འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་ཀྱི་རྒྱལ་ཡོངས་དམངས་གཙོ་ཡར་ཐོན་ཚོགས་པ་གཙོ་བྱས་པའི་རྒྱལ་ཡོངས་དང་ས་གནས་རིམ་པའི་འབར་མའི་སྲིད་དོན་ཚོགས་པ་ ༤༠ རྩིས་མེད་དུ་བཏང་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་དང་དེ་རིང་འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་ཀྱི་རྒྱལ་ཡོངས་དམངས་གཙོ་ཡར་ཐོན་ཚོགས་པ་གཙོས་རྒྱལ་ཡོངས་དང་ས་གནས་རིམ་པའི་སྲིད་དོན་ཚོགས་པ ༤༠ ཡིས་ཐོ་འགོད་བྱེད་ཕྱོགས་ལ་ནོར་འཁྲུལ་ཤོར་ཡོད་པའི་སྐྱོན་བརྗོད་འོག་མེད་པར་བཟོས་པ་ཡོངས་བསྒྲགས་བྱས་འདུག
འབར་མའི་དྲག་དམག་སྲིད་གཞུང་གིས། ལྕམ་ཨང་སན་སུའུ་སྐྱིད་ལགས་ཀྱི་སྲིད་དོན་ཚོགས་པ་ས་དུས་ཐོག་ཏུ་ཐོ་འགོད་བྱས་མེད་པས་འོས་བསྡུ་ནས་ཕྱིར་ཕུད་བཏང་ཡོད། ཅེས་བརྗོད་འདུག་པ་དང་། དེ་འབྲེལ་ཐད་རྒྱལ་ཡོངས་དམངས་གཙོ་ཡར་ཐོན་ཚོགས་པའི་ཚོགས་མི་ཊན་མེན་ཊི་ (Tun Myint) ལགས་ཀྱིས། ཚོགས་པ་དེའི་ཚོགས་མི་མང་པོ་ཞིག་གསར་བརྗེ་ཡི་རྐྱེན་བྱས་ཏེ་བཙོན་ཁང་དུ་ཡོད་པར་བརྟེན། འོས་བསྡུའི་ནང་མཉམ་ཞུགས་བྱེད་ཀྱི་མིན། འོན་ཀྱང་། དྲག་དམག་གཞུང་གིས། རྒྱལ་ཡོངས་དམངས་གཙོ་ཡར་ཐོན་ཚོགས་པ་དེ་ཡོད་མེད་ཅི་འདྲ་ཞིག་བསྒྲགས་རུང་། ང་ཚོ་མི་མང་གི་རྒྱབ་སྐྱོར་དང་ལྷན་དུ་ལངས་ནས་བསྡད་ཡོད་ཅེས་ལན་འདེབས་བྱས་པ་མ་ཟད། རྒྱལ་ཁབ་གཞན་གྱི་ནང་སྐྱབས་བཅོལ་དུ་ཡོད་པའི་དམངས་གཙོ་ཡར་ཐོན་ཚོགས་པའི་ཚོགས་མི་འགས། སྲིད་དོན་ཚོགས་པ་དེ་ཉིད་དམག་གཞུང་གི་ཁྲིམས་གསར་འོག་ཐོ་འགོད་བྱེད་མི་ཉན་པའི་རྣམ་འགྱུར་ཡང་བསྟན་ཡོད་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨེན་ཊོ་ནིའོ་གུ་ཊེ་རེ་སི་ (Antonio Guterres) ལགས་ཀྱིས། རྒྱལ་ཡོངས་དམངས་གཙོ་ཡར་ཐོན་ཚོགས་པ་མེད་པར་བཟོས་པ་ནི་ང་ཚོ་འགྲོ་འདོད་མེད་པའི་ཁ་ཕྱོགས་ཤིག་ཏུ་གོམ་པ་སྤོ་ཡི་ཡོད་པས། ཨང་སན་སུའུ་སྐྱིད་ཀློད་གྲོལ་གཏོང་དགོས། ཞེས་དྲག་དམག་སྲིད་གཞུང་གི་ཐག་གཅོད་དེར་ངོས་ལེན་པའི་རྣམ་པ་བསྟན་འདུག རྒྱལ་སྤྱིའི་དཀའ་ཉེན་ཚོགས་པའི་ (The International Crisis Group) སློབ་སྟོན་པ་རྒན་པ་རི་ཆར་ཌི་ཧོར་སེ་ (Richard Horsey) ལགས་ཀྱིས། རྒྱལ་ཁབ་དེའི་མི་མང་ཕལ་མོ་ཆེས་དྲག་དམག་སྲིད་གཞུང་གིས་དབང་སྒྱུར་བྱས་པར་རྒྱབ་སྐྱོར་མེད་སྟབས་འོས་བསྡུའི་ནང་མཉམ་ཞུགས་བྱེད་ཀྱི་མེད་པ་དང་། ད་ལན་འབར་མའི་ནང་བཙན་དབང་གིས་འོས་བསྡུ་བྱས་ཚེ་ཉེན་ཚབས་ཆེན་པོ་ཞིག་ལ་འགྱུར་རྒྱུ་ཡིན་སྐོར་བརྗོད་འདུག
འབར་མའི་དྲག་དམག་སྲིད་གཞུང་གིས། ཕྱི་ལོ་ ༢༠༢༠ ལོའི་འབར་མའི་རྒྱལ་ཡོངས་འོས་བསྡུའི་ཁྲོད་ལྕམ་ཨང་སན་སུའུ་སྐྱིད་ཀྱི་དམངས་གཙོ་ཡར་ཐོན་ཚོགས་པར་རྒྱལ་ཁ་ཐོབ་ཡོད་ཀྱང་། སྐབས་དེར་འབར་མའི་དྲག་དམག་སྲིད་གཞུང་གིས་དམངས་གཙོ་ཡར་ཐོན་ཚོགས་པས་འོས་བསྡུའི་གྲུབ་འབྲས་རྫུན་བཟོ་བྱས་ཚུལ་བརྗོད་དེ། ཨང་སན་སུའུ་སྐྱིད་ལགས་ཀྱིས་སྣེ་འཁྲིད་པའི་འབར་མའི་དམངས་གཙོ་ཡར་ཐོན་ཚོགས་པའི་དབང་ཆ་རྩ་མེད་གཏོང་ཐབས་དང་། ཕྱི་ལོ་ ༢༠༢༡ ཟླ་ ༢ པའི་ནང་ལྕམ་ཨང་སན་སུའུ་སྐྱིད་ལགས་རྒྱལ་ཁབ་ཀྱི་སློབ་སྟོན་པའི་གོ་གནས་ནས་ཕྱིར་ཕུད་བཏང་རྗེས་རང་ཁྱིམ་དུ་བཟང་བཙོན་འོག་བཅུག་ཡོད་པ་དང་། དྲག་དམག་སྲིད་གཞུང་གིས་ད་བར་མི་གྲངས་ ༢༠,༠༠༠ ལྷག་འཛིན་བཟུང་དང་མི་གྲངས་ ༣༡༠༠ ཙམ་གྲོངས་ཡོད་འདུག ཕྱི་ལོ་ ༢༠༡༥ ལོའི་འབར་མའི་འོས་བསྡུ་ཆེན་མོའི་ཁྲོད་འབར་མའི་རྒྱལ་ཡོངས་དམངས་གཙོ་ཡར་ཐོན་ཚོགས་པར་གྲོས་ཚོགས་ཀྱི་རྐུབ་སྟེགས་ལས་བརྒྱ་ཆ་ ༨༠ ཐོབ་སྟེ། འབར་མ་དམག་གཞུང་གི་ལོ་ངོ་ ༥༠ ལྷག་གི་དབང་བསྒྱུར་མཇུག་བསྡུས་ཡོད་པ་དང་། ཕྱི་ལོ་ ༡༩༤༨ ལོར་དབྱིན་ཇིའི་བཙན་བཟུང་འོག་ནས་འབར་མར་རང་བཙན་ཐོབ་རྗེས། མི་མང་གིས་བདམས་པའི་མགོ་ཁྲིད་ཅིག་ལ་ཞི་བའི་ངང་སྲིད་དབང་རྩིས་སྤྲོད་བྱས་པ་ཐོག་མ་དེ་ཆགས་ཡོད་འདུག
གསར་འགོད་པ། བསྟན་འཛིན་ཕུར་བུ།
