རྒྱལ་ཁབ་ཉི་ཤུའི་ཕྱི་སྲིད་བློན་ཆེན་རིམ་པའི་ཚོགས་ཆེན་སླད་རྒྱ་ནག་གི་ཕྱི་སྲིད་བློན་ཆེན་ཆིན་ཀཱང་ཟེར་བ་རྒྱ་གར་གྱི་རྒྱལ་ས་ལྡི་ལི་རུ་ཡོང་གི་འདུག
![](https://tibettimes.net/wp-content/uploads/2023/02/Indonesia_China_48036.jpeg)
དེ་རིང་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཕྱི་ཟླ་ ༣ ཚེས་ ༢ ཉིན་འཛམ་གླིང་གི་རྒྱལ་ཁབ་ཉི་ཤུའི་ཕྱི་སྲིད་བློན་ཆེན་རིམ་པའི་ཚོགས་ཆེན་འཚོགས་གཏན་ཁེལ་ཡོད་པ་ལྟར། རྒྱ་ནག་གཞུང་གི་ཕྱི་སྲིད་བློན་ཆིན་ཀཱང་ཟེར་བ་རྒྱ་ནག་གཞུང་གི་ཚབ་བྱས་ཏེ་རྒྱལ་ཁབ་ཉི་ཤུའི་ཚོགས་ཐོག་ཏུ་ཞུགས་འཆར་ཡོད་པའི་གསལ་བསྒྲགས་སྤེལ་འདུག་པ་དང་། དེ་ནི་ཕྱི་ལོ་ ༢༠༡༩ རྗེས་ནས་རྒྱ་ནག་གི་ཚད་མཐོའི་དཔོན་རིགས་ཤིག་རྒྱ་གར་ནང་བསྐྱོད་པ་ཐོག་མ་ཆགས་ཀྱི་ཡོད་འདུག
ཡང་ཉེ་ལམ་ཕྱི་ཚེས་ ༢༢ ཉིན་རྒྱ་གར་ཕྱི་སྲིད་ལྷན་ཁང་གི་ཨེ་ཤ་ཡ་ཚན་པའི་ཟུང་དྲུང་སྐུ་ཞབས་ཤིལ་པཱག་ཨམ་བྷོ་ལེ་ (Shilpak Ambule) ལགས་རྒྱ་ནག་ཏུ་བསྐྱོད་དེ་རྒྱ་དཀར་ནག་གི་ས་མཚམས་རྩོད་རྙོག་སྐོར་ལ་གྲོས་མོལ་བྱས་ཡོད་པ་དང་། དེ་ནི་ལོ་ངོ་གསུམ་གྱི་རྗེས་ནས་རྒྱ་གར་གྱི་ཚད་མཐོའི་དཔོན་རིགས་ཤིག་རྒྱ་ནག་ཏུ་བསྐྱོད་པ་ཞིག་ཡིན་འདུག
རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཐེངས་འདིར་རྒྱའི་ཕྱི་སྲིད་བློན་ཆེན་ཆིན་ཀཱང་ཟེར་བས། རྒྱ་གར་གྱི་ཕྱི་སྲིད་བློན་ཆེན་རྗའེ་ཤན་ཀཱར་ལགས་དང་ཐུག་འཕྲད་བྱས་ཏེ་རྒྱལ་ཁབ་གཉིས་ཀྱི་ས་མཚམས་རྩོད་རྙོག་སྐོར་ལ་གྲོས་མོལ་བྱ་རྒྱུ་ཡིན་སྐོར་བརྗོད་འདུག་པ་དང་། རྒྱ་གར་གྱི་གསར་འགྱུར་བརྒྱུད་ལམ་ཁག་མང་ཆེ་བའི་སྟེང་། རྒྱའི་ཕྱི་སྲིད་བློན་ཆིན་ཀཱང་ཟེར་བ་རྒྱ་གར་ནང་ཡོང་འཆར་ཡོད་པ་ཙམ་ལས། དོན་དངོས་ཐོག་རྒྱ་དཀར་ནག་གི་ས་མཚམས་རྩོད་རྙོག་གི་དཀའ་ངལ་སེལ་བར་རེ་བ་ཡོད་སྐོར་གྱི་གནས་ཚུལ་སྤེལ་མིན་འདུག
ད་ལྟ་རྒྱ་དཀར་ནག་གཉིས་བར། ཕྱི་ལོ་ ༢༠༢༠ ཟླ་ ༤ ཙམ་ནས་ལ་དྭགས་ཁུལ་དུ་བར་ས་མཚམས་རྩོད་རྙོག་བྱུང་སྟེ་རྒྱལ་ཁབ་གཉིས་ཀྱི་འབྲེལ་ལམ་ཇེ་ཞན་ནས་ཇེ་སྡུག་ཏུ་ཕྱིན་ཡོད་པ་དང་། ད་བར་རྒྱ་དཀར་ནག་གཉིས་བར་ས་མཚམས་ཁུལ་དུ་དམག་དཔོན་རིམ་པའི་གྲོས་མོལ་ཐེངས་ ༡༧ རིང་བྱས་ཡོད་ཀྱང་། ད་ལྟའང་རྒྱལ་ཁབ་གཉིས་ཀྱི་ས་མཚམས་རྩོད་རྙོག་གི་དཀའ་ངལ་མུ་མཐུད་གནས་བཞིན་ཡོད་པར་བརྟེན། ཟླ་འདིའི་ཕྱི་ཚེས་ ༢༦ ཉིན་རྒྱ་གར་གྱི་ཕྱི་སྲིད་བློན་ཆེན་རྗའེ་ཤན་ཀཱར་ལགས་ཀྱིས། ལ་དྭགས་གྷལ་ཝན་ལུང་གཤོངས་ཀྱི་དཀའ་རྙོག་མ་སེལ་བར་དུ་རྒྱ་དཀར་ནག་གི་འབྲེལ་ལམ་རྒྱུན་ལྡན་ལྟར་སླར་གསོ་ཡོང་ཐབས་མེད་སྐོར་བསྒྲགས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།