ཕྱི་ལོ་ ༢༠༣༥ བར་དུ་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་གཙོར་བཟུང་གིས་བོད་ཁུལ་གྱི་ཐོན་ཁུངས་ཕུན་སུམ་ཚོགས་ཤིང་མི་འབོར་ཆེ་བའི་ས་ཁུལ་དུ་ལྕགས་ལམ་མི་འདྲ་བ་བཅུ་གསར་དུ་བརྒྱག་རྒྱུ་ཡིན་པ་མ་ཟད་ཨེ་ཤ་ཡ་ལྷོ་མའི་རྒྱལ་ཁབ་ཁག་ལ་ལྕགས་ལམ་གྱིས་མཐུད་ཚད་ཇེ་མགྱོགས་སུ་གཏོང་འཆར་ཡོད་འདུག
ཁ་སང་རྒྱ་ནག་གཞུང་འབྲེལ་བརྒྱུད་ལམ་དུ་གནས་སྤེལ་བ་ལྟར་ན། བོད་རང་སྐྱོང་ལྗོངས་འཕེལ་རྒྱས་ཨུ་ཡོན་ལྷན་ཁང་ཟེར་བས་ལོ་ལྔ་ཚན་གྱི་འཆར་འགོད་བཅུ་བཞི་པ་དང་དུས་ཡུན་རིང་འབྲིང་གི་ལྕགས་ལམ་དྲ་བའི་འཆར་འགོད་ཟེར་བ་ཞིག་ཡོངས་བསྒྲགས་བྱས་པའི་ནང་། ཐོན་ཁུངས་ཕུན་སུམ་ཚོགས་ཤིང་། མི་སྣ་རུབ་འདུས་ཆེ་བའི་ས་ཁུལ་དུ་ལྕགས་ལམ་དྲ་བའི་གཞི་རྒྱ་ཇེ་ཆེ་དང་སྤུས་ཚད་ཇེ་ལེགས་སུ་གཏང་ནས་ལམ་བར་གྱི་དུས་ཚོད་ཧ་ཅང་ཐུང་དུ་འགྲོ་རྒྱུ་ཡིན་ལུགས་དང་། ལྕགས་ལམ་གྱིས་རྒྱལ་ཁབ་ཀྱི་འཐབ་ཇུས་ལག་བསྟར་དང་ས་ཁོངས་དཔལ་འབྱོར་དང་སྤྱི་ཚོགས་སྤུས་ཚད་གོང་འཕེལ་འགྲོ་རྒྱུར་ནུས་པ་སྔར་ལྷག་འཐོན་རྒྱུ་ཡིན་པར་བཤད།
དེ་ཡང་ཕྱི་ལོ་ ༢༠༣༥ ལོ་བར་དུ་བོད་ལྗོངས་ཀྱི་ལྕགས་ལམ་དྲ་བའི་གཞི་ཁྱོན་སྤྱི་ལེ་སྟོང་ ༥ ཡན་ཟིན་རྒྱུ་དང་། ལྷ་ས་གཙོ་བོར་བཟུང་བའི་བོད་ལྗོངས་ནང་ཁུལ་གྱི་ས་གནས་རིམ་པའི་སྲིད་འཛིན་ཁུལ་ཚང་མར་ཁྱབ་དགོས་པ་མ་ཟད། ཤིན་ཅང་དང་མཚོ་སྔོན། སི་ཁྲོན། ཡུན་ནན་སོགས་སྦྲེལ་ཞིང་། འགྲམ་རྒྱུད་ཀྱི་གཙོ་གནད་འགག་སྒོ་ཁག་ལའང་འབྲེལ་བ་མཐུད་རྒྱུ་ཡིན་ལ། དེ་ཡང་འཕྲེད་ཀྱི་ལམ་ཐིག་ནང་གཞིས་རྩེ་ནས་ལྷ་ས་དང་ལྷོ་ཁ། ཉིང་ཁྲི། ཆབ་མདོ། ཁྲེན་ཏུའུ་བར་དང་། མངའ་རིས་ནས་ནག་ཆུ་དང་ཆབ་མདོ་བར་དང་། གཞུང་གི་ལམ་ཐིག་ནང་ཧོ་ཐན་ནས་མངའ་རིས་དང་གཞིས་རྩེ། ལྷ་ས། ལྷོ་ཁ། ཉིང་ཁྲི། སེམས་ཀྱི་ཉི་ཟླ། ལི་ཅང་བར། ཟི་ལིང་ནས་གོར་མོ་དང་ནག་ཆུ། ལྷ་ས་བར། ཟི་ལིང་ནས་ཡུལ་ཤུལ་དང་ཆབ་མདོ་བར་བཅས་ལ་ལྕགས་ལམ་གྱིས་མཐུད་ཀྱི་ཡོད་འདུག
དེ་བཞིན་ཕྱི་ལོ་ ༢༠༣༥ ལོའི་ལོ་མཇུག་བར་དུ་ལྷ་ནས་མལ་གྲོ་གུང་དཀར་བར་གྱི་ལྕགས་ལམ་བསྐྲུན་ཚར་བ་བྱ་རྒྱུ་དང་། ས་དགའ་ནས་སྒེར་རྩེ་དང་། གཞིས་རྩེ་ནས་ཤན་རྩ་དང་དཔལ་མགོན་བར། མལ་གྲོ་གུང་དཀར་ནས་སྟེང་ཆེན་བར། སྣེ་གདོང་ནས་མཚོ་སྣ་བར། གཏིང་སྐྱེས་ནས་ཁང་དམར་བར། སྨན་གླིང་ནས་མེ་ཏོག་བར་དང་རྫ་ཡུལ་བར། ཆབ་མདོ་ནས་མཛོད་དགེ་བར་སོགས་ཀྱི་ལྕགས་ལམ་བསྐྲུན་རྒྱུར་ཞིབ་འཇུག་ལག་བསྟར་བྱ་རྒྱུ་དང་། ལམ་ཐིག་དེ་དག་གི་སྤྱིའི་རིང་ཚད་ལ་སྤྱི་ལེ་ ༢༥༡༤ ཡོད་པར་བཤད།
གཞན་ཡང་། ཨེ་ཤ་ཡ་ལྷོ་མར་ཕྱོཊ་པའི་སྒོ་དབྱེའི་ལྕཊ་ལམ་གྱི་རྒྱལ་སྤྱིའི་བགྲོད་ལམ་གཏོད་རྒྱུ་ཟེར་བའི་ལས་གཞིའི་ནང་འགག་སྒོའི་བར་གྱི་ལྕགས་ལམ་སྐྲུན་མགྱོགས་སུ་གཏོང་རྒྱུ་དང་། བོད་ལྗོངས་ཀྱི་འགྲམ་རྒྱུད་སྐམ་སའི་གཙོ་གནད་འགག་སྒོར་མཐུད་ཐུབ་པ་བྱས་ཏེ། ཨེ་ཤ་ཡ་ལྷོ་མའི་རྒྱལ་ཁབ་ཁག་བར་གྱི་རྒྱལ་སྤྱིའི་ལྕགས་ལམ་གཏོད་རྒྱུ་དང་། ཤིན་བོད་ལྕགས་ལམ་གཞི་རྟེན་དུ་བྱས་ནས་སྐྱིད་གྲོང་འགག་སྒོའི་ལྕགས་ལམ་བསྐྲུན་རྒྱུ༼བུལ་ཁུ་མཚོ་ནས་སྐྱིད་རོང་བར༽ དང་། དེ་བཞིན་གྲོ་མོ་འགག་སྒོའི་ལྕགས་ལམ་༼གཞིས་རྩེ་ནས་གྲོ་མོ་བར༽དང་། སྤུ་ཧྲེང་འགག་སྒོའི་ལྕགས་ལམ་༼བར་ཁ་ནས་སྤུ་ཧྲེང་བར༽སོགས་བསྐྲུན་ཏེ་རིམ་བཞིན་ཨེ་ཤ་ཡ་ལྷོ་མར་ཕྱོགས་པའི་སྒོ་དབྱེའི་རྒྱལ་སྤྱིའི་བགྲོད་ལམ་གཏོད་དེ་རྒྱུད་གཅིག་ལམ་གཅིག་མཉམ་སྐྲུན་བྱ་རྒྱུར་ནུས་པ་གོང་མཐོར་གཏང་རྒྱུ་ཡིན་སྐོར་བསྒྲགས་འདུག
ད་ཡོད་ཀྱི་མཚོ་བོད་ལྕགས་ལམ་ན་གོར་མོ་ནས་ལྷ་སའི་དུམ་བུ་གློག་རླངས་ཅན་དུ་བསྒྱུར་རྒྱུ་དང་། ཁྲོན་བོད་ལྕགས་ལམ་ལྷ་ས་ནས་ཉིང་ཁྲིའི་དུམ་བུར་ཕྱོགས་གཉིས་ཅན་གྱི་ལམ་ཐིག་བཟོ་རྒྱུ། ལྷ་ས་ནས་གཞིས་རྩེའི་ལྕགས་ལམ་ལ་ཕྱོགས་གཉིས་ཅན་གྱི་ལམ་ཐིག་དང་གློག་རླངས་ཅན་བསྒྱུར་རྒྱུ་ཡིན་པ་སོགས་བསྒྲགས་འདུག
གསར་འགོད་པ། བསྟན་འཛིན་ཕུར་བུ།
