རྒྱ་ནག་གཞུང་གིས་རྒྱ་རིགས་ཁྲིམས་རྩོད་པ་གཉིས་ལ་རྒྱལ་ཁབ་ཁ་བྲལ་གྱི་ཉེས་མིང་འོག་ནས་བཙོན་འཇུག་ཁྲིམས་ཐག་བཅད་ཡོད་འདུག
ད་ལྟའི་ཆར་ཞི་ཅིན་ཕིན་གྱི་སྲིད་དབང་གཅིག་སྡུད་འོག་རྒྱ་ནག་ནང་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་སོགས་ལ་དྲག་གནོན་ཚབས་ཆེན་ཐེབས་བཞིན་ཡོད་པ་ལྟར། ཁ་སང་རྒྱ་ནག་ཧྲན་ཏུང་ཞིང་ཆེན་གྱི་ཁྲིམས་ཁང་ཞིག་གིས་རྒྱ་ནག་སྐད་གྲགས་ཆེ་བའི་ཁྲིམས་རྩོད་པ་ཤེ་ཀྲི་ཡཱོང་(许志永) ་དང་ཏིན་ཅཱ་ཞི་(丁家喜)གཉིས་ལ་རྒྱལ་ཁབ་ཁ་བྲལ་གཏོང་ཐབས་བྱས་པའི་ཉེས་མིང་འོག ལོ་ ༡༤ དང་ ༡༢ ཀྱི་བཙོན་འཇུག་ཁྲིམས་ཐག་བསྟུད་མར་བཅད་ཡོད་པ་རེད།
སི་ཨན་ཨན་གསར་ཁང་གི་གནས་ཚུལ་ལྟར་ན། རྒྱ་ནག་གཞུང་གིས་ཤེ་ཀྲི་ཡཱོང་ལ་ལོ་ངོ་ ༡༤ ཡི་བཙོན་འཇུག་ཁྲིམས་ཐག་བཅད་པ་དེ་ནི། ཞི་ཅིན་ཕིན་གྱི་དྲག་གནོན་སྲིད་ཇུས་འོག་སྤྱི་དམངས་ཀྱི་བདེ་སྡུག་དང་འབྲེལ་བའི་ལས་འགུལ་སྤེལ་མཁན་ཞིག་ལ་ཁྲིམས་ཐག་དུས་ཡུན་རིང་ཤོས་ཆགས་ཡོད་སྐོར་བརྗོད་འདུག་པ་དང་། ཨ་རིར་གནས་སྡོད་བྱེད་བཞིན་པའི་སྐུ་ཞབས་ཤེ་ཀྲི་ཡཱོང་གི་བཟའ་ཟླ་ལོའུ་ཧྲན་ཁྲན་(罗升春) གྱིས། ཁོ་གཉིས་རྒྱ་ནག་ཧྲན་ཏུང་ཞིང་ཆེན་གྱི་ཁྲིམས་ཁང་ཞིག་ཏུ་གསང་བའི་ཁྲིམས་རར་བསྡུས་ཏེ་ཁྲིམས་ཐག་བཅད་ཡོད་ཀྱང་། ཁོ་གཉིས་ནས་རྒྱལ་ཁབ་ཁ་བྲལ་གཏོང་ཐབས་བྱས་པའི་ཉེས་ཆད་ལ་ངོས་ལེན་བྱས་མེད་པ་རེད། ཅེས་འགྲེལ་བརྗོད་འདུག
ཁྲིམས་རྩོད་པ་ཤེ་ཀྲི་ཡཱོང་དང་ཏིན་ཅཱ་ཞི་གཉིས། ཕྱི་ལོ་ ༢༠༡༩ ཟླ་ ༡༢ ནང་རྒྱ་ནག་གི་ལྷོ་ཤར་གྲོང་ཁྱེར་ཕྱཱ་མན་ (厦门) དུ། རྒྱ་རིགས་དམངས་གཙོ་དོན་གཉེར་བ་དང་ཁྲིམས་རྩོད་པ། འགྲོ་བ་མིའི་ཐོབ་ཐང་གི་ལས་འགུལ་བ་སོགས་ཀྱི་གསང་བའི་འདུ་འཛོམས་ཤིག་གི་ནང་མཉམ་ཞུགས་བྱས་པ་བརྟེན་ནས་རྗེས་འཛིན་བཟུང་བྱས་ཤིང་། ལོ་གཅིག་ལྷག་རིང་ཁྲིམས་རྩོད་པར་ཐུག་འཕྲད་བྱེད་དུ་བཅུག་མེད་པ་རེད། འོན་ཀྱང་། ཕྱི་ལོ་ ༢༠༢༡ གི་ལོ་མགོར་ཤེ་ཀྲི་ཡཱོང་གིས། རང་ཉིད་ཀྱི་ཁྲིམས་རྩོད་པར་ཞུ་གཏུག་གི་སྐད་ཆ་ཞིག་བཤད་པའི་ནང་། ང་ཚོའི་དུས་སྐབས་འདིར་རྒྱ་ནག་མང་གཙོར་བསྒྱུར་རྒྱུ་མངོན་འགྱུར་ཡོང་ཐུབ་དགོས། ང་ཚོས་མི་རབས་རྗེས་མ་ཚོར་འགན་འདི་བསྐུལ་མི་ཉན། ཞེས་བརྗོད་ཡོད་པ་རེད།
ཤེ་ཀྲི་ཡཱོང་དང་ཏིན་ཅཱ་ཞི་གཉིས་དེ་སྔ་ཕྱི་ལོ་ ༢༠༡༤ ལོར་ཡང་འཛིན་བཟུང་བྱས་མྱོང་བ་དང་། སྐབས་དེར་ཤེ་ཀྲི་ཡཱོང་གིས། མི་རབས་གསར་བའི་ཡོ་ལང་ཞེས་པའི་ངོ་རྒོལ་ལས་འགུལ་སྤེལ་ཏེ། རྒྱ་ནག་ནང་སྤྱི་དམངས་ཀྱི་ཐོབ་ཐང་དང་ཁྲིམས་ཀྱི་དབང་སྒྱུར། རྒྱ་ནག་གི་དཔོན་རིགས་ཚོའི་དཔལ་འབྱོར་གྱི་གནས་བབ་ཕྱི་གསལ་ནང་གསལ་བཟོ་དགོས་པ་སོགས་ཀྱི་འབོད་སྐུལ་བྱས་ཡོད་པ་རེད་ལ། ཕྱི་ལོ་ ༢༠༢༠ ལོར་ཤེ་ཀྲི་ཡཱོང་འཛིན་བཟུང་མ་བྱས་པའི་ཟླ་གཉིས་ཀྱི་གོང་དུ། ཁོས་ཞི་ཅིན་ཕིན་ལ་ཡི་གེ་ཞིག་བསྐུར་ཏེ། ཞི་ཡི་དཔལ་འབྱོར་དང་དམར་ཤོག་ཚོགས་པའི་སྲིད་ཇུས་སོགས་ལ་ནོར་སྐྱོན་ཆེ་བ་མ་ཟད། ཧོང་ཀོང་གི་རང་དབང་ཐོག་དྲག་གནོན་དང་ཝུའུ་ཧན་གྲོང་ཁྱེར་ནང་ཐོག་མར་ཏོག་དབྱིབས་གཉན་རིམས་ཐོག་སྟངས་འཛིན་ཡག་པོ་མ་བྱས་པ་སོགས་ཀྱི་སྐྱོན་བརྗོད་དང་འབྲེལ། ཞི་ཅིན་ཕིན་གྱིས་སྲིད་དབང་ནས་དགོངས་པ་ཞུ་དགོས་སྐོར་བརྗོད་ཡོད་འདུག
ཡང་ད་ལན་ཁྲིམས་ཆད་དང་འབྲེལ། ཤེ་ཀྲི་ཡཱོང་གི་ཁྲིམས་རྩོད་ལས་རོགས་ཐིན་བྷེའོ་ (Teng Biao) ཡིས། ཕྱི་ལོ་ ༢༠༡༥ ལོར་རྒྱ་ནག་གཞུང་གིས་ཁྲིམས་རྩོད་པ་དང་འགྲོ་བ་མིའི་ཐོབ་ཐང་ལས་འགུལ་བ། དམངས་གཙོ་དོན་གཉེར་བ་སོགས་ཆེད་ལས་ཐོག་དྲག་གནོན་བྱེད་མགོ་བརྩམས་པ་ནས། ཤེ་ཀྲི་ཡཱོང་ལ་ད་བར་གྱི་བཙོན་འཇུག་ཁྲིམས་ཐག་ལྗིད་ཤོས་དེ་ཆགས་ཡོད། རྒྱ་ནག་གཞུང་གིས་གདུག་རྩུབ་ཆེ་བའི་བྱེད་ཐབས་སྣ་ཚོགས་སྤྱད་དེ་འགྲོ་བ་མིའི་ཐོབ་ཐང་དང་སྤྱི་དམངས་ཀྱི་ལས་འགུལ་སོགས་ལ་རྡོག་རྫིས་གཏོང་གི་ཡོད། ཅེས་བརྗོད་ཡོད་པ་དང་། ཤེ་ཀྲི་ཡཱོང་གི་བཟའ་ཟླ་ལོའུ་ཡིས། ཁོ་ཚོ་ཁྲིམས་རྩོད་པ་ཡིན་པ་དང་རྒྱ་ནག་གི་རྩ་ཁྲིམས་དང་ཁྲིམས་གཞིར་བཟུང་ལས་ཀ་བྱས་པ་ཙམ་རེད། འོན་ཀྱང་། རྒྱ་ནག་གཞུང་གིས་ཁྲིམས་རྩོད་པར་བཙོན་འཇུག་ཁྲིམས་ཐག་འདི་ཙམ་ལྗིད་མོ་བཅད་པ་ཡིན་ན། རྒྱ་ནག་ཁྲིམས་ཀྱི་དབང་སྒྱུར་འོག་གནས་པའི་རྒྱལ་ཁབ་ཅིག་ཡིན་པ་ཇི་ལྟར་གསལ་འདེབས་བྱེད་དམ། ཞེས་དོགས་འདྲིའི་ཚུལ་དུ་བརྗོད་འདུག
ཤེ་ཀྲི་ཡཱོང་ནི་ད་ལྟ་རང་ལོ་ ༥༠ ཡིན་པ་དང་པེ་ཅིན་གཙུག་ལག་སློབ་གྲྭ་ཆེན་མོ་ནས་ཁྲིམས་ལུགས་རིག་པའི་ཐོག་འབུམ་རམས་པ་ཐོན། ཁོས་ཕྱི་ལོ་ ༢༠༠༣ ནས་སྤྱི་དམངས་ཀྱི་བདེ་སྡུག་དང་འབྲེལ་ནས་ཁྲིམས་རྩོད་ལས་དོན་དང་ཞི་རྒོལ་ལས་འགུལ་མང་དག་ཅིག་གི་སྣེ་འཁྲིད་ཅིང་། ཁྲིམས་ལུགས་ཀྱི་གནས་བབ་ཐོག་ནས་རྒྱུན་དུ་རྒྱ་ནག་དམར་ཤོག་ཚོགས་པའི་དཔོན་རིགས་དག་གི་ཁ་གཏད་དུ་ལང་མཁན་ཞིག་ཡིན་སྟབས། ཁོ་རྒྱ་ནག་དམར་ཤོག་ཚོགས་པའི་དཔོན་རིགས་ཚོའི་མིག་ནང་གི་འཚེར་མ་ལྟ་བུར་གྱུར་ཡོད་པ་རེད། ཤེ་ཡི་གྲོགས་པོ་ཏིན་ཅཱ་ཞི་ནི་ད་ལྟ་རང་ལོ་་༥༥ ཡིན་པ་དང་མི་རབས་གསར་བའི་ཡོ་ལང་མགོ་འཛུགས་མཁན་གྱི་གྲས་ཡིན་པ་མ་ཟད། རྒྱ་ནག་ནང་ཆབ་སྲིད་ཀྱི་གནས་བབ་ལ་འགྱུར་བཅོས་གཏོང་དགོས་པའི་འབོད་སྐུལ་འོག་ལས་འགུལ་རབ་དང་རིམ་པ་སྤེལ་མྱོང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
