ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ནང་མི་གསོད་དོན་རྐྱེན་བྱུང་སྟེ་མི་བཅུ་རྐྱེན་འདས་དང་མི་བཅུ་ཙམ་ལ་རྨས་སྐྱོན་བྱུང་ཡོད་འདུག
དེ་རིང་ཕྱི་ཚེས་ ༢༣ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༡ ཉིན་གྱི་དགོང་མོའི་ཆུ་ཚོད་ ༡༠།༢༠ ཙམ་ལ་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ (Monterey Park) གྲོང་ཁྱེར་གྱི་འཁྱུག་བྲོ་འཁྲབ་སྟོན་ཁང་ (Ballroom Dance Studio) ཞིག་གི་ནང་མི་ཞིག་གིས་གང་བྱུང་མེ་མདའ་འཕངས་ཏེ་མི་ ༡༠ རྐྱེན་འདས་སུ་བཏང་བ་དང་མི་ ༡༠ ཡས་མས་ཙམ་ལ་རྨས་སྐྱོན་བཟོས་ཡོད་འདུག
དེ་འབྲེལ་ཐད་ས་གནས་ཉེན་རྟོག་དཔོན་པོ་རའོ་བྷར་ཊི་ (Robert Luna) ལགས་ཀྱིས། ཕྱི་ཚེས་ ༢༡ ཉིན་གྱི་དགོང་མོའི་ཆུ་ཚོད་ ༡༠།༢༠ ཙམ་ལ་གྲོང་ཁྱེར་(Monterey Park) དུ་ཡོད་པའི་འཁྱུག་བྲོ་འཁྲབ་སྟོན་ཁང་ཞིག་གི་ནང་མེ་མདའ་ཐོགས་པའི་མི་ཞིག་གིས་གང་བྱུང་མེ་མདའ་འཕངས་པས། བུད་མེད་ ༥ དང་སྐྱེས་པ་ ༥ གྲོངས་ཡོད་པའི་ནང་ནས་མང་ཆེ་བ་རང་ལོ་ ༥༠ དང་ ༦༠ ནང་ཡིན་པ་དང་། ད་དུང་མི་ ༡༠ ཙམ་ལ་རྨས་སྐྱོན་ཕོག་པའི་ཁྲོད་མི་ ༧ ལ་ད་ལྟའང་སྨན་ཁང་དུ་སྨན་བཅོས་བྱེད་བཞིན་ཡོད་སྐོར་བརྗོད་འདུག
སི་ཨན་ཨན་གསར་ཁང་གི་གནས་ཚུལ་ལྟར་ན། མི་མདའི་དོན་རྐྱེན་དེ་བོད་ལུགས་ལྟར་ན་སོ་ནམ་ལོ་གསར་སྐབས་རྩེད་འཇོལ་ལ་རོལ་བཞིན་པའི་སྐབས་སུ་བྱུང་ཞིང་། དོན་རྐྱེན་ཁྲོད་རྐྱེན་འདས་སུ་འགྲོ་མཁན་མང་ཆེ་བ་ཨེ་ཤ་ཡའི་མི་རྒྱུད་ཡིན་པའི་འགྲེལ་བརྗོད་བྱས་འདུག་པ་དང་། ད་དུང་དོན་རྐྱེན་དེའི་རྒྱབ་ཀྱི་ཉེས་ཅན་པ་ནི་རང་ལོ་ ༧༢ ཡིན་པའི་མིང་ལ་ (Huu Can Tran) ཟེར་བའི་མི་ཞིག་ཡིན་པའི་ཚོད་དཔག་བྱེད་མུས་ཡིན་པ་མ་ཟད། ཁོས་ཆག་སྒོ་བཟོས་རྗེས་ཉེ་འཁྲིས་ (Alhambra) གྲོང་ཁྱེར་དུ་བྲོས་པ་དང་། ས་གནས་དེར་ཡོད་པའི་འཁྲབ་སྟོན་ཁང་གཞན་ཞིག་ཏུ་ཕྱིན་ཡོད་ཀྱང་། སྐབས་དེར་མི་ཁ་ཤས་ཀྱིས་ཁོ་དང་ལག་འཛིངས་བྱས་ཏེ་མེ་མདའ་ལག་ནས་འཕྲོག་ཡོད་སྟབས་དོན་རྐྱེན་གཞན་གང་ཡང་ལྷག་མེད་པ་རེད། འོན་ཀྱང་། ཉེན་རྟོག་པས་ཁ་ལི་ཧྥོ་ནེ་ཡའི་གྲོང་ཁྱེར་ལོ་སི་ཨན་ཇལ་སི་ (Los Angeles) ཁུལ་དུ་ཆུ་ཚོད་ ༡༢ རིང་རྟོག་ཞིབ་དང་འཚོལ་ཞིབ་བྱས་མཐར། ལོ་སི་ཨན་ཇལ་སིའི་(Torrance) ས་ཁུལ་ནས་རང་ལོ་ ༧༢ ལོན་པའི་དོགས་གནས་ཅན་གྱི་མི་དེ་རྙེད་སོན་བྱུང་ཡོད་ཀྱང་། མི་དེས་མེ་མདའ་འཕངས་ནས་རང་ཤི་བརྒྱབ་ཡོད་པ་རེད།
དོན་རྐྱེན་དེའི་ཐད་ཨ་རིའི་སྲིད་འཛིན་རྗོ་བྷའེ་ཌན་མཆོག་གིས། མི་གསོད་དོན་རྐྱེན་དེའི་ཁྲོད་ཤི་རྨས་བྱུང་བའི་མི་རྣམས་ལ་གདུང་སེམས་མཉམ་སྐྱེད་མཚོན་སླད། ཟླ་འདིའི་ཕྱི་ཚེས་ ༢༦ བར་དུ་ཨ་རིའི་ཕོ་བྲང་དཀར་པོ་དང་གཞུང་གི་ཡན་ལག་ལས་ཁུངས་ཁག་ཏུ་རྒྱལ་དར་ཕྱེད་ཕབ་བྱ་དགོས་པའི་བཀའ་གནང་ཡོད་འདུག་པ་དང་། ས་གནས་དང་མངའ་སྡེའི་དཔོན་རིགས་རྣམས་ཀྱིས་མུ་མཐུད་མེ་མདའི་དོན་རྐྱེན་དེའི་ཐོག་ཞིབ་འཇུག་བྱེད་དགོས་པ་དང་། ཨ་རིའི་ནང་སྲིད་བདེ་འཇགས་ལས་ཁུངས་ལ་ཆེད་དུ་དོན་རྐྱེན་དེའི་ཐད་རྒྱབ་སྐྱོར་བྱ་དགོས་པའི་ལམ་སྟོན་གནང་ཡོད་སྐོར་བརྗོད་འདུག
ད་ལྟ་འཛམ་གླིང་ནང་མི་སྒེར་ལ་མེ་མདའི་བདག་དབང་ཆེས་ཆེ་བའི་རྒྱལ་ཁབ་ནི་ཨ་རི་ཡིན་ཞིང་། ཨ་རིའི་ནང་མང་ཚོགས་ཁྲོད་མེ་མདའི་དོན་རྐྱེན་བྱུང་བ་ནི་འཆར་ཅན་ཡིན་པ་དང་། ད་ལན་གྱི་མི་གསོད་དོན་རྐྱེན་དེ་ནི་ཕྱི་ལོ་ ༢༠༢༣ ལོའི་དོན་རྐྱེན་ཐེངས་ལྔ་པ་ཆགས་ཀྱི་ཡོད་འདུག་ལ། འདས་ལོའི་ཕྱི་ཟླ་ ༥ ཚེས་ ༢༤ ཉིན་ཨ་རིའི་མངའ་སྡེ་ཊེག་ས་སི་ (Texas) ཡི་གྲོང་ཁྱེར་ (Uvalde) ནང་གི་སྔོན་འགྲོའི་སློབ་གྲྭ་ཞིག་གི་ནང་དུ་མི་ཞིག་གིས་གང་བྱུང་མེ་མདའ་བརྒྱབ་སྟེ་སློབ་ཕྲུག་ ༡༩ དང་དགེ་རྒན་ ༢ བཅས་ཁྱོན་མི་ ༢༡ བསད་ཡོད་པ་རེད། ཡང་འདས་ལོའི་ཕྱི་ཟླ་ ༡༡ ཚེས་ ༡༩ ཉིན་ཁོ་ལོ་ར་ཌོ་རུ་མཚན་མཐུན་མ་ནིང་མོ་ལོག་གི་མཚན་ཚོགས་ (LGBTQ nightclub) སུ་མི་ཞིག་གིས་མེ་མདའ་བརྒྱབ་སྟེ་མི་ ༥ བསད་པ་དང་མི་ ༢༥ ཙམ་ལ་རྨས་སྐྱོན་ཕོག་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
