གྷལ་ཝན་ལུང་གཞུང་གི་གནད་དོན་མ་སེལ་བར་དུ་རྒྱ་དཀར་ནག་གི་འབྲེལ་ལམ་རྒྱུན་ལྡན་ལྟར་ཆགས་ཐབས་མེད།

རྒྱ་གར་གྱི་ཕྱི་སྲིད་བློན་ཆེན་ཇཱེ་ཤན་ཀཱར་མཆོག་གིས་གྷལ་ཝན་ལུང་གཞུང་གི་གནད་དོན་མ་སེལ་བར་དུ་རྒྱ་དཀར་ནག་གི་འབྲེལ་ལམ་རྒྱུན་ལྡན་བཞིན་ཆགས་ཐབས་མེད་སྐོར་གསུངས་འདུག

ཁ་སང་ཕྱི་ཚེས་ ༢༦ ཉིན་རྒྱ་གར་ཧའེ་ཌི་རཱ་བྷ་ཌི་(Hyderabad)མངའ་སྡེ་ནང་རྒྱལ་གཅེས་བསམ་བློ་བའི་ལྷན་ཚོགས་(The Forum For Nationalist Thinkers)ཞེས་པ་ཞིག་འཚོགས་ཏེ། རྒྱ་གར་གྱིས་སྟོབས་ཆེན་རྒྱལ་ཁབ་ཉི་ཤུའི་མགོ་ཁྲིད་ཀྱི་ལས་ཡུན་(India’s G20 Presidency)སྐོར་ལ་བགྲོ་གླེང་གནང་ཡོད་པ་དང་། ཚོགས་ཐོག་ཏུ་རྒྱ་གར་གྱི་ཕྱི་སྲིད་བློན་ཆེན་ཇཱེ་ཤན་ཀཱར་(S. Jaishankar) མཆོག་དང་། རྒྱ་གར་ཡུལ་སྐོར་བློན་ཆེན་གངྒ་པུ་རཱམ་ཀི་ཤན་རེ་སྒྲེ་(G. Kishan Reddy)མཆོག ཆེས་མཐོའི་ཁྲིམས་དཔོན་ཟུར་པ་བྷི་སུ་བྷ་ཤན་རེ་སྒྲི་(B. Subhashan Reddy)མཆོག་བཅས་ཕེབས་ཏེ་གསུང་བཤད་གནང་ཡོད་འདུག

སྐབས་དེར་ཕྱི་སྲིད་བློན་ཆེན་ཇཱེ་ཤན་ཀཱར་མཆོག་གིས། སྲིད་བློན་མུ་ཌི་མཆོག་གི་བཀའ་དྲིན་གྱིས་རྒྱ་གར་མི་མང་ཏོག་དབྱིབས་གཉན་རིམས་ཀྱི་དཀའ་ངལ་ལས་ཐར་ཐུབ་པ་བྱུང་ཡོད། ཕྱི་ལོ་ ༢༠༢༠ ལོའི་ཏོག་དབྱིབས་གཉན་རིམས་ཀྱི་ཐེམ་སྤང་བཀའ་རྒྱའི་སྐབས་དང་བསྟུན་ནས། ང་ཚོས་རྒྱ་ནག་གིས་མཐའ་མཚམས་སུ་རྙོག་དྲ་སློང་མགོ་ཚུགས་པ་དེ་གཏན་ནས་བརྗེད་ཀྱི་མེད།  ང་ཚོས་འཛམ་གླིང་ཡོངས་སུ་ང་ཚོའི་ལངས་ཕྱོགས་བརྟན་པོ་ཡིན་པ་གསལ་འདེབས་ཞུས་ཡོད། གྷལ་ཝན་ལུང་གཞུང་(Galwan Valley) གི་གནད་དོན་མ་སེལ་བར་དུ་རྒྱ་དཀར་ནག་གི་འབྲེལ་ལམ་རྒྱུན་ལྡན་བཞིན་ཆགས་ཀྱི་མ་རེད། མཐའ་མཚམས་ཁུལ་དུ་འཛུགས་སྐྲུན་མང་པོ་བྱེད་བཞིན་པ་ནི་དུས་ཚོད་རིང་པོའི་སྣང་མེད་ཀྱི་བྱ་སྤྱོད་ཅིག་རེད། ཅེས་གསུངས་འདུག

ཡང་ཁོང་གིས། འཛམ་གླིང་ཡོངས་ལ་ཏོག་དབྱིབས་གཉན་རིམས་ཀྱི་དཀའ་ངལ་འཕྲད་ཅིང་། མི་མང་ལ་དཔལ་འབྱོར་གྱི་ཤུགས་རྐྱེན་ཆེས་ཆེར་ཐེབས་ཡོད་པས། སྟོབས་ཆེན་རྒྱལ་ཁབ་ཉི་ཤུ་གཉན་འཕྲེང་ཅན་གྱི་དུས་ཚོད་ཅིག་ནང་དུ་ལྷུང་ཡོད། གནམ་གཤིས་ཀྱི་ཚ་དྲོད་དང་། ཡུག་ཁི་རན་གྱི་ཉེན་གནས། ཚན་རྩལ་གྱི་འགྱུར་ལྡོག་བཅས་ཀྱི་དཀའ་ངལ་རྣམས་ལ་གདོང་ལེན་མུ་མཐུད་དུ་བྱེད་མུས་ཡོད་པ་རེད། རྒྱ་གར་གྱིས་འཛམ་གླིང་གི་ཁ་ཕྱོགས་སུ་གྲ་སྒྲིག་བྱེད་དགོས་པ་མ་ཟད། འཛམ་གླིང་གིས་རྒྱ་གར་ལ་ལྟ་སྟངས་ཀྱི་ཕྱོགས་གཉིས་ཀར་དྲང་བོའི་ལམ་ནས་འཛིན་དགོས་ཀྱི་འདུག   རྒྱ་གར་འཛམ་གླིང་སྟེང་གི་དཔལ་འབྱོར་ཆེ་ཤོས་ཨང་ལྔ་པའི་ཁོངས་སུ་ཚུད་དགོས་ཀྱི་འདུག་པ་མ་ཟད། མཐུན་གྲོགས་རྒྱལ་ཁབ་ཁག་དང་མཉམ་དུ་ཚོང་འབྲེལ་ཟབ་ཏུ་བཏང་ནས་འཛམ་གླིང་དུ་གཞི་རྒྱ་ཆེ་བའི་ཚོང་འགྲུལ་བྱ་རྒྱུ་ཡིན། ཞེས་གསུངས་འདུག

ཐེངས་འདིའི་ལྷན་ཚོགས་དེ་ནི་ཧ་ཅང་གལ་གནད་ཆེན་པོ་ཡིན་པའི་སྐོར་ལ་ཁོང་གིས། འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་སྐོར་གྱི་བགྲོ་གླེང་ཚོགས་འདུ་འདི་ནི་རྒྱ་གར་གྱི་ཤུགས་རྐྱེན་འབུམ་ཕྲག་འཛམ་གླིང་དུ་ཕྱིར་འདོན་བྱེད་ཐུབ་པའི་གོ་སྐབས་ཡག་ཤོས་ཤིག་ཡིན་ལ། འཛམ་གླིང་དབུ་ཁྲིད་རྣམས་ཀྱིས་ཆབ་སྲིད་ཡང་དག་འཛིན་པ་དང་། དཔལ་འབྱོར་ཡར་རྒྱས་འགྲོ་བ། བཟོ་སྐྲུན་བཀོད་ལེགས་འབྱུང་བའི་མཐུན་རྐྱེན་སྒྲུབ་པར་ཕན་པ་ཆེན་པོ་ཡོད། ད་ལྟའི་ཆར་རྒྱ་གར་གྱིས་འཛམ་གླིང་མི་མང་གི་དཀའ་སྡུག་ལ་དོ་འཁུར་བྱེད་མཁན་གྱི་སྣང་བརྙན་བཟང་པོ་ཞིག་སྐྲུན་ཡོད། ཏུར་ཀིའི་ས་ཡོམ་གནོད་འཚེའི་སྐབས་སུ་རྒྱ་གར་ནི་འཛམ་གླིང་མི་མང་ལ་རྐྱེན་ངན་གོད་ཆག་སེལ་བར་རོགས་སྐྱོར་ཞུ་མཁན་འགན་ལེན་པ་དང་པོའི་གྲས་ཡིན་ཞེས་གསུངས་འདུག

ཕྱི་ལོ་ ༢༠༢༠ ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞུང་དུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་ཉུང་མཐར་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན་ཡོད་པ་རེད། སྐབས་ཐོག་དེར་རྒྱ་ནག་ཕྱོགས་ནས་ཤི་རྨས་ཀྱི་གྲངས་འབོར་གསང་བ་བྱས་ཡོད་ཀྱང་ཕྱིས་སུ་རྒྱ་དམག་ཀྱང་གང་ཙམ་ཤི་རྨས་བྱུང་ཡོད་པའི་གནས་ཚུལ་ཐོན་ཡོད་ལ། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན། དམར་འཛིང་དེ་བྱུང་བ་ནས་བཟུང་བསྐྱར་དུ་རྒྱ་དཀར་ནག་གཉིས་བར་འཁོན་འཛིང་ཆེ་རུ་ཕྱིན་ཡོད་པ་མ་ཟད། ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་རེད།

གསར་འགོད་པ། བྱམས་པ་ཚེ་རིང་།