བོད་ཀྱི་གནམ་མཚོ་ཕྱུག་མོའི་ཁུལ་དུ་ཕྱིན་ན་ཉེས་ཆད་གཅོད་རྒྱུ་ཡིན་ཟེར།

བོད་རང་སྐྱོང་ལྗོངས་ནག་ཆུ་དཔལ་མགོན་རྫོང་རིག་གནས་ཡུལ་སྐོར་ཚན་པ་ཟེར་བས་བྱང་གནམ་མཚོ་ཕྱུག་མོའི་ཁུལ་དུ་འཆར་འགོད་ལས་དོན་སྤེལ་བཞིན་ཡོད་པས་ཡུལ་སྐོར་བ་འགྲོ་སྐྱོད་མི་ཆོག་པ་དང་གལ་སྲིད་ཁུལ་དེར་འགྲོ་སྐྱོད་བྱས་པ་ཡིན་ན་རྒྱ་སྒོར་ ༥༠༠༠ མན་གྱིས་ཉེས་ཆད་གཅོད་རྒྱུ་ཡིན་སྐོར་བསྒྲགས།

ཟླ་འདིའི་ཕྱི་ཚེས་ ༣ ཉིན་བོད་རང་སྐྱོང་ལྗོངས་ནག་ཆུ་ཁུལ་དཔལ་མགོན་རྫོང་རིག་གནས་ཡུལ་སྐོར་ཚན་པ་དང་གནམ་མཚོ་དོ་དམ་ཚན་པ་ཟེར་བས་མཚན་གུང་གསལ་བསྒྲགས་ཤིག་སྤེལ་ཏེ། གནམ་མཚོ་ཕྱུག་མོའི་ཁུལ་དུ་ཡུལ་སྐོར་སོགས་ཀྱི་བྱེད་སྒོ་རིགས་ཅི་ཡང་སྤེལ་མི་ཆོག་པའི་དོན་ཚན་གསུམ་ཅན་གྱི་གསལ་བསྒྲགས་ཞིག་སྤེལ་ཡོད་པའི་ནང་དུ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རང་བྱུང་སྲུང་སྐྱོང་ཁུལ་གྱི་སྲོལ་ཡིག་གི་དོན་ཚན་སོ་བཞི་པའི་གཏན་འབེབས་ལྟར། རང་དགར་རང་བྱུང་སྲུང་སྐྱོབ་ཁུལ་དུ་ལས་ཁུངས་དང་མི་སྒེར་སུ་ཞིག་འཛུལ་བའམ་ཡང་ན་ཆོག་མཆན་མ་ཐོབ་པར་རང་འདོད་དུ་རང་བྱུང་སྲུང་སྐྱོབ་ཁུལ་དུ་འགྲོ་བ་དང་། དོ་དམ་ཚན་པའི་དོ་དམ་ལ་ཁ་ཡ་མ་བྱས་པ་བཅས་ལ་རང་བྱུང་སྲུང་སྐྱོབ་ཁུལ་གྱི་དོ་དམ་ཚན་པས་དེར་ཡོ་བསྲང་བྱེད་དགོས་པའི་བཀའ་གཏོང་རྒྱུ་དང་། གནས་ཚུལ་ལ་གཞིགས་ཏེ་རྒྱ་སྒོར་ ༡༠༠ ཡན་ནས་སྒོར་ ༥༠༠༠ མན་གྱི་དངུལ་ཆད་གཅོད་རྒྱུ། རང་དགར་བསྐྱོད་པའི་རིགས་ལ་རྫོང་རིམ་པའི་ཁྲིམས་དང་སྒྲིག་སྲོལ་ལྟར་ཐག་གཅོད་ནན་པོ་བྱ་རྒྱུ་ཡིན་ལ། མཇུག་འབྲས་ཚང་མ་རང་གིས་འགན་འཁུར་དགོས་པ་དང་། ཁྲིམས་དང་སྒྲིག་སྲོལ་ལྟར་འབྲེལ་ཡོད་སྡེ་ཚན་ལ་ཐག་གཅོད་བྱ་རྒྱུར་རྩིས་སྤྲོད་བྱ་རྒྱུ་ཡིན་སྐོར་དང་།  གལ་སྲིད་ཁུལ་དེར་ཚན་རིག་རྟོག་ཞིབ་དང་བརྟག་ཞིབ་བྱེད་པར་བསྐྱོད་དགོས་ཚེ་ཆོག་མཆན་བླངས་རྗེས་ད་གཟོད་ལས་དོན་སྤེལ་ཆོག་སྐོར་བསྒྲགས།

དེ་བཞིན་ད་ལྟ་འཆར་འགོད་ལེགས་སྒྲིག་གི་ལས་དོན་སྤེལ་བཞིན་པའི་སྒང་ཡིན་པ་དང་། སྒོ་འབྱེད་ཀྱི་འབྲེལ་ཡོད་འགྲོ་ལུགས་གཉེར་ཚར་རྗེས་སྤྱི་བསྒྲགས་སྤེལ་ངེས་ཡིན་པས་རང་འགུལ་ངང་འབྲེལ་ཡོད་འོས་འགན་བསྒྲུབ་དགོས་པ་དང་། འབྲེལ་ཡོད་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ནན་པོ་ཞུས་ཏེ། ཁུལ་དེའི་ཆེས་གདོད་མ་དང་། སྐྱེ་ཁམས། མཛེས་ཤོས། མཚོན་བྱེད་རང་བཞིན་ལྡན་ཤོས་བཅས་ཀྱི་རང་བྱུང་ཐོན་ཁུངས་དང་སྐྱེ་ཁམས་མཛེས་ལྗོངས་ལ་མཉམ་དུ་སྲུང་སྐྱོང་ཡག་པོ་བྱེད་དགོས་སྐོར་བརྗོད་འདུག

བོད་ཀྱི་མཚོ་ཆེན་བཞི་ཡི་ཡ་གྱལ་བྱང་གནམ་མཚོ་ཕྱུག་མོ་ནི་བོད་ཀྱི་རྒྱལ་ས་ལྷ་ས་ནས་བྱང་ཕྱོགས་སུ་ཡོད་པའི་འདམ་གཞུང་དང་ནག་ཆུའི་དཔལ་མགོན་རྫོང་གཉིས་བར་གྱི་ས་བབ་མཐོ་ཚད་རྒྱ་མཚོའི་ངོས་ལས་སྨི་ ༤༧༠༠ ལྷག་ཙམ་ཡོད་པའི་མཐོ་སྒང་དུ་ཆགས་ཡོད་པ་དང་། ཤར་ནུབ་ཀྱི་དཀྱིས་སུ་སྤྱི་ལེ་ ༧༠ དང་། ལྷོ་བྱང་གི་ཞེང་དུ་སྤྱི་ལེ་ ༣༠ ཡོད་འདུག སྤྱིའི་རྒྱ་ཁྱོན་སྤྱི་ལེ་གྲུ་བཞི་མ་ ༡༩༢༠ ཙམ་ཡོད་སྟབས། བོད་ཀྱི་མཚོ་སྔོན་པོའི་རྗེས་ཀྱི་ཚྭ་མཚོ་ཆེ་ཤོས་དེ་ཡིན་འདུག གནམ་མཚོ་ཕྱུག་མོའི་མཚོ་དབུས་སུ་གླིང་ཕྲན་གསུམ་ཡོད་ཅིང་། དེ་དག་ནི་རྡོའི་ཀ་བ་དང་བྲག་ཕུག་སོགས་ཀྱི་དབྱིབས་ཅན་ངོ་མཚར་བའི་རང་བྱུང་བཀོད་པས་ཁེངས་བ་ཞིག་ཡིན་འདུག དཔྱིད་ཀ་དང་སྟོན་ཁར་ས་ཕྱོགས་འདྲ་མིན་ནས་བྱ་རིགས་སྣ་ཚོགས་ཡོང་སྟེ་གནས་མལ་བཟོ་ཡི་ཡོད་པ་མ་ཟད། མཚོ་དེའི་རྒྱུད་དུ་འབྲོང་དང་། དགོ་བ། ཤྭ་བ་སོགས་རི་སྐྱེས་སེམས་ཅན་སྣ་ཚོགས་ཀྱིས་བག་གཡེང་དུ་འཚོ་སྡོད་བྱེད་བཞིན་ཡོད་འདུག རྐང་ཐང་དུ་གཉན་ཆེན་ཐང་ལྷ་བརྒྱུད་ནས་མཚོ་སྐོར་དུ་སོང་ན་ཉིན་ ༢༠ ལྷག་འགོར་ཞིང་། རྐང་ཐང་དུ་གནམ་མཚོ་ཕྱུག་མོར་བསྐོར་དུ་ཕྱིན་ན་ཉིན་ ༡༠ ཙམ་འགོར་གྱི་ཡོད་འདུག བོད་ཀྱི་མ་ཕམ་གཡུ་མཚོ་དང་ཡར་འབྲོག་གཡུ་མཚོ། མཚོ་སྔོན་པོ། གནམ་མཚོ་ཕྱུག་མོ་བཅས་ལ་མཚོ་ཆེན་བཞི་ཞེས་མིང་དུ་གྲགས་ཡོད་པ་རེད།

གསར་འགོད་པ། བྱམས་པ་ཚེ་རིང་།