ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བཙན་བྱོལ་བོད་མི་ཚོས་བོད་ནང་གི་བོད་མིའི་མགྲིན་ཚབ་པ་བྱས་ཏེ་བཙན་གནོན་གྱི་འོག་ནས་བྲིས་པའི་རྩོམ་ཡིག་རྣམས་ལ་ཆེ་མཐོང་དང་ངོས་འཛིན་སྤྲོད་དགོས་སྐོར་གསུངས་སོང་།
དེ་རིང་ནས་ཉིན་གྲངས་གཉིས་རིང་བོད་ཀྱི་སྲིད་ཇུས་ཉམས་ཞིབ་ཁང་གི་གོ་སྒྲིག་འོག ༢༠༠༨ ནས་བཟུང་ཉེ་རབས་བོད་ནང་གི་རྩོམ་རིག་རྒྱུན་སྐྱོང་དང་འགྱུར་ལྡོག་སྐོར་གྱི་ཚོགས་འདུ་དེ་འཚོག་མགོ་བཙུགས་ཡོད་ཅིང་། ད་ལན་གྱི་ཚོགས་འདུའི་ཐོག་བཙན་བྱོལ་བོད་མིའི་མཐོ་རིམ་སློབ་གཉེར་ཁང་ཁག་གི་སློབ་དཔོན་དང་། ཉམས་ཞིབ་པ་སོགས་གཏམ་བཤད་པ་མི་གྲངས་ ༡༡ གཙོས་ཟུར་ཉན་པ་མང་པོ་ཞིག་གིས་མཉམ་ཞུགས་བྱེད་བཞིན་འདུག
མཛད་སྒོའི་ཐོག་མར་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཚོགས་འདུའི་ངོ་སྤྲོད་ཀྱི་གཏམ་བཤད་ནང་། སྤྱིར་ཁོང་ཆུང་དུས་རྒྱ་ཡིག་ལས་བོད་ཡིག་ཤེས་ཀྱི་མེད་ཀྱང་། རང་ལོ་ཉེར་བཞིའི་ཐོག་བོད་ནང་གི་སྦྲང་ཆར་དང་ཟླ་ཟེར། མང་ཚོགས་སྒྱུ་རྩལ་སོགས་ནས་བོད་ཡིག་རང་སྦྱོང་བྱེད་མགོ་བཙུགས་ཏེ། སྦྲང་ཆར་དང་ཟླ་ཟེར་གཉིས་ཐེངས་མང་ལྟ་ཀློག་བྱས་ནས། བོད་ཡིག་རང་སྦྱོང་བྱེད་བཞིན་པའི་སྐབས་དེར་དོན་གྲུབ་རྒྱལ་གྱི་བརྩམས་སྒྲུང་སྤྲུལ་སྐུ་ཟེར་བ་དེ་ལྟ་ཀློག་བྱས་ནས་སྦྱངས་ཡིན། སྐབས་དེར་ཚིག་མཛོད་ལ་ཡང་ཡང་བལྟ་དགོས་པས། རྩོམ་ཡིག་དེ་ཀློག་པར་ཕལ་ཆེར་ཉིན་གྲངས་བཅུ་ནས་བཅོ་ལྔ་བར་འགོར། སྒྲུང་དེའི་ནང་ཡོད་པའི་སྤྲུལ་སྐུ་ཟེར་བ་དང་ནམ་རྒྱུན་གྱི་སྤྲུལ་སྐུའི་བར་ལ་མི་འདྲ་བ་ཞིག་ཡོད་པས། རྗེས་སུ་སྤྲུལ་སྐུ་ཟེར་དུས་སྦྲང་ཆར་ནང་དུ་དོན་གྲུབ་རྒྱལ་གྱིས་བྲིས་པའི་སྤྲུལ་སྐུ་དེ་ཡིན་ནམ། ནམ་རྒྱུན་གྱི་སྤྲུལ་སྐུ་དེ་ཡིན་ནམ་བསམས། གང་ཡིན་ཟེར་ན། རྩོམ་པ་པོ་དང་སྙན་ངག་པ་སོགས་ཀྱིས་སྤྱི་ཚོགས་ཀྱི་འཚོ་བ་དངོས་གཞི་བྱས་ནས་བྲིས་ཏེ། སྤྱི་ཚོགས་ནང་གི་དངོས་ཡོད་ཀྱི་གནས་བབ་གསལ་སྟོན་བྱེད་ཐབས་བྱེད་ཀྱིན་ཡོད་པས། སྙན་ངག་དང་སྒྲུང་སོགས་ཀྱིས་མི་རིགས་ཤིག་གི་འདས་མ་ད་གསུམ་གྱི་གནས་བབ་ཀྱང་གསལ་སྟོན་བྱས་ཐུབ་ཀྱིན་ཡོད་པ་རེད། ཁོང་ལ་སྙན་ངག་པ་དོན་གྲུབ་རྒྱལ་གྱིས་བྲིས་པའི་རྐང་ལམ་ཕྲ་མོ་དང་སྤྲུལ་སྐུ་གཉིས་ཀྱིས་བག་ཆགས་མི་དམན་པ་ཞིག་བཞག་ཡོད། དེ་བཞིན་རྩོམ་རིག་གིས་ལོ་ཆུང་དང་གཞོན་ནུ་རྣམས་ལ་དམིགས་བསལ་གྱིས་ཚོར་བ་དང་། བག་ཆགས་ཟབ་མོ་རེ་འཇོག་ཐུབ་ཀྱི་ཡོད་ཀྱང་། བཙན་བྱོལ་བོད་པའི་སྤྱི་ཚོགས་ནང་དཔྱད་རྩོམ་དང་། ལོ་རྒྱུས་ཞིབ་འཇུག་བྱ་རྒྱུ་མ་གཏོགས། སྒྱུ་རྩལ་རྩོམ་རིག་སོགས་ཀྱི་ཐད་ལ་སློབ་སྦྱོང་སོགས་བྱེད་མཁན་ཉུང་ཉུང་ཡིན་འདུག་པས། ང་ཚོས་བོད་ཀྱི་ལོ་རྒྱུས་ཞིབ་འཇུག་དང་། ཉམས་ཞིབ་སོགས་བྱ་དགོས་པ་མ་ཟད། བོད་རང་གི་སྒྱུ་རྩལ་རྩོམ་རིག་སོགས་ཕྱོགས་གཉིས་ཀྱི་ཐད་ནས་འབད་འབུངས་བྱ་རྒྱུ་གལ་ཆེན་ཡིན་པའི་ཁར། བོད་ཀྱི་ན་གཞོན་དང་ལོ་ཆུང་མང་པོ་ཞིག་གིས་ལོ་རྒྱུས་ཀྱི་དཔེ་དེབ་དག་ཀློག་མ་ཐུབ་ཀྱང་བོད་རང་གི་སྒྱུ་རྩལ་རྩོམ་རིག་དང་སྒྲུང་སོགས་བཀླགས་ཚེ། དེས་ཀྱང་བོད་རང་གི་ཐུན་མོང་མ་ཡིན་པའི་རྩོམ་རིག་གི་བག་ཆགས་ཟབ་མོ་ཞིག་འཇོག་ཐུབ་ཀྱི་ཡོད་སྐོར་དང་། ལྷག་པར་ཕྱི་ལོ ༢༠༠༨ ཀྱི་རྗེས་ནས་བོད་ནང་གི་གཞས་མང་པོ་ཞིག་ཏུ་བོད་ཀྱི་རི་ཆུ་ནགས་གསུམ་གྱིས་མཛེས་པ་གསལ་སྟོན་བྱས་པ་དང་། བོད་ནང་གི་གཞས་ཚིག་མང་པོ་ཞིག་ལ་བོད་རང་གི་དྲི་མ་མ་བྲལ་བ་བྱས་ཏེ། སྒྱུ་རྩལ་གྱི་ལམ་ནས་གསལ་སྟོན་བྱས་པ་ནི་ཧ་ཅང་ཡག་པོ་ཡིན་པས། ད་ལན་གྱི་ཚོགས་འདུ་འདིའི་ཐོག་ནས་མུ་མཐུད་དུ་ང་ཚོས་བོད་མི་རིགས་ཀྱི་རིག་གཞུང་དར་རྒྱས་གོང་འཕེལ་གཏོང་བར་ག་རེ་བྱ་དགོས་མིན་སོགས་ཀྱི་ཐད་ལ་གླེང་སློང་དང་གྲོས་བསྡུར་བྱ་དགོས་སྐོར་སོགས་གསུངས་སོང་།
དེའི་རྗེས་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། བོད་ཀྱི་འདས་བའི་བྱུང་རབས་ལོ་རྒྱུས་དང་། ཆོས། སྤྱི་ཚོགས་སོགས་ཀྱི་ཁྲོད་རྩོམ་རིག་ནི་སྤྱི་ཚོགས་ཤིག་གི་འདས་མ་འོངས་ད་ལྟ་གསུམ་གྱི་གནས་བབ་གསལ་སྟོན་བྱེད་མཁན་ཞིག་ཡིན་པས། རྩོམ་རིག་གི་གཞི་རྩའི་བྱེད་ལས་ནི་སྤྱི་ཚོགས་ཤིག་གི་མ་འོངས་པའི་ཁ་ཕྱོགས་ལ་སྔོན་བརྡ་དང་འཚོལ་ཞིབ་བྱེད་པར་གསལ་སྟོན་བྱེད་ཀྱི་ཡོད་པ་རེད། ལྷག་པར་དེང་གྱི་ཚན་རྩལ་ཡར་རྒྱས་འགྲོ་མུས་ཡིན་པའི་སྐབས་འདིར། གནས་ཚུལ་དང་གསར་འགྱུར་གྱི་བརྒྱུད་ལམ་མང་པོ་ཞིག་ཡོད་ཀྱང་། རྩོམ་རིག་འབྲི་ཀློག་བྱ་རྒྱུ་དེ་ནི་བརྒྱུད་ལམ་གལ་ཆེ་ཤོས་དང་ཤུགས་ཆེ་ཤོས་ཤིག་ཏུ་ངོས་འཛིན་ཀྱིན་ཡོད་པ་རེད། ང་ཚོས་ཀྱང་ཕྱི་ལོ ༢༠༠༨ ལོ་ནི་བོད་ཆོལ་ཁ་གསུམ་གཅིག་ཏུ་སྒྲིལ་ནས་བཙན་དབང་འོག་གི་འབོད་སྒྲ་ཆེས་ཆེ་ཤོས་དེ་བསྒྲགས་ཡོད་པར་ངོས་འཛིན་བྱེད་ཀྱིན་ཡོད་པས། ད་ལན་གྱི་ཚོགས་འདུར་ཕྱི་ལོ ༢༠༠༨ ཀྱི་ས་བྱི་ཞི་རྒོལ་ཆེན་མོའི་རྗེས་ཀྱི་རྩོམ་ཡིག་སོགས་ཀྱི་ཐད་ལ་གྲོས་བསྡུར་དང་ཉམས་ཞིབ་བྱས་པ་དེ་ཧ་ཅང་གལ་ཆེན་དང་གནད་འགག་ཅིག་ལ་མཐོང་གིན་ཡོད། སྤྱིར་རྒྱ་ནག་གཞུང་གིས་བོད་ས་བཙན་འཛུལ་བྱས་པ་ནས་བཟུང་། གཅིག་རྗེས་གཉིས་མཐུད་ཀྱིས་བོད་ཀྱི་ཆོས་རིག་དང་མི་རིགས་རྩ་གཏོར་གཏོང་ཐབས་དང་། བོད་མི་རིགས་ཀྱི་ངོ་བོ་དེ་རྒྱ་ནག་ཅན་ཏུ་བསྒྱུར་བར་འབད་བརྩོན་ལན་མང་བྱས་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་བླ་ན་མེད་པའི་དབུ་ཁྲིད་དང་། བོད་ནང་གི་གཞིས་ལུས་རྒྱ་ཆེ་མི་མང་གི་ཆོད་སེམས་དང་སྙིང་སྟོབས་སོགས་ལ་བརྟེན་ནས། འཛམ་གླིང་ས་ཕྱོགས་གང་སར་བོད་དང་བོད་མིའི་ངོ་བོ་གནས་ཡོད། ད་ལན་གྱི་ཚོགས་འདུ་འདི་བརྒྱུད་སྤྱི་ཚོགས་དང་ཆབ་སྲིད་གུ་དོག་པོ་ཞིག་གི་འོག་ནས་བྲིས་པའི་བོད་ནང་གི་རྩོམ་ཡིག་དེ་དག་ལ་ངོས་ལེན་དང་། གུས་ཞབས་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།
ཡང་བཀའ་བློན་མཆོག་གིས། རྒྱ་ནག་གཞུང་གིས་ལོ་ངོ་བཅུའི་རིང་རིག་གནས་གསར་བརྗེ་ཡི་སྲིད་ཇུས་ལག་བསྟར་བྱས་ཏེ། མི་གྲངས་ས་ཡ་མང་པོ་བསད་རྗེས། རྒྱ་ནག་ཏུ་རྨས་སྐྱོན་གྱི་རྩོམ་ཡིག་མང་དག་ཅིག་བྲིས་ཡོད་པས། རྩོམ་ཡིག་དེ་དག་གི་ཁྲོད་དུ་རིག་གནས་གསར་བརྗེ་ཡི་ལོ་བཅུའི་གོད་ཆག་གི་ཁྲོད་དུ། དམར་གསོད་བཏང་བའི་མི་གྲངས་མང་པོ་ཞིག་གི་འབོད་སྒྲ་མཚོན་ཡོད་ཀྱང་། རྒྱ་ནག་གཞུང་གིས་བོད་བཅིངས་གྲོལ་ཟེར་བ་ཞིག་བཏང་བ་ལས། རིག་གནས་གསར་བརྗེ་སྐབས་ཀྱི་གནད་དོན་མང་པོ་ཞིག་སྦས་གསང་བྱས་པ་ནི། རྒྱ་ནག་གཞུང་གིས་རྒྱལ་ཁབ་གཅིག་ཡིན་ཟེར་ཡང་། མི་རིགས་གཉིས་ཀྱི་བར་ལ་དབྱེ་འབྱེད་བྱས་ཡོད་པ་དང་། སྨྲ་བརྗོད་རང་དབང་གི་ཐོབ་ཐང་འདྲ་མཉམ་མེད་པ། བོད་ཀྱི་རྒྱལ་རབས་དང་ལོ་རྒྱུས་སོགས་ལ་འཁྱོག་བཤད་བྱེད་ཀྱིན་ཡོད་པ་གསལ་པོ་ཡིན་པས། བོད་ནས་བྲིས་པའི་རྩོམ་ཡིག་དེ་དག་གི་ཁྲོད་དུ་ཡིག་འབྲུ་གཅིག་པུར་གང་བྲིས་པ་ཙམ་མིན་པར། རྩོམ་ཡིག་དེའི་རྒྱབ་ལྗོངས་ཀྱི་གནད་དོན་མང་པོ་ཞིག་ལ་གནད་ཆེན་དུ་བཟུང་ནས་དོ་སྣང་བྱ་རྒྱུ་དེ་གལ་ཆེན་པོ་རེད་ལ། དེ་བཞིན་སྤྱི་ཡོངས་ནས་བོད་ནང་གི་རྩོམ་པ་པོ་དང་མི་སྣ་གྲགས་ཅན་རྣམས་ཀྱིས་ཆབ་སྲིད་ཀྱི་རྩོམ་ཡིག་སོགས་བྲིས་ཚེ། རྒྱ་ནག་གཞུང་གིས་འཛིན་བཟུང་བྱ་རྒྱུ་ཡིན་པ་ནི་སྨྲོས་མེད་རེད། འོན་ཀྱང་། བོད་ནང་གི་སྙན་ངག་པ་དང་རྩོམ་པ་པོ་སོགས་ཀྱིས་བཙན་དབང་གི་འོག་ནས། དཔེ་དེབ་བྲིས་ནས་དཔར་སྐྲུན་བྱས་པ་ནི་ཆེས་གུས་བཀུར་བྱ་འོས་པ་ཞིག་རེད་ལ། འགྲོ་བ་མིའི་ཐོབ་ཐང་དང་རང་དབང་ལོངས་སུ་སྤྱོད་མཁན་གྱི་བཙན་བྱོལ་བོད་མི་རྣམས་ཀྱིས་བོད་ནང་གི་བོད་མིའི་མགྲིན་ཚབ་བྱ་དགོས་སྐོར་སོགས་གསུངས་སོང་།
ད་ལན་བོད་ཀྱི་སྲིད་ཇུས་ཉམས་ཞིབ་ཁང་གིས་གོ་སྒྲིག་བྱས་པའི་ཚོགས་འདུའི་ཆེད། གདན་ཞུ་གཏམ་བཤད་པ་མི་གྲངས ༡༡ མགྲོན་འབོད་གནང་ཡོད་པའི་ཁྲོད། དེ་རིང་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་རྩོམ་རིག་དགེ་རྒན་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱིས་ད་ལྟའི་བོད་ནང་གི་རྩོམ་པ་པོ་དང་རྩོམ་རིག་གི་སྐོར་དང་། ས་རཱ་མཐོ་རིམ་སློབ་གཉེར་ཁང་གི་དགེ་རྒན་བསོད་ནམས་རྒྱལ་མཚན་ལགས་ཀྱིས། ༢༠༠༨ ལོའི་སྔ་ཕྱིའི་སྦྲང་ཆར་དུས་དེབ་ནང་གི་སྒྲུང་རྩོམ་དང་སྙན་ངག་གི་སྐོར། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་་ཁང་གི་འགན་འཛིན་དང་སྨོན་ལམ་བརྡ་འཕྲིན་ཁང་གི་སྤྱི་ཁྱབ་རྩོམ་སྒྲིག་པ་མཁན་པོ་འཇུ་བསྟན་སྐྱོང་ལགས་ཀྱིས་བདེན་པས་བསྒུལ་བའི་སྙིང་ཁམས་ཀྱི་འཕར་ལྡིང་། ཕྱི་ལོ་ ༢༠༠༨ ནས་ད་བར་གྱི་བོད་ནང་གི་རྩོམ་རིག་གི་ཁ་ཕྱོགས་གླེང་བའི་སྐོར། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་གཙུག་ལག་རབ་འབྱམས་པའི་སློབ་དཔོན་ཆེན་མོ་ཨ་འབྲུག་དཀོན་མཆོག་ལགས་ཀྱིས་སི་ཁྲོན་མེན་ཡཱང་བཙོན་ཁང་ནས་བྲིས་པའི་སྙན་ངག་གི་དཔེ་དེབ་གཉིས་ཀྱི་ཁྱད་གནད་དཔྱད་གླེང་བ་སོགས་ཀྱི་སྐོར་གཏམ་བཤད་གནང་གི་ཡོད་འདུག
གསར་འགོད་པ། དཔལ་ལྡན།
ཡག་པོ་འདུག་་