རྒྱ་ནག་གཞུང་གིས་ཨ་རིའི་བར་སྣང་ནས་གསང་བའི་མྱུལ་ཞིབ་བྱེད་ཀྱི་ཡོད་པའི་དོགས་གཞིའི་འོག་ཕྱི་འབྲེལ་བློན་ཆེན་ཨེན་ཊོ་ནི་བྷི་ལིན་ཀན་མཆོག་རྒྱ་ནག་ཏུ་ཕེབས་འཆར་ཡོད་པ་དེ་ཕྱིར་འགྱངས་གནང་དགོས་བྱུང་ཡོད་འདུག
མདང་དགོང་ཨ་རིའི་ཕྱི་སྲིད་ལྷན་ཁང་ནས་གནས་ཚུལ་བསྒྲགས་པ་ལྟར་ན། ཁ་སང་ཨ་རིའི་ཕྱི་སྲིད་བློན་ཆེན་ཨེན་ཊོ་ནི་བྷི་ལིན་ཀན་མཆོག་རྒྱ་ནག་ནང་དུ་ཕེབས་རྒྱུར་ཆུ་ཚོད་ཁ་ཤས་ལས་མེད་པའི་མཚམས་དེར། ཨ་རིའི་རྒྱལ་སྲུང་ལྷན་ཁང་ནས་རྒྱ་ནག་གཞུང་གིས་བར་སྣང་དུ་ལྒང་ཕུག་བཏང་ནས་གསང་བའི་མྱུལ་ཞིབ་བྱེད་ཀྱི་ཡོད་པའི་དོགས་གཞིའི་གནས་ཚུལ་ཕྱིར་བསྒྲགས་བྱས་ཏེ། ཕྱི་འབྲེལ་བློན་ཆེན་མཆོག་རྒྱ་ནག་ཏུ་ཕེབས་རྒྱུ་ཕྱིར་འགྱངས་གནང་དགོས་བྱུང་ཡོད་པ་མ་ཟད། ཕྱི་སྲིད་ལྷན་ཁང་གི་མགྲིན་ཚབ་པས་ཕྱི་སྲིད་བློན་ཆེན་མཆོག་ནས་རྒྱ་ནག་གི་ཕྱི་སྲིད་བློན་ཆེན་ཝང་ཡེས་ལ་གནད་དོན་དེ་འགན་འཁུར་མེད་པའི་བྱ་སྤྱོད་ཅིག་དང་། ཨ་རིའི་མངའ་ཁོངས་བདེ་འཇགས་ཐད་ཀྱི་གནོད་འཚེ་ཞིག་ཡིན་པ་གསལ་པོ་ཡིན་ལ། ད་ལན་གཟིགས་སྐོར་དེ་རྒྱལ་སྤྱིའི་ཁྲིམས་ལ་རྡོག་རོལ་གཏོང་བ་ཆགས་རྒྱུ་ཡིན་སྐོར་གསུངས་ཡོད་པ་འགྲེལ་བརྗོད་གནང་འདུག
སྤྱིར་བཏང་ཕྱི་སྲིད་བློན་ཆེན་མཆོག་ཟླ་འདིའི་ཕྱི་ཚེས་ ༥ ནས་ ༦ བར་ཉིན་གྲངས་གཉིས་རིང་རྒྱ་ནག་གི་རྒྱལ་ས་པེ་ཅིན་དུ་ཕེབས་ཏེ་ཞི་ཅིན་ཕིང་དང་ཕྱི་འབྲེལ་མི་སྣ་སོགས་སུ་ཐུག་འཆར་ཡོད་ཀྱང་། ཟླ་འདིའི་ཕྱི་ཚེས་ ༢ ཉིན་ཨ་རིའི་རྒྱལ་སྲུང་ལྷན་ཁང་གིས་ཨ་རིའི་མཁའ་ཁུལ་དུ་མྱུལ་ཞིབ་ལྒང་ཕུག་ (surveillance balloon) ཅིག་འཕུར་སྐྱོད་བྱས་པའི་གནད་དོན་ལ་ཞིབ་འཇུག་བྱེད་བཞིན་ཡོད་པའི་གནས་ཚུལ་ཐོན་ཡོད་པ་དང་། དེ་རིང་རྒྱ་ནག་གཞུང་གིས་ལྒང་ཕུག་དེ་རྒྱ་ནག་གི་ཡིན་པ་དང་། དེ་གནམ་གཤིས་བརྟག་དཔྱད་སླད་བཏང་བ་ཞིག་ཡིན་ཡང་། གནམ་གཤིས་ཡག་པོ་མེད་པའི་རྐྱེན་གྱིས་མཁའ་ལམ་གཞན་དུ་འཕུར་སྐྱོད་བྱས་ཡོད་སྟབས། གནད་དོན་དེ་འདྲ་བྱུང་བར་བློ་ཕམ་ཡོད་ཚུལ་དང་། གནད་དོན་དེའི་ཐོག་ནང་གྲོས་བྱ་རྒྱུ་ཡིན་སྐོར་བརྗོད་ཡོད་འདུག
ཨ་རིའི་གཞུང་གིས་མྱུལ་ཞིབ་ལྒང་ཕུག་དེ་ཨ་ལཱ་སི་ཀཱ་ (Alaska) དང་ཁེ་ན་ཌར་འཕུར་སྐྱོད་བྱས་རྗེས། ཨ་རིའི་མོན་ཊ་ནཱ(Montana) མངའ་སྡེའི་མཁའ་དབྱིངས་སུ་འཕུར་སྐྱོད་བྱས་ཡོད་སྐོར་དང་། དང་ཐོག་ཨ་རིའི་གཞུང་གིས་མཁའ་དམག་གནམ་གྲུ་སོགས་ལ་ཉེན་བརྡ་བཏང་ཡོད་ཀྱང་། ལྒང་ཕུག་དེར་མེ་མདས་བརྒྱབ་ཚེ་ལྷུ་ལག་རྣམས་ཟེགས་ཡོང་བའི་ཉེན་ཁ་ཡོད་སྟབས། མེ་མདས་བརྒྱབ་མེད་སྐོར་བརྗོད་འདུག་
ཨ་རིའི་རྒྱལ་སྲུང་ལྷན་ཁང་གི་གསར་འགོད་དྲུང་ཆེ་པཱ་ཊི་རའེ་ཌིར་ (Pat Ryder) ལགས་ཀྱིས། ཁ་སང་ཕྱི་ཚེས་ ༣ ཉིན་གྱི་ཞོགས་པར་མྱུལ་ཞིབ་ཀྱི་ལྒང་ཕུག་དེ་ཤར་ཕྱོགས་སུ་འཕུར་ནས་ཨ་རིའི་དབུས་ཁུལ་གྱི་མཐོ་ཚད་ཧྥི་ཊི་སྟོང་ཕྲག་ ༦༠ ཐོག་ལ་འཕུར་སྐྱོད་བྱས་ཡོད་སྐོར་བརྗོད་འདུག་ལ། ཨ་རིའི་སྲིད་འཛིན་ཟུར་པ་ཊོམ་ཕུ་མཆོག་གིས་སྤྱི་ཚོགས་དྲ་ལམ་དུ་ལྒང་ཕུག་དེར་མེ་མདས་བརྒྱག་དགོས་སྐོར་བརྗོད་འདུག
དེ་འབྲེལ་གནད་དོན་དབྱེ་ཞིབ་པ་
གསར་འགོད་པ། བསྟན་འཛིན་ཕུར་བུ།
