རྒྱ་ནག་གཞུང་གིས་རྨ་བྱ་ཁ་འབབ་ཀྱི་ཁུལ་དུ་ཆུ་མཛོད་གསར་རྒྱག་བྱས་པ་དེས་རྒྱ་གར་དང་བལ་ཡུལ་ལ་ཆུའི་དཀའ་ངལ་འཕྲད་སྲིད་པ་རེད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ས་ཁམས་ཚན་རིག་གི་ཉམས་ཞིབ་པ་སྐུ་ཞབས་ཌ་མན་སའེ་མོན་(Damien Symon) ལགས་ཀྱིས་མཁའ་ལམ་འཁོར་སྐར་ (satellite) གྱི་པར་རིས་བརྒྱུད་རྒྱ་ནག་གཞུང་གིས་རྒྱ་གར་དང་བལ་ཡུལ་གཉིས་ཀྱི་མཐའ་མཚམས་སུ་ཁེལ་བའི་བོད་ཀྱི་ཆུ་བོ་ཆེན་པོ་རྨ་བྱ་ཁ་འབབ་ཁུལ་དུ་གསང་སྟབས་ཀྱིས་ཆུ་མཛོད་འཛུགས་སྐྲུན་བྱེད་བཞིན་ཡོད་པ་ཤེས་རྟོགས་བྱུང་ཡོད་འདུག
དེའི་ཐད་ཚན་རིག་པ་ཌ་མན་སའེ་མོན་ལགས་ཀྱིས། ཕྱི་ལོ་ ༢༠༢༡ ནས་བཟུང་རྒྱ་ནག་གཞུང་གིས་རྒྱ་གར་དང་བལ་ཡུལ་གྱི་ས་མཚམས་སུ་ཡོད་པའི་བོད་ནང་གི་རྨ་བྱ་ཁ་འབབ་གྱི་བཞུར་རྒྱུན་དུ་ཆུ་མཛོད་གསར་འཛུགས་ཀྱི་ལས་གཞི་ལག་བསྟར་བྱེད་མུས་ཡིན་ཡང་། ད་ལྟ་ལས་གཞི་དེ་ཡོངས་སུ་འགྲུབ་མེད་པ་དང་། རྒྱ་ནག་གཞུང་གིས་ཆུ་མཛོད་གསར་རྒྱག་བྱས་ཏེ། མ་འོངས་པར་ཆུ་ལ་སྟངས་འཛིན་བྱེད་ཕྱོགས་ཀྱི་ཐོག་ནས། རྨ་བྱ་ཁ་འབབ་བཞུར་རྒྱུན་གྱི་ས་ཁུལ་མང་པོར་དཀའ་ངལ་འཕྲད་ཉེན་ཡོད་སྐོར་སོགས་བརྗོད་འདུག
ད་ལྟ་མཁའ་ལམ་འཁོར་སྐར་གྱི་པར་རིས་བརྒྱུད་ཤེས་རྟོགས་བྱུང་བ་ལྟར་ན། རྒྱ་ནག་གཞུང་གིས་རྒྱ་གར་དང་བལ་ཡུལ་གཉིས་ཀྱི་བྱང་ཕྱོགས་ས་མཚམས་ནས་སྤྱི་ལེ་ཁ་ཤས་ལས་མེད་པའི་བོད་སྟོད་མངའ་རིས་སྤུ་ཧྲེང་རྫོང་ཁོངས་སུ་ཆུ་མཛོད་གསར་རྒྱག་བྱེད་མུས་ཡིན་ཞིང་། ཆུ་མཛོད་གསར་པ་དེའི་རིང་ཚད་ལ་མེ་ཊར་ ༣༥༠ ནས་ ༤༠༠ ཙམ་ཡོད་པའི་ཚོད་དཔག་བྱེད་ཀྱིན་འདུག་ལ། བོད་མཐོ་སྒང་ནས་བཞུར་བའི་རྨ་བྱ་ཁ་འབབ་ནི་བོད་བརྒྱུད་བལ་ཡུལ་དང་། རྒྱ་གར། རྒྱ་གར་ནས་བྷང་ལ་དྷེ་ཤིར་བཞུར་ཏེ་མཐར་ཧིན་རྡུ་རྒྱ་མཚོ་ཆེན་པོར་འདྲེས་ཡོད་པ་རེད།
དེ་སྔོན་རྒྱ་ནག་གཞུང་གིས་ཡར་ཀླུང་གཙང་པོའི་བཞུར་རྒྱུན་དུ་ཆུ་མཛོད་གསར་འཛུགས་ཀྱི་ལས་གཞི་མང་པོ་ཞིག་སྤེལ་ཏེ། ཡར་ཀླུང་གཙང་པོའི་བཞུར་རྒྱུན་དུ་ཆགས་པའི་རྒྱལ་ཁབ་ཁག་ལ་ཆུའི་དཀའ་ངལ་ཕྲད་ཡོད་པ་ལྟར། ད་ལྟ་རྒྱ་ནག་གིས་རྨ་བྱ་ཁ་འབབ་ཀྱི་ཁུལ་དུ་ཆུ་མཛོད་གསར་རྒྱག་བྱས་པ་དེས། རྒྱ་ནག་གཞུང་གིས་བོད་ཀྱི་ལྷོ་ཕྱོགས་སུ་ཆགས་པའི་རྒྱལ་ཁབ་ཁག་ཏུ་བོད་ནས་བཞུར་བའི་རྒྱུག་ཆུ་དག་བཀག་འགོག་བྱེད་ཉེན་ཡོད་པ་དང་། ལྷག་པར་རྒྱ་གར་གྱི་ཧིན་རྡུའི་ཆོས་ལུགས་ཀྱི་གནས་ཆེན་དུ་རྩི་བའི་ཆུ་མོ་གངྒ་ལའང་གནོད་སྐྱོན་ཐེབས་སྲིད་པ་མ་ཟད། རྨ་བྱ་ཁ་འབབ་ཁུལ་དུ་ཆུ་རགས་བརྒྱབ་ནས་རྒྱུག་ཆུ་བཀག་འགོག་བྱས་པ་དེས། རྒྱ་གར་བྱང་ཤར་གྱི་མངའ་སྡེ་ཨ་རུ་ན་ཅལ་དང་ཨ་སམ་གཉིས་ལ་དཀའ་ངལ་འཕྲད་སྲིད་པ་དང་། གློ་བུར་དུ་ཆུ་ལོག་རྒྱུག་ཉེན་ཡང་ཡོད་པའི་ཚོད་དཔག་བྱེད་ཀྱིན་འདུག
དེ་བཞིན་རྒྱ་གར་གྱི་ཉམས་ཞིབ་པ་ས་མིར་པའེ་ཊེལ་ (Sameer Patil) ལགས་ཀྱིས། རྒྱ་ནག་གཞུང་གིས་ཧིན་བོད་མཐའ་མཚམས་ཀྱི་གཙང་པོ་དང་རྒྱུག་ཆུའི་ཁུལ་དུ་ཆུ་མཛོད་བརྒྱབ་ནས། བོད་ཀྱི་སྣོད་བཅུད་ལ་གནོད་འཚེ་བཏང་བ་དེས། རྒྱ་གར་གྱི་ཆུའི་ཐོན་ཁུངས་ཐད་ལ་དཀའ་ངལ་ཤུགས་ཆེན་ཞིག་འཕྲད་སྲིད་པ་མ་ཟད། རྒྱལ་ཁབ་གཉིས་ཀྱི་འབྱུང་འགྱུར་གྱི་འབྲེལ་ལམ་ལའང་གནོད་འཚེ་ཤུགས་ཆེན་ཐེབས་སྲིད་སྐོར་སོགས་བརྗོད་འདུག་ལ། དེ་བཞིན་གནས་ཚུལ་དབྱེ་ཞིབ་པ་ཁག་ཅིག་གིས། རྒྱ་ནག་གཞུང་གིས་བོད་མཐོ་སྒང་ནས་ཨེ་ཤ་ཡའི་རྒྱལ་ཁབ་ཁག་ཏུ་བཞུར་གྱིན་པའི་གཙང་པོའི་ཁུལ་དུ་ཆུ་མཛོད་སོགས་བརྒྱབ་པ་དེས། བོད་ཀྱི་ལྷོ་རྒྱུད་དུ་ཆགས་པའི་རྒྱལ་ཁབ་ཁག་ལ་ཆུའི་དཀའ་ངལ་འཕྲད་ཉེན་ཡོད་པའི་ཚོད་དཔག་བྱེད་ཀྱིན་འདུག
འདས་པའི་ལོ་ཤས་ནང་རྒྱ་དཀར་ནག་གཉིས་བར་ས་མཚམས་རྩོད་རྙོག་ཤུགས་ཇེ་ཆེ་རུ་འགྲོ་བཞིན་ཡོད་པ་མ་ཟད། ཕྱོགས་གཉིས་ཀས་ས་མཚམས་སུ་གཞུང་ལམ་དང་ཟམ་པ་སོགས་འཛུགས་སྐྲུན་བྱས་ཏེ་ས་མཚམས་ཀྱི་བདག་དབང་རྩོད་བཞིན་ཡོད་པ་དང་། འདས་ལོའི་ཟླ་ ༧ ནང་བོད་ཧིན་མཐའ་མཚམས་སུ་རྟོག་ཞིབ་དང་དམག་ཆས་དབོར་འདྲེན་སྟབས་བདེ་སོགས་ལ་དམིགས་ཏེ་རྒྱ་ནག་གཞུང་གིས་བོད་ལྷུན་རྩེ་རྫོང་ནས་ཤིན་ཅང་གི་མཱ་ཛ་བར་གྱི་སྤྱི་ལེ་འབུམ་བཞི་ལྷག་གི་མྱུར་སྐྱོད་གཞུང་ལམ་གསར་རྒྱག་གི་ལས་གཞི་ལག་བསྟར་བྱས་ཡོད་པ་དང་། འདས་ལོའི་ཟླ ༥ ནང་རྒྱ་ནག་གཞུང་གིས་བོད་ཧིན་ས་མཚམས་སུ་ཁེལ་བའི་སྤང་གོང་མཚོའི་བྱང་ཕྱོགས་ནས་ལྷོ་ཕྱོགས་བར་དམག་ཆས་དབོར་འདྲེན་སོགས་ཀྱི་ཆེད་དུ་ཟམ་པ་བརྒྱབ་ཟིན་པ་མ་ཟད་དེ་ཁུལ་དུ་གཞུང་ལམ་གསར་རྒྱག་བྱེད་མགོ་བཙུགས་ཡོད་འདུག
གསར་འགོད་པ། དཔལ་ལྡན།
བལ་བོད་ས་མཚམས་སྤུ་ཧྲང་གི་ས་ཁུལ་དུ་རྨ་བྱ་གཙང་པོ་ཆུ་ཕྲན་ཆེན་པོ་རང་ཡོད་པ་མ་རེད།