ཐའེ་ཝན་གྱི་ཕྱི་སྲིད་བློན་ཆེན་གྱིས་རྒྱ་ནག་གིས་ཕྱི་ལོ་ ༢༠༢༧ ལོར་ཐའེ་ཝན་བཙན་འཛུལ་བྱེད་ཐབས་བྱ་རྒྱུ་ཡིན་པའི་ཉེན་བརྡ་བཏང་ཡོད་འདུག
ཁ་སང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཐའེ་ཝན་གྱི་ཕྱི་སྲིད་བློན་ཆེན་སྐུ་ཞབས་རྗོ་སེབ་ཝུ་ (Joseph Wu) མཆོག་གིས་ཕྱི་ལོ་༢༠༢༧ ལོར་རྒྱ་ནག་གཞུང་གིས་ཐའེ་ཝན་ལ་བཙན་འཛུལ་དང་འཇབ་རྒོལ་བྱ་སྲིད་པའི་ཚོད་དཔག་བྱེད་ཀྱི་ཡོད་འདུག
དེའི་ཐད་ཐའེ་ཝན་གྱི་ཕྱི་སྲིད་བློན་ཆེན་སྐུ་ཞབས་རྗོ་སེབ་ཝུ་ (Joseph Wu) ཡིས། ཉེ་ལམ་རྒྱ་ནག་ནང་རྩོད་རྙོག་མང་པོ་ཡོང་གི་ཡོད་ཅིང་། ཏོག་དབྱིབས་གཉན་རིམས་ཀྱི་རྐྱེན་གྱིས་མི་མང་གི་འཚོ་བ་དང་ཉིན་རེའི་བྱ་གཞག་ཐད་ཕོག་སྡུག་མང་པོ་ཡོང་གི་ཡོད་པ་མ་ཟད། རྒྱལ་ཁབ་ཀྱི་དཔལ་འབྱོར་དཀའ་ངལ་ཤུགས་ཆེན་འཕྲད་བཞིན་ཡོད་པར་བརྟེན། གནད་དོན་དེ་དག་ལས་གཡོལ་ཐབས་སུ་ཕྱི་ལོ་ ༢༠༢༧ ལོར་ཞི་ཅིན་ཕིན་གྱིས་ཐའེ་ཝན་བཙན་འཛུལ་བྱ་རྒྱུའི་ཐབས་ཤེས་བྱ་ངེས་རེད། ཅེས་བརྗོད་ཡོད་འདུག
ད་དུང་ཁོང་གིས། ཞི་ཅིན་ཕིན་རྒྱ་ནག་གི་མགོ་ཁྲིད་ཆགས་པའི་རིང་། རང་གི་རྒྱལ་ཁབ་ཀྱི་དོན་དུ་ལས་དོན་ལེགས་པར་བསྒྲུབ་པ་བཏོན་སླད། ཐའེ་ཝན་བཙན་འཛུལ་བྱ་རྒྱུ་ཡིན་པ་མ་ཟད། ཐའེ་ཝན་དེ་མ་ཉེས་ཁ་གཡོག་བྱ་ཡུལ་གྱི་རྒྱལ་ཁབ་ཅིག་ལ་འགྱུར་རྒྱུའི་སེམས་འཚབ་ཡོད་སྐོར་དང་། ད་ལྟའི་ཆར་རྒྱ་ནག་གིས་ཐའེ་ཝན་ལ་ས་མཚོ་གནམ་གསུམ་གྱི་དམག་མིའི་སྟོབས་ཤུགས་ངོམས་ནས་འཇིགས་སྐུལ་བྱས་དང་བྱེད་མུས་ཡིན་སྐོར་བརྗོད་ཡོད་འདུག
ཐའེ་ཝན་ནི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག་ཀྲུང་ཧྭ་མི་མང་སྤྱི་མཐུན་རྒྱལ་ཁབ་དང་ནམ་ཡང་ཁ་བྲལ་ཐབས་མེད་པའི་ཆ་ཤས་ཤིག་ཏུ་ངོས་འཛིན་བྱེད་མུས་ཡིན་པ་མ་ཟད། ཐའེ་ཝན་གྱི་གཞུང་སྒེར་མང་པོས་ཐའེ་ཝན་རང་བཙན་རྒྱལ་ཁབ་ཞིག་ཏུ་འདོད་ཚེ། རྒྱ་ནག་གཞུང་གིས་དམག་གི་སྟོབས་ཤུགས་ངོམས་ནས་བཙན་འཛུལ་བྱ་རྒྱུ་ཡིན་པའི་འཇིགས་སྐུལ་བྱས་ཡོད་ལ། འདས་པའི་ལོ་ངོ་འགའི་རིང་རྒྱ་ནག་གིས་ཐའེ་ཝན་གྱི་མཁའ་ཁུལ་དུ་དམག་དོན་འཐབ་འཁྲུག་གནམ་གྲུ་མང་པོ་མངག་གཏོང་བྱས་པ་དང་། ཐའེ་ཝན་གྱི་མཚོ་འགག་ཁུལ་དུ་དམག་སྦྱོང་བྱས་ཏེ་ཐའེ་ཝན་ལ་འཇིགས་སྐུལ་ཐེངས་མང་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
སྤྱི་ལོ་༢༠༢༧ གི་སྔོན་ལ་ཞི་ཅིང་ཕིན་བརྗེ་པོ་རྒྱབ་འགྲོ་གི་རེད་། ཐེ་ཝན་ལ་རྒྱ་ནག་གི་དམག་རྒྱབ་ན་ལོ་འདིའི་ནང་ལ་རྒྱག་གི་རེད་ལ་འཛམ་གླིང་དམག་ཆེན་གསུམ་པའི་སྣེ་འཁྲིད་མཁན་དེ་ཡང་རྒྱ་ནག་དང་ཨུ་རུ་སུ་དང་བྱང་ཀོ་རི་ཡ་སོགས་དེ་ཚོའི་སྣེ་འཁྲིད་སྲིད་པ་རེད་།