ལི་ཟེར་བའི་རྒྱ་མི་ཞིག་གིས་རང་ཉིད་བོད་དོན་རྒྱབ་སྐྱོར་བ་ཞིག་ཡིན་ཚུལ་བརྗོད་ནས་ནེའུ་ཛི་ལན་ཌིའི་སྐྱབས་བཅོལ་ཐོབ་ཐང་ཞུ་ཡི་ཡོད་པར། ས་གནས་བོད་རིགས་ཚོགས་པས་ལི་ཟེར་བའི་རྒྱ་མི་དེ་བོད་དོན་རྒྱབ་སྐྱོར་བ་ཞིག་མིན་སྐོར་བརྗོད་བྱུང་།
ཉེ་ལམ་ཞི་བདེ་རྒྱ་མཚོའི་ལྷོ་ནུབ་ཀྱི་ཁུལ་དུ་ཆགས་པའི་ནེའུ་ཛི་ལན་ཌིའི་ (New Zealand) གྲོང་ཁྱེར་ཨོག་ལེན་ཌི་ (Auckland) ནང་ལི་ཟེར་བའི་རྒྱ་རིགས་ཤིག་གིས། རང་ཉིད་ཀྱི་པཱ་ལགས་བོད་ནང་གི་དམག་དཔོན་ཞིག་ཡིན་པ་དང་། ཕྱི་ལོ་ ༢༠༠༨ ལོར་ཁོའི་པཱ་ལགས་ཀྱིས་བོད་ནང་གི་བོད་མི་རྣམས་ལ་དྲག་གནོན་བྱེད་རྒྱུར་མོས་མཐུན་མ་བྱས་པར་གཞུང་ལ་ངོ་རྒོལ་བྱས་ཚུལ་དང་། དེ་བཞིན་ལི་རང་ཉིད་བོད་མིའི་ལོ་རྒྱུས་ཀྱི་གསུམ་བཅུ་དུས་དྲན་སོགས་སུ་མཉམ་ཞུགས་བྱས་ཏེ་བོད་དོན་རྒྱབ་སྐྱོར་བ་ཞིག་ཡིན་ཚུལ་སོགས་བརྗོད་ནས་ནེའུ་ཛི་ལན་ཌིའི་སྐྱབས་བཅོལ་ཞུ་ཐབས་བྱེད་བཞིན་ཡོད་པའི་ཐད། ནེའུ་ཛི་ལན་ཌིའི་ཨོག་ལེན་ཌི་བོད་རིགས་ཚོགས་པའི་ཚོགས་གཙོ་རི་ཤུལ་སྙན་གྲགས་ལགས་ཀྱིས། རྒྱ་རིགས་ཤིག་གིས་བོད་དོན་རྒྱབ་སྐྱོར་བ་ཡིན་ཚུལ་བརྗོད་ནས་ནེའུ་ཛི་ལན་ཌིའི་སྐྱབས་བཅོལ་ཐོབ་ཐང་ཞུ་ཡི་ཡོད་པར་རྩ་བ་ནས་ངོས་ལེན་མེད་པ་མ་ཟད། གནད་དོན་དེས་ནེའུ་ཛི་ལན་ཌིའི་བོད་མི་སྤྱི་དང་རྒྱལ་སྤྱིའི་སྟེང་བོད་མི་དང་བོད་དོན་རྒྱབ་སྐྱོར་བར་ལྟ་སྟངས་གཞན་ཞིག་ཡོང་མི་སྲིད་པ་མིན་སྐོར་བརྗོད་བྱུང་།
དེ་རིང་འདི་གའི་གསར་འགོད་པས་ཁ་པར་བརྒྱུད་ཨོག་ལེན་ཌི་བོད་རིགས་ཚོགས་པའི་ཚོགས་གཙོ་རི་ཤུལ་སྙན་གྲགས་ལགས་སུ་ལི་ཟེར་བའི་མི་དེ་བོད་དོན་ལས་འགུལ་སྤེལ་བའི་སྐབས་མཉམ་ཞུགས་བྱས་ཡོད་མེད་སྐོར་དྲིས་པར། ཁོང་གིས། ལི་ཟེར་བའི་རྒྱ་མི་དེ་བོད་དོན་ལས་འགུལ་མང་ཆེ་བའི་ནང་མཉམ་ཞུགས་མང་པོ་བྱེད་ཀྱི་ཡོད་པ་དང་། བོད་ཀྱི་མཛད་སྒོ་ཆེ་ཁག་ལོ་སར་དང་༧སྐུ་མདུན་གྱི་འཁྲུངས་སྐར་ལ་སོགས་པའི་ནང་ཡོང་གི་འདུག་ལ། དེ་སྔ་གསུམ་བཅུའི་དུས་དྲན་དང་འགྲོ་བ་མིའི་ཐོབ་ཐང་གི་ཉིན་མོ་ལ་སོགས་པའི་སྐབས་བོད་དོན་དྲིལ་བསྒྲགས་ཀྱི་ལས་འགུལ་སྤེལ་བའི་སྐབས། ཁོས་བོད་ཀྱི་རྒྱལ་དར་བཟུང་སྟེ་མཉམ་ཞུགས་བྱེད་ཀྱི་འདུག ཉེ་བའི་ཆར་འགྲོ་བ་མིའི་ཐོབ་ཐང་གི་ཉིན་མོ་དང་ལོ་སར་སྐབས་ཁོ་དང་རྒྱ་མི་ཁ་ཤས་བསླེབས་སོང་། འོན་ཀྱང་། ང་ཚོས་རྒྱ་ནག་གཞུང་ལ་ངོ་རྒོལ་དང་ཞི་བའི་གོམ་བགྲོད་ལ་སོགས་པའི་ལས་འགུལ་སྤེལ་བའི་སྐབས། རྒྱ་མིའི་དམངས་གཙོ་དོན་གཉེར་བ་མང་པོ་མཉམ་ཞུགས་བྱེད་ཀྱི་ཡོད་པར་བརྟེན། ལི་ཟེར་བའི་མི་དེ་རྒྱ་མིའི་དམངས་གཙོ་དོན་གཉེར་བ་ཞིག་ཡིན་ཤག་ཤག་བྱས་པ་ཡིན། ཞེས་བརྗོད་བྱུང་།
ད་དུང་ཨོག་ལེན་ཌི་བོད་རིགས་ཚོགས་པའི་ཚོགས་གཙོ་རི་ཤུལ་སྙན་གྲགས་ལགས་ཀྱིས་འདི་གའི་གསར་འགོད་པར། ཁོས་རང་གི་པཱ་ལགས་ཀྱིས་ལྷ་ས་ནས་བོད་པ་ཚོར་རོགས་པ་བྱས་ཡོད་ཚུལ་སོགས་མང་པོ་ལབ་འདུག དེ་ཚོ་བདེན་པ་རེད་མི་འདུག རྒྱུ་མཚན་ནི་རྒྱ་མིས་བོད་ནང་ལས་བྱེད་པ་གང་འདྲ་གཏོང་གི་ཡོད་པ་དང་། དེ་ཚོས་ག་རེ་བྱེད་ཀྱི་ཡོད་པ་དང་ག་རེ་བྱེད་ཐུབ་ཀྱི་ཡོད་པ་ཚང་མ་ངས་ཧ་གོ་ཡི་ཡོད་པས། ཁོས་ལབ་པ་དེ་ཏག་ཏག་མ་རེད། འཛམ་གླིང་སྟེང་བོད་དོན་ལ་རྒྱབ་སྐྱོར་བྱེད་མཁན་རྣམས་རྒྱ་ནག་གཞུང་གིས་ཛ་དྲག་པོར་བརྩིས་ཏེ་དམ་དྲག་ཤུགས་ཆེན་བྱེད་ཀྱི་ཡོད་པའི་རྒྱབ་ལྗོངས་སོགས་མང་པོ་ཞིག་ཧ་གོ་ཡི་ཡོད་པས། ཁོས་རང་ཉིད་སྲུང་སྐྱོབ་ཀྱི་ཆེད་དུ་གནད་དོན་དེ་དག་ལ་ཁ་གཡར་པ་རེད། མ་གཞི་རྒྱ་ནག་ནང་དུའང་དམངས་གཙོ་དོན་གཉེར་བ་དང་ཆོས་འཁོར་རྩ་རླུང་སྒོམ་སྒྲུབ་པ་ཡིན་ལབ་ནའང་འགྲིག་རེད་དེ། དེ་དག་གི་ཐད་ནས་ཁོ་ཚོ་རྐུབ་བརྡོལ་བ་དང་རྒྱ་མི་ཚོས་ཕན་ཚུན་ཧ་གོ་ཡི་ཡོད་དུས་ལབ་མ་ཐུབ་པ་རེད་བསམ་སོང་། ཁོས་བོད་དོན་རྒྱབ་སྐྱོར་བ་ཡིན་ལབ་པ་ཡིན་ན། བོད་པ་ཚོས་རྩད་གཅོད་བྱེད་ཐུབ་ཀྱིི་མི་འདུག་བསམ་ནས། ཁོ་རང་གི་བྱ་བ་ཡག་པོ་འགྲོ་རྒྱུའི་དོན་དུ་བོད་པ་བེད་སྤྱོད་བཏང་བ་ལྟ་བུ་ཞིག་ཏུ་མཐོང་སོང་། ཞེས་བརྗོད་བྱུང་།
ལི་ཟེར་བའི་རྒྱ་རིགས་དེ་བོད་དོན་རྒྱབ་སྐྱོར་བ་ཡིན་མིན་ཐད་སྙན་གྲགས་ལགས་ཀྱིས། ང་རང་གི་ངོས་ནས་ཁོ་བོད་དོན་རྒྱབ་སྐྱོར་བ་ཞིག་ལ་ངོས་འཛིན་བྱེད་ཀྱི་མེད། རྒྱུ་མཚན་ནི་ཁོས་རང་གི་ནག་ཉེས་མེད་པ་བཟོ་རྒྱུ་དང་ལམ་ཁ་གཞན་ཞིག་ནས་རང་ཉིད་དཀར་པོ་ཆགས་རྒྱུའི་ལམ་ཁ་བཙལ་རྒྱུ་མ་གཏོགས་བོད་དོན་ལ་རྒྱབ་སྐྱོར་བྱེད་མཁན་ཞིག་ལ་རྩ་བ་ཉིད་ནས་ངོས་འཛིན་བྱེད་ཀྱི་མེད། དེ་ཡང་གཙོ་བོ་ཁོ་རང་གིས་ནེའུ་ཛི་ལན་ཌི་གཞུང་ལ་སྐྱབས་བཅོལ་ཞུ་ཡི་ཡོད་པས། དེ་བརྒྱུད་ནས་ཁོ་རང་མི་གསོད་ཁྲག་སྦྱོར་བྱེད་མཁན་ཡིན་པ་ཧ་གོ་བ་རེད། དེ་མ་གཏོགས་སྔོན་ལ་ཧ་གོ་ཡི་མེད། ཅེས་བརྗོད་པ་སྦྲགས། སྙན་གྲགས་ལགས་ཀྱིས་ལི་ཡི་གནད་དོན་དེར་ཨོག་ལེན་ཌི་ཡི་བོད་པ་ཚང་མ་དངངས་འཚབ་སྐྱེ་དགོས་པ་ལྟ་བུ་ཆགས་ཡོད། རྒྱུ་མཚན་ནི་གསར་ལམ་ཁག་ཏུ་གནས་ཚུལ་ཐོན་ཚར་དུས་མི་ཚང་མས་དོ་སྣང་བྱེད་པའི་དུས་ཤིག་ལ་བསླེབས་པ་རེད། དེའི་སྒང་ལ་། ང་ཚོ་བོད་པའི་རྒྱལ་དར་གྱོན་ཡོད་མཁན་ཞིག་དང་བོད་དོན་རྒྱབ་སྐྱོར་བྱེད་མཁན་ཞིག་ཡིན་ཟེར་ནས་གསར་ལམ་ཁག་ཏུ་བསྒྲགས་ཚར་དུས། ང་ཚོ་བོད་པ་ཚང་མས་གནས་ཚུལ་མི་ལེགས་པ་དེ་འདྲ་མཐོང་ཡོང་དུས་ཏོག་ཙམ་དངངས་འཚབ་སྐྱེ་དགོས་པའི་གནས་སྟངས་བྱུང་བ་རེད། འདིར་བོད་པ་ཉུང་ཉུང་ཞིག་ལས་མེད་པ་དང་ང་ཚོའི་བསམ་ཚུལ་གཅིག་པ་རེད། ད་ལྟའི་བར་དུ་ང་ཚོ་ནེའུ་ཛི་ལན་ཌི་གཞུང་དང་ཐག་ཉེ་བ་དང་ཁྲིམས་འགལ་ལ་སོགས་བྱ་བ་མི་ལེགས་པ་གཅིག་ཀྱང་ཧ་ལམ་བྱུང་མྱོང་མི་འདུག ད་རེས་གློ་བུར་དུ་དོན་དག་འདི་བྱུང་བ་རེད། ང་ཚོ་ཧ་མ་གོ་བ་རེད་མ་གཏོགས་ཧ་གོ་ཡོད་ཚེ་སྔོན་མ་ནས་འགོག་སྲུང་བྱས་ཡོད་ཤག་རེད། སྤྱིར་ང་ཚོས་ཁོའི་སྐོར་ལ་ཧ་གོ་རྒྱུ་ཕར་ཞོག མཐའ་ན་ད་ལྟའི་བར་དུ་ནེའུ་ཛི་ལན་ཌི་གཞུང་གིས་ཁོ་ག་རེ་ཡིན་མིན་ཧ་གོ་མེད་པ་རེད། ཁོས་ང་ཚོ་བོད་པའི་རྒྱབ་སྐྱོར་བ་ཞིག་གི་རྣམ་པ་བསྟན་པ་དང་བོད་ཀྱི་རྒྱལ་དར་གྱོན་པ་སོགས་བྱས་ཡོད་དུས། སྤྱི་ཡོངས་ནས་འཛམ་གླིང་ཐོག་བོད་དོན་རྒྱབ་སྐྱོར་བ་ཚོའི་མཐོང་ཏོག་ཙམ་ཆགས་རྒྱུ་དང་། ང་ཚོ་བོད་པ་ཡིན་ནའང་བོད་དོན་རྒྱབ་སྐྱོར་བ་མི་གསོད་མཁན་དེ་འདྲའང་ཡོད་པའི་མཐོང་ཚུལ་གཞན་ཞིག་ཡོང་མི་སྲིད་པ་མ་རེད། དེར་བརྟེན་ང་ཚོ་ཚང་མ་དངངས་འཚབ་སྐྱེ་ཡི་ཡོད་པ་རེད། ཅེས་བརྗོད་བྱུང་།
ཕྱི་ཟླ་ ༢ ཚེས་ ༢༦ ཉིན་ནེའུ་ཛི་ལན་ཌིར་རྟེན་གཞི་བྱས་ཡོད་པའི་ (nzherald) གསར་ཁང་གིས་གནས་ཚུལ་སྤེལ་བ་ལྟར་ན། ལི་ (Leo Li) ཟེར་བའི་མི་དེར་ (Ang Li) དང་ (Jiaming Li)། དེ་བཞིན་(Zongyuan Li) ཡང་ཟེར་བ་སོགས་ཁྱོན་མིང་བཞི་དང་(Antigua and Barbuda Passport) རྒྱལ་ཁབ་ཀྱི་རྫུན་བཟོས་ཕྱི་སྐྱོད་ལག་ཁྱེར་ཞིག་དང་ངོས་འཛིན་ལག་ཁྱེར་གཞན་ཞིག་ཀྱང་ཡོད་པ་དང་། ཕྱི་ལོ་ ༢༠༠༢ ལོར་ལི་དང་ཁོའི་དགའ་རོགས་(Amanda Zhou) གཉིས་ནས་ཁེ་ན་ཌ་རུ་རྒྱལ་སྤྱིའི་སློབ་མའི་མིང་ཐོག་ནས་སློབ་སྦྱོང་བྱེད་བཞིན་པའི་སྐབས་དེར། ལིས་རང་ལོ་ ༢༡ ཡིན་པའི་དགའ་རོགས་འ་མན་ཌ་ (Amanda Zhou) བསད་ཡོད་པའི་ནག་ཉེས་འོག་འཛིན་བཟུང་བྱས་ཏེ། ཕྱི་ལོ་ ༢༠༠༤ ལོར་རྒྱ་ནག་ལ་རྩིས་སྤྲོད་བྱས་ཡོད་ཀྱང་དཔང་པོ་ཉུང་དྲགས་པའི་རྐྱེན་གྱི
ལི་ཡིས་ནེའུ་ཛི་ལན་ཌིའི་(nzherald)གསར་ཁང་གི་གསར་འགོད་པར། ལོ་ངོ་ ༤ གོང་དུ་ཁོ་དང་ཁོའི་ནང་མི་རྣམས་བོད་ནང་གི་སྡུག་སྦྱོང་མནར་གཅོད་ལ་གཡོལ་ཕྱིར་ནེའུ་ཛི་ལེན་ཌི་རུ་ཡོང་བ་ཡིན་སྐོར་དང་། རྒྱ་ནག་དམར་ཤོག་གཞུང་གིས་ཁོའི་ནང་མི་རྣམས་ལ་སྡུག་སྦྱོང་མནར་གཅོད་བཏང་བ་དང་དམའ་འབེབས་བྱས་པ། དེ་བཞིན་བཙོན་འཇུག་དང་བཟང་བཙོན་སོགས་ཀྱི་དཀའ་སྡུག་མྱངས་མྱོང་ཡོད་ཚུལ་དང་། ཕྱི་ལོ་ ༢༠༠༨ ལོར་བོད་མི་རྣམས་ཀྱིས་དམངས་གཙོའི་དོན་དུ་ངོ་རྒོལ་ལས་འགུལ་སྤེལ་སྐབས། རྒྱ་ནག་གཞུང་གི་ཉེན་རྟོག་བློན་ཆེན་དང་ཁྲིམས་འཛིན་བློན་ཆེན། དམག་དཔོན་སོགས་ལ་བཀའ་བཏང་སྟེ། བོད་མི་རྣམས་སྡེབ་གསོད་བྱེད་དགོས་པའི་བཀའ་བཏང་སྐབས། ལིའི་པཱ་ལགས་ཀྱིས་བོད་མི་ངོ་རྒོལ་བ་རྣམས་ལ་དྲག་གནོན་མ་བྱས་པར་ཕར་གཞུང་ལ་འཁྲུག་རྩོད་བརྒྱབ་ཡོད་སྐོར། དེ་བཞིན་སྐབས་དེར་ཁོས་རང་གི་པ་ལགས་སུ་རོགས་པ་བྱས་སྟབས་རྒྱ་ནག་གཞུང་གིས་རང་ཉིད་འཛིན་བཟུང་བྱས་ཡོད་སྐོར་སོགས་བརྗོད་འདུག
འོན་ཀྱང་ནེའུ་ཛི་ལན་ཌིའི་ཨོག་ལེན་ཌི་གྲོང་ཁྱེར་གྱི་བོད་རིགས་ཚོགས་པའི་ཚོགས་གཙོ་ཟུར་པ་དབང་འདུས་ཚེ་རིང་ལགས་ཀྱིས། ལི་ཟེར་བའི་རྒྱ་མི་དེར་མགྲོན་འབོད་སོགས་གང་ཡང་མེད་པའི་ཐོག་ནས་བོད་མིའི་ངོ་རྒོལ་གྱི་ལས་འགུལ་སོགས་ལ་མཉམ་ཞུགས་བྱེད་མགོ་བཙུགས་ཡོད་པ་དང་། དེ་སྔ་ང་རང་བོད་རིགས་ཚོགས་པའི་ཚོགས་གཙོ་ཡིན་པའི་སྐབས། ལིས་ང་ལ་ཁོང་དང་ཁོང་གི་ནང་མི་རྣམས་ཨོག་ལེན་ཌི་གྲོང་ཁྱེར་དུ་གནས་སྡོད་བྱེད་སླད་རྒྱབ་སྐྱོར་གྱི་ཡི་གེ་སྤྲོད་དགོས་པའི་རེ་སྐུལ་ཞུས་ཏེ། ལིའི་པ་ལགས་ལྷ་སའི་ཁུལ་གྱི་བོད་དམག་གི་དམག་དཔོན་གཞོན་པ་ཡིན་རབས་དང་བོད་དོན་ལ་སེམས་ཁུར་བྱེད་མི་ཞིག་ཡིན་ཚུལ་བརྗོད་བྱུང་། འོན་ཀྱང་། རྒྱ་མི་མང་པོ་ཞིག་བོད་པའི་སྤྱི་ཚོགས་ནང་སིམ་འཛུལ་བྱེད་ཐབས་བྱས་དང་བྱེད་མུས་ཡིན་པར་བརྟེན། སྐབས་དེ་དུས་ངས་ཁོང་གི་བཤད་པར་ཡིད་ཆེས་བྱས་མེད་ལ་རྒྱབ་སྐྱོར་ཡི་གེ་གང་ཡང་སྤྲད་མེད། ངས་ཁོའི་པཱ་ལགས་དང་འབྲེལ་བའི་གནས་ཚུལ་རྣམས་དྲ་ཐོག་ནས་འཚོལ་ཐབས་བྱས་ཀྱང་གང་ཡང་རྙེད་མ་སོང་། ཞེས་དང་། ངའི་བསམ་ཚུལ་ལ་རྒྱ་གཞུང་གིས་བོད་ནང་དུ་རྒྱ་ནག་གི་དམག་དཔོན་དང་དམག་མི་བཏང་བ་རྣམས་ནས། གལ་ཏེ་རྒྱ་ནག་གཞུང་གིས་བཀའ་ལ་བརྩི་འཇོག་མི་བྱེད་ཚེ་འཚོ་ཐབས་མེད་པ་ཞིག་རེད། འོན་ཀྱང་ལིའི་པཱ་ལགས་རྒྱ་ནག་ནང་འཚོ་གནས་བྱེད་བཞིན་ཡོད་པ་དང་། ལིས་ནེའུ་ཛི་ལན་ཌི་ཁུལ་དུ་མཁར་དངོས་སོགས་ཉོས་པར་དངུལ་གཏོང་ཐུབ་ཀྱི་ཡོད་པར་བརྟེན། ཁོས་བཤད་པའི་སྒྲུང་ལ་དོགས་པ་ཆེན་པོ་ཡོད། ཅེས་བརྗོད་འདུག
ནེའུ་ཛི་ལན་ཌིའི་ཡུལ་མི་གནས་སྤོའི་ (Immigration New Zealand) ལས་ཁུངས་ཀྱིས། རང་ལོ་ ༣༨ ཡིན་པའི་རྒྱ་མི་ལི་ (Leo Li) ཟེར་བ་དེས་ངོས་འཛིན་ལག་ཁྱེར་མི་འདྲ་བ་མང་པོ་བེད་སྤྱོད་བྱེད་ཀྱི་ཡོད་པ་དང་། ཁོ་ལ་སྐྱེས་ལོ་སྐྱེས་ཚེས་མི་འདྲ་བ་གསུམ་དང་སྐྱེས་ཡུལ་ས་ཁུལ་མི་འདྲ་བ་གཉིས་ཡོད་པར་བརྟེན། ལི་ཟེར་བའི་མི་དེའི་གཤིས་རྒྱུད་མི་བརྟན་པ་དང་། འཁྲབ་སྟོན་དང་གཡོ་ཁྲམ་བྱེད་མཁན་ཞིག་ལ་ངོས་འཛིན་བྱས་འདུག ད་ལྟ་ལི་ཡིས་ནེའུ་ཛི་ལན་ཌི་གཞུང་ལ་ཁྲིམས་གཏུགས་བྱས་ཏེ་རང་ཉིད་ལ་སྐྱབས་བཅོལ་བའི་ཐོབ་ཐང་འཐོབ་པར་རྩོད་ལེན་བྱེད་བཞིན་ཡོད་པ་དང་། ཁོས་གལ་སྲིད་ནེའུ་ཛི་ལན་ཌི་གཞུང་གིས་ཁོའི་ནང་མི་ཡོངས་རྒྱ་ནག་ཏུ་ཕྱིར་ལོག་བཏང་ཚེ། རྒྱ་གཞུང་གིས་ཁོ་ཚོར་བཙོན་འཇུག་ཁྲིམས་ཐག་དང་མནར་གཅོད་གཏོང་ངེས་ཡིན་ཚུལ་རྗོད་ཀྱིན་ཡོད་ཀྱང་། ནེའུ་ཛི་ལན་ཌི་གཞུང་གིས་གལ་སྲིད་ལིའི་ནང་མི་རྣམས་རྒྱ་ནག་ཏུ་ལོག་ཚེ་རྒྱ་ནག་གཞུང་གིས་ཉེས་ཆད་གཏོང་མི་སྲིད་པའི་མཇུག་སྡོམ་བརྒྱབ་འདུག
གསར་འགོད་པ། བསྟན་འཛིན་ཕུར་བུ།
ཧ་ཅིང་་ཡག་པོ་འདུག་བཀའ་དྲིན་ཆེ།