སྲིད་སྐྱོང་མཆོག་ནས་བོད་རིགས་གཞོན་སྐྱེས་ཚོས་བོད་ཀྱི་ལོ་རྒྱུས་སོགས་ལ་དོ་སྣང་དགོས་པ་གལ་ཆེན་ཡིན་སྐོར་གསུངས།

དེ་རིང་ཕྱི་ཚེས་ ༦ ནས་བཟུང་ཉིན་ཤས་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ས་ཝ་ཤིན་ཌོན་ཁུལ་དུ་སྲིད་གཞུང་གི་རོགས་དངུལ་དང་འབྲེལ་བ་ཡོད་པའི་གནད་ཡོད་མི་སྣ་དང་ཨ་རིའི་གྲོས་ཚོགས་ཀྱི་གནད་ཡོད་མི་སྣ་སོགས་ལ་མཇལ་མོལ་གནང་གི་ཡོད་འདུག

ཟླ་འདིའི་ཕྱི་ཚེས་ ༡ ནས་ ༡༧ ཙམ་བར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་ནང་གཞུང་འབྲེལ་ཕྱོགས་བསྐྱོད་གནང་བཞིན་ཡོད་པ་ལྟར།  ཕྱི་ཚེས་ ༢ ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨཛ་ར་ཛི་ཡ་(Uzra Zeya)མཆོག་གི་དབུས་ཨ་རིའི་བདེ་འཇགས་ལྷན་ཁང་གི་དམངས་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐུ་ཞབས་རོབ་བྷར་ས་ཆིན་སི་ཀི་(Rob Berschinsk) ལགས་བཅས་ལ་མཇལ་འཕྲད་གནང་ཡོད་པ་དང་། ཕྱི་ཚེས་ ༣ ནས་ ༥ བར་སྲིད་སྐྱོང་མཆོག་ཨ་རིའི་གྲོང་ཁྱེར་ཅི་ཀ་གྷོ་ཁུལ་དུ་ཕེབས་ཏེ། ཁུལ་དེའི་ས་གནས་བོད་རིགས་མང་ཚོགས་ལ་སྲིད་སྐྱོང་མཆོག་ནས་ཐུགས་འགན་བཞེས་ཏེ་ལོ་གཅིག་དང་ཟླ་བ་བརྒྱད་སོང་རིང་སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་། ད་བར་གཞིས་ཆགས་སྲ་བརྟན་དུ་གཏོང་ཆེད་གཞིས་ཆགས་ཀྱི་དགོས་མཁོ་ཇི་ཡིན་མཁྱེན་རྟོགས་གནང་སྟངས་སྐོར་དང་། བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས་གནང་བའི་སྐོར།  གཞུང་ཞབས་ལས་བྱེད་པའི་ནུས་ཤུགས་སྔར་ལས་ཆེ་རུ་གཏོང་ཐབས།  ས་ཁང་སྒྲིག་གཞི་བསྐྱར་བཅོས་བྱས་པའི་དགོས་དམིགས།  དེ་བཞིན་བཀའ་ཤག་སྐབས་ ༡༦ པས་འདས་པའི་ལོ་ཤས་ནང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ལ་གཞིགས་ནས་གོ་སྐབས་ཇི་ཡོད་དམ་འཛིན་གནང་སྟངས་དང་། རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་གནང་བ།  བོད་ནང་གི་གནས་སྟངས་རྒྱུས་ལོན་ཐད་ཐབས་ཤེས་དང་ཤུགས་སྣོན་གནང་གི་ཡོད་པ་སོགས་ཀྱི་སྐོར་ལ་གསུང་བཤད་གནང་ན་དང་འབྲེལ་དྲི་བ་རྣམས་ལ་ལན་འདེབས་གནང་ཡོད་འདུག

ཕྱི་ཚེས་ ༤ ཉིན་ཝིས་ཀོན་སིན་རི་དྭགས་དགའ་ཚལ་གླིང་དགོན་པར་འཚམས་གཟིགས་སུ་ཕེབས་ཏེ་ཁུལ་དེའི་བོད་རིགས་གཞོན་སྐྱེས་དང་ཆེད་ལས་པ། ཕྱི་རྒྱལ་དོ་སྣང་ཅན་སོགས་ལ་བོད་སྐོར་གསུང་བཤད་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་མ་འོངས་བོད་ཀྱི་བདག་པོ་ཡིན་པའི་བོད་རིགས་གཞོན་སྐྱེས་དང་མཉམ་དུ་མཇལ་མོལ་གྱི་མཛད་རིམ་སྒྲིག་དགོས་དོན་གཙོ་བོ་ནི།  བོད་རིགས་གཞོན་སྐྱེས་ཚོས་ཕྱི་མི་རྣམས་ལ་བོད་ཀྱི་སྐོར་འགྲེལ་བརྗོད་བྱེད་སྐབས་ཀྱི་རྒྱུ་ཆ་ཕུན་སུམ་ཚོགས་པར་གཏོང་རྒྱུ་དང་།  བོད་རིགས་གཞོན་སྐྱེས་ཚོའི་བོད་སྐོར་གྱི་ཤེས་བྱ་ཕུན་སུམ་ཚོགས་སུ་གཏོང་རྒྱུ་དེ་ཡིན་པ་རེད། ཕྱི་ལོ་ ༡༩༥༩ ལོར་༸གོང་ས་མཆོག་དང་བོད་མི་རྣམས་རྒྱ་གར་དུ་བཙན་བྱོལ་ལ་ཕེབས་མ་ཐག་གི་འཕགས་བོད་འབྲེལ་བ།  ཨ་རི་དང་བོད་དབར་གྱི་ལོ་རྒྱུས་འབྲེལ་བ།  ༸གོང་ས་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་དེང་སྐབས་ཨ་རིའི་ནང་བོད་དོན་ལ་ཚད་མཐོའི་རྒྱབ་སྐྱོར་ཇི་ལྟར་བྱུང་བའི་འཕེལ་རིམ་སྐོར། ལོ་ལྟར་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་བྱེད་བཞིན་པའི་བོད་དོན་ཞུ་གཏུགས་ཀྱི་ལས་འགུལ་ནང་མཉམ་ཞུགས་གནང་གལ་ཆེ་བའི་འབོད་སྐུལ་གནང་ཡོད་འདུག

ཁ་སང་ཕྱི་ཚེས་ ༥ ཉིན་ཅི་ཀ་གྷོ་ཁུལ་གྱི་བོད་རིགས་གཞོན་སྐྱེས་རྣམས་ལ་བོད་ཀྱི་ལོ་རྒྱུས་ངོ་སྤྲོད་སྦྲགས་དྲི་བ་དྲིས་ལན་ཁག་ལན་འདེབས་གནང་སྐབས། བོད་ཀྱི་ས་བབ་ཆགས་ཚུལ་དང་བོད་ཀྱི་ལོ་རྒྱུས་ཤེས་པ་ཡིན་ན་མི་གཞན་ལ་བོད་ཀྱི་སྐོར་ངོ་སྤྲོད་དང་།  རྒྱ་ནག་གཞུང་གིས་བོད་ཀྱི་སྐོར་ལ་འཁྱོག་བཤད་སྣ་ཚོགས་བྱེད་བཞིན་པ་དེར་དོན་དངོས་དང་མཐུན་པའི་ལན་འདེབས་བྱེད་ཐུབ་རྒྱུ་ཕན་ཐོགས་ཆེན་པོ་ཡོད་སྟབས། གཞོན་སྐྱེས་ཚོས་བོད་ཀྱི་སྐོར་དོ་སྣང་བྱེད་དགོས་པ་ཧ་ཅང་གལ་ཆེན་པོ་ཡིན་སྐོར་ལམ་སྟོན་གང་ཡོད་འདུག དེ་རྗེས་གཟའ་མཇུག་སློབ་གྲྭའི་འཛིན་གྲྭ་ཁག་ལ་འཚམས་གཟིགས་གནང་ཡོད་འདུག

གསར་འགྱུར་ཕྱོགས་བསྡུས་པ་བྱམས་པ་ཚེ་རིང་།