ཨ་རི་དང་ཐའེ་ཝན་གྱི་མགོ་ཁྲིད་ཐུག་འཕྲད་དང་འབྲེལ་རྒྱ་ནག་གིས་ཨ་རིའི་སློབ་གསོའི་ལྟེ་གནས་ཁང་གཉིས་ལ་ཉེས་ཆད་བཏང་ཡོད་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། ད་ལྟའི་ཆར་ཐའེ་ཝན་གྱི་སྲིད་འཛིན་ལྕམ་ཚའེ་ཡེ་ཝན་ལགས་དབུས་ཨ་མེ་རི་ཁའི་རྒྱལ་ཁབ་ཅིག་ཏུ་གཞུང་འབྲེལ་ཕྱོགས་སྐྱོད་བྱེད་བཞིན་པ་དང་བསྟུན། ཟླ་འདིའི་ཕྱི་ཚེས་ ༥ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་ཁོང་མོར་མགོ་ཁྲིད་ཀྱི་གཟེངས་རྟགས་ཤིག་འབུལ་ལམ་ཞུས་པ་དང་སྟབས་བསྟུན། ལྕམ་ཚའེ་ཡེ་ཝན་དང་ཨ་རིའི་གྲོས་ཚོགས་འོག་མའི་ཚོགས་གཙོ་སྐུ་ཞབས་ཀེ་ཝིན་མཱག་ཁ་ཐེ་ (Kevin McCarthy) གཉིས་ཐུག་འཕྲད་བྱས་པའི་ཐད། ཁ་སང་དང་དེ་རིང་ད་དུང་རྒྱ་ནག་གཞུང་གིས། ཐའེ་ཝན་མཚོ་འགོག་ཏུ་དམག་འཐབ་མཚོ་གྲུ་གསུམ་མངག་གཏོང་བྱས་ཏེ། འཐབ་འཁྲུག་གནམ་གྲུ་ཆེད་དུ་ཐའེ་ཝན་གྱི་རྒྱལ་སྲུང་མཁའ་ལམ་དུ་འཛུལ་ནས་ཐའེ་ཝན་ལ་འཇིགས་སྐུལ་བྱས་དང་བྱེད་བཞིན་ཡོད་འདུག
ཡང་། ཁ་སང་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་ལས་གྲུབ་པའི་སྐུ་ཚབ་ཚོགས་ཆུང་ཞིག་ཐའེ་ཝན་ནང་གཞུང་འབྲེལ་ཕྱོགས་སྐྱོད་སླད་འབྱོར་ཡོད་པ་དང་། ཚོགས་ཆུང་དེའི་ནང་དུ་ཡོད་པའི་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ (Michael McCaul) ལགས་ཀྱིས། ང་ཚོ་འདིར་ཡོང་དོན་ནི་ཨ་རིས་ཐའེ་ཝན་ལ་རྒྱབ་སྐྱོར་བྱེད་ཀྱི་ཡོད་པ་མཚོན་པ་མ་ཟད། ང་ཚོས་ཐའེ་ཝན་ལ་བཟུང་བའི་སྲིད་ཇུས་ཇེ་བརྟན་དུ་གཏོང་བ་དང་ལྷན་དུ། རྒྱ་ནག་གཞུང་ནས་ཐའེ་ཝན་ལ་བཙན་འཛུལ་བྱ་རྒྱུར་བསམ་བློ་བསྐྱར་དུ་གཏོང་དགོས་པའི་བརྡ་ལན་ཀྱང་གཏོང་གི་ཡོད། ཅེས་བརྗོད་འདུག
ད་ལྟ་ཨ་རི་དང་ཐའེ་ཝན་གཉིས་ཀྱི་འབྲེལ་ལམ་གོང་འཕེལ་དུ་འགྲོ་བཞིན་པ་དང་འབྲེལ། དེ་རིང་རྒྱ་ནག་གཞུང་འབྲེལ་གསར་ཁང་གོ་ལའི་དུས་བབ་ཟེར་བའི་སྟེང་། ཚོགས་གཙོ་སྐུ་ཞབས་ཀེ་ཝིན་མཱག་ཁ་ཐེ་དང་ལྕམ་ཚའེ་ཡེ་ཝན་གཉིས་ཐུག་འཕྲད་བྱས་པའི་ཐད། རྒྱ་ནག་གཞུང་གིས་ད་ནས་བཟུང་རྒྱ་ནག་གི་སློབ་གསོ་ལྟེ་ཁང་དང་སློབ་གྲྭ་ཆེན་མོ། དེ་བཞིན་ཚོགས་སྡེ་གཞན་དང་མི་སྒེར་སོགས་ནས། ཨ་རིའི་ (Hudson Institute)ཞིབ་འཇུག་ལྟེ་གནས་ཁང་དང་དཔེ་མཛོད་ཁང་ (Ronald Reagan Presidential Library) གཉིས་ལ་འབྲེལ་འདྲིས་བྱེད་མི་ཆོག་པ་མ་ཟད། ཚོགས་པ་དེ་གཉིས་ཀྱི་འབྲེལ་ཡོད་འགན་འཛིན་བཞི་རྒྱ་ནག་ཏུ་ཡོང་མི་ཆོག་པའི་ཁྲིམས་ཆད་བཏང་ཡོད་པ་དང་། ཚོགས་པ་དེ་གཉིས་ཀྱིས་ལྕམ་ཚའེ་ཡེ་ཝན་ལ་ཨ་རིའི་ནང་ཐའེ་ཝན་རང་བཙན་དང་འབྲེལ་བའི་ཁ་བྲལ་གྱི་བྱ་འགུལ་སྤེལ་བཅུག་པ་མ་ཟད། རྒྱ་ནག་གཅིག་གི་སྲིད་ཇུས་དང་མཉམ་གནས་མངའ་ཁོངས་ཀྱི་བདག་སོགས་ལ་གཏོར་བརླག་ཚབས་ཆེན་བཏང་ཡོད་སྐོར་སོགས་བཀོད་འདུག
བྷི་བྷི་སི་གསར་ཁང་གི་གནས་ཚུལ་ལྟར་ན། ད་ལན་ལྕམ་ཚའེ་ཡེ་ཝན་ཨ་རིར་བསྐྱོད་སྐབས་ནི་ཨ་རིའི་ནང་རྒྱ་ནག་ལ་མི་དགའ་བའི་སེམས་ཚོར་ཤུགས་ཆེན་ཡོད་སྐབས་ཤིག་ཡིན་པ་དང་། ཨ་རིའི་ངོས་ནས་ཀྱང་ཆེད་དུ་གྲོས་ཚོགས་འཐུས་མིའི་སྐུ་ཚབ་ཚོགས་པ་ཐའེ་ཝན་དང་ཉི་ཧོང་། ཀོ་རི་ཡ་སོགས་སུ་མངག་གཏོང་བྱས་ཏེ་རྒྱ་ནག་ལ་སུན་གཙེར་དང་ཞི་བདེ་རྒྱ་མཚོའི་ཁུལ་གྱི་ཨ་རིའི་སྟོབས་ཤུགས་རྒྱ་སྐྱེད་གཏོང་གི་ཡོད་ཅིང་། དམིགས་བསལ་རྒྱ་ནག་གཞུང་གིས་རྒྱུན་ལྡན་ལྟར་ཐའེ་ཝན་གྱི་གནད་ཡོད་མི་སྣ་ཨ་རིར་ཡོང་བ་ཁ་ལ་འཁྱེར་ནས་ཐའེ་ཝན་ལ་བཙན་འཛུལ་བྱ་རྒྱུ་མེད་པའི་ལན་འདེབས་ཤིག་ཀྱང་བྱས་འདུག
སྤྱིར་དེང་སྐབས་རྒྱ་ནག་གཞུང་གིས་དངོས་ཤུགས་བརྒྱུད་གསུམ་གྱི་ཐོག་ནས་རྒྱལ་སྤྱིའི་སྟེང་ཐའེ་ཝན་གྲོགས་མེད་ཁེར་རྐྱང་དུ་འཕུད་ཐབས་བྱེད་བཞིན་ཡོད་པ་མ་ཟད། ཕྱི་ལོ་ ༢༠༢༥ ལོར་དམག་འཁྲུག་བརྒྱག་དགོས་ཐུག་ཀྱང་དམག་འཁྲུག་བརྒྱབ་སྟེ་ཚུར་རྒྱ་ནག་གི་འོག་ཏུ་བསྡུ་རྒྱུ་ཡིན་སྐོར་བསྒྲགས་ཡོད་པ་དང་། ལྕམ་ཚའེ་ཡེ་ཝན་ཨ་རིར་སྐད་བཏང་བ་དང་། རྒྱ་ནག་གིས་ཐའེ་ཝན་གྱི་སྲིད་འཛིན་ཟུར་བ་མཱ་ཡེན་ (Ma Ying-jeou) ཟེར་རྒྱ་ནག་ཏུ་འབོད་འགུག་བྱས་ཏེ། རྒྱ་ནག་གི་གྲོང་ཁྱེར་ལྔའི་ནང་ལྟ་སྐོར་དུ་འཁྲིད་ཡོད་པ་མ་ཟད། ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙེས་པ་ནས་ད་བར་ཐའེ་ཝན་གྱི་སྲིད་འཛིན་ཟུར་བ་ཞིག་རྒྱ་ནག་ཏུ་འབོད་འགུག་བྱས་པ་ཐོག་མ་དེ་ཆགས་ཡོད་པ་རེད།
དམིགས་བསལ་ད་རེས་ཐའེ་ཝན་གྱི་སྲིད་འཛིན་དང་སྲིད་འཛིན་ཟུར་བ་གཉིས་ལས་གཅིག་ཨ་རི་དང་གཅིག་རྒྱ་ནག་ཏུ་བསྐྱོད་པ་དེས། ཐའེ་ཝན་གྱི་འཕྲལ་ཕུགས་རྒྱང་གསུམ་ལ་ཤུགས་རྐྱེན་བཟོས་ཡོད་ཅིང་། བྱེ་བྲག་ཏུ་ཕྱི་ལོ་ ༢༠༢༤ ལོར་ཐའེ་ཝན་ནང་སྲིད་འཛིན་འོས་བསྡུ་ཆེན་མོ་བྱ་རྒྱུ་ཡིན་པར་ཤུགས་རྐྱེན་ཐེབས་ཀྱིན་ཡོད་པ་དབྱེ་ཞིབ་པས་བརྗོད་འདུག
གསར་འགོད་པ། སྐལ་བཟང་སྦྱིན་པ།
