ཉི་ཧོང་ནང་གི་བོད་དོན་རྒྱབ་སྐྱོར་ཚོགས་པ་བཅུ་ཐུན་མོང་ནས་རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ངོས་འཛིན་ཐད་ཐེ་ཇུས་མི་ཆོག་པ་དང་བོད་ཀྱི་སྐད་ཡིག་རིག་གཞུང་རྩ་མེད་དུ་གཏོང་བའི་རྒྱ་སྒྱུར་སྲིད་ཇུས་འཕྲལ་དུ་མཚམས་འཇོག་ཡོང་ཐབས་དང་འབྲེལ་བའི་གྲོས་ཆོད་དོན་ཚན་ལྔ་གཏན་འབེབ་གནང་འདུག
ཁ་སང་ཕྱི་ཚེས་ ༡༢ ཉིན་བོད་སྐྱོབ་འབྲེལ་མཐུད་ཁང་(The Save Tibet Network)གིས་གཙོ་གཉེར་དང་། ཉི་ཧོང་བོད་རིགས་སྤྱི་མཐུན་ཚོགས་པས་མཉམ་འབྲེལ་གྱི་གོ་སྒྲིག་འོག་དྲ་ལམ་བརྒྱུད་ལོ་འཁོར་ཚོགས་འདུ་འཚོགས་ཡོད་པ་དང་། ཚོགས་འདུའི་ཐོག་འབྲེལ་མཐུད་ཁང་གི་འགན་འཛིན་(Makino Seishu)ལགས་དང་། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱི་དབུས་རྒྱལ་ས་ཊོག་ཡོ་དང་ཧི་རོ་ཤི་མ་སོགས་ཉི་ཧོང་གི་ས་ཁུལ་འདྲ་མིན་ནས་བོད་དོན་རྒྱབ་སྐྱོར་ཚོགས་པ་ ༡༠ ཡི་ཚོགས་མི་ ༢༨ འཛོམས་ཏེ། བོད་དོན་དང་འབྲེལ་བའི་གྲོས་ཆོད་དོན་ཚན་ལྔ་གཏན་འབེབ་གནང་འདུག
དེ་རིང་འདི་གའི་གསར་འགོད་པས་ཞལ་པར་བརྒྱུད་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་སུ་ཚོགས་ཐོག་ཏུ་བཞག་པའི་བོད་སྐོར་གྲོས་ཆོད་དོན་ཚན་ལྔའི་སྐོར་བཀའ་འདྲི་ཞུས་ཁོང་གིས། གྲོས་ཆོད་ནང་དུ་བོད་ནང་གི་བོད་མི་ཚོར་འགྲོ་བ་མིའི་ཐོབ་ཐང་སྤྲོད་དགོས་པ་དང་བོད་པའི་ཕྲུ་གུ་རྣམས་རྒྱ་ནག་ཅན་དུ་སྒྱུར་བའི་སྲིད་ཇུས་ལག་བསྟར་མཚམས་འཇོག་བྱ་དགོས་པ། དེ་བཞིན་༧གོང་ས་ཏཱ་ལའི་བླ་མའི་ཡང་སྲིད་འདེམས་ཕྱོགས་སོགས་ལ་ཐེ་ཇུས་བྱ་ཆོག་གི་མེད་པ་བཅས་ཀྱི་གྲོས་ཆོད་བཞག་ཡོད་སྐོར་དང་། ལོ་འདིའི་ནང་བོད་དོན་རྒྱབ་སྐྱོར་ཚོགས་པ་ཁག་སོ་སོ་ནས་གྲོས་ཆོད་དོན་ཚན་ལྔ་པོ་དེ་དག་ས་གནས་ཁག་གི་ཚོགས་པ་དང་། ས་གནས་ཀྱི་གྲོས་ཚོགས་སོགས་ལ་འགྲེམས་སྤེལ་དང་། ཁོང་ཚོའི་ངོས་ནས་ལག་བསྟར་བྱ་དགོས་ཤིང་། དགོན་པ་ཁག་ཏུའང་ལས་འགུལ་དེ་འདྲ་སྤེལ་དགོས་ཀྱི་ཡོད་པ་དང་། དམིགས་བསལ་གྱིས་ཉི་ཧོང་གི་གྲོས་ཚོགས་ནས་བོད་དོན་སྐོར་ལ་དོ་སྣང་ཡོང་སླད་ལས་འགུལ་སྤེལ་འཆར་ཡོད་སྐོར་སོགས་བརྗོད་བྱུང་།
ད་ལན་ཐུན་མོང་ཐོག་གཏན་འབེབ་བྱུང་བའི་གྲོས་ཆོད་དོན་ཚན་ལྔ་ནི། ༡། རྒྱ་ནག་དམར་ཤོག་གཞུང་གིས་བོད་ནང་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་པ་དེ་མཚམས་འཇོག་བྱ་དགོས་པ་དང་། ༢། བོད་ནང་གི་བོད་མི་ཚོར་རང་ཐག་རང་གཅོད་དང་འགྲོ་བ་མིའི་ཐོབ་ཐང་སྤྲོད་དགོས་ཀྱི་ཡོད་པ་དང་། བོད་ཀྱི་སྐད་ཡིག་དང་རིག་གཞུང་རྩ་མེད་བཟོ་སླད། རྒྱ་ནག་གི་མགོ་ཁྲིད་ཀྱིས་བོད་པའི་ཕྲུ་གུ་རྣམས་ཀྱི་ལྟ་བ་སྒྱུར་ཐབས་སུ་རྒྱ་སྐད་དང་རྒྱ་ནག་གི་རིག་གཞུང་སོགས་བསླབ་སྟེ་བོད་པའི་སློབ་ཕྲུག་རྣམས་རྒྱ་ནག་ཅན་དུ་སྒྱུར་བའི་ལས་གཞི་དེ་གང་མགྱོགས་མཚམས་འཇོག་བྱ་དགོས་པ། ༣། རྒྱ་ནག་གི་གྲངས་ཉུང་མི་རིགས་ཀྱི་ཁྲིམས་གཞིར་བཟུང་། གྲངས་ཉུང་མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་ཁྲིམས་དེ་ལག་བསྟར་བྱ་དགོས་ཀྱི་ཡོད་པ། ༤། རྒྱ་ནག་གཞུང་གིས་བོད་ཀྱི་ནང་པའི་ཆོས་ལུགས་་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་སོགས་ཀྱི་ཐོག་ལ་ཐེ་ཇུས་བྱེད་མི་ཆོག་པ། ༥། ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་མི་དང་ཉི་ཧོང་སྐུ་ཚབ་དོན་ཁང་གིས་རྒྱ་ནག་སྲིད་གཞུང་གིས་འདེམས་པའི་ཏཱ་ལའི་བླ་མའི་ཡང་སྲིད་སོགས་ནམ་ཡང་ངོས་ལེན་བྱེད་ཀྱི་མེད་པའི་གྲོས་ཆོད་བཏོན་ཡོད་འདུག
ཚོགས་འདུའི་ཐོག་ཉི་ཧོང་གྲོས་ཚོགས་ཀྱི་ཚོགས་མི་ཟུར་པ་དང་ (Save Tibet Network) གི་ཚོགས་གཙོ་མི་ཀི་ནོ་སི་ཤུ་ (Makino Seishu) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་ཇི་བཞིན་ཚོགས་མི་རྣམས་ནས་འཚེ་མེད་ཞི་བའི་ལམ་ནས་བོད་མིའི་རང་དབང་དྲང་བདེན་རྩོད་དགོས་སྐོར་བརྗོད་ཡོད་པ་དང་། དེ་བཞིན་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་འདུ་གོ་སྒྲིག་གནང་མཁན་དང་ཚོགས་འདུའི་ནང་མཉམ་ཞུགས་གནང་མཁན་རྣམས་ཀྱིས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་དང་། རྒྱ་ནག་གཞུང་གིས་བོད་ནང་གི་བོད་མི་ཚོར་སྡུག་སྦྱོང་མནར་གཅོད་གཏོང་བཞིན་ཡོད་པ་དང་། བོད་ཀྱི་ནང་པའི་ཆོས་ལུགས་ལ་ཐེ་ཇུས་བྱེད་བཞིན་ཡོད་པའི་གནས་སྟངས་སོགས་ངོ་སྤྲོད་བྱས་ཤིང་། ཚོགས་མི་དང་ཁྲིམས་བཟོ་བ་རྣམས་ཀྱིས་བོད་ནང་དུ་འགྲོ་བ་མིའི་ཐོབ་ཐང་མེད་པ་དང་ཆོས་དད་རང་མོས་མེད་པ། བོད་ཀྱི་ངོ་བོ་དང་སྐད་ཡིག་རྩ་མེད་ཀྱི་སྲིད་ཇུས་ངན་པ་ལག་བསྟར་བྱེད་བཞིན་པའི་གནས་སྟངས་སོགས་ངོ་སྤྲོད་དང་གོ་རྟོགས་གང་མང་སྤེལ་དགོས་པའི་འབོད་སྐུལ་ཞུས་ཡོད་འདུག
གསར་འགོད་པ། བསྟན་འཛིན་ཕུར་བུ།
