རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་མཆོག་ནས་བོད་དང་ཡུ་གུར། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཐད་བློ་འཚབ་བསྟན་པ་དང་འབྲེལ། རྒྱ་ནག་གིས་རྒྱལ་ཚོགས་ཀྱི་ལམ་སྟོན་ལག་བསྟར་བྱེད་དགོས་སྐོར་བརྗོད་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཟླ་འདིའི་ཕྱི་ཚེས་ ༦ ཉིན་མཉམ་འབྲེལ་རྒྱལ་ཚོགས་ཀྱིས། རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་བསྐྱར་ཞིབ་ཀྱི་སྙན་ཐོ་ཞིག་བཏོན་པ་དང་འབྲེལ། ཕྱི་ཚེས་ ༧ ཉིན་སུད་སིའི་གྲོང་ཁྱེར་ཇི་ནི་ཝ་ (Geneva) རུ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་གསར་པ་སྐུ་ཞབས་ཝོལ་ཀར་ (Volker Turk) ལགས་ཀྱིས་བོད་དང་ཤིན་ཅང་། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་པོ་ཡིན་པའི་ཐད་བློ་འཚབ་ཤུགས་ཆེན་བྱེད་ཀྱི་ཡོད་པས། རྒྱ་ནག་གཞུང་ནས་ས་ཁུལ་དེ་དག་གི་དངོས་ཡོད་གནས་ཚུལ་ལ་དཔག་པའི་རྒྱལ་ཚོགས་ཀྱི་ལམ་སྟོན་ཁག་ལག་བསྟར་བྱེད་དགོས་པ་ནན་སྐུལ་བྱས་འདུག
སྐུ་ཞབས་ཝོལ་ཀར་ལགས་ཀྱིས། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་ནང་གི་འཁྲབ་སྟོན་པ་ཁག་དང་འབྲེལ་ལམ་བྱེད་མགོ་བརྩམས་ཏེ། བོད་དང་ཤར་ཊུ་ཀི་སི་ཐན་ཁུལ་གྱི་གྲངས་ཉུང་མི་རིགས་ཀྱི་ཐོབ་ཐང་སྲུང་སྐྱོབ་བྱེད་བཞིན་ཡོད་པ་དང་། ཤར་ཊུ་ཀི་སི་ཐན་ནང་མི་གྲངས་འབོར་ཆེན་གང་བྱུང་འཛིན་བཟུང་དང་ནང་མི་ཁ་བྲལ་གཏོང་གི་ཡོད་སྐོར། ཕྱི་ལོ་ ༢༠༢༠ ལོར་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ལག་བསྟར་བྱས་ཏེ། ད་བར་དམངས་གཙོ་དོན་གཉེར་བ་དང་ཁྲིམས་རྩོད་པ། འགྲོ་བ་མིའི་ཐོབ་ཐང་རྩོད་ལེན་པ་སོགས་ཀྱི་ཐོག་དྲག་གནོན་བྱས་དང་བྱེད་བཞིན་པའི་ཐད་སེམས་འཚབ་ཡོད་སྐོར་སོགས་བརྗོད་འདུག
རྒྱ་ནག་གི་འགྲོ་བ་མིའི་ཐོབ་ཐང་བསྐྱར་ཞིབ་ཀྱི་སྙན་ཐོ་དེའི་ནང་། རྒྱ་ནག་གཞུང་གིས་དཔལ་འབྱོར་དང་སྤྱི་ཚོགས། རིག་གཞུང་ཐོབ་ཐང་བཅས་ཀྱི་ཐོག སྒྲིག་འཛུགས་ལྡན་ཞིང་དྲང་བདེན་མིན་པའི་དམ་དྲག་དང་དབྱེ་འབྱེད་ཤུགས་ཆེན་བྱེད་བཞིན་ཡོད་པ་དང་། ལྷན་ཚོགས་ཀྱི་ངོས་ནས་རྒྱ་ནག་ནང་གི་གྲངས་ཉུང་མི་རིགས་ཀྱི་སྐད་རིགས་དང་རིག་གཞུང་གི་ཐོབ་ཐང་ལ་བཙན་གནོན་བྱས་དང་བྱེད་མུས་ཡིན་པའི་ཐད་སེམས་འཚབ་ཡོད་སྐོར་བརྗོད་འདུག ད་དུང་བོད་ཀྱི་སྐད་ཡིག་དང་རིག་གཞུང་རྩ་མེད་བཟོ་སླད་ལས་འགུལ་སྣ་མང་སྤེལ་བ་དང་། ཡུལ་གོམས་གཤིས་ལུགས་འགྱུར་ལྡོག་གི་སྲིད་ཇུས་ལག་བསྟར་འོག་གྲངས་ཉུང་མི་རིགས་ཀྱི་སྐད་རིགས་ལ་སྣང་ཆུང་བྱེད་དེ་བོད་ཀྱི་སྐད་དང་རིག་གཞུང་རྩ་མེད་བཟོས་དང་བཟོ་མུས་ཡིན་སྐོར་སོགས་བཀོད་འདུག
དེ་འབྲེལ་ཐད་རྒྱ་ནག་གི་ཕྱི་སྲིད་བློན་ཆེན་ཆིན་ཀཱང་ (Qin Gang) ཟེར་བས། རྒྱལ་ཁབ་གཞན་གྱིས་འགྲོ་བ་མིའི་ཐོབ་ཐང་གི་གནས་སྟངས་ལ་མཛུབ་མོ་བཙུགས་ཏེ་ལམ་སྟོན་བྱེད་ཐབས་བྱེད་པ་ལས། རྒྱལ་ཁབ་སོ་སོའི་ཚབས་ཆེ་བའི་འགྲོ་བ་མིའི་ཐོབ་ཐང་གི་དཀའ་ངལ་སེལ་ཐབས་མི་བྱེད་པས་ངོས་ལེན་མེད། ཅེས་རྒྱལ་ཚོགས་ཀྱི་བསྐྱར་ཞིབ་སྙན་ཐོ་དེར་ངོས་ལེན་མེད་པའི་ལན་འདེབས་བྱས་འདུག
རྒྱལ་ཚོགས་ཀྱིས་རྒྱ་ནག་ཐོག་བསྐྱར་ཞིབ་སྙན་ཐོ་བཏོན་པར། བོད་མིའི་སྒྲིག་འཛུགས་དང་འཛམ་གླིང་ཡུ་གུར་མཐུན་ཚོགས་གཉིས་ནས་བཟང་ཕྱོགས་ཀྱི་འགྱུར་བ་འགྲོ་བར་དགའ་ཚོར་བསྟན་འདུག དེ་ཡང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་རྒྱལ་ཚོགས་ཀྱི་བསྐྱར་ཞིབ་ཚོགས་འདུར་མཉམ་ཞུགས་ཀྱིས་བོད་དོན་སྐོར་སྙན་ཐོ་ཞིག་ཕུལ་ཏེ་རྒྱལ་ཚོགས་ཀྱི་སློབ་སྟོན་གནང་བ་ལྟར་རྒྱ་ནག་གཞུང་གིས་དུས་ཐོག་ལག་བསྟར་བྱེད་རྒྱུའི་རེ་བ་ཡོད། ཅེས་དང་། རྒྱལ་ཚོགས་ཀྱི་སྐུ་ཚབ་ཚོགས་ཆུང་ནས་ཀྱང་སློབ་སྟོན་གནང་བ་ལྟར་རྒྱ་ནག་གཞུང་ལ་ངེས་པར་ལག་བསྟར་བྱེད་བཅུག་དགོས། ཞེས་བརྗོད་ཡོད་པ་དང་། འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་ (Dolkun Isa) ལགས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་ཡུ་གུར་དང་ཊར་ཁེ་མི་མང་གི་གནས་སྟངས་ཚབས་ཆེན་ཡིན་པ་གསལ་སྟོན་བྱས་ཡོད། འདི་ནི་མཉམ་འབྲེལ་རྒྱལ་ཚོགས་ནང་རྒྱ་ནག་གཞུང་གི་མི་རིགས་རྩ་གཏོར་གྱི་སྲིད་ཇུས་ནུས་མེད་ཡིན་པའི་དཔང་རྟགས་ཤིག་རེད། ཅེས་བརྗོད་འདུག
