བྱིས་པ་སྐྱབས་བཅོལ་ཞུ་མཁན་ ༢༠༠ ལྷག་གར་སོང་ཆ་མེད་དུ་གྱུར།

དབྱིན་ཡུལ་གནས་སྤོ་ཡུལ་མིའི་བློན་ཆེན་སྐུ་ཞབས་རོ་བྷེར་ཌི་ཇེན་རི་ཁི་ལགས་ཀྱིས་དབྱིན་ཡུལ་དུ་བྱིས་པ་སྐྱབས་བཅོལ་ཞུ་མཁན་ ༢༠༠ ཙམ་གར་སོང་ཆ་མེད་དུ་གྱུར་བར་སྲུང་སྐྱོབ་བྱེད་དགོས་ཚུལ་འགྲེལ་བརྗོད་བྱས་འདུག

ལོ་རེར་དབྱིན་ཡུལ་ནང་སྐྱབས་བཅོལ་བ་མང་པོ་ཡོང་གི་ཡོད་པའི་ཁྲོད་ཕ་མ་མེད་ཅིང་བྱིས་པ་གཅིག་པུ་སྐྱབས་བཅོལ་དུ་ཡོང་མཁན་མང་པོ་ཡོད་པ་ལྟར། ད་ལྟ་ཆར་དབྱིན་ཡུལ་གྱི་གྲོས་ཚོགས་འཐུས་མི་ཁག་ཅིག་དང་བྱིས་པའི་ཐོབ་ཐང་རྩོད་ལེན་པ་སོགས་ཀྱིས། དབྱིན་ཡུལ་གྲོས་ཚོགས་ནང་ད་ལྟ་དབྱིན་ཡུལ་གཞུང་གི་སྐྱོབ་གསོའི་འོག་གནས་པའི་བྱིས་པ་ ༢༠༠ ལྷག་གར་སོང་ཆ་མེད་དུ་གྱུར་བའི་གནས་ཚུལ་གསལ་འདོན་བྱས་ཡོད་འདུག

དེ་འབྲེལ་གནས་ཚུལ་གྱི་སྐོར་ལ། ཟླ་འདིའི་ཕྱི་ཚེས་ ༢༤ ཉིན་དབྱིན་ཡུལ་གྱི་ཡུལ་མི་གནས་སྤོའི་བློན་ཆེན་དང་ལྗང་ཁུ་སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་རོ་བྷེར་ཊི་ཇེན་རི་ཁི་ (Robert Jenrick) ལགས་ཀྱིས་དབྱིན་ཡུལ་གྲོས་ཚོགས་ནང་དུ། སྐྱབས་བཅོལ་འཕྲལ་སེལ་གནས་སྡོད་མགྲོན་ཁང་དུ་བྱིས་པ་སྐྱབས་བཅོལ་ཞུ་མཁན་ ༢༠༠ ཙམ་གར་སོང་ཆ་མེད་དུ་གྱུར་ཡོད་པ་དང་། དེའི་ཁྲོད་དུ་ལོ་ ༡༦ མན་ཆད་ཀྱི་བྱིས་པ་ ༡༣ དང་བུ་མོ་ ༡ ཡོད་འདུག དེའི་ནང་ནས་བརྒྱ་ཆ་ ༨༨ ཨལ་བྷ་ནི་ཡ་ (Albania) རྒྱལ་ཁབ་ནས་ཡིན་འདུག་ལ། བརྒྱ་ཆ་ ༡༢ ནི་ཨབ་གྷན་དང་ཨེ་ཇབ། རྒྱ་གར། ཝི་ཏི་ནམ། པཱ་ཀི་སི་ཐན། ཌོར་ཁི་(Turkey)བཅས་ནས་ཡིན་འདུག ཕྱི་ལོ་ ༢༠༢༡ ཟླ་ ༧ ནས་བཟུང་སྐྱབས་བཅོལ་འཕྲལ་སེལ་སྡོད་གནས་ནས་སྔ་རྗེས་བྱིས་པའི་གྲངས་ ༤༦༠༠ ལྷག་ལ་སྡོད་གནས་མཁོ་སྤྲོད་ཐུབ་ཡོད་ཀྱང་། ཉེ་ཆར་བྱིས་པ་གྲངས་ ༤༤༠ ལས་བྱིས་པ་ ༢༠༠ ལྷག་ད་དུང་གར་སོང་ཆ་མེད་གྱུར་ཡོད་ཅེས་གསལ་འདོན་བྱས་ཡོད་པ་རེད།

ཡང་ངལ་རྩོལ་བདེ་དོན་ཚོགས་པའི་ཁྲིམས་རྩོད་པ་ཕེ་ཊིར་ཁེལ་(peter kyle) ལགས་ཀྱིས། དབྱིན་ཡུལ་ལྷོ་ཕྱོགས་མཚོ་འགྲམ་གྱི་བྷི་རི་ཊོན་གྲོང་གསེབ་ཀྱི་མགྲོན་ཁང་ཞིག་ནས་བྱིས་པ་༧༦ གར་སོང་ཆ་མེད་དུ་གྱུར་ཡོད། དོན་དངོས་ཐོག་གྲོས་ཚོགས་འདིའི་ནང་ཡོད་པའི་འཐུས་མི་ཞིག་གི་བྱིས་པ་བོར་བརླག་བྱུང་ཚེ། དེ་ནི་ཧ་ཅང་གནད་དོན་ཆེན་པོ་ཞིག་ཏུ་གྱུར་བ་རེད། ངས་བྱིས་པ་བོར་བརླག་བྱུང་བ་དག་གི་ཚབ་མཚོན་བྱེད་ཀྱི་ཡོད། ང་ཚོས་དང་པོ་བྱིས་པ་གཅིག་བོར་བརླག་བྱུང་བ་དང་། དེ་ནས་བྱིས་པ་ ༥ བོར་བརླག དེའི་རྗེས་སུ་བྱིས་པ་ ༡༠ དང་། དེའི་རྗེས་བྱིས་པ་ ༥༠ བོར་བརླག་བྱུང་། དེ་རིང་བྱིས་པ་ ༧༦ བར་བརླག་བྱུང་ཡོད་ཀྱང་། ང་ཚོས་དེའི་ཐད་འགན་དང་ལས་དོན་གཅིག་ཀྱང་སྒྲུབ་ཀྱི་མེད།  ཅེས་བརྗོད་འདུག

ངལ་རྩོལ་ཡུལ་མི་གནས་སྤོ་ཚོགས་པའི་མགྲིན་ཚབ་པ་ཡེ་ཝེ་ཌི་ཁོ་ཕར་ Yvette Cooper) ལགས་ཀྱིས་གཞུང་གི་ལས་དོན་འཐུས་ཤོར་བཏང་སྟེ་བྱིས་པ་རྣམས་ཉེན་ཁའི་གཡུགས་འདུག་ཅེས་གཞུང་ལ་སྐྱོན་བརྗོད་བྱས་ཡོད་པ་དང་། དེ་བཞིན་དབྱིན་ཡུལ་བྱིས་པའི་ལྷན་ཚོགས་ཀྱི་འགན་འཛིན་རཱ་ཆལ་ཌེ་སོ་ཛ་ (Rachel de Souza) ལགས་ཀྱིས། སྐྱབས་བཅོལ་འཕྲལ་སེལ་གནས་སྡོད་མགྲོན་ཁང་ནས་བྱིས་པ་བོར་བརླག་བྱུང་བ་དེས་སླར་ཡང་བྱིས་པ་རྣམས་ཉེན་ཁའི་ནང་ལྷུང་ཡོད་པ་བསྟན་ཡོད།  ངས་བྱིས་པ་ཚོའི་བདེ་འཇགས་ལ་སེམས་འཁུར་བྱེད་བཞིན་ཡོད། ཁོ་ཚོས་དབྱིན་སྐད་ཤེས་ཀྱི་མེད་ལ། བྱིས་པ་མང་པོ་ཞིག་ལ་དྲ་ལམ་གྱི་མཐུན་རྐྱེན་མེད་པ་མ་ཟད། ཁོང་ཚོར་རང་ཉིད་ཀྱི་ཐོབ་ཐང་སྐོར་ཤེས་རྟོགས་གང་ཡང་མེད་ཅེས་བརྗོད་འདུག

དབྱིན་ཡུལ་དུ་ལོ་རྟག་པར་ཡུ་རོབ་གླིང་ཆེན་གྱི་ཨི་ཊ་ལི་དང་། འཇར་མན། ཧྥ་རན་སི་སོགས་ནས་སྐྱབས་བཅོལ་ཞུ་མཁན་གྱི་མི་གྲངས་མང་པོ་འབྱོར་གྱི་ཡོད་འདུག་ལ། ཕྱི་ལོ་ ༢༠༢༢ ནང་དུ་དབྱིན་ཡུལ་གྱི་ཅན་ནལ་མཚོ་འགྲམ་གྱི་མཚོ་གྲུ་ཆུང་བ་བརྒྱུད་ནས་མི་གྲངས་ ༤༥༠༠༠ ལྷག་སྐྱབས་བཅོལ་དུ་འབྱོར་བའི་ཁྲོད་ནས་ཁ་ཤས་ཞིག་རྐྱེན་འདས་བྱུང་ཡོད་པའི་གནས་ཚུལ་ཡང་བྱུང་ཡོད་པ་དང་། ཕྱི་ལོ་ ༢༠༢༢ ལོར་དབྱིན་ཡུལ་ནང་ཕ་མ་གཉེན་ཉེ་ལྷན་དུ་མེད་པའི་བྱིས་པ་ཁྱོན་ ༤༨༩༦ འབྱོར། ཕྱི་ལོ་ ༢༠༢༠ ལོར་འཛམ་གླིང་ཁྱོན་ཡོངས་ནས་བྱིས་པ་གྲངས་ ༢༡༠༠༠ ལྷག་གིས་དབྱིན་ཡུལ་གྱི་སྐྱབས་བཅོལ་ཞུས་ཡོད་འདུག

གསར་འགོད་པ། བྱམས་པ་ཚེ་རིང་།