ཨ་རིའི་མཐུན་ཕྱོགས་རྒྱལ་ཁབ་ཁག་གིས་རྒྱ་ནག་གཞུང་གི་གནོན་ཤུགས་ལ་འགོག་རྒོལ་བྱས་ཏེ་རང་རང་གི་ས་མཚམས་སྲུང་སྐྱོབ་དང་མཉམ་འབྲེལ་དམག་དོན་ལས་དོན་སྤེལ་མུས་ཡིན་འདུག
འདས་པའི་ལོ་ཤས་རིང་རྒྱ་ནག་གཞུང་གིས་ས་མཚོ་གནམ་གསུམ་གྱི་དམག་གི་སྟོབས་ཤུགས་སྐྱེད་ནས། རྒྱ་གར་རྒྱ་མཚོ་དང་ཞི་བདེ་རྒྱ་མཚོ་སོགས་ཀྱི་ཁུལ་དུ་དབང་ཤུགས་རྒྱ་སྐྱེད་གཏོང་ཐབས་བྱེད་མུས་ཡིན་པ་ལྟར། ཕྱི་ཟླ་ ༡ ཚེས་ ༣༡ ནས་ཉིན་གྲངས་གཉིས་རིང་ཨ་རི་དང་རྒྱ་གར་གཉིས་ཀྱི་བདེ་སྲུང་སློབ་སྟོན་པ་སྐུ་ཞབས་ཇེག་སི་ལི་ཝན་ (Jake Sullivan) དང་ཨར་ཇིད་དྷོ་ཝལ་ (Ajit Doval ) གཉིས་ཀྱི་སྣེ་ཁྲིད་འོག ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་ཁབ་གཉིས་ཀྱི་རྒྱལ་སྲུང་དང་རྒྱ་ནག་གཞུང་གི་དབང་ཤུགས་ལ་ཇི་ལྟར་འགོག་རྒོལ་བྱ་དགོས་མིན་གྱི་ཐད་དང་། རྒྱལ་ཁབ་གཉིས་ཀྱི་མཉམ་ལས་ཀྱི་ཐོག་ནས་དམག་གི་སྟོབས་ཤུགས་གོང་འཕེལ་གཏོང་ཐབས་ཚུད་པའི་རྒྱ་གར་ཞི་བདེ་རྒྱ་མཚོ་ཁུལ་དུ་ཇི་ལྟར་དམག་དོན་གྱི་འཛུགས་སྐྲུན་བྱ་དགོས་མིན་སོགས་ཀྱི་ཐད་ལ་གླེང་སློང་བྱས་ཡོད་འདུག
དེའི་ཐད་སྐུ་ཞབས་ཇེག་སི་ལི་ཝན་ (Jake Sullivan) ལགས་ཀྱིས་ཊི་ཝེ་ཊར་དུ། རྒྱ་གར་གྱི་བདེ་སྲུང་སློབ་སྟོན་པ་སྐུ་ཞབས་ཨར་ཇིད་དྷོ་ཝལ་ལགས་དང་ཐུག་འཕྲད་བྱས་ཏེ། ཨ་རྒྱ་གཉིས་ཀྱི་མཉམ་འབྲེལ་རྒྱལ་སྲུང་དང་ཐབས་ཇུས་འཕྲུལ་རིགས་ཀྱི་གོམ་སྟབས་གསར་པ་ཞིག་མགོ་འཛུགས་བྱ་འཆར་ཡོད་ཅིང་། ང་ཚོས་མཉམ་འབྲེལ་གྱི་ཐོག་ནས་ཚོང་དོན་ཡར་རྒྱས་གཏོང་ཐབས་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་བརླིང་ཡོང་ཐབས་བྱ་རྒྱུ་ཡིན། ཞེས་བརྗོད་ཡོད་འདུག ཡང་ཁོང་གིས་རྒྱ་ནག་གཞུང་གིས་དམག་དོན་དང་ཚོང་འབྲེལ་གྱི་ཁེ་ཕན་ཐོག་ནས་རྒྱ་གར་ལ་གནོན་ཤུགས་སྤྲད་ཉེན་ཡོད་པས། རྒྱ་གར་གཞུང་གིས་དོགས་ཟོན་བྱ་དགོས་སྐོར་སོགས་ཀྱང་བརྗོད་འདུག
ད་ལན་གྱི་ཚོགས་འདུ་འདིའི་བརྒྱུད་ཨ་རིས་རྒྱ་གར་གྱི་དམག་དོན་ཐད་འཕུར་གནམ་གྲུ་སོགས་ཀྱི་འཕྲུལ་ཆས་མ་ལག་གཙོ་བོ་ (engines) དང་། གོ་མཚོན་བཟོ་ལས་རིག་རྩལ་གོང་མཐོར་གཏོང་བར་རོགས་འདེགས་དང་མཉམ་ལས་བྱ་རྒྱུ་ཡིན་འདུག་ལ། དེ་བཞིན་རྒྱ་གར་གཞུང་གི་བདེ་སྲུང་གི་ཆེད་དུ་ཨ་རིས་རྒྱ་གར་མཁའ་ལམ་འཕུར་སྐྱོད་ཀྱི་ལས་དོན་སོགས་ཚུད་པའི་མཁའ་ལམ་འཕྲུལ་རིགས་སོགས་ཡར་རྒྱས་གཏོང་བར་རོགས་འདེགས་བྱ་རྒྱུའི་མོས་མཐུན་བྱུང་ཡོད་འདུག་ཀྱང་། ཁ་སང་རྒྱ་ནག་གོ་ལའི་དུས་བབ་ཏུ་རྒྱ་ནག་གཞུང་གི་རྒྱལ་སྤྱིའི་འབྲེལ་ལམ་ཚན་པའི་ཉམས་ཞིབ་པ་ལུའུ་ཆན་ཧའོ་ (Lou Chunhao) ཡིས་ཨ་རིས་རྒྱ་གར་གཞུང་སླུ་བྲིད་བྱས་ནས། རྒྱ་ནག་གཞུང་གི་ལས་དོན་དང་རྒྱ་དཀར་ནག་གཉིས་འགལ་བ་བཟོ་ཐབས་བྱེད་ཀྱི་ཡོད་པ་ལས། རྒྱ་དཀར་ནག་གཉིས་ནི་ཁྱིམ་མཚེས་རྒྱལ་ཁབ་ཡིན་སྟབས་ཚོང་འབྲེལ་ཡང་ཡག་པོ་ཡོད་པས། རྒྱ་ནག་གཞུང་གིས་མུ་མཐུད་རྒྱ་གར་ལ་ཚོང་གི་འབྲེལ་བ་བཙུགས་ནས། ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏོང་ཐབས་བྱེད་མུས་ཡིན་ལུགས་སོགས་བཤད་ཡོད་འདུག
ཨ་རིས་རྒྱ་ནག་གཞུང་གི་ཨེ་ཤ་ཡའི་ཁུལ་དུ་དབང་ཤུགས་སྐྱེད་མུས་ཡིན་པར་འགོག་རྒོལ་དྲག་པོ་བྱས་ཏེ། རྒྱ་གར་གཙོ་བོར་གྱུར་བའི་ཨེ་ཤ་ཡའི་རྒྱལ་ཁབ་ཁག་ལ་དམག་དོན་སོགས་ཀྱི་ཐད་རོགས་འདེགས་བྱེད་མུས་ཡིན་པ་ལྟར། འདས་ལོའི་ཕྱི་ཟླ་ ༡༡ ཚེས་ ༢༨ ནས་ཕྱི་ཟླ་ ༡༢ པའི་བདུན་ཕྲག་དང་པོའི་གཟའ་མཇུག་བར་རྒྱ་གར་དང་ཨ་རི་གཉིས་ཀྱིས་རྒྱ་གར་བྱང་ཕྱོགས་ཨུ་ཊར་ཁཱན་གྱི་ཅ་མོ་ལི་རྫོང་ (Chamoli District) གི་ཨའོ་ལི་ (Auli) ཞེས་པའི་བོད་ཧིན་ས་མཚམས་ཀྱི་རི་ཁུག་ཅིག་ཏུ་མཉམ་འབྲེལ་དམག་སྦྱོང་བྱས་ཡོད་ཅིང་། དེ་ནི་ཨ་རྒྱ་གཉིས་ཀྱི་མཉམ་འབྲེལ་དམག་སྦྱོང་ཐེངས་ ༡༨ པ་དང་མཉམ་འབྲེལ་དམག་སྦྱོང་ཆེས་གསར་ཤོས་དེའང་ཡིན་པ་རེད། རྒྱ་གར་གཞུང་གིས་རྒྱ་ནག་གི་དམག་ཤུགས་ལ་གདོང་རྒོལ་ཆེད། ཧིན་བོད་ས་མཚམས་ཁག་ཏུ་དམག་མི་དཔུང་འཇུག་དང་དམག་དོན་གྱི་ལས་དོན་མང་པོ་ཞིག་སྤེལ་མུས་ཡིན་པ་མ་ཟད། རྒྱ་གར་གཞུང་གིས་ཧིན་བོད་མཐའ་མཚམས་ཀྱི་ཆུ་ཤུལ་ (Chushul) ནས་བདེ་མཆོག་ (Demchok) བར་སྤྱི་ལེ་ ༡༣༥ ཅན་གྱི་གཞུང་ལམ་གསར་རྒྱག་གི་ལས་གཞི་ལག་བསྟར་བྱེད་མགོ་བཙུགས་ཡོད་ཅིང་། རྒྱ་གར་གཞུང་གི་མཐའ་མཚམས་ཀྱི་དམག་མི་དང་གོ་མཚོན་དབོར་འདྲེན་བྱ་སའི་གཞུང་ལམ་དེ་མི་ལོ་གཉིས་ཀྱི་ནང་ཚུད་དུ་འཛུགས་སྐྲུན་ཚར་བ་བྱ་རྒྱུ་ཡིན་འདུག་ལ། རྒྱ་གར་གཞུང་གིས་མངོན་གསལ་དོད་པོའི་ཐོག་ནས་རྒྱ་ནག་གི་གནོན་ཤུགས་ལ་འགོག་རྒོལ་བྱེད་མུས་ཡིན་འདུག
དེ་བཞིན་འདས་པའི་ལོ་ཤས་རིང་ཨ་རིའི་མཐུན་ཕྱོགས་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་ཀྱིས་གྲུབ་པའི་ཕྱོགས་ཁག་རྒྱལ་ཁབ་བཞི་ཡི་ཚོགས་སྡེ་ (Quad) ཡིས་ཀྱང་། མཉམ་ལས་ཀྱི་ཐོག་ནས་རྒྱ་ནག་གཞུང་གི་དབང་ཤུགས་རྒྱ་སྐྱེད་པར་འགོག་རྒོལ་བྱས་ཡོད་ཅིང་། ཨེ་ཤ་ཡའི་བྱང་ཆིངས་སྒྲིག་འཛུགས་ (ASIAN NATO) སུ་འབོད་པའི་ཕྱོགས་ཁག་རྒྱལ་ཁབ་བཞིས་ཨེ་ཤ་ཡའི་ཁུལ་གྱི་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཀྱིན་ཡོད་ཅིང་། འདས་པའི་ལོ་ཤས་རིང་རྒྱ་གར་ཞི་བདེ་རྒྱ་མཚོའི་མངའ་ཁུལ་དུ་ཨ་རི་དང་ཉི་ཧོང་། རྒྱ་གར་བཅས་ནས་དམག་སྦྱོང་བྱས་པར་ཨོ་སི་ཊོ་ལི་ཡ་མཉམ་ཞུགས་བྱས་མེད་ཀྱང་། ཕྱི་ལོ་ ༢༠༢༠ ལོར་ཨོ་སི་ཊོ་ལི་ཡའི་དམག་དཔུང་ཡང་དམག་སྦྱོང་དེར་མཉམ་ཞུགས་བྱས་འདུག་པས། དེ་ནི་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་རྗེས། ཨེ་ཤ་ཡའི་རྒྱལ་ཁབ་ཁག་གིས་ཀྱང་རྒྱ་ནག་གི་གནོན་ཤུགས་ལ་འགོག་རྒོལ་དང་དོགས་ཟོན་ནན་མོ་བྱེད་ཀྱིན་ཡོད་པ་རེད་འདུག
གསར་འགོད་པ། དཔལ་ལྡན།