ཐའེ་ཝན་གྱི་སྲིད་འཛིན་ཚའེ་ཡེན་ཝིན་མཆོག་ཨ་རིར་ཕེབས།

རྒྱ་ནག་གཞུང་གི་གནོན་ཤུགས་ལ་མ་ལྟོས་པར་ཐའེ་ཝན་གྱི་སྲིད་འཛིན་ཚའེ་ཡེན་ཝན་མཆོག་ཨ་རིར་ཕེབས་ཡོད་འདུག

ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝིན་མཆོག་གིས་དབུས་ཨ་མི་རི་ཁའི་ཁུལ་དུ་ཉིན་གྲངས་ ༡༠ ཡི་གཞུང་འབྲེལ་འཚམས་གཟིགས་མགོ་འཛུགས་གནང་སྟེ་ཁ་སང་ཕྱི་ཚེས་ ༢༩ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་འབྱོར་ཡོད་འདུག་ཅིང་། དེ་ནི་ཕྱི་ལོ་ ༢༠༡༩ རྗེས་སུ་ཐའེ་ཝན་གྱི་ཆེས་མཐོའི་དབུ་འཁྲིད་ཅིག་ཨ་རིར་ཕེབས་པ་ཐེངས་དང་པོ་ཡིན་འདུག འཚམས་གཟིགས་སྐབས་རྒྱ་ནག་གཞུང་གིས་ཐའེ་ཝན་གཞུང་མང་གཉིས་ལ་འཇིགས་སྐུལ་མཚམས་མ་ཆད་པར་བྱེད་བཞིན་པའི་གནད་དོན་ཐེར་འདོན་དང་། དབུས་ཨ་མི་རི་ཁའི་ཁུལ་གྱི་རྒྱལ་ཁབ་རྣམས་དང་འབྲེལ་བ་སྲ་བརྟན་དུ་གཏོང་ཐབས་གནང་གི་ཡོད་འདུག

དེའི་ཐད་ལྕམ་ཚའེ་ཡེན་ཝིན་མཆོག་གིས། རྒྱ་ནག་གི་ཚད་ལས་འདས་པའི་གནོན་ཤུགས་དེས་ང་ཚོས་རྒྱལ་སྤྱིའི་སྤྱི་ཚོགས་ནང་མདུན་སྐྱོད་བྱེད་པའི་ཆོད་སེམས་དེ་ནམ་ཡང་རྩ་མེད་དུ་གཏོང་མི་སྲིད། ང་ཚོ་ནི་ཞི་འཇམ་དང་། གདེང་སྤོབས་ཅན། རང་ཤེད་ཅན། ནམ་ཡང་གཉའ་ཆག་མཁན་ཞིག་མིན། ཞེས་གསུངས་འདུག་ལ། ཡང་ཁོང་མོས་སྒེར་གྱི་ཊི་ཝེ་ཊར་དུ་ཨ་རི་དང་ཤར་ཕྱོགས་ཀྱི་མཚོ་ངོགས་སུ་ཡོད་པའི་གྲོགས་པོ་ཚོ། ངས་ཁྱེད་ཅག་གི་འབོད་སྒྲ་གོ་འདོད་འདུག ཁྱེད་ཅག་གིས་ཞབས་མཆན་བྲིས་ནས་ཐའེ་ཝན་ལ་རྒྱབ་སྐྱོར་བྱོས། ཞེས་གསུངས་འདུག

ཁ་སང་ཕྱི་ཚེས་ ༢༩ ཉིན་གྱི་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་ཐོག རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་མའོ་ཉིང་(Mao Ning) གིས། རྒྱ་ནག་གཞུང་གིས་རང་ཚུགས་བརྟན་པོའི་ཐོག་ནས་ཨ་རི་དང་ཐའེ་ཝན་གཉིས་ཀྱི་མགོ་ཁྲིད་ཚོས་ཐུག་འཕྲད་བྱ་བར་ཁ་གཏད་དུ་ལངས་ཀྱི་ཡོད་ལ། ཐའེ་ཝན་གྱི་མགོ་ཁྲིད་སུ་ཡིན་ནའང་ཨ་རི་སོགས་སུ་བསྐྱོད་པར་བཀག་སྡོམ་བྱེད་ཀྱི་ཡོད་སྐོར་དང་། ཐའེ་ཝན་རང་བཙན་རྩོད་པའི་གནད་དོན་དེ་རྒྱ་ནག་ལ་ཧ་ལས་དགོས་པའི་གནད་དོན་ཞིག་མིན་ཡང་། ཨ་རིས་ཐའེ་ཝན་གྱི་ཁ་བྲལ་རིང་ལུགས་པ་ཚོར་རྒྱབ་སྐྱོར་བྱེད་མཚམས་འཇོག་དགོས་སྐོར་གྱི་ཉེན་བརྡའང་བཏང་ཡོད་འདུག དེ་བཞིན་ཨ་རིའི་ནང་གི་རྒྱ་ནག་གཞུང་ཚབ་པ་ཞུ་ཞེ་ཡོན་ (Xu Xueyuan) གྱིས་ཀྱང་། ཨ་རིས་ཐའེ་ཝན་གྱི་ཁ་བྲལ་རིང་ལུགས་པའི་ཕྱོགས་ཁག་དག་ཨ་རིར་ཡོང་བཅུག་པ་ནི་ཆེས་ནོར་འཁྲུལ་ཞིག་ཡིན་པ་མ་ཟད། རྒྱ་ནག་གཅིག་གི་སྲིད་ཇུས་ལ་གཏོར་སྐྱོན་བཏང་ཡོད་ལུགས་བཤད་ཡོད་འདུག

ད་ལྟ་རྒྱལ་སྤྱིའི་གསར་ལམ་ཁག་ཏུ་ལྕམ་ཚའེ་ཡེན་ཝན་མཆོག་གི་འཚམས་གཟིགས་དང་བསྟུན་ནས་མི་སྣ་སུ་དང་སུར་མཇལ་འཕྲད་གནང་རྒྱུ་ཡིན་པ་སོགས་ཀྱི་གནས་ཚུལ་ཁ་གསལ་མེད་ཀྱང་། རྒྱ་ནག་གཞུང་གིས་ཨ་རིའི་གྲོས་ཚོགས་ཀྱི་ཚོགས་གཙོ་མེག་ཁར་ཐི (McCarthy) མཆོག་གིས། ཨ་རྒྱ་གཉིས་ཀྱི་འབྲེལ་ལམ་གཙོ་བོར་དམིགས་ནས་ལྕམ་ཚའེ་ཡེན་ཝིན་མཆོག་དང་མཇལ་འཕྲད་གནང་མི་ཆོག་པའི་འཇིགས་སྐུལ་བྱས་ཏེ་འགོག་རྒོལ་དང་མྱུལ་ཞིབ་ནན་པོ་བྱེད་མུས་ཡིན་པའི་ཁར། གནད་དོན་དབྱེ་ཞིབ་པ་དག་གིས། འདི་ལོའི་ཕྱི་ཟླ་ ༢ པའི་ནང་ཨ་རིའི་ཕྱི་སྲིད་བློན་ཆེན་ཨེན་ཊོ་ནི་བྷི་ལིན་ཀན་མཆོག་རྒྱ་ནག་ནང་དུ་ཕེབས་འཆར་ཡོད་པ་གློ་བུར་དུ་ཕྱིར་འགྱངས་གནང་སྟེ་ཡུལ་གཉིས་བར་གྱི་འབྲེལ་བ་སྔར་ལས་ཇེ་སྡུག་ཏུ་ཕྱིན་པའི་སྐབས་འདིར། ལྕམ་སྐུ་ཁོང་ཨ་རིར་ཕེབས་པ་དེས་ཨ་རྒྱ་གཉིས་ཀྱི་འབྲེལ་ལམ་ལ་དོ་ཕོག་འབྱུང་སྲིད་པའི་ཚོད་དཔག་ཀྱང་གནང་འདུག

འདས་པའི་ལོ་ཤས་རིང་ལྕམ་ཚའེ་ཡེན་ཝིན་མཆོག་གིས་རྒྱལ་ཁབ་མང་དག་ཅིག་ལ་འབྲེལ་ལམ་བཙུགས་ཏེ། རྒྱ་ནག་གཞུང་གིས་གང་བྱུང་ཐའེ་ཝན་མཚོ་འགག་ཏུ་དམག་དོན་བཙན་འཛུལ་བྱེད་བཞིན་པ་ལས་སྐྱོབ་དགོས་པའི་རེ་སྐུལ་ཡང་ཡང་ཞུ་ཡི་ཡོད་ནའང་།  དབུས་ཨ་མི་རི་ཁ་དང་ཨེ་ཤ་ཡའི་ཁུལ་གྱི་རྒྱལ་ཁབ་ཆུང་ཁག་གིས་རྒྱ་ནག་གི་དམག་དོན་དང་ཚོང་འབྲེལ་སོགས་ལ་དམིགས་ནས་ཐའེ་ཝན་ལ་རྒྱང་ཐག་འཛིན་བཞིན་ཡོད་པ་རེད། ད་ལྟའི་ཆར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་འཛིན་ཐོབ་པའི་རྒྱལ་ཁབ་ ༡༩༣ གྱི་ནང་ནས་ཕྱི་འབྲེལ་ཆ་ཚང་ལྡན་པའི་རྒྱལ་ཁབ་ཁག་ ༡༣ མ་གཏོགས་ལྷག་མེད་པ་རེད།

རྒྱ་ནག་གཞུང་གིས་ཞི་བདེ་རྒྱ་མཚོའི་ཁུལ་དུ་དབང་ཤུགས་སྐྱེད་ནས་ཐའེ་ཝན་ལ་གནམ་མཚོ་གཉིས་ཀྱི་ཐོག་ནས་ཡང་ཡང་སིམ་འཛུལ་དང་འཇིགས་སྐུལ་ཡང་ཡང་བྱས་ཏེ་དཀའ་རྙོག་རྒྱུན་མ་ཆད་པར་འབྱུང་བཞིན་ཡོད་པ་དང་། ཨ་རིའི་གཞུང་གིས་ཐའེ་ཝན་མཚོ་གླིང་གི་བདེ་འཇགས་སྲུང་སྐྱོབ་ཐད་དྲག་པོའི་མཚོན་ཆ་སོགས་ཀྱི་མཐུན་འགྱུར་ཤུགས་ཆེན་གནང་བཞིན་ཡོད་པ་མ་ཟད།  འདས་ལོའི་ཕྱི་ཟླ་ ༨ པའི་ནང་རྒྱ་ནག་གཞུང་གིས་འཇིགས་སྐུལ་ཅི་ཙམ་བྱས་ཀྱང་སྣང་མེད་དུ་བཏང་སྟེ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་ཐའེ་ཝན་ནང་དངོས་སུ་ཕེབས་པ་སོགས་ཨ་རིའི་མཐོ་རིམ་དཔོན་རིགས་ཁག་ཅིག་སྔ་རྗེས་སུ་ཐའེ་ཝན་ནང་ཕེབས་ཡོད་པ་དང་། ལྷག་པར་དུ་ཨ་རིའི་སྲིད་འཛིན་ལས་ཐོག་རྗོ་བྷའེ་ཌན་མཆོག་གིས་ཀྱང་། རྒྱ་ནག་གཞུང་གིས་བཙན་ཚུགས་ཀྱིས་ཐའེ་ཝན་གྱི་མཚོ་འགག་ཁག་ཏུ་བཙན་འཛུལ་བྱས་ཚེ། ཨ་རིའི་གཞུང་གིས་ཐའེ་ཝན་གྱི་མཚོ་འགག་བདེ་སྲུང་གི་ཐད་ལ་རོགས་འདེགས་བྱས་ཏེ། ཨ་ཐའེ་གཉིས་ཀྱི་གཅིག་སྒྲིལ་གྱི་ནུས་པ་གོང་མཐོར་གཏང་རྒྱུ་ཡིན་སྐོར་སོགས་ཀྱང་གསུངས་ཡོད་པ་རེད།

ཕྱི་ལོ ༢༠༡༩ ལོར་ལྕམ་སྐུ་མཆོག་ཨ་རིར་ཐེངས་དང་པོར་ཕེབས་ཡོད་ཅིང་། སྐབས་དེར་རྒྱ་ནག་གཞུང་གིས་ཐའེ་ཝན་མཚོ་འགག་ཁུལ་དུ་དམག་དོན་གྱི་ལས་འགུལ་རྒྱ་ཆེར་སྤེལ་ནས། ཁོང་ཉིད་ཨ་རིར་ཕེབས་པར་ངོ་རྒོལ་དྲག་པོ་བྱས་ཡོད་འདུག སྤྱིར་བཏང་ཕྱི་ལོ་ ༢༠༡༦ ལོར་ལྕམ་ཚའེ་ཡེན་ཝིན་མཆོག་ཐའེ་ཝན་གྱི་སྲིད་འཛིན་དུ་འདེམས་ཐོན་རྗེས་སྔ་གཞུག་ཏུ་ཐེངས་དྲུག་ལ་ཨ་རིའི་ནང་ཕེབས་ཐབས་གནང་ཡོད་ཀྱང་ཕེབས་ཐུབ་མེད་པ་རེད།

གསར་འགོད་པ། དཔལ་ལྡན།