ཨ་རིའི་རྒྱལ་སྲིད་དྲུང་ཆེ་ཨེན་ཏོ་ནི་བྷི་ལིན་ཀིན་མཆོག་ཉིན་གྲངས་ ༢ རིང་རྒྱ་ནག་ཏུ་ཕེབས་ཏེ་ཞི་ཅིན་ཕིང་དང་ཕྱི་སྲིད་བློན་ཆེན་སོགས་ལ་ཐུག་འཕྲད་གནང་འཆར་ཡོད་པ་ལྟར་བོད་ནང་གི་ཛ་དྲག་གནས་སྟངས་གླེང་སློང་དང་༧གོང་ས་མཆོག་སྐུ་འཚོ་བཞུགས་སྐབས་བོད་རྒྱ་འབྲེལ་མོལ་བསྐྱར་གསོ་ཡོང་ཐབས་གནང་དགོས་པའི་འབོད་སྐུལ་ནན་པོ་ཞུས་འདུག
ཟླ་འདིའི་ཕྱི་ཚེས་ ༥ དང་ ༦ ཉིན་ཨ་རིའི་རྒྱལ་སྲིད་དྲུང་ཆེ་སྐུ་ཞབས་ཨེན་ཐོ་ནི་བྷི་ལིན་ཀིན་( Antony Blinken )མཆོག་རྒྱ་ནག་གི་རྒྱལ་ས་པེ་ཅིང་དུ་གཞུང་འབྲེལ་ཕྱོགས་ཕེབས་གནང་སྟེ། ཞི་ཅིན་ཕིང་དང་ཕྱི་སྲིད་བློོན་ཆེན་སོགས་ལ་ཐུག་འཕྲད་གནང་འཆར་ཡོད་པ་དང་། ད་ལན་ཨ་རིའི་བློན་ཆེན་ཁོང་རྒྱ་ནག་ཏུ་ཕེབས་པ་ཐེངས་དང་པོ་ཆགས་ཡོད་པ་རེད། ཁོང་རྒྱ་ནག་ནང་ཕེབས་འཆར་ཡོད་པ་དང་བསྟུན། ཁ་སང་ཨ་རིར་རྟེན་གཞི་བྱས་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཕྱི་སྲིད་བློན་ཆེན་མཆོག་ལ་ཡོངས་ཁྱབ་ཐོག་འབོད་སྐུལ་ཞིག་ཞུས་པའི་ནང་། ཨ་རིའི་ཕྱི་སྲིད་བློན་ཆེན་མཆོག་རྒྱ་ནག་ནང་གཞུང་འབྲེལ་འཚམས་གཟིགས་སུ་ཕེབས་སྐབས། རྒྱ་ནག་གི་མགོ་ཁྲིད་དང་ལྷན་དུ་༧གོང་ས་རྒྱལ་བ་རིན་པོ་ཆེ་མཆོག་སྐུ་འཚོ་བཞུགས་སྐབས་བོད་རྒྱ་འབྲེལ་མོལ་བསྐྱར་གསོ་དགོས་པའི་ནན་སྐུལ་གནང་རྒྱུ་དང་། ཕྱི་ལོ་ ༢༠༢༠ ཟླ་ ༩ པའི་ནང་སྲིད་འཛིན་བྷའེ་ཌིན་མཆོག་སྲིད་འཛིན་གྱི་འོས་མིར་བཞེངས་སྐབས། ཁོང་གིས་བོད་དོན་ཐོག་མཐའ་གཅིག་ཏུ་རྒྱབ་སྐྱོར་གནང་རྒྱུའི་ཁས་ལེན་གནང་ཡོད་པ་ལྟར། ཕྱི་ལོ་ ༢༠༡༠ ནས་བཟུང་བོད་རྒྱ་འབྲེལ་མོལ་མཚམས་ཆད་པ་དང་། བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་སྟབས། ཨ་རིའི་ངོས་ནས་བོད་རྒྱའི་དཀའ་རྙོག་སེལ་ཐབས་སུ་ཐུགས་འགན་བཞེས་དགོས་པའི་འབོད་སྐུལ་ཞུས་འདུག
ཡང་བློན་ཆེན་མཆོག་གིས་རྒྱ་ནག་གི་མགོ་འཁྲིད་དང་ཐུག་འཕྲད་གནང་སྐབས། བོད་ཀྱི་ཆབ་སྲིད་བཙོན་པ་རྣམས་ཀློད་གྲོལ་གཏང་དགོས་པ་དང་། དམིགས་བསལ་གྱིས་༧པཎ་ཆེན་རིན་པོ་ཆེ་དང་སྒོ་ཤེས་རབ་རྒྱ་མཚོའི་གནད་དོན་ཐད་གླེང་སློང་གནང་དགོས་སྐོར་དང་། རྒྱ་ནག་གཞུང་གིས་བོད་ནང་དམ་དྲག་ཤུགས་ཆེན་བྱས་དང་བྱེད་མུས་ཡིན་པར་བརྟེན། རྒྱལ་སྤྱིའི་སྤྱི་ཚོགས་ཁྲོད་བོད་ནང་གི་དངོས་ཡོད་ཀྱི་གནས་སྟངས་ཁ་གསལ་ཤེས་ཀྱི་མེད་སྐོར་དང་། བོད་ནང་གི་བོད་མི་རྣམས་ལ་འགྲོ་འདུག་སྤྱོད་གསུམ་གྱི་རང་དབང་མེད་པར་བརྟེན། བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཐོག་ལ་འདྲི་རྩད་ནན་པོ་བྱ་དགོས་སྐོར། དེ་བཞིན་རྒྱ་ནག་གིས་ཐའེ་ཝན་དང་རྒྱ་གར་ཐོག་དྲག་ཤུགས་སྤྱོད་བཞིན་ཡོད་པ་དེ་ནམ་ཡང་ངོས་ལེན་གནང་ཐབས་མེད་པ་སོགས་ཞུས་འདུག དེ་བཞིན་རྒྱ་ནག་གི་མི་སེར་རྣམས་ཨ་རིར་བསྐྱོད་རྒྱུར་དམ་དྲག་མེད་ཀྱང་། ཨ་རིའི་མི་སེར་རྣམས་བོད་ལ་བསྐྱོད་རྒྱུར་དམ་དྲག་བྱེད་བཞིན་ཡོད་པ་དང་། ཨ་རིའི་མི་སེར་ཡིན་པའི་བོད་མི་རྣམས་ལ་རང་ཉིད་ཀྱི་ཕ་མ་སྤུན་མཆེད་རྣམས་ལ་ཐུག་འཕྲད་ཆེད་བོད་དུ་སྐྱོད་པའི་མཐོང་མཆན་རག་གི་མེད་པའི་དཀའ་ངལ་འཕྲད་ཀྱི་ཡོད་པ་སོགས་ཞུས་འདུག
དེ་བཞིན་ཟླ་འདིའི་ཕྱི་ཚེས་ ༡ ཉིན་ཨ་རིའི་གྲོས་ཚོགས་གོང་མའི་འཐུས་མི་རོ་བྷིའོ་ལགས་ཀྱིས་དབུ་ཁྲིད་པའི་གྲོས་ཚོགས་འཐུས་མི་ཁྱོན་ ༡༤ ཐུན་མོང་གི་ཐོག་ནས་ཕྱི་སྲིད་བློན་ཆེན་མཆོག་ལ་འབོད་སྐུལ་ཞུ་ཡིག་ཅིག་ཕུལ་ཏེ། ཨ་རིའི་སྲིད་འཛིན་བྷའེ་ཌིན་དང་ཊོམ་ཕུ་སྲིད་གཞུང་གཉིས་ཀྱིས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་མ་ཟད། ཡུ་གུར་གྱི་ངལ་རྩོལ་བསྒྱུར་བཀོད་ཁང་སོགས་སུ་གསང་སྟབས་ཀྱིས་སྡུག་སྦྱོང་མནར་གཅོད་དང་བཙན་གཡེམ་བྱས་པ། ཚད་ལས་འདས་པའི་བཙན་གནོན་སོགས་བྱེད་ཀྱིན་ཡོད་པར་ངོས་འཛིན་བྱེད་ཀྱི་ཡོད་པ་ལྟར། ཕྱི་སྲིད་བློན་ཆེན་མཆོག་གིས་ད་ལན་ངེས་པར་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་སོགས་ཀྱི་ཐད་ལ་རྒྱུས་ལོན་གནང་དགོས་པ་མ་ཟད། རྒྱ་ནག་གཞུང་གིས་ཁྲིམས་མཐུན་མིན་པའི་བྱ་སྤྱོད་དེ་དག་ཐེར་འདོན་གནང་དགོས་པའི་འབོད་སྐུལ་ཞུས་ཡོད་འདུག
ཨ་རི་དང་རྒྱ་ནག་གཉིས་བར་དཔལ་འབྱོར་དང་དམག་དོན། ཚན་རྩལ་ཆབ་སྲིད་སོགས་ཀྱི་ཐོག་ནས་རྩོད་རྙོག་དང་ཕན་ཚུན་སྐྱོན་འཛུགས་རྒྱུན་མ་ཆད་པར་ཡོང་བཞིན་ཡོད་ཀྱང་། འདས་ལོར་འཛམ་གླིང་སྟོབས་ལྡན་རྒྱལ་ཁབ་ ༢༠ ཡི་ལྷན་ཚོགས་སྐབས་ཨ་རིའི་སྲིད་འཛིན་བྷའེ་ཌིན་དང་རྒྱ་ནག་གི་སྲིད་འཛིན་ཞི་ཅིན་ཕིང་གཉིས་ཀྱིས་དངོས་སུ་ཐུག་འཕྲད་བྱས་ཏེ་ཕྱོགས་གཉིས་ཀྱི་འགལ་ཟླ་མང་པོ་ཞིག་གི་ཐོག་གྲོས་མོལ་བྱུང་ཡོད་པའི་གནས་ཚུལ་ཐོན་ཡོད་ལ། འདི་ལོའི་ཕྱི་ཟླ་དང་པོའི་ནང་ཨ་རིའི་ནོར་སྲིད་བློན་ཆེན་ལྕམ་སྐུ་རྗེ་ནེ་ཊི་ཡེལ་ལིན་(Janet Yellen)མཆོག་དང་། ཞི་ཅིན་ཕིང་གཞུང་གི་དཔལ་འབྱོར་ཐད་ཀྱི་གཙོ་གནད་མི་སྣ་སྲིད་བློན་གཞོན་པ་ལུའུ་ཧེ་ཐུག་འཕྲད་གནང་ཡོད་པ་དང་། མི་འགྱངས་བར་ལྕམ་སྐུ་རྗེ་ནེ་ཌི་མཆོག་རྒྱ་ནག་ཏུ་ཕེབས་པའི་འཆར་གཞིའང་ཡོད་འདུག
གསར་འགོད་པ། བྱམས་པ་ཚེ་རིང་།
