རྒྱ་ནག་གཞུང་གིས་བོད་མཚོ་སྣ་རྫོང་དང་ལྷུན་རྩེ་རྫོང་། རྫ་ཡུལ་རྫོང་། མེ་ཏོག་རྫོང་བཅས་ཀྱི་ཁོངས་སུ་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ས་ཁུལ་དང་རི་ཆུ་ཁག་ཅིག་བཙུད་པར་བརྟེན་རྒྱ་གར་གཞུང་ཕྱོགས་ཀྱིས་རྒོལ་གཏམ་བསྒྲགས་འདུག
ཉེ་སྔོན་རྒྱ་ནག་རྒྱལ་སྲིད་སྤྱི་ཁྱབ་ཁང་ས་མིང་དོ་དམ་ལྷན་ཁང་ཟེར་བས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་བཏགས་ནས་ཁ་གསབ་བྱས་ཡོད་ཅེས་ཐོ་གཞུང་ཞིག་ཕྱིར་བསྒྲགས་བྱས་འདུག་ལ། ཐོ་གཞུང་དེའི་ནང་དུ་བོད་མེ་ཏོག་རྫོང་ཁོངས་སུ་མ་ནི་སྒང་དང་། གུ་མིང་ཤིང་རྩེ་རི། གཤེན་གཡོག་མོ་ཆུ། ཏུ་ཏིང་། མིག་ཕན། རྟ་གདོང་། ཆེན་པོ་རི། མདུང་རྩེ་རི་བཅས་དང་། རྫ་ཡུལ་རྫོང་ཁོངས་སུ་མགོ་གླིང་དང་། གཏམས་པ། ཏུ་ལན་ཆུ། དགེ་སྡེའུ་ཆུ། མགོ་ཡུལ་ཐང་། ཉི་མ་སྒང་། དེ་བཞིན་ལྷུན་རྩེ་རྫོང་ཁོངས་སུ་མེ་ལྕག་དང་། ལྕུག་སྨྱུག་རྩེ་གངས་རི། མཚོ་སྣ་རྫོང་ཁོངས་སུ་སེངྒེ་རྫོང་དང་། སྟག་ལུང་རྫོང་། གཟེ་ལ། ཝ་མོ་རི། མདེའུ་རི། ལྷུན་གྲུབ་རི། སྤང་ཆེན། རྒྱང་མཁར་རྫོང་། ལོ་གཟུགས་རི། གཏེ་པོ་རི་བཅས་ཁ་གསབ་བྱས་ཡོད་ལུགས་བརྗོད་དེ། རྒྱ་གར་བྱང་ཤར་ཁུལ་གྱི་ས་གནས་མང་པོ་ཞིག་བོད་མཚོ་སྣ་རྫོང་དང་ལྷུན་རྩེ་རྫོང་། རྫ་ཡུལ་རྫོང་། མེ་ཏོག་རྫོང་བཅས་ཀྱི་ཁོངས་སུ་བཙུད་ཡོད་འདུག
ད་ལན་རྒྱ་གཞུང་གིས་བསྒྲགས་པའི་ས་ཁུལ་དང་རི་ཆུ་དེ་དག་ལས་མང་པོ་ཞིག་རྒྱ་གར་ཨ་རུ་ནཱ་ཅལ་གྱི་མངའ་ཁོངས་སུ་ཡོད་པར་བརྟེན། རྒྱ་གར་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ཨ་རིན་དྷམ་བྷག་ཆི་ (Arindam Bagchi) ལགས་ཀྱིས། ད་ལན་རྒྱ་ནག་གཞུང་གིས་རྒྱ་གར་བྱང་ཤར་ཨ་རུ་ནཱ་ཅལ་ཁུལ་གྱི་ས་གནས་ཁག་ལ་མིང་འདོགས་བྱས་པ་ཐེངས་དང་པོ་མིན་པར། ཕྱི་ལོ་ ༢༠༡༧ ལོ་ལའང་ཁྲིམས་འགལ་གྱི་ཐོག་ནས་ཨ་རུ་ནཱ་ཅལ་མངའ་སྡེ་ཁུལ་གྱི་ས་གནས་ཁག་ཅིག་ལ་མིང་གསར་པ་བཏགས་ཡོད་སྐོར་དང་། དེ་བཞིན་པེ་ཅིང་གཞུང་གིས་མིང་བསྒྱུར་གྱི་ལས་གཞི་འདིའི་ཁྲོད་ནས། ཨ་རུ་ནཱ་ཅལ་དེ་རྒྱ་གར་གྱི་མངའ་ཁོངས་ཡིན་པའི་དངོས་ཡོད་ཀྱི་གནད་དོན་དེར་འགྱུར་བ་གཏོང་ཐུབ་ཀྱི་མེད་སྐོར་དང་། དེ་བཞིན་རྒྱ་གར་གཞུང་ཕྱོགས་ཀྱི་འབྲེལ་ཡོད་ཀྱིས་ཀྱང་། རྒྱ་ནག་གཞུང་གིས་རྒྱ་གར་བྱང་ཤར་གྱི་ས་ཁུལ་ཁག་ལ་མིང་ག་ཚོད་བཏགས་ཐབས་བྱས་ཀྱང་། དེས་རྒྱ་གར་གྱི་ས་ཁོངས་ཁག་གི་ས་མིང་གཏན་ནས་བརྗེ་མི་ཐུབ་ཅིང་། རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེ་ནི་རྒྱ་གར་གྱི་ས་ཁོངས་ཡིན་པ་བརྗོད་མི་དགོས་པ་ཞིག་ཡིན་སྐོར་སོགས་བརྗོད་འདུག
ཡང་རྒྱལ་སྤྱིའི་གོ་ལའི་དུས་བབ་སྟེང་རྒྱ་ནག་གི་མཐའ་མཚམས་སྐོར་གྱི་ཉམས་ཞིབ་པ་ཀྲང་ཡོང་པན་ (Zhang Yongpan)ཟེར་བ་ཞིག་གིས། ལོ་རྒྱུས་ཀྱི་ཁྲོད་དུའང་བོད་ཀྱི་ལྷོ་རྒྱུད་གྱི་ས་ཁུལ་དེ་དག་ལ་དབུས་གཞུང་དང་ས་གནས་སྲིད་གཞུང་། དེ་བཞིན་ཁུལ་དེར་གནས་སྡོད་བོད་པ་དང་། མོན་པ། གློ་བ་སོགས་ཀྱིས་མིང་འདོགས་ཀྱིན་ཡོད་ཀྱང་། རྒྱ་གར་གཞུང་གིས་བོད་ཀྱི་ལྷོ་རྒྱུད་ས་ཁུལ་ལ་བཙན་འཛུལ་བྱས་རྗེས། རྒྱ་གར་གཞུང་གིས་ཁྲིམས་མཐུན་མིན་པའི་ཐོག་ནས་ས་ཁུལ་དེ་དག་ལ་གང་འདོད་དུ་མིང་བཏགས་ཡོད་པས། ད་ལྟ་རྒྱ་ནག་གཞུང་ལ་ས་ཁུལ་དེ་དག་ལ་མིང་འདོགས་པ་དང་ལྟ་སྲུང་བྱེད་པའི་ཐོབ་ཐང་དགོས་ལུགས་དང་། རྒྱ་ནག་གཞུང་གིས་རྒྱ་ནག་གི་མཐའ་མཚམས་དང་རྒྱལ་སྲུང་བདེ་འཇགས་སླད་བོད་ཀྱི་ལྷོ་རྒྱུད་ཀྱི་ས་ཁུལ་དེ་དག་སྲུང་སྐྱོབ་བྱ་དགོས་སྐོར་སོགས་ཀྱང་བརྗོད་འདུག
འདི་ལོའི་ཕྱི་ཟླ་ ༣ ཚེས་ ༢༥ ནས་ཉིན་གྲངས་གཉིས་རིང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་རྒྱལ་ས་ཨི་ཊ་ནཱ་གྷར་ (Itanagar) དུ་འཚོགས་པའི་འཛམ་གླིང་སྟོབས་ཆེན་རྒྱལ་ཁབ་ ༢༠ ཡི་ཚོགས་ཆེན་ཐོག་རྒྱ་ནག་གི་འཐུས་མི་མཉམ་ཞུགས་བྱས་མི་འདུག་ལ། ཕྱི་ལོ་ ༢༠༡༧ ཟླ་ ༤ ཚེས་ ༡༩ ཉིན་རྒྱ་ནག་གཞུང་གིས་ཨ་རུ་ནཱ་ཅལ་ཁུལ་གྱི་ཨོ་རྒྱན་གླིང་དང་མི་ལ་རི། མཆོད་རྟེན་དཀར་པོ་རི། སྨན་ཆུ་ཁ། པུས་མོའི་ལ། ནམ་མཁའ་ཕུབ་རི་བཅས་ཀྱང་རྒྱ་ནག་གི་མངའ་ཁོངས་ཡིན་ལུགས་ཀྱི་དྲིལ་བསྒྲགས་བྱས་ཡོད་པ་མ་ཟད། གྷོ་གྷུལ་ (Google) སོགས་སུའང་ནང་འཇུག་བྱས་འདུག
གསར་འགོད་པ། དཔལ་ལྡན།
