བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅལ་མངའ་སྡེའི་སྲིད་སྐྱོང་གསར་བར་བོད་མིའི་སྒྲིག་འཛུགས་དང་བོད་མི་མང་གི་ཚབ་བྱས་ཏེ་འཚམས་འདྲི་ཞུས་གནང་འདུག
ད་ལྟ་རང་སྐར་མ་བཅུ་ཙམ་གྱི་སྔོན་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཊུ་ཝི་ཊར་བརྒྱུད། དེ་སྔ་མངའ་སྡེ་བློན་ཆེན་དང་དབུས་བློན་ཆེན་གྱི་ཕྱག་ལས་གནང་མྱོང་བའི་སྐུ་ཞབས་ཤཱུག་ལ་ (Shiv Pratap Shukla) ལགས་ཧི་མ་ཅལ་མངའ་སྡེའི་སྲིད་སྐྱོང་དུ་བསྐོ་གཞག་བྱུང་བར་འཚམས་འདྲི་ཞུས་གནང་འདུག
དེ་འབྲེལ་འཚམས་འཕྲིན་ནང་སྲིད་སྐྱོང་མཆོག་གིས། བོད་མིའི་སྒྲིག་འཛུགས་དང་བོད་མི་མང་གིས་ཁྱེད་ཉིད་ནས་ཧི་མ་ཅལ་མངའ་སྡེའི་སྲིད་སྐྱོང་གི་འགན་བཞེས་གནང་རྒྱུ་ཡིན་པར་འཚམས་འདྲི་ཞུ་ཡི་ཡོད། ངས་ཁྱེད་ཉིད་དང་དངོས་སུ་མཇལ་བར་རེ་བས་བལྟས་ཡོད། ཅེས་གསུངས་འདུག
གསར་དུ་བསྐོ་གཞག་བྱུང་བའི་སྐུ་ཞབས་ཤཱུག་ལ་ལགས་ཁ་སང་ཕྱི་ཚེས་ ༡༧ ཉིན་ཧི་མ་ཅལ་མངའ་སྡེའི་རྒྱལ་ས་ཤིམ་ལ་རུ་འབྱོར་ཡོད་ཅིང་། དེ་རིང་ཚེས་ ༡༨ ཉིན་རྒྱབ་ཆུ་ཚོད་ ༢ སྟེང་མངའ་སྡེའི་སྲིད་སྐྱོང་སྡོད་ཤག་ཏུ་ཧི་མ་ཅལ་མངའ་སྡེའི་སྲིད་སྐྱོང་སྐབས་ ༢༩ བའི་དམ་འབུལ་གནང་གི་ཡོད་པ་རེད།
ད་ལྟ་རང་ལོ་ ༧༠ ཡིན་པའི་སྐུ་ཞབས་ཤཱུག་ལ་ལགས་ནི་ཕྱི་ལོ་ ༡༩༥༢ ལོར་རྒྱ་གར་མངའ་སྡེ་ཨོ་ཊར་ནང་སྐྱེས་ཤིང་། ཕྱི་ལོ་ ༡༩༨༩ ལོ་ནས་ཁོང་རྒྱ་གར་གྱི་ཆབ་སྲིད་ནང་ཞུགས་པ་དང་བྷེ་ཇི་པུ་སྲིད་དོན་ཚོགས་པའི་ཚོགས་མི་ཡིན་འདུག ཕྱི་ལོ་ ༢༠༡༧ ནས་ ༢༠༡༩ བར་སྲིད་བློན་མུ་དྷི་མཆོག་གི་སྐབས་དང་པོའི་སྲིད་བློན་གྱི་སྣེ་འཁྲིད་འོག་རྒྱ་གར་དབུས་དཔལ་འབྱོར་བློན་ཆེན་དང་ཨོ་ཊར་མངའ་སྡེའི་བློན་ཆེན་སོགས་གནང་མྱོང་འདུག
