རྒྱལ་ཁབ་ཀྱི་དམག་གི་སྟོབས་ཤུགས་བསྐྱེད་ནས་རྒྱ་ནག་གི་བཙན་འཛུལ་ལ་རྒོལ་ལན་བསློག་འཆར་ཡོད་འདུག

ཐའེ་ཝན་སྲིད་གཞུང་གིས་རྒྱ་ནག་གཞུང་གིས་ལྷོ་ཤར་ཨེ་ཤ་ཡའི་མཚོ་འགག་ཁུལ་དུ་དམག་དོན་གྱི་དབངཤུགས་སྐྱེད་མུས་ཡིན་པའི་དུས་སྐབས་དང་བསྟུན། རྒྱལ་ཁབ་ཀྱི་བདེ་སྲུང་དོ་དམ་དང་དམག་གི་སྟོབས་ཤུགས་བསྐྱེད་ནས་རྒྱ་ནག་གི་བཙན་འཛུལ་ལ་རྒོལ་ལན་བསློག་འཆར་ཡོད་འདུག

Annual Han Kuang military exercise, in Bali district, in New Taipei City, Taiwan, August 8, 2026. REUTERS/Cheng-Chia Huang

འདས་པའི་ལོ་ཤས་རིང་རྒྱ་ནག་གཞུང་གིས་ཐའེ་ཝན་གཙོས་ལྷོ་ཤར་ཨེ་ཤ་ཡའི་མཚོ་འགག་ཁུལ་དུ་དབང་ཤུགས་སྐྱེད་མུས་ཡིན་པ་མ་ཟད། ལྷག་པར་རྒྱ་ནག་གཞུང་གིས་གནམ་མཚོ་གཉིས་ནས་ཐའེ་ཝན་ལ་དམག་དོན་གྱི་ཐོག་ནས་འཇིགས་སྐུལ་བྱེད་མུས་ཡིན་པ་ལྟར། ཕྱི་ལོ་ ༢༠༢༧ ལོ་ནས་བཟུང་ཐའེ་ཝན་གཞུང་གིས་ཐའེ་སྒོར་ཁྲག་ཁྲིག་ཆེན་མོ་༡། ༡ (ཨ་སྒོར་ཐེར་འབུམ་ ༣༡ ) ལྷག་གི་འགྲོ་གྲོན་བཏང་ནས་རྒྱལ་ཁབ་ཀྱི་བདེ་སྲུང་སྲ་བརྟན་དང་རྒྱ་ནག་གི་དབང་ཤུགས་ལས་འགོག་སྲུང་བྱ་རྒྱུའི་གྲོས་འཆར་ཞིག་བཏོན་ཡོད་ཅིང་། ཟླ་འདིའི་ཕྱི་ཚེས་ ༢༠ ཉིན་དངོས་སུ་ལག་བསྟར་བྱ་ཐུབ་རྒྱུའི་རེ་བ་བྱེད་ཀྱིན་འདུག་ལ། དེ་ནི་ཐའེ་ཝན་གཞུང་གི་རྩིས་ལོ་སྔོན་མའི་དམག་དོན་དང་བདེ་སྲུང་གི་དངུལ་འབོར་ལས་བརྒྱ་ཆ་བཅུ་དྲུག་གིས་མཐོ་བ་ཡོད་འདུག

གནད་དོན་དེ་དང་འབྲེལ་ནས་ཟླ་འདིའི་ཕྱི་ཚེས་ ༨ ཉིན་ཐའེ་ཝན་གྱི་སྲིད་འཛིན་སྐུ་ཞབས་ལེ་ཆིན་ཏི་(賴清德) མཆོག་ཧན་ཀོང་(Han Kuang) དམག་དོན་སྦྱོང་བརྡར་ས་ཚིགས་སུ་ཆེད་ཕེབས་གནང་ཏེ། ཧན་ཀོང་དམག་སྦྱོང་གི་དམིགས་ཡུལ་ནི་དམག་དོན་བཀོད་འདོམས་ཚོད་བལྟ་དང་། དམག་དོན་ཐབས་ཇུས། རྒྱལ་ཁབ་ཀྱི་སྲུང་སྐྱོབ་ནུས་པ་སོགས་ལ་ཚོད་ལྟ་བྱ་རྒྱུ་དེ་ཡིན། ཕྱི་ཕྱོགས་ཀྱི་(རྒྱ་ནག ) འཇིགས་སྐུལ་སྐབས་དམག་དོན་སྟོབས་ཤུགས་བསྐྱེད་ཐབས་དང་། མཚོ་དམག་ལ་རྒྱབ་སྐྱོར་ཆ་ཚང་བྱ་རྒྱུ་དེ་ཡིན། ཞེས་དང་། དམག་སྦྱོང་ཁྲོད་ཞུགས་མཁན་ཚང་མས་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ཆེད་དུ་འབད་བརྩོན་གནང་དགོས་སྐོར་སོགས་གསུངས་འདུག

Taiwan’s President Lai Ching-te (2nd-L) and Defence Minister Wellington Koo (3rd-L) (Photo by I-Hwa Cheng / AFP via Getty Images)

ཕྱི་ལོ་ ༢༠༢༦ ལོར་རྒྱ་ནག་གཞུང་གི་རྒྱལ་སྲུང་དང་དམག་དོན་གྱི་དངུལ་འབོར་བརྒྱ་ཆ་༧ འཕར་ནས་ཨ་སྒོར་ཐེར་འབུམ་ ༢།༨༣ ཆགས་ཡོད་སྟབས། དེ་ནི་ཐའེ་ཝན་གྱི་འགོག་སྲུང་སྔོན་རྩིས་མ་དངུལ་ཐའེ་སྒོར་ཁྲག་ཁྲིག་ ༡།༡ ལས་ལྡབ་དགུ་ལྷག་གི་མང་བ་ཡིན་ལ། ཉེ་ལམ་ཡང་རྒྱ་ནག་བཅིངས་གྲོལ་དམག་མི་ཟེར་བས་ཐའེ་ཝན་གྱི་མཁའ་དབྱིངས་ས་ཚིགས་ཀྱི་ཁོངས་སུ་འཛུལ་ནས། དེང་རབས་ཅན་གྱི་དམག་དོན་མཁའ་གྲུ་སོགས་མངགས་གཏོང་བྱས་ཏེ་འཇིགས་སྐུལ་བྱས་ཡོད།

ད་ལན་ཐའེ་ཝན་སྲིད་གཞུང་གིས་དམག་དོན་དང་འགོག་སྲུང་གི་མ་དངུལ་མང་ཤོས་ཤིག་ནི་མི་མེད་དམག་དོན་གནམ་གྲུ་(unmanned systems) དང་། མཁའ་དབྱིངས་ལྟ་ཞིབ་དམག་དོན་བརྙན་ཆས་ (Drone) སོགས་ཀྱི་ཐོག་ལ་གཏང་འཆར་ཡོད་ཅིང་། དེ་ནི་གཙོ་བོ་ཨ་རིའི་མི་མེད་གོ་མཚོན་ལ་བརྟེན་པའི་དམག་དོན་ལས་དཔེ་བླངས་བ་ཞིག་ཡིན་ཞིང་། ལྷག་པར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་དུས་སྐབས་དང་། དེང་གི་འཛམ་གླིང་གི་དམག་འཁྲུག་ཁྲོད་མི་མེད་གོ་མཚོན་ནི་མེད་དུ་མི་རུང་བའི་མཚོན་ཆ་ཞིག་ཏུ་གྱུར་ཡོད་ལ། ལྷག་པར་ཐའེ་ཝན་གྱི་ས་ཁམས་ཆགས་ཚུལ་ཐད་ནས་མི་མེད་དམག་དོན་གོ་མཚོན་དེ་དག་ནི་མེད་དུ་མི་རུང་བ་ཞིག་ཏུ་གྱུར་ཡོད་དེ། དེས་རྒྱ་ནག་གི་དམག་དཔུང་དང་། མཚོ་གྲུ་སོགས་ལ་ཚོད་འཛིན་དང་ལྟ་ཞིབ་བྱ་ཐུབ་ཀྱི་ཡོད་པས། ཟླ་འདིའི་ཕྱི་ཚེས་ ༥ ཉིན་ནས་ཐའེ་ཝན་གྱི་དམག་མི་རྣམས་ཧན་ཀོང་(Han Kuang) དམག་དོན་སྦྱོང་བརྡར་ཁྲོད་ཞུགས་ནས། མཁའ་དབྱིངས་ལྟ་ཞིབ་དམག་དོན་བརྙན་ཆས་ཚུད་པའི་དམག་དོན་སྦྱོར་བརྡར་བྱེད་མུས་ཡིན་འདུག

འདས་ལོའི་ཕྱི་ཟླ་ ༡༢ ནང་ཨ་རིས་ཐའེ་ཝན་སྲིད་གཞུང་ལ་ཨ་སྒོར་ཁྲག་ཁྲིག་ཆེན་མོ་ ༡༡། ༡ ལྷག་གི་མཚོན་ཆ་བཙོང་རྒྱུ་ཡིན་པའི་གསལ་བསྒྲགས་སོགས་བྱས་ཏེ། ཕྱོགས་ཡོངས་ནས་ཐའེ་ཝན་གྱི་བདེ་སྲུང་གི་ཐད་ལ་རོགས་འདེགས་བྱེད་མུས་ཡིན་ཞིང་། གནད་དོན་དབྱེ་ཞིབ་པ་ཁག་ཅིག་གིས། ཨ་རིའི་ཐའེ་ཝན་ལ་རོགས་འདེགས་བྱེད་དོན་གཙོ་བོ་གཉིས་ནི་ཐའེ་ཝན་གྱིས་རྒྱ་ནག་གི་བཙན་འཛུལ་ལ་རྒོལ་ལན་བསློགས་ནས་རང་སྲུང་གི་ནུས་པ་ཇེ་མཐོར་གཏོང་ཐབས་དང་། གཉིས་ནས་ཨ་རིའི་དམག་དོན་རོགས་འདེགས་ཁོ་ནར་བརྟེན་མི་དགོས་པར། རྒྱལ་སྲུང་གི་འགན་འཁྲི་ཐའེ་ཝན་རྒྱལ་ཁབ་རང་ཉིད་ཀྱིས་ཁུར་དགོས་པའི་བརྡ་ལན་སྤྲོད་ཆེད་ཡིན་པའི་ཚོད་དཔག་བྱེད་ཀྱིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།