བོད་ཀྱི་དཔེ་མཛོད་ཁང་ནས་དཔེ་དེབ་ལྔ་དབུ་འབྱེད་གནང་སྐབས་འགན་འཛིན་དགེ་བཤེས་ལྷག་རྡོར་ལགས་ནས་སྤྱི་ཚོགས་ནང་དཔེ་དེབ་རྩོམ་མཁན་རྣམས་ལ་དམིགས་བསལ་གྱིས་ཆེ་མཐོང་དང་ཆེ་བསྟོད་བྱ་རྒྱུ་གལ་ཆེན་པོ་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡།༠༠ ཐོག་ངྷ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ། དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། ན་ག་སངས་རྒྱས་བསྟན་དར་ལགས། དགེ་བཤེས་ལྷ་རམས་པ་རོང་བོ་བློ་བཟང་སྙན་གྲགས་ལགས་ལྷན་འཛོམས་ཐོག དགེ་བཤེས་ལགས་དང་། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། རྩོམ་པ་པོ་འོད་ཟེར་ལགས་སོགས་ཀྱིས་བརྩམས་པའི་དཔེ་དེབ་ལྔ་དབུ་འབྱེད་གནང་སོང་བ་དང་། སྐབས་དེར་དགེ་བཤེས་ལྷག་རྡོར་ལགས་ཀྱིས། བར་ལམ་ནས་བོད་ཀྱི་དཔེ་མཛོད་ཁང་གིས་དཔེ་དེབ་གསར་པ་དབུ་འབྱེད་བྱེད་ཀྱི་ཡོད་ལ། དེ་ཡང་དཔེ་དེབ་དེ་ཁྱབ་བསྒྲགས་བྱས་པ་ཙམ་མ་ཡིན་པར་རྩོམ་པ་པོས་དངོས་སུ་དཀའ་ལས་བརྒྱབ་པ་ཡིན་ཙང་། ཁོང་ཚོ་དངོས་སུ་ཕེབས་པའམ་དྲ་ལམ་ནས་འཛུལ་ཞུགས་ཀྱིས་རང་ཉིད་ཀྱི་དཔེ་དེབ་ངོ་སྤྲོད་བྱེད་ཀྱི་་ཡོད། མཁས་པས་གདེང་འཇོག་བྱེད་པ་འཆད་རྩོད་རྩོམ་གསུམ་ཟེར་གྱི་ཡོད་པ་རེད་ལ། སྐབས་སུ་བབས་པ་རྩོམ་ལ་དམིགས་བསལ་གྱི་ཁྱད་ཆོས་ཤིག་ཡོད་པ་རེད། རྩོམ་པ་པོ་ཁོང་ཉིད་འཇིག་རྟེན་འདིར་མེད་པ་ཡིན་ཡང་། ཁོང་གི་བརྩམས་ཆོས་རྣམས་ལོ་མང་པོར་ལྷག་གི་ཡོད་པ་རེད། ཤི་ཡང་ཕྱིར་མིག་ལྟ་བའི་རེ་བ་ཡོད། དེབ་ཆུང་འདི་ནི་མི་ཡི་ཡིད་དུ་ཤར།། གསུངས་པ་བཞིན་ཁྱད་ཆོས་ཞེ་དྲགས་ཡོད་བསྡད་པ་ཞིག་རེད། སྤྱི་ཚོགས་ནང་དཔེ་དེབ་རྩོམ་མཁན་རྣམས་ལ་དམིགས་བསལ་གྱིས་ཆེ་མཐོང་དང་། ཆེ་བསྟོད་བྱ་རྒྱུ་གལ་ཆེན་དུ་མཐོང་གི་འདུག ཅེས་གསུངས་སོང་།
དེ་ནས་དགེ་བཤེས་ལྷ་རམས་པ་རོང་བོ་བློ་བཟང་སྙན་གྲགས་ལགས་ཀྱིས། ཕྱི་ལོ་ ༡༩༨༠ དང་ ༡༩༩༠ ནང་དུ་བོད་ཕྱི་ནང་གཉིས་སུ་བོད་ཀྱི་རྩོམ་རིག་སྤྱི་དང་། ལྷག་པར་དུ་སྲོལ་རྒྱུན་གྱི་རྩོམ་རིག་དང་སྙན་ངག་ཐོག་ཏུ་ཚོར་སྣང་ཞེ་དྲགས་འཕྱུར་སྟེ་གང་ལ་གང་འཚམ་གྱིས་གྲུབ་འབྲས་ཐོན་ཡོད། ད་ལྟའི་ཆར་སྙན་ངག་པ་ཅུང་ཙམ་ཉམས་འགྲོ་བཞིན་པའི་དུས་ཚོད་ཅིག་ཏུ་མཐོང་གི་ཡོད། དམིགས་བསལ་སྲོལ་རྒྱུན་གྱི་སྙན་ངག་ཉམས་ཆག་ཏུ་འགྲོ་བཞིན་པ་གསལ་བོ་མཐོང་གི་འདུག ཁོར་ཡུག་དང་ཆབ་སྲིད་ཀྱི་དགོས་མཁོའི་ཆ་ནས་བོད་ནང་གི་དགོན་སྡེ་ཁག་དང་། སློབ་གྲྭ་ཁག་ཏུ་སྙན་ངག་གསར་པའི་རིགས་སྦྱོ་མཁན་མང་ཞིང་། བོད་ཀྱི་གཏིང་ཟབ་ལ་རྒྱ་ཆེ་བའི་ཤེས་རིག་སྦྱོང་བ་དཀོན་པོ་ཆགས་འདུག བཙན་བྱོལ་ནང་དུ་དེ་ལས་ཀྱང་ཕྱོགས་མང་པོ་ཉམས་ཆགས་སོང་འདུག ཅེས་དང་། བློ་གསལ་དོན་གཉེར་ཅན་ཚོས་སྲོལ་རྒྱུན་སྙན་ངག་དང་སྲོལ་རྒྱུན་གྱི་ཚབ་མཚོན་༧རྗེ་རིན་པོ་ཆེ་མཆོག་གི་སྙན་ངག་ལ་སྦྱངས་བ་བྱས་པ་ཡིན་ན་ཁེ་ཕན་གཉིས་རག་གི་ཡོད། ང་ཚོའི་དཀའ་ངལ་མང་པོ་ཞིག་ལ་གདོང་ལེན་བྱེད་པའི་རྒྱབ་ལྗོངས་བོད་ཀྱི་རིག་གཞུང་ཆགས་ཡོད། བོད་ཀྱི་རིག་གཞུང་ཡང་བཀའ་བསྟན་དང་མཁས་པ་རྣམས་ཀྱི་གསུང་འབུམ་ཆགས་ཡོད། བརྗོད་བྱེད་ཚིག་གི་བཏུམ་པའི་གསུང་འབུམ་དེ་དག་གོ་དོན་ལེན་པར་སྲོལ་རྒྱུན་སྙན་ངག་གི་རྩོམ་འགྲོས་ཤིག་མེད་ན། ཆ་ཚང་བ་གོ་བ་ལེན་རྒྱུ་ཁག་པོ་རེད། བོད་ཀྱི་སྲོལ་རྒྱུན་སྙན་ངག་མ་སྦྱངས་བ་ཡིན་ན་བོད་ཀྱི་མཁས་དབང་དག་གི་རྣམ་དཔྱོད་ལེན་ཐུབ་ཀྱི་མ་རེད། གསུངས་སོང་།
དྲ་ལམ་ནས་མཉམ་ཞུགས་གནང་མཁན་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས། དང་ཐོག་རང་ཉིད་ཀྱི་ལོ་རྒྱུས་ཀྱི་དཔེ་དེབ་འབྲི་བར་གྲ་སྒྲིག་མེད་ཅིང་གདེང་འཇོག་བྱེད་རིན་ཡོད་པ་ཞིག་ཀྱང་མིན་པས། དེ་ལ་དོ་སྣང་དེ་འདྲ་བྱས་མེད་ཀྱང་། རྗེས་སུ་༧གོང་ས་མཆོག་གི་དབུས་ས་དབང་ཆེན་མོ་སྐུ་ངོ་རྒྱ་ལོ་དོན་འགྲུབ་མཆོག་བཅས་ཀྱིས་ནན་ཏན་གྱིས་བཀའ་འདྲི་གནང་སོང་། རྒྱལ་སྤྱིའི་བོད་དོན་ཉམས་ཞིབ་ཁང་གི་ལས་གཞི་རུ་རྒྱབ་སྐྱོར་གནང་དགོས་པའི་སྐུལ་མ་གནང་པར་བརྟེན། ན་ནིང་ཏོག་དབྱིབས་གཉན་རིམ་སྐབས་དང་བསྟུན་ནས་ཁྱིམ་དུ་བསྡད་ནས་བྲིས་པ་ཞིག་ཡིན་ལ། ལོ་རྒྱུས་ཀྱི་དེབ་འདི་ནི་ང་རང་ཡ་མཚན་ཞིག་ཡིན་པར་བྲིས་པ་མ་ཡིན་པར། གཙོ་བོ་བོད་མི་རིགས་དང་རྒྱལ་ཁབ་དཀའ་ཁག་ལ་ཐུག་དུས། ང་ཚོ་མི་རབས་བར་མ་ཞིག་ཡིན་པའི་ཆ་ནས། བོད་ཀྱི་ལོ་རྒྱུས་དང་འཐབ་རྩོད་ཀྱི་རྒྱུན་བསྐྱངས་ནས་མི་རབས་རྗེས་མའི་ལག་ཏུ་འཇོག་པའི་དམིགས་ཡུལ་བཟུང་ནས་བྲིས་པ་ཞིག་ཡིན། ཞེས་གསུངས་སོང་།
འདི་གའི་གསར་འགོད་པས་ཞལ་པར་བརྒྱུད་དཔེ་དེབ་དེ་བྲིས་པའི་དགོས་དམིགས་སྐོར་དྲིས་པར་ཁོང་གིས། མི་ཞིག་གི་རང་ཉིད་ཀྱི་ལོ་རྒྱུས་ཡིག་ཐོག་ཏུ་འགོད་པ་གལ་ཆེན་པོ་རེད། དང་པོ་བཙན་བྱོལ་དུ་འབྱོར་སྐབས་དེབ་འདོན་པའི་འཆར་གཞི་གང་ཡང་མེད། ༧གོང་ས་མཆོག་ལ་ཐེངས་དང་པོ་མཇལ་ཁ་ཞུས་སྐབས་མི་ཚེའི་ལོ་རྒྱུས་ཤིག་འབྲི་དགོས་སྐོར་བཀའ་གནང་སོང་། རང་ཉིད་ཀྱི་མི་ཚེའི་ལོ་རྒྱུས་ཤིག་འབྲི་དགོས་པར་དམིགས་བསལ་རིན་ཐང་ཞིག་མི་འདུག་བསམ་ནས་དེ་ལྟར་ལྷག་སོང་། དེའི་རྗེས་སུ་༧གོང་ས་མཆོག་ལ་མཇལ་ཁ་ཞུས་ནས་ཡང་བསྐྱར་དཔེ་དེབ་སྐོར་ལ་བཀའ་གནང་སོང་པས་བཀའ་ཟློག་མ་ཐུབ་པ་དང་། མི་རིགས་ཤིག་གི་འཐབ་རྩོད་ཀྱི་བརྒྱུད་རིམ་ཐོག་ནས་གལ་ཆེན་པོ་ཡིན་པར་བརྟེན། ང་རང་ཡ་མཚན་ཞིག་ཡིན་པར་ཡིག་འཇོག་བྱ་རྒྱུ་མིན་པར། མི་རིགས་ཤིག་གི་དཀའ་ཁག་དང་འཐབ་རྩོད་ཀྱི་གནད་འགག་ཏུ་ཐུག་ཡོད་པར། རང་ཉིད་ཀྱིས་འཐབ་རྩོད་བྱས་པ་དེ་མི་རབས་རྗེས་མར་ཐུགས་ཕན་གསོ་ཐུབ་རྒྱུ་རེད་བསམ་ནས་ཡིག་ཐོག་ཏུ་བཀོད་པ་ཡིན། བོད་ནང་དུ་ལོ་རྒྱུས་སྟེང་དུ་རིན་ཐང་ཆེ་བའི་མི་སྣ་གལ་ཆེན་མང་པོ་བཙོན་འཇུག་བྱས་ཡོད་སྟབས། ཁོང་རྣམ་པའི་ལོ་རྒྱུས་ཡིག་ཐོག་ཏུ་འཁོད་ཐུབ་པ་ཡིན་ན་རིན་ཐང་བླ་ན་མེད་པ་ཡིན་རྒྱུ་རེད། ཅེས་བརྗོད་བྱུང་།
མགོ་ལོག་འཇིགས་མེད་ལགས་ཀྱི་དཔེ་དེབ་ནང་དུ་གཙོ་བོ་མི་རིགས་ཤིག་གི་འཐབ་རྩོད་ཀྱི་བརྒྱུད་རིམ་ཞིག་འབྲི་དགོས་ན་ལོ་རྒྱུས་ཀྱི་ཕུགས་འདེད་ཐུབ་དགོས་པ་གལ་ཆེན་དུ་བསམ་ཏེ། དང་པོར་བོད་ཀྱི་བཙན་པོའི་རྒྱལ་རབས་ནས་མགོ་བཙུགས་ཏེ། རྒྱ་ནག་དམར་ཕྱོགས་ཀྱིས་བོད་དུ་བཙན་འཛུལ་བྱས་པ་དང་། མདོ་སྨད་མགོ་ལོག་ཏུ་བཙན་འཛུལ་ཇི་ལྟར་བྱས་པ། དེ་བཞིན་རང་ཉིད་ཀྱི་ཕ་མེས་རྣམས་ལ་མནར་གཅོད་བྱས་པའི་མཐོང་ཐོས། མདོ་སྨད་བླ་བྲང་ཕྱོགས་སུ་ལས་འགུལ་སྤེལ་བ། ཕྱི་ལོ་ ༢༠༠༨ ནས་རང་ཉིད་ལ་མནར་གཅོད་ཇི་ལྟར་བྱས་པའི་བརྒྱུད་རིམ་དང། རྒྱ་གཞུང་གིས་ཐེངས་གསུམ་བཙོན་བྱས་པའི་སྐོར། དེ་ནས་བཙན་བྱོལ་དུ་ཡོང་ནས་རྒྱལ་སྤྱིའི་ཐོག་བོད་དོན་ཞུ་གཏུགས་བྱས་པ་བཅས་བྲིས་ཡོད་འདུག
གསར་འགོད་པ། བྱམས་པ་ཚེ་རིང་།
