ཐའེ་པའེ་རྒྱལ་སྤྱིའི་དཔེ་དེབ་ཁྲོམ་འདུས་ཐེངས་ ༣༡ པའི་ཐོག་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་བོད་ཀྱི་དཔེ་དེབ་ཁག་ཅིག་འགྲེམས་སྟོན་དང་སྦྲགས་བོད་དོན་དང་འབྲེལ་བའི་གཏམ་བཤད་གནང་འདུག
ཕྱི་ཟླ་ ༡ ཚེས ༣༡ ནས་ཕྱི་ཟླ་ ༢ ཚེས་ ༥ བར་དུ་ཐའེ་ཝན་གྱི་རྒྱལ་ས་ཐའེ་པའེ་རུ། པོ་ལན་ཌི་རྒྱལ་ཁབ་ཀྱི་གོ་སྒྲིག་འོག ཐའེ་པའེ་རྒྱལ་སྤྱིའི་དཔེ་དེབ་ཁྲོམ་འདུས་ཐེངས་ ༣༡ པ་འཚོག་བཞིན་ཡོད་པ་དང་། ཁྲོམ་འདུས་དེའི་ཐོག་རྒྱལ་སྤྱིའི་ཚོགས་སྡེ་ཁག་གི་གནད་ཡོད་མི་སྣ་མང་པོ་ཞིག་གདན་འདྲེན་ཞུས་ཏེ་གཏམ་བཤད་གནང་བཞིན་ཡོད་པ་དང་། བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་༧གོང་ས་མཆོག་གི་མཛད་རྣམ་དང་། བོད་ནང་གི་སྐུ་ལུས་མེར་བསྲེགས་གནང་མཁན་གྱི་སྐུ་པར་དང་ཞལ་ཆེམས་སོགས་འགྲེམས་སྟོན་གནང་ཡོད་པ་མ་ཟད། འབྲེལ་མཐུད་ཁང་དེའི་འགན་འཛིན་གཞོན་པ་བཀྲ་ཤིས་ཚེ་རིང་ལགས་ཀྱིས་ཐེངས་འདིའི་དཔེ་དེབ་ཁྲོམ་འདུས་སྟེང་བོད་དོན་འབྲེལ་བའི་གཏམ་བཤད་གནང་ཡོད་འདུག
ཁྲོམ་འདུས་ཐོག་བཀྲ་ཤིས་ཚེ་རིང་ལགས་ཀྱིས། ཕྱི་ལོ་ ༡༩༥༩ ལོར་བོད་མི་མང་པོ་བཙན་བྱོལ་དུ་འབྱོར་ནས་ཟླ་བ་ཁ་ཤས་ཀྱི་རྗེས་སུ་རང་ཉིད་ཀྱི་ཕ་ཡུལ་དུ་ལོག་ཐུབ་པ་རེད་བསམ་ཡོད་ཡང་། བཙན་བྱོལ་མི་རབས་དང་པོའི་བོད་པ་རྣམས་རང་ཁྱིམ་དུ་གཏན་ནས་ལོག་ཐུབ་ཡོད་པ་མ་རེད། ང་ནི་བཙན་བྱོལ་དུ་འཚར་ལོངས་བྱུང་བའི་བོད་པའི་མི་རབས་གཉིས་པ་དེ་ཡིན་ཡང་། རང་ཉིད་ཀྱི་རྒྱལ་ཁབ་མིག་གིས་མཐོང་མྱོང་མེད། དེ་རིང་ངས་བོད་གཞེས་བྱེས་གཉིས་དང་བོད་མི་ས་ཡ་དྲུག་གི་ཚབ་བྱས་ཏེ་ཐའེ་ཝན་ནང་གོ་རྟོགས་སྤེལ་འདོད་བྱུང་། ཞེས་སོགས་བརྗོད་འདུག
འདི་གའི་གསར་འགོད་པས་ཞལ་པར་བརྒྱུད་ཁོང་ལ་བོད་དོན་གཏམ་བཤད་སྐོར་སྐད་ཆ་དྲིས་པར་ཁོང་གིས། བོད་པ་རྣམས་བཙན་བྱོལ་དུ་ཡོང་དགོས་པའི་རྒྱུ་མཚན་དང་། བཙན་བྱོལ་ནང་གི་བོད་དོན་འཐབ་རྩོད་ཀྱི་གནས་བབ། རྒྱ་གཞུང་གིས་བཅིངས་གྲོལ་བཏང་ཟེར་ནས་བོད་ནང་དུ་གདུག་རྩུབ་བྱས་ཏེ། བོད་མི་ ༡༥༦ ལྷག་གིས་རང་ལུས་མེར་བསྲེགས་གཏོང་དགོས་བྱུང་བའི་སྐོར། དེ་བཞིན་བཙན་བྱོལ་ནང་དུ་༧གོང་ས་མཆོག་གི་ཐུགས་རྗེའི་བཀའ་དྲིན་ལ་རྟེན་ནས་དམངས་གཙོ་ཡང་དག་ལོངས་སྤྱོད་བཞིན་ཡོད་པ་དང་། རྒྱ་ནག་ལ་མཚོན་ན་རྒྱལ་ཁབ་ཡོད་ཀྱང་རང་དབང་དང་དམངས་གཙོ་ཐོབ་ཐང་མེད་པའི་སྐོར་དང་། ཕྱི་ལོ་ ༢༠༡༡ ནས་ཐའེ་ཝན་ནང་དུ་རྐང་འཁོར་བསྐོར་བསྐྱོད་ཀྱི་ལས་འགུལ་ཞིག་མགོ་ཚུགས་ཏེ། རྒྱ་ནག་སྐམ་ས་ནས་ཡོང་བཞིན་པའི་ཡུལ་སྐོར་སྤྲོ་འཆམ་པ་དང་གཞོན་སྐྱེས་རྣམས་རང་དབང་ལུང་པའི་ནང་གི་དམངས་གཙོ་དང་། རྒྱ་གཞུང་གིས་བོད་པའི་ཐོག་གདུག་རྩུབ་དང་། རིག་གཞུང་རྩ་མེད་གཏོང་བཞིན་པའི་སྐོར་སོགས་འགྲེལ་བརྗོད་གནང་ཡོད་སྐོར་བརྗོད་བྱུང་།
ཐའེ་ཝན་མི་མང་གིས་བོད་དོན་ཐད་དོ་སྣང་ག་འདྲ་ཡོད་མེད་སྐོར་ལ་ཁོང་གིས། དང་པོ་ཐའེ་ཝན་མི་མང་དང་ཐུག་སྐབས་བོད་བརྒྱུད་ནང་བསྟན་བཤད་ཡོང་གི་འདུག གཞོན་སྐྱེས་ཤིག་ལ་ཐུག་ནས་སྐད་ཆ་བཤད་སྐབས་བོད་དོན་སྐོར་ལ་གོ་རྟོགས་ཇི་ཙམ་ཡོད་ཀྱང་། མཐའ་མར་ཁོའི་ཕ་མ་བོད་བརྒྱུད་ནང་བསྟན་གྱི་སློབ་མ་ཡིན་པ་བཤད་ཡོང་གི་འདུག བོད་པ་ཡིན་ན་གྲྭ་ཆས་གྱོན་མི་འདུག་ཅེས་བཤད་ཡོང་མཁན་ཡང་འདུག བོད་པ་ཡིན་དུས་གྲྭ་པ་ཡིན་དགོས་པ་ཞིག་ཀྱང་མཐོང་གི་ཡོད་ས་རེད། བོད་པ་མཐོང་སྟངས་འདྲ་མི་འདྲ་ཡིན་ས་རེད། ལོ་ ༤༠ ཡས་མས་ཀྱི་སྔོན་ལ་ཐའེ་ཝན་གྱི་སློབ་ཚན་ནང་དུའང་བོད་རྒྱ་ནག་གི་ཁ་ཤས་ཡིན་ཞེས་བྲིས་ཡོད་པ་རེད། གོ་མིན་ཏང་གི་མི་ཐོག་རྒན་པ་དེ་ཚོས་བཤད་ཚུལ་དེ་ག་རང་རེད། ད་ལྟ་བོད་པ་གོ་ཡོང་དུས་རྒྱ་ནག་གི་མནར་གཅོད་འོག་ཏུ་ཡོད་པ་དང་། ༧གོང་ས་མཆོག་གི་ཐུགས་རྗེ་བཀའ་དྲིན་འོག་ཏུ་མུ་མཐུད་དུ་གནས་ཡོད་པ་བཤད་མཁན་ཧ་ཅང་མང་པོ་རེད། ཅེས་བརྗོད་བྱུང་།
ཐའེ་པའེ་རྒྱལ་སྤྱིའི་དཔེ་དེབ་འགྲེམས་སྟོན་ཁྲོམ་འདུས་ནི་ཕྱི་ལོ་ ༢༠༠༨ ནས་མགོ་འཛུགས་གནང་ཡོད་པ་དང་། ཕྱི་ལོ་ ༢༠༡༦ ལོར་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་དེབ་སྐྱེལ་བྱས་ཏེ་ལོ་ལྟར་དཔེ་དེབ་ཁྲོམ་འདུས་དེར་མཉམ་ཞུགས་གནང་ནས་བོད་དོན་དྲིལ་བསྒྲགས་དང་གོ་རྟོགས་སྤེལ་བཞིན་ཡོད་འདུག དེ་བཞིན་ལོ་ལྟར་ཕྱི་ཟླ་ ༢ ཚེས་ ༨ ཉིན་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་གོ་སྒྲིག་འོག བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་ཞིག་སྤེལ་གྱི་ཡོད་པ་དང་། སྐབས་དེར་ས་གནས་ཀྱི་རྒྱ་མིའི་དངུལ་ཁང་གི་རྒྱ་མི་ ༢༠ ལྷག་གིས་མིང་འདོགས་བྱས་ཏེ་ངོ་རྒོལ་བྱས་ཏེ་འགོག་རྐྱེན་བཟོ་ཡི་ཡོད་འདུག
གསར་འགོད་པ། བྱམས་པ་ཚེ་རིང་།
