འདས་པའི་ཟླ་གཅིག་ཙམ་ནས་བཟུང་སྟེ་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་སོགས་སུ་དམག་མི་སྔར་ལས་མང་པོ་འགྲེམ་འཇོག་བྱས་ཏེ་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་དོགས་ཟོན་དང་སོ་ཉུལ་ཤུགས་ཆེན་བྱེད་བཞིན་ཡོད་འདུག
བོད་ཀྱི་ལོ་སར་བསླེབ་ལ་ཉེ་བའི་སྐབས་འདིར་རྒྱ་ནག་གཞུང་གིས་ལྷ་སའི་ཁུལ་དུ་དམག་མི་སྔར་ལས་མང་པོ་འགྲེམ་འཇོག་བྱས་ཡོད་པ་མ་ཟད། ལྷ་སའི་བར་སྐོར་གཙོ་བོར་གྱུར་བའི་ས་ས་ཚིགས་ཁག་ཏུ་གསང་བའི་བརྙན་མིག་སྔར་ལས་མང་པོ་གསར་དུ་བཙུགས་ཏེ། བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་ལྟ་ཞིབ་དང་དོགས་ཟོན་ནན་པོ་བྱེད་ཀྱིན་ཡོད་འདུག འདི་གའི་གསར་འགོད་པར་འབྲེལ་ཡོད་ཀྱི་གནས་ཚུལ་མཁོ་སྤྲོད་པས། ལྷ་ས་གྲོང་ཁྱེར་ཁུལ་དུ་དམག་མི་མང་པོ་འགྲེམ་འཇོག་བྱས་ནས་བོད་མི་རྣམས་གང་བྱུང་འབོད་འགུག་བྱས་ཏེ་ཁ་པར་སོགས་ཀྱི་ནང་སྔོག་བཤེར་དང་ཞིབ་བཤེར་ནན་པོ་བྱེད་བཞིན་ཡོད་སྐོར་བརྗོད་བྱུང་།
ཡང་ཁོང་གིས། ཕྱི་ཟླ ༢ ཙམ་ནས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཁུལ་དུ་ཉེན་རྟོག་པ་དང་དྲག་ཆས་དམག་མི་འབོར་ཆེན་འགྲེམ་འཇོག་བྱས་ཡོད་པ་མ་ཟད། དམག་མི་དང་ཉེན་རྟོག་པའི་སྒྲིག་ཆས་གྱོན་མེད་པའི་སོ་ཉུལ་བ་མང་པོ་ཞིག་ཀྱང་འགྲེམ་འཇོག་བྱས་ཏེ། དམག་དོན་མི་སྣ་ཟེར་བ་དག་གིས་ཉིན་ལྟར་ཁྲོམ་སྲང་ཁག་ཏུ་སྐོར་གཡེང་དང་། བདེ་འཇགས་སྲུང་སྐྱོབ་ཟེར་བར་ཁ་གཡར་ནས་ཟ་ཁང་དང་ཚོང་ཁང་རེ་རེ་བཞིན་ཞིབ་བཤེར་བྱེད་བཞིན་ཡོད་སྐོར་སོགས་འགྲེལ་བརྗོད་གནང་བྱུང་།
དེ་བཞིན་རྒྱ་ནག་གཞུང་འབྲེལ་ཤིན་ཧྭ་གསར་ཁང་སོགས་ཀྱིས་སྤེལ་བའི་དེ་འབྲེལ་གསར་འགྱུར་ནང་དུ། ལོ་སར་བསླེབ་ལ་ཉེ་བའི་སྐབས་འདིར། འདས་པའི་ཟླ་བ་གཅིག་ནང་ཚུད་དུ་ལྷ་ས་གྲོང་ཁྱེར་འགྲིམ་འགྲུལ་སྐྱེལ་འདྲེན་ཕྱོགས་བསྡུས་ཁྲིམས་འཛིན་རུ་ཁག་ཟེར་བས། ལྷ་ས་རྒྱ་ཆེའི་གྲོང་མི་ཚོར་བདེ་འཇགས་དང་། ཤེས་དཔལ། གོ་རིམ་ལྡན་པའི་འགྲིམ་འགྲུལ་སྒྲིག་ལམ་ཡར་རྒྱས་གཏང་རྒྱུ་ཡིན་ལུགས་བསྒྲགས་ནས། ཁྱོན་རླངས་འཁོར་ ༥༩༣ ལ་སྔོག་བཤེར་བྱས་ཏེ། རྒྱ་སྒོར་ཁྲི་ ༣༢ ལྷག་གི་ཆད་པ་བཅད་ཡོད་ཅིང་། བོད་ཀྱི་ལོ་སར་ལ་འཆར་ཉེའི་མཚམས་འདིར་བྱ་ཐབས་སྣ་ཚོགས་སྤྱད་དེ་ཁྲིམས་འགལ་ངང་སྐྱེལ་འདྲེན་བྱེད་པའི་འཁོར་རིགས་ལ་ཞིབ་བཤེར་ཐག་གཅོད་བྱེད་ཤུགས་སྔར་བས་ཆེ་རུ་བཏང་ཡོད་ལུགས་སོགས་བསྒྲགས་འདུག
ལོ་སར་དང་དུས་ཆེན་ཁག་ལ་བོད་མི་མང་པོ་འདུ་འཛོམས་བྱས་ཏེ་ཆོས་ཕྱོགས་ཀྱི་བྱེད་སྒོ་སྣ་མང་སྤེལ་བཞིན་ཡོད་པ་མ་ཟད། ན་ནིང་གི་ལོ་སར་སྐབས་སུ་བོད་ཀྱི་གཞས་པ་གྲགས་ཅན་ཚེ་དབང་ནོར་བུ་ལགས་ཀྱིས་རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་གྱིས་སྐུ་ལུས་མེ་སྲེག་གནང་བ་སོགས་ངོ་རྒོལ་གྱི་ལས་འགུལ་རིགས་ཀྱང་འབྱུང་བཞིན་ཡོད་པར་བརྟེན། ལོ་ལྟར་རྒྱ་ནག་གཞུང་གིས་གསུམ་བཅུའི་དུས་དྲན་དང་། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར། དེ་བཞིན་བོད་ཀྱི་ལོ་སར་སོགས་ཀྱི་སྐབས་སུ་བོད་ནང་གི་ས་ཁུལ་མང་པོ་ཞིག་ཏུ་དམག་མི་འབོར་ཆེན་འགྲེམ་འཇོག་བྱས་ཏེ། བོད་མི་རྣམས་ཀྱི་འགྲོ་འདུག་དང་། ཆབ་སྲིད་ཀྱི་ལས་དོན་སྤེལ་གྱི་ཡོད་མེད་སོགས་ལ་གསང་ཉུལ་ནན་མོ་བྱེད་ཀྱི་ཡོད་པ་རེད།
གསར་འགོད་པ། དཔལ་ལྡན།
