བོད་ཀྱི་རྒྱལ་ས་ལྷ་སར་གནས་སྡོད་བུ་མོ་ལྷ་མོ་ལགས་ཀྱིས་རྒྱ་ནག་གཞུང་ལ་ངོ་རྒོལ་ཆེད་རང་ཤི་བརྒྱབ་པའི་གནས་ཚུལ་ཐོན་འདུག
ཉེ་ལམ་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་རྫོང་ཁག་ ༣༤ ཡི་མཐོ་སློབ་འགྲིམས་མུས་ཡིན་པའི་བོད་རིགས་སློབ་མ་མང་པོ་ཞིག་རྒྱ་ནག་གི་རྒྱལ་ས་པེ་ཅིན་དང་། ཧྲང་ཧེ་སོགས་རྒྱ་ནག་གི་གྲོང་ཁྱེར་ཆེ་ཁག་ཏུ་བཙན་གྱིས་མངག་གཏོང་བྱེད་མུས་ཡིན་པ་ལྟར། ཟླ་འདིའི་ཕྱི་ཚེས་ ༢༣ གྱི་དགོང་མོར་ལྷ་ས་སྟག་རྩེ་ཁུལ་དུ་གནས་སྡོད་བུ་མོ་ལྷ་མོ་ལགས་ཀྱིས་རྒྱ་ནག་གཞུང་གིས་བཙན་གྱིས་བོད་རིགས་གཞོན་སྐྱེས་རྣམས་རྒྱ་ནག་གི་གྲོང་ཁྱེར་ཆེ་ཁག་ཏུ་མངག་གཏོང་བྱེད་བཞིན་པར་ངོ་རྒོལ་བྱས་ཏེ། རང་ཤི་བརྒྱབ་པའི་གནས་ཚུལ་ཐོན་ཡོད།
དེའི་ཐད་ས་གནས་བོད་མི་ཞིག་གིས་འདི་གའི་གསར་འགོད་པར། ཉེ་ལམ་རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་ས་གནས་མང་པོ་ཞིག་གི་གཞོན་སྐྱེས་མང་པོ་རྒྱ་ནག་གི་གྲོང་ཁྱེར་ཆེ་ཁག་ཏུ་མངག་གཏོང་བྱེད་མུས་ཡིན་པ་དང་། དེ་སྔ་རྒྱ་ནག་གཞུང་གིས་རྫོང་ཁག་ཆེ་བ་ཁག་གི་ནང་ཚོགས་འདུ་བསྐོངས་ཏེ། གཞོན་སྐྱེས་ལས་མེད་དང་མཐོ་སློབ་ཐོན་ཟིན་པ། དེ་བཞིན་ཁྱིམ་ཚང་གཅིག་ལ་ལས་མེད་གཞོན་སྐྱེས་གཉིས་ཡོད་ཚེ། ངེས་པར་དུ་གཞོན་སྐྱེས་གཅིག་བཅས་རྒྱ་ནག་ཏུ་ལས་ཀ་བྱེད་དུ་འགྲོ་དགོས་པའི་བཀའ་ཕབ་པས། རྒྱུན་དུ་རྒན་རྒོན་གཉིས་ལ་ཞབས་ཞུ་བྱེད་མུས་ཡིན་པའི་བུ་མོ་ལྷ་མོ་ལགས་ཀྱིས་རྒྱ་ནག་གི་ཐག་གཅོད་དེ་ལ་ངོ་རྒོལ་མཚོན་སླད་རང་ཤི་བརྒྱབ་ཡོད་སྐོར་འགྲེལ་བརྗོད་བྱས་སོང་།
དེ་བཞིན་གནས་ཚུལ་མཁོ་སྤྲོད་པས། ས་གནས་དེ་དག་གི་གཞོན་སྐྱེས་མང་པོ་ཞིག་གིས་མི་འདོད་པའི་རྣམ་འགྱུར་ཡང་ཡང་སྟོན་གིན་འདུག་ལ། དེ་བཞིན་རྒྱ་ནག་གཞུང་གིས་བོད་རིགས་གཞོན་སྐྱེས་མང་པོ་ཞིག་རྒྱ་ནག་ཏུ་མངག་གཏོང་བྱེད་མུས་ཡིན་པས། དེ་དག་གི་ཕ་མ་སོགས་ཀྱིས་ཕྲུ་གུ་དེ་དག་རྒྱ་ནག་ཏུ་མངགས་ཚེ། རྗེས་མ་རྒྱ་མིན་བོད་མིན་ཞིག་ཆགས་པ་མ་ཟད། བོད་མིའི་འདུ་ཤེས་བརླག་ཉེན་ཡོད་པའི་སེམས་ཚབས་ཤུགས་ཆེན་བྱེད་ཀྱིན་ཡོད་སྐོར་སོགས་འགྲེལ་བརྗོད་གནང་སོང་།
ཉེ་ལམ་རྒྱ་ནག་གཞུང་གིས་བོད་རིགས་གཞོན་སྐྱེས་མང་པོ་ཞིག་རྒྱ་ནག་དུ་མངག་གཏོང་བྱེད་མུས་ཡིན་པའི་ལས་གཞི་དེ། བོད་རང་སྐྱོང་ལྗོངས་ཟེར་བའི་རྫོང་ཁག་ ༣༤ ཡི་ཡུལ་ཤོག ༤༨ དངདེ་བཞིན་མགོ་ལོག་ཚུད་པའི་མཚོ་སྔོན་ཞིག་ཆེན་ཁོངས་ཀྱི་ཡུལ་ཤོག་༨༠ ཙམ་གྱི་ནང་དུའང་ལག་བསྟར་བྱེད་མུས་ཡིན་འདུག ཕ་སྤེན་ཡེས་དང་མ་གསར་སྐྱིད་གཉིས་ཀྱི་བུ་མོ་ལྷ་མོ་ནི་ཁམས་མི་ཉག་ནས་ཡིན་ཞིང་མི་ལོ་ ༢༤ གོང་བོད་ཀྱི་རྒྱལ་ས་ལྷ་སར་གནས་སྤོར་བྱས་ཏེ། ད་ལྟ་སྟག་རྩེ་ཁུལ་དུ་གཏན་སྡོད་བྱེད་མུས་ཡིན་འདུག
