ཁ་སང་དགོང་མོར་མཚོ་སྔོན་མི་རིགས་སློབ་གྲྭ་ཆེན་མོའི་བོད་རིག་པའི་སློབ་གླིང་གི་སློབ་གཙོ་ཟུར་པ་བོད་རིག་པའི་མཁས་དབང་དང་ལོ་ཙཱ་བ་སངས་རྒྱས་ལགས་ནད་གཞི་ཡི་རྐྱེན་གྱིས་དགུང་གྲངས་ ༧༡ ཐོག་རེབ་གོང་དུ་སྐུ་གྲོངས་ཡོད་འདུག
བོད་རིག་པའི་མཁས་དབང་སློབ་དཔོན་ཆེན་མོ་སངས་རྒྱས་ལགས། དྲ་ལམ་གྱི་པར།
དགེ་རྒན་ཆེན་མོ་ཁོང་སྐུ་གཤེགས་པའི་ཡིད་སྐྱོའི་གནས་ཚུལ་ཐོན་རྗེས། བོད་ནང་གི་ཤེས་ལྡན་མི་སྣ་མང་པོ་ཞིག་གིས་ཁོང་གི་ཤུལ་ལུས་ནང་མི་སོགས་ལ་མྱ་ངན་དང་གདུང་སེམས་མཉམ་སྐྱེད་མཚོན་སླད། མི་སྒེར་གྱི་སྐད་འཕྲིན་རྒྱབ་ལྗོངས་སོགས་སུ་ཁོང་གི་པར་དང་བརྩམས་ཆོས་རྣམས་བཞག་ནས་བཀའ་དྲིན་རྗེས་དྲན་དང་མྱ་ངན་གྱི་ཡི་གེ་བྲིས་དང་འབྲི་ཡི་འདུག་ལ། དམ་པ་ཁོང་གིས་གངས་རྒྱན་ན་ཆུང་ཚགས་པར་དང་སྦྲང་ཆར་སོགས་ཀྱི་གཙོ་སྒྲིག་པ་གནང་ཡོད་པ་མ་ཟད། མཚོ་སྔོན་མི་རིགས་སློབ་གྲྭ་ཆེན་མོའི་བོད་རིག་པའི་སློབ་གླིང་གི་སློབ་གཙོ་ཟུར་པ་དང་འབུམ་རམས་པའི་དགེ་རྒན་ཆེན་མོ་བཅས་གནང་སྟེ། བོད་ཁུལ་གྱི་སློབ་གསོའི་བྱ་བཞག་ཐོག་མཛད་རྒྱས་རླབས་ཆེན་བཞག་གནང་ཡོད་འདུག
བོད་ཀྱི་སྙན་ངག་པ་གྲགས་ཅན་སྐྱབས་ཆེན་བདེ་གྲོལ་ལགས་ཀྱིས། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག། བརྒྱད་ཅུ་རྩ་གཅིག་སངས་རྒྱས་ཞིང་ཀུན་གྱི།། ཡོན་ཏན་བཀོད་པ་ཐམས་ཅད་གཅིག་བསྡོམས་པ།། ཞིང་ཁམས་ཀུན་ལས་ཁྱད་འཕགས་བླ་ན་མེད།། བདེ་བ་ཅན་གྱི་ཞིང་དེར་སྐྱེ་བར་ཤོག། ཅེས་བྲིས་འདུག ཡང་བོད་མི་གཞན་ཞིག་གིས། ཆེས་ཕལ་བ་ཞིག་གི་རྨི་ལམ་དང་འདྲ་བའི་མི་ཚེ་ཐུང་ཐུང་མཇུག་སྒྲིལ་བ་ནི་ཕངས་སེམས་སྐྱེ་དགོས་པ་ཞིག་མིན་སྙམ་དེ། ཕྱི་མའི་ལས་རྟེན་ལ་དེ་རིང་ལས་ཀྱང་རླབས་ཆེན་གྱི་བྱ་བཞག་རེ་འགྲུབ་ཐུབ་པའི་གོ་སྐབས་བཟང་པོ་ཐོབ་ཐུབ། འོན་ཀྱང་ཉམ་ཐག་ཉག་ཕྲ་བའི་མི་རིགས་དང་རིག་གཞུང་གི་ཚེ་སྲོག་གསོ་བའི་རྟེན་ཕུར་དུ་གྱུར་བའི་དམ་པ་རེ་རེ། རླབས་ཆེ་བའི་ཕྱག་ལས་ཀྱི་འཇུག་པ་རྒྱ་ཆེར་གནང་བཞིན་པའི་སྒང་ལ། འདི་ལྟར་གློ་བུར་ཏུ་སྐུ་གཤེགས་པ་ནི་མི་རིགས་གང་དང་རིག་གཞུང་གང་གི་ཆག་སྒོ་ཆེན་པོ་ཞིག་ཅི་ལ་མིན། དམ་པ་ཁྱེད་རང་གིས་སླར་ཡང་ཤེས་རིག་གི་རྫོང་ཆེན་བསྣམས་ནས་གངས་རིའི་བསྐོར་བའི་ཡུལ་ལུང་འདིར་འབྱོན་དགོས། ཞེས་བྲིས་འདུག
སློབ་དཔོན་ཆེན་མོ་སངས་རྒྱས་ལགས་ནི་མཚོ་སྔོན་ཞིང་ཆེན་ཐུན་རིན་རྫོང་ཁོངས་སུ་སྐྱེས་ཤིང་། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་དགེ་རྒན་ཆེན་མོ་དང་འབུམ་རམས་པའི་མཛུབ་སྟོན་དགེ་རྒན་གནང་བའི་ཞོར་དུ། ཕྱི་ལོ ༢༠༠༡ ལོར་ཞིང་ཆེན་རིམ་པའི་གནད་ཆེའི་ལས་གཞི་སྟེ«དེང་རབས་རྒྱ་ཡིག་ཚིག་མཛོད»(པར་ཐེངས་དྲུག་པ)ཀྱི་རྒྱ་བོད་ལོ་ཙཱའི་དབུ་བཞུགས་ཆེད་མཁས་པའི་འགན་བཞེས་ཡོད་པ་དང་། ཕྱི་ལོ ༢༠༢༢ ལོར་རྒྱལ་ཁབ་ལོ་ཙཱ་པའི་མཐུན་ཚོགས་ཀྱིས“བསླབ་པ་ཟབ་པའི་ལོ་ཙཱ་པ”ཞེས་པའི་མཚན་སྙན་གནང་། ༡༩༩༡ ལོ་ནས ༢༠༠༡ བར་མཚོ་སྔོན་མི་རིགས་དཔེ་སྐྲུན་ཁང་གི་སྤྱི་ཁྱབ་རྩོམ་སྒྲིག་གཞོན་པའི་འགན་བཞེས་ཤིང་། བོད་ཡིག་རྩོམ་སྒྲིག་ཁང་གི་འགན་འཛིན་དང་། «གངས་རྒྱན་ན་ཆུང་ཚགས་པར»གྱི་གཙོ་སྒྲིག་པ། «སྦྲང་ཆར»གྱི་གཙོ་སྒྲིག་པ་སོགས་ཀྱི་འགན་ཡང་ཁུར་ «ཨ་མདོའི་དམངས་ཁྲོད་རྩོམ་རིག»དང«རྗེ་ཙོང་ཁ་པའི་གསུང་འབུམ» «རྗེ་ཤར་གདོང་རིན་པོ་ཆེའི་གསུང་འབུམ» «དམུ་དགེ་བསམ་གཏན་ཚང་གི་གསུང་འབུམ» «བོད་བརྒྱད་ནང་བསྟན་ལྷ་ཚོགས་ཆེན་མོ» «བོད་ཀྱི་བཅུ་ཕྲག་རིག་མཛོད་ཆེན་མོ»སོགས་བོད་ཡིག་དཔེ་དེབ་དང་དུས་དེབ་སྟོག་ཕྲག་ལྷག་ཅིག་པར་སྐྲུན་གནང་ཡོད་སྟབས། “རྒྱལ་ཡོངས་དཔེ་སྐྲུན་ལས་མཛད་ཕུལ་བྱུང་པ་བརྒྱ”ཞེས་པའི་མཚན་སྙན་དེའང་ཕུལ་ཡོད་འདུག
ད་དུང་དམ་པ་ཁོང་གིས་«དེང་རབས་རྒྱ་ཡིག་ཚིག་མཛོད»དང«ཚིག་རྒྱན་རིག་པའི་སྒོ་འབྱེད་འཕྲུལ་གྱི་ལྡེ་མིག» «སྒྲུང་གཏམ་གསར་རྩོམ་གྱི་ཤེས་བྱ་མུན་སེལ་སྒྲོན་མེ» «མཛངས་བླུན་ཞེས་བྱ་བའི་མདོ་བསྒྱུར་ཅིང་ཞུས་མཆན་བཏབ་པ» «བོད་ཀྱི་གནའ་རབས་རྩོམ་རིག་གི་ལོ་རྒྱུས་མདོར་བསྡུས» «ཀྲུང་གོའི་གྲངས་ཉུང་མི་རིགས་ཀྱི་གནའ་དཔེ་སྤྱིའི་དཀར་ཆག་གནད་བསྡུས་ལས་བོད་རིགས་བམ་པོའི་ཟི་ལིང་གི་སྐོར» «དུས་རབས་བཅུ་དགུ་པའི་དབྱིན་ཇིའི་རང་མོས་རིང་ལུགས» «རྒྱའི་ཡིག་གསུམ་མདོ» «ང་མཚོ་སྔོན་ལ་དགའ» «གསར་བརྗེའི་སྔོན་གཤེགས་དཔའ་བོའི་སྙན་ཚིག་འདྲ་བཤུས» སོགས་བརྩམས་ཡོད་འདུག
གསར་འགོད་པ། དཔལ་ལྡན།
