མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༢ སྟེང་བོད་དོན་གླེང་སློང་གནང་།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༢ སྟེང་རྒྱ་ནག་གཞུང་གིས་བོད་ཀྱི་བྱིས་པ་རྣམས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་གཏོང་མཚམས་བཞག་དགོས་པའི་རེ་སྐུལ་བྱས་ཡོད་འདུག

ཉེ་ལམ་སུད་སི་གྲོང་ཁྱེར་ཇི་ནི་ཝ་རུ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༢ པ་དང་བསྟུན་རྒྱལ་སྤྱིའི་གནད་ཡོད་མི་སྣ་མང་པོ་ཞིག་གིས།  བོད་དང་ཤིན་ཅང་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། རྒྱ་ནག་གཞུང་གིས་བོད་ཀྱི་ཕྲུ་གུ་རྣམས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་མངག་གཏོང་བྱེད་མུས་ཡིན་པའི་སྐོར་སོགས་ཀྱི་ཐད་ལ་གླེང་སློང་གནང་ཡོད་འདུག

དེའི་ཐད་ལྷོ་ཤར་ཨེ་ཤ་ཡའི་ཞིབ་འཇུག་གི་ཡུ་རོབ་ཐེབས་རྩའི་ (European Foundation for South Asian Studies) ཞིབ་འཇུག་པ་ཨེ་རོན་ (Aaron Magunna) ལགས་ཀྱིས། དེང་གི་འཛམ་གླིང་ནང་གྲངས་ཉུང་མི་རིགས་ལ་དབྱེ་འབྱེད་ཤུགས་ཆེན་བྱེད་ཀྱི་ཡོད་སྐོར་གྱི་སྙན་ཐོ་དང་འབྲེལ། རྒྱ་ནག་གཞུང་གིས་བོད་ནང་གི་བོད་པའི་སློབ་ཕྲུག་རྣམས་རང་གི་ཕ་མ་དང་ཁ་བྲལ་དུ་བཅུག་ནས་བཙན་གྱིས་གཏན་འཇགས་སློབ་གྲྭར་བཏང་སྟེ། བོད་ཀྱི་བྱིས་པ་རྣམས་བོད་རང་གི་སྤྱི་ཚོགས་དང་ཁ་བཀྱེད་དུ་བཅུག་པ་དང་།  བོད་མིའི་འདུ་ཤེས་དང་རིན་ཐང་ལྟ་ཚུལ་སོགས་རྩ་མེད་དུ་གཏོང་ཐབས་བྱེད་མུས་ཡིན་པ་མ་ཟད། བོད་ཀྱི་བྱིས་པ་ཚོར་བོད་ཀྱི་སྐད་ཡིག་དང་རིག་གཞུང་སོགས་གཏན་ནས་སློབ་མ་བཅུག་པར། བོད་ནང་གི་སྡེ་ཁག་མང་པོ་ཞིག་ཏུ་རྒྱའི་སྐད་ཡིག་སློབ་ཀྱིན་ཡོད་སྐོར་དང་།  མཉམ་འབྲེལ་རྒྱལ་ཚོགས་ཀྱིས་གྲངས་ཉུང་མི་རིགས་གནད་དོན་ཐོག་ལ་གླེང་སློང་མ་བྱས་པའི་རྐྱེན་གྱིས། རྒྱ་ནག་གཞུང་གིས་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་གི་ཡོད་པར་བརྟེན། མཉམ་འབྲེལ་རྒྱལ་ཚོགས་ཀྱི་ཚོགས་མི་རྣམས་ཀྱིས་འགྲོ་བ་མིའི་གཞི་རྩའི་ཐོབ་ཐང་ལ་ཆེ་མཐོང་དང་གདེང་འཇོག་བྱ་དགོས་པ་མ་ཟད།  རྒྱ་ནག་གཞུང་གིས་གྲངས་ཉུང་མི་རིགས་དག་གི་ཐོབ་ཐང་རྩིས་མེད་རྡོག་རོལ་གཏོང་བའི་གནད་དོན་ཐད་མཉམ་འབྲེལ་རྒྱལ་ཚོགས་ཀྱི་ཚོགས་མི་རྣམས་ཀྱིས་ཀྱང་འགན་ཁུར་དགོས་སྐོར་སོགས་བརྗོད་ཡོད་འདུག

དེ་བཞིན་ཁ་སང་ཕྱི་ཚེས་ ༢༣ ཉིན་འཇར་མན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཀ་ཡེ་མུ་ལར (Kai Muller) ལགས་ཀྱིས། རྒྱ་ནག་གཞུང་གིས་བོད་ཀྱི་སྐད་ཡིག་དང་། རིག་གཞུང་། ཆོས་སོགས་རྩ་མེད་གཏོང་སླད་བོད་ནང་དུ་རྒྱའི་སྲིད་ཇུས་ལག་བསྟར་བྱས་ཏེ། བོད་ནང་གི་ཞིང་འབྲོག་མི་མང་རྣམས་ས་གནས་གཞན་ལ་བཙན་གྱིས་གནས་སྤོ་བྱེད་དུ་བཅུག་ཡོད་པར་སེམས་འཚབ་ཆེན་པོ་ཡོད་པས། རྒྱ་ནག་གཞུང་གིས་བོད་པའི་སློབ་ཕྲུག་རྣམས་ལ་རྒྱའི་སྐད་ཡིག་བསླབ་མཚམས་འཇོག་དགོས་པ་མ་ཟད།  བོད་ཀྱི་སྒེར་ཚུགས་སློབ་གྲྭ་བོད་པའི་སློབ་གྲྭ་འཛུགས་སྐྲུན་བྱ་བཅུག་ནས། བོད་པའི་བྱིས་པ་རྣམས་ལ་བོད་ཀྱི་སྐད་ཡིག་སྦྱང་བཙོན་བྱ་བཅུག་དགོས་སྐོར་སོགས་བརྗོད་ཡོད་འདུག

གཞན་ཡང་། ཐེངས་འདིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཐང་གི་ཚོགས་འདུ་ཐེངས་ ༥༢ པའི་ཁྲོད། དབྱིན་ཡུལ་གྱི་འགྲོ་བ་མིའི་ཐོབ་ཐང་གི་གཙོ་འཛིན་དང་རྒྱལ་ཚོགས་ཀྱི་སྐུ་ཚབ་རི་ཊ་ཧྥ་རན་ཆི་ (Rita French)  ལགས་དང་། སུ་ཝེ་ཌན་གྱི་ཨེ་ན་ (Anna Jardfelt) ལགས་སོགས་ཀྱིས་རྒྱ་ནག་གཞུང་གིས་བོད་ནང་གི་བྱིས་པ་རྣམས་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་མངག་གཏོང་བྱེད་མཚམས་བཞག་དགོས་པ་མ་ཟད།  བོད་ཕྲུག་ཚུད་པའི་བོད་མི་རྣམས་ཀྱི་རིགས་རྫས་བསྡུ་མཚམས་བཞག་ནས། བོད་ནང་གི་འགྲོ་མིའི་ཐོང་ཐང་གི་གནད་དོན་ལ་བརྩི་འཇོག་བྱ་དགོས་སྐོར་སོགས་བརྗོད་ཡོད་འདུག

ད་ལན་གྱི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཚོགས་འདུ་ཐེངས་ ༥༢ སྟེང་། རྒྱལ་ཁབ་མང་པོ་ཞིག་གི་བློན་ཆེན་ཁག་དང་གནད་ཡོད་མི་སྣ་མང་པོ་མཉམ་ཞུགས་གནང་སྟེ། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་བབ་སྐོར། དེ་བཞིན་གོ་ལའི་གནམ་གཤིས་འགྱུར་ལྡོག་སོགས་ཀྱི་ཐོག་ལ་གླེང་སློང་གནང་འདུག་པ་མ་ཟད། ད་ལན་གྱི་ཚོགས་འདུའི་སྟེང་བོད་དང་ཡུ་གུར་གྱི་འགྲོ་བ་མིའི་ཐོབ་ཐང་གི་སྐོར་ལའང་གླེང་སློང་བྱས་ཡོད་འདུག

གསར་འགོད་པ། བསྟན་འཛིན་ཕུར་བུ།