མི་འགྱངས་བར་ཨོ་གླིང་གི་གྲོས་ཚོགས་འཐུས་མི་ཁག་ཅིག་དྷ་རམ་ས་ལར་ཕེབས་འཆར་འདུག

ཨོ་གླིང་གྲོས་ཚོགས་ནང་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་གླེང་སློང་གནང་ཡོད་པ་མ་ཟད་འདི་ལོའི་ཕྱི་ཟླ་ ༤ པའི་ནང་བོད་དོན་རྒྱབ་སྐྱོར་ཚོགས་པའི་སྐུ་ཚབ་འགའ་བཞུགས་སྒར་དྷ་རམ་ས་ལར་ཕེབས་འཆར་འདུག

བོད་མིའི་སྒྲིག་འཛུགས་ཀྱི་ཕྱི་འབྲེལ་ལས་ཁུངས་དང་ཨོ་གླིང་སྐུ་ཚབ་དོན་ཁང་གཉིས་ཀྱི་གོ་སྒྲིག་འོག འདི་ལོའི་ཕྱི་ཟླ་ ༤ ཚེས་ ༡༧ ནས་ ༢༠ བར་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་གྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཕེབས་འཆར་ཡོད་འདུག་ལ། ད་ལྟའི་ཆར་ངེས་གཏན་མེད་ཀྱང་ཐེངས་འདིའི་སྐུ་ཚབ་ཚོགས་ཆུང་གི་གཟིགས་སྐོར་ནང་བོད་དོན་རྒྱབ་སྐྱོར་བ་འཐུས་མི་ ༥ ཡས་མས་ཕེབས་ཀྱི་ཡོད་འདུག

ཟླ་འདིའི་ཕྱི་ཚེས་ ༧ ཉིན་ཨོ་གླིང་གྲོས་ཚོགས་ནང་ཕྱི་འབྲེལ་ལས་དོན་དང་འབྲེལ་བའི་བགྲོ་གླེང་གནང་སྐབས། གྲོས་ཚོགས་གོང་མའི་འཐུས་མི་ལྕམ་སྐུ་ཇཱ་ནེ་ཊི་རའེ (Janet Rice) ལགས་ཀྱིས། རྒྱ་ནག་གཞུང་གིས་བོད་ནང་གི་བོད་མི་ཚོར་བཙན་གནོན་དང་འགྲོ་བ་མིའི་ཐོབ་ཐང་འཕྲོག་པའི་གནད་དོན་ཐོག་ལ་སེམས་འཚབ་ཡོད་པ་དང་། རྒྱ་གཞུང་གིས་ཕྱི་ལོ་ ༡༩༥༠ ལོར་བོད་ནང་བཙན་འཛུལ་བྱེད་མགོ་བཙུགས་པ་དང་། ཕྱི་ལོ་ ༡༩༥༩ ལོར་བོད་ཡོངས་སུ་བཙན་འཕྲོག་བྱས་པར་བརྟེན། ཕྱི་ལོ་ ༡༩༥༩ ལོའི་བོད་མིའི་སྒེར་ལངས་ཉིན་མོ་རྗེས་དྲན་སླད། ལོ་ལྟར་ཕྱི་ཟླ་ ༣ ཚེས་ ༡༠ ཉིན་གསུམ་བཅུའི་དུས་དྲན་སྲུང་གཙི་བྱེད་ཀྱི་ཡོད་པ་རེད། དུས་དེ་ནས་བཟུང་རྒྱ་ནག་གཞུང་གིས་བོད་མི་ས་ཡ་ ༡ ལྷག་བསད་པ་དང་། རྒྱ་མི་རྣམས་བོད་ནང་དུ་གནས་སྤོ་རུ་བཅུག་པའི་རྐྱེན་གྱིས་བོད་ནང་དུ་བོད་མིའི་མི་གྲངས་ནི་གྲངས་ཉུང་མི་རིགས་ཤིག་ཆགས་ཡོད་སྐོར་དང་། འདས་པའི་ལོ་ངོ་ ༢༨ གོང་༧པཎ་ཆེན་བླ་མ་གར་སོང་ཆ་མེད་དུ་གྱུར་བའི་གནད་དོན་ཐད་སེམས་འཚབ་ཡོད་པ་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་གསར་འགོད་བསྒྲགས་གཏམ་སྤེལ་བའི་ནང་། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ལྷག་རང་གི་ཕ་མ་དང་ཁ་བྲལ་དུ་བཅུག་སྟེ། བཙན་གྱིས་རྒྱ་སྒྱུར་གྱི་སློབ་གསོ་སྤྲོད་ཀྱི་ཡོད་པའི་སྐོར་ལ་ཉེན་བརྡ་བཏང་ཡོད་སྐོར་དང་། ཨོ་གླིང་གཞུང་ནས་རྒྱ་གཞུང་གིས་བོད་ནང་དང་འཛམ་གླིང་ས་ཕྱོགས་གང་སར་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་གནད་དོན་གླེང་སློང་གནང་དགོས་སྐོར་གསུངས་འདུག

ཡང་ལྕམ་སྐུ་ཇཱ་ནེ་ཊི་རའེ་སི་ལགས་ཀྱིས། འདི་ལོའི་ཕྱི་ཟླ་ ༤ པའི་ནང་ཨོ་གླིང་གྲོས་ཚོགས་བོད་དོན་རྒྱབ་སྐྱོར་གྱི་འཐུས་མི་དང་ལྷན་དུ་དྷ་རམ་ས་ལར་ཕེབས་འཆར་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་འཆར་ཡོད་སྐོར་སོགས་གསུངས་འདུག་ལ། ལྕམ་སྐུ་ཇཱ་ནེ་ཊི་རའེ་སི་ལགས་ནི་ཨོ་གླིང་གི་ལྗང་ཁུ་སྲིད་དོན་ཚོགས་པའི་འཐུས་མི་དང་། དུས་ཡུན་རིང་པོ་ནས་བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་འདུག་ལ། འདས་ལོར་ཨ་རིའི་རྒྱལ་ས་ཝ་ཤིང་ཊོན་དུ་སྐོང་ཚོགས་གནང་བའི་བོད་མི་མང་སྤྱི་འཐུས་ལྷན་ཚོགས་ཀྱི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ ༨ པའི་ཐོག་ལའང་མཉམ་ཞུགས་གནང་ཡོད་འདུག

ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བཞུགས་སྒར་དྷ་རམ་ས་ལར་ཕེབས་འཆར་ཡོད་པའི་སྐོར་ལ་དེ་རིང་འདི་གའི་གསར་འགོད་པར་ཨོ་གླིང་གི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས། ད་ལྟའི་ཆར་དུས་ཚེས་དེ་གཏན་འཁེལ་མེད་ཀྱང་འདི་ལོའི་ཕྱི་ཟླ་ ༤ པའི་ཟླ་དཀྱིལ་ལ་ཕེབས་འཆར་ཡོད་པ་དང་། དྷ་རམ་ས་ལར་ཉིན་གྲངས་གསུམ་བཞི་ཙམ་རིང་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་ཀྱི་བཀའ་ཤག་དང་བཅས་ལྷན་ཁང་ཁག་དང་། བོད་མི་མང་སྤྱི་འཐུས་ལྷན་ཁང་། དེ་བཞིན་རིག་གཞུང་ལྟེ་གནས་ཁག་ཅིག་ལ་གཟིགས་སྐོར་གནང་འཆར་ཡོད་སྐོར་དང་། ད་ལྟའི་ཆར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་གཏན་འཁེལ་བྱུང་མེད་སྐོར་བརྗོད་བྱུང་།

ཨོ་གླིང་ནང་རྒྱའི་མི་འབོར་ཆེན་པོ་ཡོད་པ་དང་། འདས་པའི་ལོ་མང་ནང་བོད་མིའང་ཇེ་མང་དུ་འགྲོ་བཞིན་ཡོད་སྟབས། ཡུལ་དེའི་ནང་བོད་དོན་གོ་རྟོགས་དང་ལས་འགུལ་སྤེལ་ཕྱོགས་ཀྱི་གནས་སྟངས་ག་འདྲ་ཆགས་ཀྱི་ཡོད་དྲིས་པར་ཁོང་གིས།  ང་ཚོ་འདིར་དོན་གཅོད་ལས་ཁུངས་དང་བོད་རིགས་མཐུན་ཚོགས་ཁག དེ་བཞིན་བོད་དོན་རྒྱབ་སྐྱོར་བའི་ཚོགས་པ་སོགས་ཡོད་པ་ཚང་མས་བོད་དོན་དང་འབྲེལ་བའི་གནད་དོན་དེ་ཚོའི་ཐོག་མུ་མཐུད་དུ་ལས་འགུལ་སྤེལ་བཞིན་ཡོད་པ་རེད། སྐབས་དང་དུས་ལ་བོད་ནང་གི་གནས་སྟངས་གང་འདྲ་བྱུང་བ་ཡིན་ནའང་། དེ་ཚོའི་ཐོག་ལ་གཞུང་དང་གྲོས་ཚོགས་འཐུས་མིར་ཞུ་གཏུག་བྱས་པ་དང་རྒྱབ་སྐྱོར་འཚོལ་བ་སོགས་མུ་མཐུད་དུ་བྱེད་བཞིན་ཡོད་པ་སོགས་སྔར་རྒྱུན་ལྟར་གནང་གི་ཡོད་པ་ལས། དེ་ལ་དམིགས་བསལ་དཀའ་ངལ་གང་ཡང་འཕྲད་ཀྱི་མེད་སྐོར་བརྗོད་བྱུང་།

གསར་འགོད་པ། བསྟན་འཛིན་ཕུར་བུ།