དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༥ ཉིན་བྷང་ལ་དྷེ་ཤི་ (Bangladesh) ཡི་ཤར་ལྷོ་ཁུལ་དུ་ཡོད་པའི་འབར་མའི་སྐྱབས་བཅོལ་བའི་སྡོད་སྒར་ (Rohingya refugee camp) དུ་མེ་སྐྱོན་ཆེན་པོ་ཤོར་ཏེ་མི་གྲངས་ ༡༢,༠༠༠ ཙམ་གྱི་སྡོད་ཁང་མེད་པར་གྱུར་ཡོད་འདུག
A massive fire broke out in a Rohingya refugee camp in Cox’s Bazar, Bangladesh, on Sunday. Photograph: Reuters
ཁ་སང་ཕྱི་ཚེས་ ༥ ཉིན་ཡུལ་དེའི་ཕྱི་དྲོའི་ཆུ་ཚོད་ ༢།༤༥ ཙམ་ལ་འཛམ་གླིང་ནང་གི་སྐྱབས་བཅོལ་བའི་སྡོད་སྒར་ཆེ་ཤོས་སུ་ངོས་འཛིན་བྱེད་བཞིན་པའི་ (Rohingya refugee camp)ཞེས་པའི་སྐྱབས་བཅོལ་བའི་སྡོད་སྒར་དུ་མེ་སྐྱོན་བྱུང་སྟེ་ཆུ་ཚོད་ ༣ ལྷག་རིང་མེ་གསོད་མ་ཐུབ་པར་བརྟེན། སྡོད་ཁང་ ༢༠༠༠ ཙམ་ཚིག་ནས་མི་གྲངས་ ༡༢,༠༠༠ ཙམ་སྡོད་ས་མེད་པར་གྱུར་ཡོད་སྟབས། ས་གནས་སྲིད་གཞུང་གིས་མེ་སྐྱོན་དེ་གཏོར་རྒོལ་ངན་ཇུས་དང་འབྲེལ་བ་ཡོད་མེད་དང་འབྱུང་རྐྱེན་ཅི་ཡིན་ཐད་ཞིབ་འཇུག་བྱེད་བཞིན་ཡོད་པ་མ་ཟད། དོགས་ཡོད་མི་གཅིག་འཛིན་བཟུང་བྱས་ཡོད་འདུག
དེའི་ཐད་བྷང་ལ་དྷེ་ཤི་སྐྱབས་བཅོལ་བའི་འགན་འཛིན་མི་ཇ་ནུར་རཱ་མན་ (Mijanur Rahman) གྱིས། མེ་འབར་བའི་རྐྱེན་གྱིས་སྡོད་སྒར་གྱི་ཁ་ཆེའི་ལྷ་ཁང་ ༣༥ དང་སྐྱབས་བཅོལ་བའི་ཤེས་ཡོན་ལྟེ་གནས་ཁང་ ༢༡ ལ་མེ་སྐྱོན་བྱུང་ཡོད་སྐོར་བཤད་འདུག་ལ། དེ་བཞིན་ཝ་ཤིང་ཊོན་ཌི་སི་དང་ནེའུ་ཡོག་ལ་ཡོད་པའི་རྒྱལ་སྤྱིའི་སྐྱབས་བཅོལ་བའི་ཚོགས་པའི་ (Refugees International) འགན་འཛིན་གཞོན་པ་ཧར་ཌིན་ (Hardin Lang) ལགས་ཀྱིས། སྡོད་གནས་མེད་པར་གྱུར་བའི་སྐྱབས་བཅོལ་བ་དེ་དག་ལ་བསྐྱར་དུ་སྡོད་གནས་འཚོལ་རྒྱུ་ཁག་པོ་ཡིན་ལ། དེ་བཞིན་སྨན་ཁང་དང་སློབ་གྲྭ་མང་པོར་མེ་སྐྱོན་བྱུང་ཡོད་སྟབས་གཞི་རྩའི་དགོས་མཁོ་དེ་དག་བསྐྱར་སྐྲུན་བྱ་རྒྱུར་དཀའ་ངལ་ཆེན་པོ་ཡོད་སྐོར་སོགས་བརྗོད་འདུག
འདི་ལོའི་ཕྱི་ཟླ་ ༢ པའི་ནང་བྷང་ལ་དྷེ་ཤིའི་ཕྱི་སྲིད་ལས་ཁུངས་ཀྱིས་སྐྱབས་བཅོལ་བའི་སྡོད་སྒར་དེའི་སྐོར་ལ་སྙན་ཐོ་ཞིག་བཏོན་པའི་ནང་། ཕྱི་ལོ་ ༢༠༢༡ ཟླ་ ༡ དང་འདས་ལོའི་ཕྱི་ཟླ་ ༡༢ བར་ལ་སྐྱབས་བཅོལ་བའི་སྡོད་སྒར་དུ་མེ་ཤོར་བའི་དོན་རྐྱེན་ཆེ་ཆུང་ ༢༢༢ བྱུང་ཡོད་པ་མ་ཟད། ཕྱི་ལོ་ ༢༠༢༡ ཟླ་ ༣ པའི་ནང་སྡོད་སྒར་དེར་མེ་སྐྱོན་བྱུང་སྟེ་ཉུང་མཐར་མི་གྲངས་ ༡༢ རྐྱེན་འདས་དང་མི་གྲངས་ ༥༠,༠༠༠ ཙམ་གནས་སྤོ་དགོས་བྱུང་འདུག
ཕྱི་ལོ་ ༢༠༡༦ ཟླ་ ༡༠ ནས་ཕྱི་ལོ་ ༢༠༡༧ ཟླ་ ༡ བར་དང་། ཕྱི་ལོ་ ༢༠༡༧ ཟླ་ ༨ པ་ནས་བཟུང་འབར་མའི་ནུབ་རྒྱུད་ཀྱི་རཱ་ཁེན་ (Rakhine) མངའ་སྡེ་ནང་ཡོད་པའི་ཁ་ཆེ་རཱོ་ཧན་གྷ་གྲངས་ཉུང་མི་རིགས་ (Muslim Rohingya ethnics minority) དང་ནང་པའི་རཱ་ཁེན་གྲངས་མང་མི་རིགས་ (Buddhist Rakhine ethnics majority) བར་གྱི་སྡོད་གནས་སོགས་ཀྱི་ཐོག་འཁྲུག་རྩོད་མང་པོ་བྱུང་མཐར། ཡུལ་དེའི་དྲག་པོའི་དམག་དཔུང་གིས་ཁ་ཆེ་རཱོ་ཧན་གྷ་ (Rohingya) གྲངས་ཉུང་མི་རིགས་ཀྱི་གྲོང་ཚོ་མང་པོ་མེར་སྲེག་བཏང་བ་དང་། གྲོང་ཚོ་དེ་དག་གི་མཐའ་སྐོར་ནས་བྲོས་བྱོལ་དུ་འགྲོ་བའི་མི་མང་ནང་གང་བྱུང་མེ་མདས་བརྒྱབ་པ་སོགས་བྱས་ཏེ། རཱོ་ཧན་གྷ་ཁ་ཆེའི་མི་རིགས་དམར་གསོད་ཀྱི་སྲིད་ཇུས་ལག་བསྟར་བྱས་ཡོད་པར་བརྟེན། མི་གྲངས་ས་ཡ་ ༡ ལྷག་རྒྱལ་ཁབ་གཞན་ལ་བྲོས་བྱོལ་དུ་ཕྱིན་ཡོད་པ་དང་། སྐབས་དེར་མི་མང་ཆེ་བ་ཁྱིམ་མཚེས་རྒྱལ་ཁབ་བྷང་ལ་དྷེ་ཤིའི་ནང་སྐྱབས་བཅོལ་དུ་གནས་བཅས་ཡོད་པ་རེད། ཕྱིས་སུ་ཡུལ་གཉིས་བར་སྐྱབས་བཅོལ་བ་དེ་དག་འབར་མའི་ནང་ཕྱིར་ལོག་གཏོང་རྒྱུ་ཡིན་པའི་ཐད་གྲོས་བསྡུར་བྱས་ཡོད་ཀྱང་དོན་འབྲས་ཐོན་མེད་འདུག
གསར་འགོད་པ། བསྟན་འཛིན་ཕུར་བུ།
