བོད་ཀྱི་འབྲས་ནད་ཚོགས་པས་ཆེད་མཁས་མི་སྣ་གདན་ཞུ་བྱས་ཏེ་འབྲས་ནད་སྐོར་ལ་གོ་རྟོགས་ལས་འགུལ་སྤེལ་སོང་།
དེ་རིང་རྒྱལ་སྤྱིའི་འབྲས་ནད་ཉིན་མོ་དང་བསྟུན། བོད་ཀྱི་འབྲས་ནད་ཚོགས་པའི་ངོས་ནས་གངས་ཅན་སྐྱིད་གཤོངས་སུ། བོད་མི་རྣམས་ཀྱི་ཁྲོད་ཁྲག་ཤེད་དང་། གཅིན་སྙི་ཟ་ཁུ་ལ་སོགས་པའི་བརྟག་དཔྱད་བྱེད་ཀྱི་ཡོད་པ་དང་འབྲེལ། འབྲས་ནད་སྐོར་གྱི་གོ་རྟོགས་ལས་འགུལ་ཞིག་སྤེལ་གནང་སོང་བ་དང་། ཕྱི་དྲོའི་ཆུ་ཚོད་ ༤ ཡས་མས་ཤིག་ལ་གངས་སྐྱིད་སྲིད་སྐྱོང་ཚོགས་ཁང་དུ་འབྲས་ནད་སྐོར་གྱི་གོ་རྟོགས་གཏམ་བཤད་སྐབས། བོད་ཀྱི་འབྲས་ནད་ཚོགས་པའི་འགན་འཛིན་ཚུལ་ཁྲིམས་རྡོ་རྗེ་ལགས་ཀྱིས། ཕྱི་ལོ་ ༢༠༡༤ ཡི་ལོ་མཇུག་ནས་བོད་ཀྱི་འབྲས་ནད་ཚོགས་པའི་ལས་གཞི་མགོ་བཙུགས་ཡོད་པ་དང་། འདས་པའི་ལོ་ངོ་ ༩ ལྷག་རིང་ལས་ཀ་བྱས་ཏེ་བོད་པའི་གཞིས་ཆགས་ཁག་ལ་སྐོར་བསྐྱོད་བྱས་ཏེ། ད་བར་དུ་ཀྲུ་ཀྲིང་ཕུད་པའི་རྒྱ་གར་དུ་ཡོད་པའི་བོད་པའི་གཞིས་ཆགས་ཁག་ཡོངས་སུ་སྐྱོད་ཐུབ་ཡོད་པ་དང་། ཉེ་ལམ་བལ་ཡུལ་དུ་ཟླ་བ་གཅིག་རིང་འབྲས་ནད་ཀྱི་ནད་རྟགས་ཡོད་མེད་ཀྱི་བརྟག་དཔྱད་བྱེད་ཐུབ་ཡོད་སྐོར་དང་། ཚོགས་པའི་ངོས་ནས་བོད་པ་ཙམ་མིན་པར་རྒྱ་གར་དང་ཕྱིའི་རྒྱལ་ཁབ་ཀྱི་མི་རིགས་སོགས་དབྱེ་འབྱེད་མེད་པར་འབྲས་ནད་བཅོས་ཐབས་སུ་མཐུན་རྐྱེན་རོགས་རམ་བྱས་དང་བྱེད་མུས་ཡིན་པ་དང་། ཚོགས་པའི་ནང་ལས་བྱེད་ ༢༠ ཡོད་པའི་ཁྲོད་སྨན་ཞབས་ ༧ དང་ནད་པ་འདྲེན་འཁོར་གྱི་ཁ་ལོ་བ་ ༢། སྤྱི་ཐབ་ནང་དུ་མི་ ༤ དང་ལས་ཁུངས་ཀྱི་ལས་བྱེད་ ༢། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཉེར་མཁོ་ཚོང་ཁང་དུ་མི་ ༣། སུ་ཇ་བོད་ཁྱིམ་སློབ་གྲྭར་མི་ ༢ ཡོད་པ་དང་། དྭང་བླངས་ཞབས་ཞུ་བ་མང་པོ་ཡོད་པ་སོགས་ད་ལྟའི་ཆར་ཚོགས་པའི་ནང་ཁྱོན་མི་ ༡༠༠ ཡོད་སྐོར་སོགས་འགྲེལ་བརྗོད་གནང་སོང་།
ཁོང་གིས་མུ་མཐུད། ང་ཚོས་འབྲས་ནད་ནད་རྟགས་ཡོད་མེད་སོགས་གང་མགྱོགས་ཤེས་རྟོགས་བྱུང་ཚེ། དེ་ལ་སྨན་བཅོས་བྱ་ཐུབ་ཀྱི་ཡོད་སྐོར་དང་། འདས་པའི་ལོ་ངོ་ ༩ ལྷག་རིང་ལས་ཀ་བྱས་ཏེ་བོད་པའི་གཞིས་ཆགས་ཁག་ལ་སྐྱོད་ཀྱི་ཡོད་པ་དང་། དེའི་བརྒྱུད་རིམ་ཁྲོད་ནས་རྒྱ་བལ་འབྲུག་གསུམ་ནང་གི་གཞིས་ཆགས་ཁུག་ཀྱོག་ཁག་ལ་སྨན་བཅོས་དང་བརྟག་དཔྱད་ཀྱི་མཐུན་རྐྱེན་ཏག་ཏག་མ་རག་པའི་གནས་སྟངས་ཡོད་པ་དོ་སྣང་བྱུང་བར་བརྟེན། བོད་མི་སྤྱི་ཡོངས་དང་། ལྷག་པར་དུ་གྲོས་ཚོགས་དང་འཕྲོད་བསྟེན་ལས་ཁུངས་ངོས་ནས་གྲོས་བྱས་ཏེ་མ་འོངས་པར་དཀའ་ངལ་དེའི་རིགས་སེལ་ཐབས་སུ་ཚོགས་པའི་ངོས་ནས་གང་ཐུབ་ཅི་ཐུབ་ཀྱིས་རོགས་རམ་མུ་མཐུད་དུ་བྱེད་ཀྱི་ཡིན་སྐོར་སོགས་བརྗོད་སོང་།
༧སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས། དེང་སང་གི་སྤྱི་ཚོགས་ནང་དུ་འབྲས་ནད་ཀྱི་འགྲོ་སོང་དཀའ་ངལ་ཆེ་ཤོས་ཤིག་རེད། འབྲས་ནད་མི་འབྱུང་བར་གཙོ་ཆེ་ཤོས་སྔོན་འགོག་རེད། ཐ་མག་དང་ཆང་གཉིས་འབྲས་ནད་བཟོ་མཁན་གཙོ་བོ་ཡིན་ཡང་། གཞོན་སྐྱེས་ནང་དུ་ཆང་རག་འཐུང་མཁན་མང་དུ་འགྲོ་ཡི་ཡོད་པ་ལས་ཉུང་དུ་འགྲོ་ཡི་མི་འདུག ཉེ་ཆར་འཛམ་གླིང་འཕྲོད་བསྟེན་ཚོགས་པས་གསལ་བསྒྲགས་གསར་བ་ཞིག་སྤེལ་ཡོད་པའི་ནང་དུ། ཆང་ཨ་རག་ཅུང་ཙམ་གྱིས་ཀྱང་འབྲས་ནད་འབྱུང་བའི་ཉེན་ཁ་ཡོད་པ་འགྲེལ་བཤད་བྱས་འདུག བོད་པའི་སྤྱི་ཚོགས་ནང་དུ་མཆིན་པའི་གཉན་ཚད་ཀྱི་དཀའ་ངལ་གྱིས་སྔོན་འགོག་ལས་གཞི་ཆེན་པོ་སྤེལ་བཞིན་ཡོད། རང་ཉིད་གཅིག་པོ་ནད་གཞི་དེ་འགོས་མེད་པ་ཙམ་གྱིས་ཕན་ཐོགས་འབྱུང་གི་མེད། གཉེན་མི་དང་དགའ་ཉེ་སོགས་འབྲེལ་བ་ཡོད་པའི་དཀའ་ངལ་ཡོད་མཁན་ཡོང་གི་འདུག ཧ་གོ་ཚར་དུས་མཆིན་པའི་འབྲས་ནད་ཆགས་བསྡད་འདུག བོད་སྨན་ནང་དུ་འབྲས་ནད་སྔོན་འགོག་བྱེད་ཐུབ་ཀྱི་ཡོད་པ་རེད་ལ། ཕྱིས་སུ་བུ་སྣོད་ཀྱི་འབྲས་ནད་ལ་སྔོན་འགོག་བྱེད་ཐུབ་པའི་རྒྱ་གར་སྨན་ཐོན་ཡོད། སྔོན་འགོག་ཁབ་དེ་བརྒྱབ་ན་འབྲས་ནད་སྔོན་འགོག་བྱེད་ཐུབ་ཀྱི་ཡོད་པ་རེད། སྔོན་འགོག་སྨན་དེ་རིགས་ཤེས་དགོས་པ་གལ་ཆེན་རེད། འབྲས་ནད་མང་ཤོས་ནི་ལོ་རྒན་པ་དེ་ཚོ་ན་ཡི་ཡོད་པ་རེད། ནད་གཞི་ཡོད་མེད་བརྟག་དཔྱད་མ་བྱས་པར་ཡུན་རིང་འགོར་དུས་རྗེས་སུ་འཕྱི་དྲགས་པ་རེད། ནད་གཞི་ཡོད་མཁན་སྔ་པོ་ཤེས་མཁན་ཚོར་ཏན་ཏན་ཕན་ཐོགས་ཀྱི་འདུག དྷ་རམ་ས་ལའི་ནང་ཕོ་བའི་འབྲས་ནད་ཡོད་པ་ཤེས་མཁན་ནང་དུ་དྲག་སྐྱེད་བྱུང་བ་མང་པོ་ཡོད། ཅེས་གསུངས་སོང་།
ཁོང་གིས་མུ་མཐུད་དུ། འབྲས་ནད་ཀྱི་ནད་གཞིར་དེང་རབས་ཀྱི་སྨན་དང་གསོ་བ་རིག་པ་གཉིས་མཉམ་དུ་སྦྱར་དགོས་ཀྱི་འདུག དེ་ཧ་ཅང་གལ་ཆེན་པོ་རེད། འབྲས་ནད་རིགས་ཅིག་བོད་ཀྱི་གསོ་བ་རིག་པས་ཕན་ཐོགས་ཆེན་པོ་བྱུང་འདུག དེང་དུས་འཕྲུལ་ཆས་ཀྱིས་འབྲས་ནད་ནད་གཞི་མགྱོགས་པོར་ངོས་ཟིན་གྱི་འདུག ངོས་འཛིན་བྱེད་ཐུབ་ཀྱང་བཅོས་རྒྱུ་མེད་པའི་རིགས་ལ་བོད་སྨན་གྱི་ཕན་ཐོགས་པ་དེ་འདྲ་འདུག ༧གོང་ས་མཆོག་གི་དགོངས་གཞིའི་འོག་འཕྲོད་བསྟེན་ལྷན་ཁང་གིས་གསོ་རིག་དང་དེང་རབས་ཟུང་འབྲེལ་གྱི་ལས་གཞི་འགྲོ་ཡི་ཡོད་པ་དེའི་ནད་གཞི་ཁག་ལ་དགེ་ཕན་ཆེན་པོ་འདུག འབྲས་ནད་ཚོགས་པས་ཏོག་དབྱིབས་གཉན་རིམས་ཀྱི་སྐབས་སུ་དཀའ་ལས་ཞེ་དྲགས་བརྒྱབ་སོང་། བོད་པའི་སྤྱི་ཚོགས་ནང་དུ་ཕན་ཐོགས་དཔེ་ཡག་པོ་བྱུང་སོང་། ཞེས་གསུངས་སོང་།
མཐར་ལྡི་ལིར་ཡོད་པའི་ར་ཇིབ་གྷན་དྷི་འབྲས་ནད་སྨན་ཁང་གི་སྨན་པ་ (Dr. Manish Sharma) ལགས་ཀྱིས་ནུ་མའི་འབྲས་ནད་ (Breast Cancer) དང་བུ་སྣོད་འབྲས་ནད་ (Cervical Cancer) ཀྱི་ནད་རྟགས་ངོ་སྤྲོད་གནང་བ་དང་། འབྲས་ནད་དེ་དག་ལ་བཅོས་ཐབས་ཡོད་ཅིང་སྨན་ཁབ་ཀྱང་ཡོད་སྐོར་དང་། འབྲས་ནད་ཡོད་མེད་དེ་སྔ་ས་ནས་རྩད་གཅོད་བྱས་པ་དང་ཤེས་རྟོགས་བྱུང་བ་ཡིན་ན། དེ་ལ་བཅོས་ཐབས་ཡོད་པ་དང་། གལ་ཏེ་ནད་རིགས་གང་འདྲ་ཞིག་ཡིན་རུང་སྨན་ཟས་ཀྱང་དྲག་གི་མེད་པ་ཡིན་ན། དེ་ནི་འབྲས་ནད་ཡིན་པས། ཚང་མས་རང་ཉིད་ཀྱི་འཕྲོད་བསྟེན་ལ་དོ་སྣང་དང་གཅེས་སྐྱོང་ལེགས་པོ་བྱ་དགོས་སྐོར་སོགས་ལམ་སྟོན་གནང་སོང་།
གསར་འགོད་པ། བསྟན་འཛིན་ཕུར་བུ་དང་བྱམས་པ་ཚེ་རིང་།
