དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་གསུམ་པའི་སྟེང་། སྤྱི་འཐུས་སྒེར་གྱིས་བསྣམས་ཕེབས་པའི་ཡིག་ཆ་ཨང་ ༢༢ པ་སྟེ་བོད་རང་བཙན་འཐབ་རྩོད་རྒྱུན་འཁྱོངས་ཀྱི་གྲོས་ཆོད་དང་། ཡིག་ཆ་ཨང་ ༢༣ པ་དབུས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་རྣམས་ཀྱིས་བོད་སྐད་བཀོལ་སྤྱོད་གནང་རྒྱུ། དེ་བཞིན་ཡིག་ཆ་ཨང་ ༢༤ པ་ཁྲིམས་ཡིག་བསྐྱར་བཅོས་ཀྱི་ཁྲིམས་འཆར་བཅས་ལས། ཡིག་ཆ་ ༢༣ པར་སྤྱི་མོས་གཏན་འབེབས་བྱུང་བ་དང་། ཡིག་ཆ་ཨང་ ༢༢ དང་ ༢༤ གཉིས་མར་ཟགས་སོང་།
དེ་རིང་སྤྱི་འཐུས་སྒེར་གྱིས་བསྣམས་ཕེབས་པའི་གྲོས་ཆོད་གྲོས་འཆར་ཡིག་ཆ་ཨང་ ༢༣ པའི་ཁྲོད། ད་ཕན་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་ཞབས་ཞུ་བར་གཏོགས་པ་ཚང་མས་གཞུང་འབྲེལ་ཕྱག་ལས་གནང་སྐབས་ཕ་སྐད་གཙང་མ་བཀོལ་སྤྱོད་གནང་རྒྱུའི་གྲོས་ཆོད་གཏན་འབེབས་གནང་ཡོད་ཅིང་། གནད་དོན་དེ་དང་འབྲེལ་ནས་བོད་མི་མང་སྤྱི་འཐུས་ལྷག་པ་ཚེ་རིང་མཆོག་གིས། ཝ་ར་ན་སི་ལ་སྤྱི་འཐུས་རྣམས་ཕེབས་པའི་སྐབས་གྲོས་ཆོད་དེ་འདྲ་ཞིག་འཇོག་རོགས་གནང་། རྣམ་པ་ཚོ་ལ་སྐུ་དབང་ཡོད་རེད། དེ་དུས་ང་ཚོ་ནི་སེམས་བསམ་པའི་བར་སྣང་ལ་རྟ་རྒྱུགས་ཀྱང་། རྒྱུགས་མི་ཐུབ་སྤར་མོ་ལ་སོ་མི་འཐེབས། ཟེར་བ་དང་ལག་པ་རིང་ཡང་། ཕུ་ཐུང་ཐུང་ཟེར་བ་ལྟ་བུ་རེད། དེ་བས་རྣམ་པ་ཚོ་ལ་རེ་བ་བཅོལ་བ་བཞིན་གནང་འདུག ཡིན་ནའང་། དེ་རིང་གལ་ཆེན་ལ་དོན་ཆེན། དམ་པའི་ཆོས་ལ་བརྒྱ་ཚར་ཟེར་བ་ལྟར་མི་ཤོད་་ཐབས་མེད་ཅིག་དང་། འུ་ཐུག་ཐབས་ཟད་ཟེར་ནའང་མ་འགྲིག་པ་ཕལ་ཆེར་མེད། ཕྱོགས་གཅིག་ནས་(རྒྱ་ནག་གིས)བཞི་ཅུ་ཞེ་གྲངས་དང་ལྔ་བཅུ་གྲངས་ནས་བཟུང་འཆར་གཞི་དང་ལྡན་པའི་སྒོ་ནས་མི་རིགས་རྩ་མེད་བཟོ་རྒྱུའི་གཞི་བཏིངས་ཡོད་རེད། ཁོ་ཚོ་ལ་ལྟ་གྲུབ་ཡོད་རེད། མི་རིགས་ཤིག་རྩ་མེད་བཟོ་དགོས་ན་མི་རིགས་དེའི་སྐད་ཡིག་རྩ་མེད་བཟོ་དགོས་རེད་ཅེས་ཤོད་མཁན་དེ་ནི་ཆབ་སྲིད་དང་དཔལ་འབྱོར། སྐད་ཡིག་མཁས་པ་རེད། སྐད་བརྡ་རིག་པའི་འགྲོས་ལྟར་ན་སྐད་དང་ཡི་གེ་གཉིས་ལས་སྐད་གལ་ཆེ་བ་ཡོད་རེད། སྐད་མེད་པ་ཡིན་ན་ཡི་གེ་ལ་སྲོག་མེད་པ་རེད། དེ་ལ་ད་ལྟ་འདི་ལ་བཞུགས་མཁན་ཚོ་དང་ཕྱི་ལོགས་སུ་བཞུགས་མཁན། བོད་ཀྱི་འབྲོག་པ་དང་ཞིང་པའི་བུ་ཕྲུག་རྣལ་མ་དང་གཞན་དག་བསྡུར་ན། ཧ་གོ་ཡོང་གི་རེད། ཁ་ཤས་ཀྱིས་ཟླ་བ་དྲུག་ལ་སྦྱང་རྒྱུ་དེ་འགའ་ཤས་ཀྱིས་ལོ་བཅུ་གཉིས་ལ་སྦྱོང་མི་ཐུབ་པ་དེ་འདྲ་ཡོད་རེད། དེ་བས་སྐད་ནི་ཤིན་ཏུ་གལ་ཆེན་པོ་དང་དེ་རིང་ངས་སྐད་ཤོར་བའི་རྒྱུ་མཚན་ཡང་དེ་རེད། བུ་ཕྲུག་སྐྱེས་མ་ཐག་ནས་རྒྱུགས་དགོས་ཟེར་བ་ཡང་མིན། དེ་ལ་སྔ་འཕྲོས་དང་། བོད་སྐད་བཤད་དགོས་རེད། བོད་སྐད་གཙང་མ་བཤད་དགོས་རེད་ཟེར་བ་དང་།སྔ་འཕྲོས་ཟེར་བ་དེ་ལ་སྙན་ངག་ནང་དུ་སྦྱར་རྒྱན་ཟེར་བ་རེད། ང་ཚོའི་ཕྱག་ལས་གནང་པའི་སྐབས་ལ། གཞུང་དོན་སྒྲུབ་པའི་སྐབས་ལ་གནང་རྒྱུ། དེ་ནས་རིམ་པའི་ག་ལེར་གོམས་ན་སྐད་གཙང་མ་བཤད་པའི་ནུས་པ་ཞིག་སླེབས་ཡོང་གི་རེད། དེ་ནས་ཕྱི་ནང་མེད་པར་ཆུ་ཚོད་ཉེར་བཞི་ཟེར་ནའང་འདྲ། དེ་འདྲ་ཡོང་ཐུབ་དུས་མང་ཚོགས་ལ་ལས་སླ་པོའི་སྒོ་ནས་བསླབ་ཐུབ་རེད། དེ་མ་གཏོགས་ང་ཚོ་བོད་ཀྱི་གཏམ་དཔེ་ལ་བྱད་གཟུགས་བཤད་པ་ལ་གདོང་གཟུགས་དགོས་ཀྱི་ཡོད། མི་ལ་མཆན་ཞིག་རྒྱག་པ་ལ་སོ་སོའི་གདོང་ལ་བཟོ་ལྟ་གང་འཚམས་ཤིག་དགོས་རེད། ཀེ་མ་ལབ་ཀེ། སྒྲ་མ་གྲགས་མ་གྲགས་བྱས་ནས་སྒྲ་གྲགས་པ་ནང་བཞིན་ནོ།། ཤ་མ་ཟ་བླ་མས་གསུང་གི་རེད། ཤ་ཞིམ་པོ་བླ་མས་ཟ་ནི་རེད་ཟེར་བ་ལྟ་བུའི་དོན་དག་མཚོན་བྱེད་ཀྱི་དཔེ་མང་པོ་ཡོད་རེད། ཐོག་མར་སོ་སོ་ལ་གང་འཚམས་ཚང་དགོས་པ་དང་། དེ་སྦྱོང་བརྡར་གྱི་ཚུལ་དུ་སྔ་འཕྲོས་ཞུ་དགོས་པའི་རྒྱུ་མཚན་གཅིག་དེ་རེད། སྔ་འཕྲོས་ཞུ་དགོས་པའི་རྒྱུ་མཚན་གཉིས་པ་ནི། ང་ཚོ་ཞབས་ཞུའི་ལས་རིགས་ལ་གཏོགས་པའི་ནང་ཁུལ་ཚགས་ཚུད་དུ་ཆགས་སོང་ན། གཞི་ནས་འབངས་མི་སེར་ལ་བསླབ་ཐུབ་པའི་རིམ་པར་སླེབས་ཡོང་གི་རེད་བསམ་གྱིན་འདུག ལྷག་དོན་དུ་དེ་རིང་མང་ཚོགས་ཀྱིས་ཐད་གཏོང་ལ་གཟིགས་ཀྱིན་ཡོད་རེད། གལ་ཆེན་པོ་བྱས་ནས་ཞུ་རྒྱུ་ལ་སྐད་ཡིག་དང་རིག་གཞུང་ཉམས་ཟེར་བའི་བརྒྱུད་རིམ་དང་ལོ་རྒྱུས་ཀྱི་ཕྱག་དཔེ་ལ་གཟིགས་པ་ཡིན་ན། མི་རབས་མི་རབས་ཟེར་གྱི་ཡོད་རེད་མ་གཏོགས་ལོ་ལྔ་དྲུག་དེ་འདྲ་ཟེར་གྱི་ཡོད་མ་རེད། ལོ་བཅུ་བཅོ་ལྔ་ཟེར་གྱི་ཡོད་མ་རེད། སྐད་དང་རིག་གཞུང་ཟེར་བ་ནི་མི་རབས་ནས་མི་རབས་རྩིས་སྤྲོད་བྱེད་རྒྱུའི་དངོས་པོ་ཞིག་རེད་མ་གཏོགས། གཅིག་ཤོར་སོང་ན་དངུལ་ཁང་ལ་བཅོལ་ནས་ལེན་རྒྱུ་ཡོད་པ་ལྟ་བུ་དང་། ཁྲོམ་ནས་ཉོ་རྒྱུ་ཡོད་པ་ཞིག་མ་རེད། རྒན་པ་འཚོ་བའི་སྐབས་ལ་གཞོན་པ་སྤྲོད་ཐུབ་པའམ། ཕ་མའི་བུ་ཕྲུག་ལ་སྤྲོད་ཐུབ་ན་ཐུབ་པ་རེད་མ་གཏོགས། ཕ་མ་གཉིས་ཀྱིས་སྤྲོད་མ་ཐུབ་ན། དེའི་བུ་ཕྲུག་དེ་ལ་ཀུན་སློང་ཡག་པོ་ཞིག་སླེབས་ཐུབ་ནའང་། དེའི་རྗེས་ཀྱི་མི་རབས་གསུམ་པ་དེ་ལ་སྤྲོད་དགོས་བསམ་ནའང་སྤྲོད་རྒྱུ་ཡོད་མ་རེད། དེ་དུས་སྔོན་གྱི་ཕ་མ་དྲིན་ཆེན་གྱི་ཚབ་ལ་ཕ་མ་དྲིན་ཆུང་དུ་བསམ་པའི་ཉེན་ཁ་མེད་པ་མ་རེད། ཅེས་གསུངས་སོང་།
ཡང་བོད་མི་མང་སྤྱི་འཐུས་འབུམ་རམས་པ་རིག་འཛིན་ལྷུན་གྲུབ་ལགས་ཀྱིས། ཡིག་ཆ་ཨང་ ༢༣ ལ་རྒྱབ་སྐྱོར་དང་། དེའི་ཀུན་སློང་དེ་ཡང་བོད་ཀྱི་སྐད་ཡིག་གནས་རྒྱུའི་ཆེད་དུ་འབད་བརྩོན་ཟེར་ནའང་འདྲ། རྣམ་འགྱུར་ཞིག་ཡིན་པས་ཆ་ནས་རྒྱབ་སྐྱོར་ཞུས་པ་ཞིག་དང་། གཉིས་ནས་བོད་མིའི་བོད་སྐད་བཤད་རྒྱུ་དང་བོད་ཡིག་བཀོལ་སྤྱོད་བྱེད་སྟངས་ལ་གྲོས་ཆོད་དུ་འཁུར་ཡོང་བ་དེ་ཕྱོགས་གཅིག་ནས་བལྟས་ན། ཐབས་སྐྱོ་བོ་དང་ཡ་མཚན་པོ་ཞིག་ཡོད་རེད། ཡིན་ནའང་། འཛམ་གླིང་གི་རང་བཙན་ཅན་གྱི་རྒྱལ་ཁབ་མང་པོ་ཞིག་གི་ནང་དུ་སྐད་ཡིག་བྱེ་བྲག་པ་གང་འདྲ་ཞིག་བེད་སྤྱོད་གཏོང་ཕྱོགས་ཐད། གཞུང་སྒྲིག་འཛུགས་ཀྱི་ངོས་ནས་འོས་འཚམས་ཀྱིས་གཏན་འབེབས་དང་ཁྲིམས་སྒྲིག་གཞི་བཟོས་ཡོད་རེད། དེ་བཞིན་འདས་པའི་གྲོས་ཚོགས་ར་བ་འདིར་གཞུང་འབྲེལ་གྱི་ཡིག་ཆ་དག་བོད་ཡིག་གི་ཐོག་ཏུ་གྲོས་ཆོད་ཕེབས་དགོས་པ་མཐོང་སོང་། དེའི་ནང་བྲིས་པ་བཞིན་གཞུང་འབྲེལ་གྱི་ཡིག་ཆ་མང་པོ་ཞིག་བོད་ཡིག་ཏུ་བྲིས་ཡོད་ལ། ལྷག་པར་དུ་གཞུང་ཞབས་བྱ་འདོད་ན་བོད་ཡིག་གང་འཚམས་ཤིག་ཤེས་དགོས་རེད་ཅེས་དང་། གཞུང་ཞབས་བྱ་རྒྱུར་གྲ་སྒྲིག་གིས་ས་རཱ་ལ་སོགས་པའི་མཐོ་སློབ་ཏུ་ལོ་གཅིག་ལྟ་བུར་བོད་ཡིག་སྦྱོང་མཁན་དང་། གཞོན་སྐྱེས་མཐོ་སློབ་ཐོན་མ་ཐག་ཧོན་སུར་སོགས་སུ་གཞུང་འབྲེལ་གྱིས་འགྲོ་སོང་བཏང་ནས་ཟབ་སྦྱོང་ལ་འཛུལ་ཞུགས་ཀྱི་ཀུན་སློང་ནི།བོད་མིའི་སྒྲིག་འཛུགས་སུ་ཞུགས་དགོས་ཡོད་ན། དབྱིན་སྐད་ཙམ་གྱིས་འགྲིག་གི་མེད་པ་དེ་ནི་སྔོན་མ་བཞག་པའི་གྲོས་ཆོད་ཀྱི་ཤུགས་རྐྱེན་ནམ་འབྲས་བུ་ཞིག་ཆགས་ཡོད་རེད། བོད་སྐད་བཤད་དགོས་པ་དང་། ལྷག་པར་དུ་མང་གཙོའི་ཀ་བ་གསུམ་གྱི་གཞུང་ཞབས་རྣམས་ཀྱིས་མི་མང་དང་གཞུང་གི་ལས་དོན་བྱེད་པའི་སྐབས་སུ། རང་གི་འགན་དང་བོད་སྐད་གཙང་མའི་སྒོ་ནས་འབྲེལ་མོལ་བྱེད་ཐུབ་པ་ཡིན་ན་བུ་རབས་རྗེས་མ་དང་། བོད་མའི་སྒྲིག་འཛུགས་ཀྱི་ཁོངས་གཏོགས་མིན་པ་དག་ལ་མིག་དཔེ་དང་། གཞུང་ཞབས་ལྷན་འཛོམས་སྐབས་དང་། ཁ་འཐོར་ལ་སྡོད་མཁན་སྐད་རིགས་གཞན་ངན་གོམས་སུ་སོང་བ་དག་གཞུང་ཞབས་འགྲམ་དུ་སླེབས་དུས་ཅུང་ཙམ་འཚབ་འཚུབ་ཆགས་པ་དང་། དཔེ་སྟོན་སློབ་གྲྭའི་སློབ་ཕྲུག་མདུན་དུ་ཕ་མ་ཡིན་ཡང་འཚབ་འཚུབ་ཆགས་པའི་གནས་ཚུལ་མང་པོ་བྱུང་ཡོད་རེད། དཔེར་ན། དཔེ་སྟོན་སློབ་གྲྭའི་སློབ་མ་ཞིག་མེག་གྷན་གྱི་ཚོང་ཁང་དུ་འཁྲིད་སྐབས། སློབ་ཕྲུག་དེའི་ང་ལ་ཚོན་མདོག་ལི་ཝང་དགོས་ཟེར་དུས། ཨ་མ་དེའི་ཚོན་མདོག་ལི་ཝང་ཟེར་བ་ངོས་མ་ཟིན་པའི་གནས་ཚུལ་ཡོད་རེད། དཔེ་སྟོན་སློབ་གྲྭའི་འཛིན་གྲྭ་བཅུ་པ་ཐོན་པ་རེད་ཟེར་དུས་རང་བཞིན་གྱིས་བོད་ཡིག་ཤེས་པ་ཞིག་ལ་ཆ་འཇོག་བྱ་ངེས་རེད། དེ་དག་ནི་དངོས་ཤུགས་ཀྱི་ཐོག་ནས་ནུས་པ་ལྡན་པ་ཞིག་ཆགས་པ་རེད། བོད་སྐད་བཤད་དགོས་ཞེས་རྒྱ་ནག་གི་ཁྲིམས་སྒྲིག་དེ་ལ་ཆེད་དམིགས་ཀྱི་རྣམ་འགྱུར་ཞིག་དང་། གཞུང་ཞབས་པ་རྣམས་གཙོས་པའི་བོད་པ་ནང་ཁུལ་དུ་བོད་སྐད་བཤད་པ་ནི་མི་རིགས་ཀྱི་ངོ་བོ་སྲུང་སྐྱོབ་དང་། རིག་གཞུང་སྲུང་སྐྱོབ་ཀྱི་ཆེད་དུ་རེད། བོད་པ་ཟེར་ན་སུ་རེད། དེའི་ངོ་བོ་སྟོན་བྱེད་ལ་བོད་སྐད་བཤད་དགོས་རེད། དེ་བས་ཡིག་ཆ་དེ་ལ་རྒྱབ་སྐྱོར་ཞུ་བའི་སྒོ་ནས་གཞུང་ཞབས་གཙོས་པའི་ང་ཚོ་བོད་རིགས་མགོ་ནག་རྩམ་གཟན་ཡོད་དོ་ཅོག་གིས་བོད་སྐད་བཤད་རྒྱུ་དེ་ལ་འབད་བརྩོན་བྱ་རྒྱུ་དང་། བོད་སྐད་ཐོག་ལ་འབྲེལ་མོལ་དང་དྲི་བ་འདྲི་རྒྱུ་ཁ་ཚ་དགོས་གཏུགས་དང་འཕྱི་མ་དྲགས་ན་སྔ་ནམ་ཡང་དྲགས་ཡོད་མ་རེད། ཅེས་གསུངས་སོང་།
སྤྱི་འཐུས་གོ་བོ་བློ་བཟང་ཕན་བདེ་ལགས་ཀྱིས། གྲོས་ཆོད་གྲོས་འཆར་དེའི་སྔོན་གླེང་དང་གྲོས་ཆོད་གཉིས་ཀ་ལ་རྒྱབ་སྐྱོར་ཞུ་བཞིན་ཡོད། བཀུར་འོས་སྤྱི་འཐུས་ལོ་བཅུ་ཕྲག་གི་སྔོན་ནས་གདན་ས་གྲྭ་ཚང་ཁག་དང་གཞིས་ཆགས་ཁག་ཏུ་ཕ་སྐད་གཙང་མ་དང་འབྲེལ་བ་དང་། བོད་སྐད་ཡིག་དང་འབྲེལ་བའི་ཐོག་ལ་ལས་འགུལ་རྒྱ་ཆེན་སྤེལ་སྡོད་མཁན་ཞིག་རེད། སོ་སོ་སྒེར་ཡང་དེའི་ཐོག་ལ་རྒྱུས་མངའ་ཡོད་མཁན་ཞིག་ཡིན། ཕ་སྐད་རྒྱུན་རིང་དུ་གནས་རྒྱུའི་ཆེད་ཀུན་སློང་གཙང་མའི་ཐོག་ནས་གྲོས་ཆོད་གྲོས་འཆར་འདོན་མཁན་གཉིས་ཀར་རྒྱབ་སྐྱོར་ཞུ་གི་ཡོད། བཙན་བྱོལ་བོད་མིའི་མང་གཙོའི་ཀ་བ་གསུམ་གྱི་གཞུང་ཞབས་གཏོགས་པ་ཚང་མའི་གཞུང་འབྲེལ་ཕྱག་ལས་གནང་སྐབས། ཕ་སྐད་བཤད་རོགས་བྱོས་ཟེར་བ་མ་རེད། རྣམ་པ་ཚོ་ཚང་མའི་བཤད་བསྡད་ཡོད་རེད། ཕ་སྐད་གཙང་མ་བཤད་རོགས་གནང་ཟེར་དུས། ལྷན་ཁང་ཁག་གི་ལོ་ཆུང་ཚོས་སྐད་ཆ་བཤད་སྐབས། ཡོངས་གྲགས་སུ་ར་མ་ལུག་གི་སྐད་དང་། དེ་མིན་སྐད་ཆ་བསྲེས་ལྷད་བྱས་ནས་བཤད་སྡོད་དུས་བོད་སྐད་གཙང་མ་ཡོང་ཐུབ་པ་མི་འདུག དེ་འདྲ་ལ་མང་གཙོའི་ཀ་བ་གསུམ་ལས་སུ་ཡིན་རུང་རྣམ་པ་ཚོས་དགོངས་པ་བཞེས་དང་།གྲོས་ཚོགས་ནང་ཡིན་ནའང་། མང་པོ་ཞིག་གིས་བོད་སྐད་ཀྱི་ཐ་སྙད་ཡོད་བཞིན་དུ་དབྱིན་ཇིའི་ཚིག་ཉམས་བྱས་ནས་ཤོད་མཁན་ཡོད་རེད། དེ་ཚོ་ལ་ཚོད་འཛིན་བྱ་དགོས་རྒྱུའི་འབོད་སྐུལ་རླབས་ཆེན་དུ་མཐོང་གི་འདུག མང་གཙོའི་ཀ་བ་གསུམ་དུ་ཕྱག་ལས་གནང་མཁན་མི་ལྔ་བརྒྱ་དྲུག་བརྒྱ་ལྷག་ཡོད་རེད། དེ་དག་ལྷན་ཁང་ཆ་ཚང་ལ་ཁྱབ་ཡོད་དུས། དེ་ཚོ་ཕ་སྐད་གཙང་མའི་ཐོག་ནས་འགྲོ་ཐུབ་པ་ཡིན་ན། གཞན་གྱིས་ཕ་སྐད་གཙང་མའི་སྒོ་ནས་བཤད་ཡོང་གི་རེད། ད་ལྟའི་དུས་སུ་ང་ཚོ་ལ་ཕ་སྐད་གཙང་མ་མེད་པའི་དཀའ་ངལ་ཞིག་འདུག་པས། དེ་ལ་འབོད་སྐུལ་དང་ཧ་ཅང་གལ་ཆེན་པོ་ལ་བརྩི་བཞིན་ཡོད། བོད་ནང་དུ་རྒྱ་ནག་གིས་ང་ཚོའི་ཕ་སྐད་མ་ཡིག་ལ་བཀག་སྡོམ་བྱེད་སྟངས་དང། ལྷག་པར་དུ་ཉེ་ཆར་རྒྱ་ནག་གཞུང་གི་ཁྲིམས་འཆར་གང་ལ་བལྟས་ཀྱང་། བོད་ནང་དུ་ཕ་སྐད་གཙང་མ་ལ་མངོན་འདོད་དང་སྦྱོང་འདོད་ཡོད་མཁན་ཚང་མ་ལ་རྒྱ་ནག་གཞུང་གིས་གོ་སྐབས་སྤྲད་རྒྱུ་རེད་དམ་མ་རེད། དམ་དྲག་ག་འདྲ་བྱེད་ཀྱིན་འདུག དེ་ཚོ་གང་ལ་བལྟས་ཀྱང་བཙན་བྱོལ་ནང་དུ་དྲན་སྐུལ་བྱེད་པའི་གོ་སྐབས་འོས་ཤིང་འཚམ་པ་ཞིག་ལ་ངོས་འཛིན་ཞུ་བཞིན་ཡོད། དེའི་ཐོག་ལ་ཉེ་ཆར་ནང་སྲིད་ཁྱབ་ཁོངས་ས་གནས་མགོ་འཛིན་ཁག་གི་ཚོགས་འདུ་ལ་མཉན་རྒྱུ་བྱུང་སོང་། སྐད་ཡིག་བཀོལ་སྤྱོད་བྱེད་སྟངས་སྐོར་ལ་གྲོས་ཆོད་བཞག་སོང་། གྲོས་ཆོད་དེ་ཐོག་མ་བྱེད་མཁན་དྷ་ས་ས་གནས་མགོ་འཛིན་རེད། དེ་ལ་དམིགས་བསལ་ཐུགས་རྗེ་ཆེ་ཞུ་བ་ཡིན། ང་ཚོ་བཙན་བྱོལ་ལ་གྲོས་ཆོད་མང་པོ་ཞིག་བཞག་ནས་ཡིག་ཐོག་ལ་བཀོད་དེ་བཞག་ཡོད་རེད། དྷ་ས་ས་གནས་མགོ་འཛིན་གྱིས་ཉིན་གཉིས་ཀྱི་རྗེས་སུ་ཆེད་དུ་ཁྱབ་བསྒྲགས་ཀྱིས་ས་གནས་འགོ་འཛིན་ལ་སྙན་ཞུ་ག་འདྲ་ཡོང་བ་ཡིན་ནའང་། ཕ་ཡིག་དང་ཕ་སྐད་རང་གི་ཐོག་ནས་འབྲི་དགོས་ཡོད་ཅེས་པའི་བཀོད་ཁྱབ་བཏང་སོང་། དེ་ཚོའི་གྲངས་ལ་ལེགས་པར་མཐོང་བའི་སྒོ་ནས་ཡི་རངས་བྱ་རྒྱུ་དང་། དྷ་ས་ས་གནས་མགོ་འཛིན་ལ་དམིགས་བསལ་ཐུགས་རྗེ་ཆེ་ཞུ་རྒྱུ་དང་། དེ་ཡང་གསལ་བསྒྲགས་བཏང་བ་ཙམ་མིན་པར་མ་འོངས་པར་མུ་མཐུད་ནས་རྒྱུན་སྐྱོང་གནང་རོགས་གནང་ཞེས་ཞུ་བ་ཡིན། ཞེས་གསུངས་སོང་།
གསར་འགོད་པ། རྟ་མགྲིན་མཚོ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
