག་གནངས་དང་གནང་མུས་ཡིན་འདུག

གསར་འགོད་པ། དཔལ་ལྡན།