གྲོས་ཚོགས་ཚོགས་དུས་ལྔ་པའི་སྟེང་རྩིས་ལོ་ ༢༠༢༣ དང་ ༢༠༢༤ ལོའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་ཧིན་སྒོར་ས་ཡ་ ༣༠༣༤ སྤྱི་མོས་གཏན་འབེབས་གནང་སོང་།
དེ་རིང་ཕྱི་ཚེས་ ༢༥ ཉིན་རྒྱབ་ཆུ་ཚོད་ ༢།༥༠ སྟེང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་མཇུག་སྒྲིལ་སོང་བ་དང་། ཚོགས་ཐོག་ཏུ་གཙོ་བོ་རྩིས་ལོ་ ༢༠༢༣ དང་ ༢༠༢༤ ལོའི་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་མ་དངུལ་ནས་རྒྱུན་གྲོན་དང་དམིགས་བསལ་འགྲོ་འཆར་ཧིན་སྒོར་ ༩༨༦༧༤༩༨༨༢ དང་ཟུར་བཀོལ་རྩིས་ཁོངས་ནས་འགྲོ་འཆར་ཧིན་སྒོར་༢༠༤༧༢༥༦༡༧༣ བཅས་བསྡོམས་ཧིན་སྒོར་ ༣༠༣༤༠༠༦༠༥༥ སྤྱི་མོས་གཏན་འབེབས་གནང་སོང་།
དེ་རིང་གྲོས་ཚོགས་ཀྱི་ལས་ཉིན་བཅུ་བའི་སྟེང་གཞུང་འབྲེལ་གྲོས་ཆོད་གྲོས་འཆར་དང་གཞུང་འབྲེལ་སྒྲིག་གཞི་བསྐྱར་བཅོས་ཁྲིམས་འཆར། རྩིས་ལོ་གཉིས་ཀྱི་བསྐྱར་བཅོས་གཏོང་ལེན་ཁྲིམས་ཡིག་སོགས་ ༨ ཡོད་པ་ཚང་མ་མང་མོས་དང་སྤྱི་མོས་ཐོག་ནས་གཏན་འབེབས་གནང་སོང་བ་དང་། གྲོས་ཆོད་གྲོས་འཆར་དེ་དག་གི་ཁྲོད། གཅིག་ཚོགས་གཙོ་སྦྲེལ་པོས་ཁྲིམས་སྒྲིག་བསྐྱར་བཅོས་འཆར་ཟིན་ཆེད་ཚོགས་མི་ལྔ་ལས་གྲུབ་པའི་ཆེད་འཛུགས་ཚོགས་ཆུང་ཞིག་བསྐོ་འཛུགས་གནང་སྟེ། བཙན་བྱོལ་བོད་མིའི་བཅའ་ཁྲིམས་ནང་གསལ་ཁ་མེད་རིགས་དང་དགོས་ངེས་ཅན་གྱི་ཁྲིམས་སྒྲིག་ཁག་ལ་བསྐྱར་བཅོས་བྱས་པའི་ཟིན་བྲིས་ཤིག་གམ་སྙན་ཐོ་ཞིག་ཕྱི་ལོ་ ༢༠༢༤ ཟླ་ ༢ པའི་ཟླ་མཇུག་ཏུ་སྤྱི་འཐུས་ཚོགས་དྲུང་ལས་ཁུངས་སུ་ཕུལ་ཟིན་པ་དགོས་པའི་གྲོས་ཆོད་ཅིག་མང་མོས་གཏན་འབེབས་དང་། གཉིས་གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་རང་སྐྱོང་ལྡན་པའི་ཁེ་གཉེར་ཁང་མིང་དོན་མཚུངས་པ་ཞིག་ཏུ་བསྒྱུར་རྒྱུའི་འཇུག་སྐྱོང་ལས་དོན་བྱེད་སྒོ་རྣམས་འཕྲལ་མྱུར་ལག་བསྟར་དགོས་རྒྱུ་དང་། གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་གཉེར་ལས་དོན་ལག་བསྟར་ཞུ་སྐབས་ལོ་རེའི་ལས་བསྡོམས་འགོད་འབུལ་དང་། བོད་མིའི་སྒྲིག་འཛུགས་ཀྱི་རྩིས་ཞིབ་ལས་ཁང་ནས་རྩིས་ཁྲར་ཞིབ་འཇུག་བྱ་དགོས་པའི་གྲོས་ཆོད་མང་མོས་གཏན་འབེབས། དེ་བཞིན་བཙན་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན། བོད་མིའི་དང་བླངས་དཔྱ་དངུལ་དང་བསྡུ་དངུལ་གཞན་དག་གི་འབུལ་འབབ་ཁྲིམས་སོགས་འདུག
མཇུག་ཏུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་འདུ་མཇུག་སྒྲིལ་བའི་གསུང་བཤད་གནང་སྐབས། སྐབས་༡༧ བའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ ༥་བའི་ནང་དུ་སྤྱི་ཟུར་བདུད་འདུལ་སྤྲུལ་སྐུ་རིན་པོ་ཆེར་མྱ་ངན་གུས་འདུད་ཀྱི་གྲོས་ཆོད་གཅིག་དང་། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་དང་། བོད་ནང་གི་བོད་མི་རྣམས་ལ་གདུང་སེམས་མཉམ་བསྐྱེད་ཆེད་དང་། བོད་ཀྱི་བདེན་པའི་འཐབ་རྩོད་ཀྱི་ཁ་ཕྱོགས་མུ་མཐུད་དུ་རྒྱུན་བསྲིངས་བྱེད་ཆེད་རྒྱལ་སྤྱིའི་ཐོག་དང་། བོད་རྒྱའི་དཀའ་རྙོག་སེལ་བའི་གྲོས་ཆོད་དོན་ཚན་དྲུག་བཞག་ཡོད་ཅིང་། གྲོས་ཆོད་དེ་དག་སྤྱི་མོས་ཀྱི་ཐོག་ནས་གཏན་འབེབས་བྱས་པ་དེས་བོད་གཞིས་བྱེས་གཉིས་ཀྱི་གནས་སྟངས་དང་། རྒྱལ་སྤྱིའི་ཐོག་ནས་བོད་དོན་ལ་རྒྱབ་སྐྱོར་ཡོད་མེད་ཤེས་རྟོགས་བྱུང་ཐུབ་པའི་སྐོར་སོགས་གསུངས་སོང་།
ཡང་ཚོགས་གཙོ་མཆོག་གིས། ད་རེས་གྲོས་ཚོགས་ཀྱི་དུས་ཚོད་མང་ཆེ་བ་རྩིས་ལོ་ ༢༠༢༣ དང་ ༢༠༢༤ ཡི་སྔོན་རྩིས་གཏན་འབེབས་ཐོག་རེད། དེའི་ཐོག་དཔལ་ལྡན་དཔལ་འབྱོར་བཀའ་བློན་ཆེན་མཆོག་གི་སྔོན་རྩིས་གསུང་བཤད་དང་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་རེད། ནམ་རྒྱུན་སྔོན་རྩིས་སྤྱི་ཡོངས་ཀྱི་ཐོག་སྤྱི་འཐུས་རེ་གཉིས་ལས་བགྲོ་གླེང་གནང་མཁན་མེད་ཀྱང་། ད་རེས་སྤྱི་འཐུས་མང་པོས་ཆ་ཤས་བླངས་ཏེ་དུས་ཚོད་ཀྱང་སྟངས་འཛིན་བྱེད་མི་ཐུབ་པའི་གནས་སྟངས་བྱུང་བ་དང་། དཔེར་ན་སྔོན་མ་བཀའ་དྲུང་ཡིག་ཚང་གི་ལས་དོན་བྱེད་ཕྱོགས་ཐོག་བགྲོ་གླེང་བྱེད་མཁན་མེད་ཀྱང་། ད་ལྟ་ལྷན་ཁང་གཅིག་ནང་ལྟར་གྱི་གསལ་བཤད་ལན་འདེབས་བྱས་ཏེ་འགྲོ་དགོས་པའི་གནས་སྟངས་བྱུང་གི་འདུག་པ་སོགས་ཀྱི་ཐད་ཚོགས་གཙོ་སྤྲེལ་པོ་གཉིས་ལ་ཚོད་མི་ཐིག་པའི་གནས་སྟངས་ཤིག་ཡིན་སྐོར་དང་ ད་རེས་སྔོན་རྩིས་གཏན་འབེབས་སྤྱི་ཡོངས་ཀྱི་ཐོག་ནས་སོང་གི་འབབ་ཧིན་སྒོར་ས་ཡ་ ༣༠༣༤ གཏན་འབེབས་བཀའ་འཁྲོལ་ཐོབ་པ་བཞིན། འབྲེལ་ཡོད་དཔལ་འབྱོར་བཀའ་བློན་མཆོག་གིས་སྣེ་འཁྲིད་པའི་ལྷན་ཁང་དང་ཁྱབ་ཁོངས་ལས་བྱེད་རྣམས་ནས་འགན་འཁུར་ཞུ་བཞིན་ཡོད་པ་ལྟར་ལས་དོན་གང་ཞིག་བསྒྲུབ་རུང་འགན་འགྲུབ་པ་དང་སྲི་ཚགས་བྱེད་པ་སོགས་དོན་ཕན་ལྡན་པ་ཡོང་བ་བྱེད་གལ་ཆེ་སྐོར་དང་། དེ་བཞིན་གྲོས་ཚོགས་ཀྱི་ལས་རིམ་འགྲོ་བཞིན་པའི་སྐབས་སུ། གྲོས་ཚོགས་ནང་གོ་ནོར་ཐེབས་ནས་ཚིག་མཐོ་དམན་ཤོར་གྱི་ཡོད་པ་དང་མ་འོངས་པར་གྲོས་ཚོགས་ནང་ཆ་ཤས་བཞེས་སྐབས་ཚིག་དེའི་རིགས་མི་ཡོང་བར་དགོངས་པ་བཞེས་གལ་ཆེ་བ་དང་། ལྷག་པར་དུ་སྤྱི་འཐུས་རྣམས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་ཁྲིམས་སྒྲིག་གི་ཐོག་དོ་སྣང་བྱེད་རྒྱུ་ཧ་ཅང་གལ་ཆེ་སྐོར་སོགས་གསུངས་སོང་།
༧གོང་ས་མཆོག་གི་སྐུའི་ཡང་སྲིད་དང་འབྲེལ་བའི་སྐོར་ལ་ཁོང་གིས། ༧གོང་ས་མཆོག་གི་ཡང་སྲིད་ངོས་འཛིན་ནི་ཆོས་ཕྱོགས་ཀྱི་སྲོལ་རྒྱུན་ལམ་ལུགས་བཞིན་འགྲོ་དགོས་པ་མ་ཟད། ཕྱི་ལོ་༡༩༦༩ དང་ ཕྱི་ལོ་ ༢༠༡༡ ལོར་༧གོང་ས་མཆོག་ནས་ཡོངས་ཁྱབ་གསལ་བསྒྲགས་བྱས་ཅིང་། ཡང་སྲིད་ཀྱི་ལས་དོན་ཐད་༧སྐུ་འཚོ་བཞུགས་སྐབས་སུ་གསལ་བོར་ཆགས་ངེས་ན། གཞིས་བྱེས་གཉིས་ཀྱི་བོད་མི་ཡོངས་ནས་བཀའ་དེ་བཞིན་ཐག་གཅོད་རྒྱུན་འཁྱོངས་བྱེད་དགོས་པ་གལ་ཆེན་ཡིན་པ་ལས། རྒྱལ་སྤྱིའི་ཚོགས་སྡེ་ཁག་དང་ཉམས་ཞིབ་པ་ཚོས་ཞིབ་འཇུག་བྱས་ནས་འབྲས་བུ་ལེགས་པོ་ཞིག་འབྱུང་བར་འདོད་ཀྱི་མེད་ཀྱང་། ད་ལྟ་༧གོང་ས་མཆོག་ཞལ་བཞུགས་པའི་སྐབས་སུ་གང་གསུངས་བའི་ཐག་གཅོད་ལ་འཛམ་གླིང་སྤྱི་དང་། སྒོས་སུ་རྒྱ་བོད་ཧོར་གསུམ་གྱི་ནང་པ་ཡོངས་ནས་ཡིད་གཉིས་ཐེ་ཚོམ་མེད་པའི་ཐོག་བསྐྱོད་རྒྱུ་ལས། རྒྱ་གཞུང་གིས་ཆབ་སྲིད་ཀྱི་དགོས་མཁོར་བེད་སྤྱོད་བྱས་ཏེ་དེ་འབྲེལ་ཚོགས་ཆུང་འཛུགས་བཞིན་ཡོད་པའི་གནས་ཚུལ་ཡོད་མོད། ང་ཚོའི་ལས་དོན་བྱེད་ཕྱོགས་ཁག་བསམ་ཞིབ་གང་ལེགས་ཀྱི་ཐོག་ནས་གྲ་སྒྲིག་བྱེད་དགོས་སྐོར་གསུངས་སོང་།
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།
