བལ་ཡུལ་དུ་གནམ་གྲུ་ཞིག་བརྡབ་སྐྱོན་བྱུང་།

བལ་ཡུལ་གྱི་གྲོང་ཁྱེར་སྤོག་རར་བསྐྱོད་པའི་གནམ་གྲུ་ཞིག་བརྡབ་སྐྱོན་བྱུང་ནས་མི་གྲངས་ ༦༨ རྐྱེན་འདས་སུ་གྱུར།

ཁ་སང་ཕྱི་ཚེས་ ༡༦ ཉིན་བལ་ཡུལ་གྱི་རྒྱལ་ས་ཀ་ཐ་མན་ཌུ་ནས་སྤོག་རར་བསྐྱོད་པའི་ཡེ་ཊི་མཁའ་ལམ་(Yeti Airlines) འགྲིམ་འགྲུལ་ཁང་གི་ (ATR-72) རྟགས་ཅན་གྱི་གནམ་གྲུ་ཞིག་སྤོག་རའི་གནམ་ཐང་གི་མཁའ་ལམ་ནས་མར་བབ་སྐབས། གནམ་གཤིས་ཡག་པོ་མེད་པ་སོགས་ཀྱི་དབང་གིས། གནམ་གྲུ་བརྡབ་སྐྱོན་བྱུང་ནས་མི་གྲངས་ ༦༨ རྐྱེན་འདས་སུ་གྱུར་ཡོད་འདུག

ཡེ་ཊི་མཁའ་ལམ་འགྲིམ་འགྲུལ་ཁང་གི་ (ATR-72) རྟགས་ཅན་གྱི་གནམ་གྲུའི་ནང་དུ་མཁའ་ལམ་ཞབས་ཞུ་བ་མི་གྲངས་ ༤ ཚུད་པའི་འགྲིམ་འགྲུལ་བ་ ༦༨ ཡོད་པའི་ཁྲོད། སྐྱེས་པ་གྲངས་ ༣༧ དང་བུད་མེད་ ༢༥ བྱིས་པ་དམར་རྗེན་ ༣ ཚུད་པའི་ཕྲུ་གུ་ ༦ ཡོད་འདུག་ལ། དེའི་ནང་བལ་པོ་བ་གྲངས་ ༥༣ དང་། རྒྱ་གར་བ་ ༥། ཨུ་རུ་སུ་ནས་མི་གྲངས ༤། ཀོ་རི་ཡ་ ༢། དེ་བཞིན་ཨོ་གླིང་དང་། ཨར་ཇེན་ཊི་ན། ཧྥ་རན་སི། ཨའེ་ལེན་ཌི་བཅས་ནས་མི་གྲངས་གཅིག་རེ་ཡོད་འདུག

དེའི་ཐད་བལ་ཡུལ་གྱི་སྲིད་བློན་པུ་ཤི་པ་ཀ་མལ་ (Minister Pushpa Kamal) ཡི་སྒེར་གྱི་ཊུ་ཝེ་ཊར་དུ། ངས་བལ་ཡུལ་གྱི་བདེ་འཇགས་མི་སྣ་དང་། བལ་ཡུལ་གཞུང་གི་འགྲིམ་འགྲུལ་ལས་ཁུངས་ཁག་སོགས་ཀྱིས་ནུས་པ་ལྡན་པའི་ངང་ནས་མྱུར་སྐྱོབ་བྱ་རྒྱུ་རེ་སྐུལ་ཞུས་ཡོད། ཅེས་དང་། དེ་རིང་བལ་ཡུལ་རྒྱལ་ཁབ་ཀྱི་ལས་ཁུངས་སོགས་སྒོ་བརྒྱབ་ནས། མཁའ་ལམ་འགྲིམ་འགྲུལ་གྱི་དོན་རྐྱེན་ཁྲོད་འདས་གྲོངས་སུ་གྱུར་བའི་མི་རྣམས་ལ་མྱ་ངན་བྱས་ཡོད་འདུག  དེ་བཞིན་རྒྱ་གར་གྱི་སྲིད་བློན་མུ་དྷི་མཆོག་དང་། ཨུ་རུ་སུའི་སྲིད་འཛིན་པུ་ཊིན། བལ་ཡུལ་དུ་ཡོད་པའི་ཨོ་གླིང་གི་གཞུང་ཚབ་པ་སོགས་ཀྱིས་ཀྱང་མྱ་ངན་ཞུས་ཡོད་འདུག་ལ། དེ་རིང་བལ་ཡུལ་གྱི་ཡེ་ཊི་མཁའ་ལམ་ (Yeti Airlines) འགྲིམ་འགྲུལ་ཁང་གིས་ཀྱང་འགྲིམ་འགྲུལ་ཚང་མ་མཚམས་འཇོག་བྱས་ཏེ། རྐྱེན་འདས་སུ་ཕྱིན་པའི་འགྲིམ་འགྲུལ་བ་དག་གི་ཤུལ་ལུས་ནང་མིར་མྱ་ངན་དང་གདུང་སེམས་མཉམ་སྐྱེད་བྱས་ཡོད་འདུག

ཡེ་ཊི་མཁའ་ལམ་འགྲིམ་འགྲུལ་ཁང་གི་ (ATR-72) རྟགས་ཅན་གྱི་གནམ་གྲུ་སྤོག་རའི་གནམ་ཐང་དུ་མ་འབྱོར་གོང་། གློ་བུར་དུ་སེ་ཊི་ (Seti River Gorge) གཙང་ངོགས་སུ་འཕུར་སྐྱོད་བྱས་ཏེ་བརྡབ་སྐྱོན་བྱུང་ཡོད་ཅིང་། སྐབས་དེར་བལ་ཡུལ་གྱི་དམག་མི་དང་། ཉེན་རྟོག་པ་སོགས་ཁུལ་དེར་ཕྱིན་ནས་མྱུར་སྐྱོབ་བྱེད་ཐབས་བྱས་འདུག དེ་བཞིན་ད་ལྟ་དྲ་ལམ་དུ་གནམ་གྲུ་དེའི་ནང་ཡོད་པའི་སྐྱེས་པ་ཞིག་གིས་སྤོག་ར་གྲོང་ཁྱེར་གྱི་ཁང་བརྩེགས་དག་བརྙན་ལེན་བཞིན་པའི་སྐབས། གློ་བུར་དུ་གནམ་གྲུ་བརྡབ་སྐྱོན་བྱུང་སྟེ། མེ་སྟག་མཆེད་པ་ལས་ཅི་ཡང་གོ་ཐོས་སུ་མེད་པར་གྱུར་བའི་བརྙན་ཐུང་ཞིག་དང་། ཡང་སྤོག་རར་ཡོད་པའི་མི་ཞིག་གིས།  གནམ་གྲུ་དེ་སྤོག་རའི་གནམ་ཐང་དུ་མར་བབ་གྲབས་ཡོད་ཀྱང་། གློ་བུར་དུ་གནམ་གྲུ་དེའི་གཤོག་པ་གཅིག་མར་གཡོན་རྗེས། གནམ་གྲུ་དེ་རིག་རྒྱུ་མེད་པ་ཆགས་པའི་བརྙན་སོགས་མཐོང་རྒྱུ་འདུག

ཕྱི་ལོ་ ༡༩༤༩ ལོར་བལ་ཡུལ་ནང་ཐེངས་དང་པོར་གནམ་གྲུ་འཕུར་སྐྱོད་བྱེད་མགོ་བརྩམས་པ་ནས་བཟུང་ད་བར་གནམ་གྲུའི་བརྡབ་སྐྱོན་ཐེངས་ ༤༢ ལྷག་བྱུང་ཡོད་ཅིང་། ཧི་མ་ལ་ཡའི་རི་རྒྱུད་དུ་ཆགས་པའི་བལ་ཡུལ་རྒྱལ་ཁབ་ནི་གནམ་གྲུའི་མཐུན་རྐྱེན་ལེགས་པོ་མེད་པའི་རྒྱལ་ཁབ་ཅིག་ཏུ་ངོས་འཛིན་བྱེད་ཀྱི་ཡོད་པ་མ་ཟད། ད་ལན་གྱི་གནམ་གྲུ་བརྡབ་སྐྱོན་དེ་ནི་བལ་ཡུལ་ནང་གི་ལོ་ངོ་ ༣༠ རིང་གི་དོན་རྐྱེན་ཆེས་ཆེ་ཤོས་ལ་ངོས་འཛིན་བྱེད་ཀྱིན་འདུག་ལ། ཧི་མ་ལ་ཡའི་རི་རྒྱུད་དུ་ཆགས་པའི་རྒྱལ་ཁབ་ཁག་ཏུ་བྱུང་བའི་མཁའ་ལམ་དོན་རྐྱེན་ཆེ་ཤོས་གཉིས་པ་དེ་ཡིན་འདུག ཕྱི་ལོ་ ༡༩༩༢ ལོར་པ་ཀི་སི་ཐན་དུ་གནམ་གྲུའི་དོན་རྐྱེན་བྱུང་བའི་ཁྲོད་མི་གྲངས་ ༡༦༧ འདས་གྲོངས་སུ་གྱུར་ཡོད་ཅིང་། དེ་ནི་ཧི་མ་ཡ་ལའི་རི་རྒྱུད་རྒྱལ་ཁབ་ཁག་ཏུ་བྱུང་བའི་གནམ་གྲུའི་བརྡབ་སྐྱོན་ཆེས་ཆེ་ཤོས་ཤིག་ཏུ་ངོས་འཛིན་བྱེད་ཀྱི་ཡོད་འདུག

ཆེད་མཁས་པ་རྣམས་ཀྱིས་བལ་ཡུལ་དུ་གནམ་གཤིས་ཡག་པོ་མེད་པའི་ཁར། མཁའ་ལམ་ནས་རྒྱང་དུ་ཡག་པོ་མི་མཐོང་བ་དང་རི་རྒྱུད་མང་པོ་ཞིག་ཡོད་སྟབས། བལ་ཡུལ་གྱི་མཁའ་ལམ་ནི་ཡོངས་གྲགས་ཐོག་ཆེས་ཉེན་ཚབས་ཆེ་ཤོས་ཀྱི་ས་ཚིགས་ཤིག་ཏུ་ངོས་འཛིན་བྱེད་ཀྱིན་ཡོད་སྐོར་བརྗོད་ཡོད་འདུག

གསར་འགོད་པ། དཔལ་ལྡན།