སྲིད་སྐྱོང་མཆོག་གིས་ནེའུ་ཛེ་ལན་ཌིའི་སྲིད་བློན་གསར་བར་འཚམས་འདྲི་ཞུས།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ནེའུ་ཛེ་ལེན་ཌིའི་སྲིད་བློན་གསར་པ་ཁི་རི་སི་ཧིབ་ཁིན་ལགས་སུ་བོད་མི་ཡོངས་ཀྱི་ཚབ་བྱས་ནས་འཚམས་འདྲི་དང་སྦྲགས་མུ་མཐུད་བོད་དོན་རྒྱབ་སྐྱོར་གནང་བའི་འབོད་སྐུལ་ཞུས་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ནེའུ་ཛེ་ལན་ཌིའི་སྲིད་བློན་ལྕམ་ཇཱེ་སིན་ཌ་ཨར་དི་རེན་ (Jacinda Ardern) ལགས་སྲིད་བློན་གྱི་ལས་གནས་ནས་རྩ་དགོངས་ཞུས་ཡོད་པར་བརྟེན། ཁོང་མོའི་ཚབ་ཏུ་གྲོས་ཚོགས་འཐུས་མི་ཁི་རི་སི་ཧིབ་ཁིན་ (Chris Hipkins) ལགས་ནེའུ་ཛེ་ལེན་ཌིའི་སྲིད་བློན་གྱི་འོས་མིར་མིང་འདོན་བྱས་འདུག་ལ། སང་ཉིན་ཕྱི་ཚེས་ ༢༥ ཉིན་སྐུ་ཞབས་ཁི་རི་སི་ཧིབ་ཁིན་ལགས་ནས་སྲིད་བློན་གྱི་དམ་འབུལ་ཞུ་རྒྱུ་ཡིན་འདུག

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཊུ་ཝེ་ཊར་ནང་ནེའུ་ཛེ་ལེན་ཌིའི་སྲིད་བློན་གསར་པ་སྐུ་ཞབས་ཁི་རི་སི་ཧིབ་ཁིན་ (Chris Hipkins) ལགས་ལ་འཚམས་འཕྲིན་གནང་བའི་ནང་། བོད་མིའི་སྒྲིག་འཛུགས་དང་བོད་མི་རྣམས་ནས་ཁི་རི་སི་ཧིབ་ཁིན་ལགས་ནེའུ་ཛེ་ལན་ཌིའི་སྲིད་བློན་གསར་པ་ཆགས་པར་འཚམས་འདྲི་ཞུ་ཡི་ཡོད། ནེའུ་ཛེ་ལན་ཌིའི་གཞུང་མང་གཉིས་ཀྱིས་བོད་མི་རྣམས་ལ་ད་བར་གདུང་སེམས་མཉམ་སྐྱེད་གནང་བར་ཐུགས་རྗེ་ཆེ་ཞུ་རྒྱུ་དང་། ཁྱེད་རང་གིས་མགོ་ཁྲིད་པའི་ནེའུ་ཛེ་ལན་ཌིས་བསྐྱར་དུ་བོད་དོན་ལ་རྒྱབ་སྐྱོར་བྱ་རྒྱུ་དང་། བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པར་མཐུན་འགྱུར་བྱ་རྒྱུའི་རེ་བ་ཡོད། ཅེས་བརྗོད་ཡོད་འདུག

དེ་འབྲེལ་ཐད། ཟླ་འདིའི་ཕྱི་ཚེས་ ༢༢ ཉིན་སྐུ་ཞབས་ཁི་རི་སི་ཧིབ་ཁིན་ (Chris Hipkins) ལགས་ཀྱིས། སྲིད་བློན་ལྕམ་ཇཱེ་སིན་ཌ་ལགས་ཀྱི་ཚབ་ཏུ་སྲིད་བློན་གྱི་ལས་འགན་ཁུར་རྒྱུ་བྱུང་བ་ནི། ངའི་མི་ཚེ་ནང་གི་འགན་འཁུར་ཆེ་ཤོས་དང་ཐོབ་ཐང་ཆེ་ཤོས་ཤིག་རེད། ཅེས་དང་། ལྕམ་ཇཱེ་སིན་ཌ་ལགས་ཀྱིས་སྲིད་བློན་གྱི་ཕྱག་ལས་གནང་ཕྱོགས་ལ་བསྟོད་བསྔགས་བཏང་བ་དང་འབྲེལ། ཁོང་མོས་སྲིད་བློན་གྱི་ལས་གནས་སྐབས་དཀའ་ངལ་མང་པོ་ཞིག་ལ་གདོང་ལེན་བྱས་ཡོད་སྐོར་སོགས་བརྗོད་ཡོད་འདུག

ད་ལན་ནེའུ་ཛེ་ལན་ཌིའི་སྲིད་བློན་གློ་བུར་དུ་འཕོ་འགྱུར་གཏོང་གི་ཡོད་པའི་རྒྱུ་རྐྱེན་གཙོ་བོ་ནི། ཟླ་འདིའི་ཕྱི་ཚེས་ ༡༩ ཉིན་ནེའུ་ཛེ་ལན་ཌིའི་སྲིད་བློན་ལྕམ་ཇཱེ་སིན་ཌ་ཨར་དི་རེན་ (Jacinda Ardern) ལགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། འདི་ལོའི་ཕྱི་ཟླ་ ༡༠ པའི་ནང་ནེའུ་ཛེ་ལན་ཌི་རུ་འོས་བསྡུ་བྱ་རྒྱུ་ཡིན་ཡང་། ཁོང་མོ་ཕྱི་ཟླ་ ༢ ཚེས་ ༧ ནང་ཚུད་དུ་སྲིད་བློན་གྱི་ལས་གནས་ནས་དགོངས་པ་ཞུ་རྒྱུ་དང་། མ་འོངས་འོས་བསྡུའི་ནང་སླར་ཡང་མཉམ་ཞུགས་བྱེད་ཀྱི་མེད་སྐོར་བརྗོད་ཡོད་པར་བརྟེན།  ཟླ་འདིའི་ཕྱི་ཚེས་ ༢༡ ཉིན་ངལ་རྩོལ་སྲིད་དོན་ཚོགས་པའི་ (Labour Party) ཚོགས་མི་ཡོངས་ཀྱིས་སྤྱི་མོས་ཐོག་སྐུ་ཞབས་ཁི་རི་སི་ (Chris Hipkins) ལགས་སྲིད་བློན་གྱི་འོས་མིར་མིང་འདོན་བྱས་པ་ཞིག་ཡིན་འདུག མ་ཚད་སྐུ་ཞབས་ཁི་རི་སི་ལགས་ཏོག་དབྱིབས་གཉན་རིམས་ཀྱི་གཉན་འཕྲང་གི་དུས་སྐབས་སུ་ནེའུ་ཛེ་ལན་ཌིའི་འཕྲོད་བསྟེན་བློན་ཆེན་གྱི་འགན་ཁུར་བ་དང་། དེ་བཞིན་ཤེས་ཡོན་དང་ཉེན་རྟོག་ལས་ཁུངས། ནང་སྲིད་སོགས་ཀྱི་བློན་ཆེན་གྱི་ཕྱག་ལས་གནང་མྱོང་བས་ཉམས་མྱོང་དང་མཐོང་རྒྱ་ཚད་ལྡན་པའི་ངོས་འཛིན་འོག་སྲིད་བློན་དུ་བདམས་ཐོན་བྱུང་ཡོད་སྐོར་བརྗོད་མཁན་འདུག

རང་ལོ་ ༤༤ ཡིན་པའི་སྐུ་ཞབས་ཁི་རི་སི་ཧིབ་ཁིན་ལགས་ནི་ཕྱི་ལོ་ ༡༩༧༨ ལོར་ནེའུ་ཛེ་ལན་ཌིའི་ཝེ་ལེན་ཊོན་ (Wellington) ས་ཁུལ་གྱི་ (Hutt Valley) ལུང་གཤོངས་ཤིག་ཏུ་སྐྱེས་ཤིང་། ས་གནས་དེའི་འབྲིང་རིམ་སློབ་གྲྭ་དང་མཐོ་རིམ་སློབ་གྲྭར་སློབ་སྦྱོང་བྱས་རྗེས། ཝེ་ལེན་ཊོན་གྱི་ཝིག་ཊོ་རེ་ཡ་གཙུག་ལག་སློབ་གཉེར་ཁང་དུ་ཆབ་སྲིད་རིག་པ་དང་ཁྲིམས་འགལ་དཔྱད་རིག་ (criminology) གི་རིག་གནས་རབ་འབྱམས་པའི་སློབ་མཐར་ཕྱིན། ཁོང་གིས་ཤེས་ཡོན་ལྷན་ཁང་གི་སློབ་སྟོན་པ་རྒན་པའི་ལས་གནས་གཉེར་ཡོད་ལ། ཕྱི་ལོ་ ༢༠༠༨ ནས་ ༢༠༢༠ བར་དུ་ནེའུ་ཛེ་ལན་ཌིའི་གྲོས་ཚོགས་འཐུས་མི་གནང་བ་དང་། ཕྱི་ལོ་ ༢༠༢༠ ཟླ་ ༧ ནས་ཟླ་ ༡༡ བར་དུ་འཕྲོད་བསྟེན་བློན་ཆེན་གྱི་ཕྱག་ལས་གནང་ཡོད་པ་མ་ཟད། ཕྱི་ལོ་ ༢༠༢༠ ཟླ་ ༡༡ ནས་ཕྱི་ལོ་ ༢༠༢༢ ཟླ་ ༦ བར་ཏོག་དབྱིབས་ ༡༩ འགོག་བཅོས་ཚན་པའི་བློན་ཆེན་གྱི་གོ་གནས་གཉེར། ད་ལྟ་སྐུ་ཞབས་ཁི་རི་སི་ལགས་ཀྱིས་ཤེས་ཡོན་དང་ཉེན་རྟོག་བློན་ཆེན་ལས་ཁུངས། དེ་བཞིན་སྤྱི་དམངས་སྲི་ཞུ་ལྷན་ཁང་སོགས་ཀྱི་བློན་ཆེན་དང་གྲོས་ཚོགས་ཀྱི་ཚོགས་གཙོའི་ (Leader of the House) འོས་འགན་ཁུར་ཡོད་འདུག

གསར་འགོད་པ། བསྟན་འཛིན་ཕུར་བུ།