བོད་མི་མང་སྤྱི་ཟུར་བློ་བཟང་ཆོས་འབྱོར།
ང་ཚོ་བོད་མི་རིགས་ཀྱི་བྱམས་བརྩེ་དང་གཞན་ཕན་གྱི་རིག་གཞུང་གསལ་བོ་མ་མཁྱེན་པ་ཁག་མེད། དེའི་ཚུལ་ཕྱིའི་ལུས་ངག་གི་བྱེད་ལས་ལ་ཐོན་ཏེ་སྤྱི་ཚོགས་ལ་ཕན་བདེ་བསྐྲུན་སྟངས་ཀྱི་རྣམ་གྲངས་གྲངས་ལས་འདས་པ་ཡོད། ང་ཚོས་སེམས་ལྡན་ཚང་མ་སྐྱེ་བ་ཀུན་ཏུ་རང་གི་མར་བྱས་པ་རིགས་པའི་ལམ་ནས་ཁས་ལེན་ཞིང། མི་ཙམ་མ་ཟད། སེམས་ལྡན་ཡོངས་ལ་ལྟ་སྟངས་གཅིག་གྱུར་ཞིག་ཡོང་བའི་བློ་སྦྱོང་རྒྱུ་ནི་ང་ཚོའི་རིག་གཞུང་གི་བསྟན་དོན་གཙོ་བོ་ཞིག་ཡིན། མི་ཞིག་ལ་མཚོན་ན། བཙས་མ་ཐག་ནས་ཁང་པའི་ཐོག་ཁར་བསང་ཕུད་པ། ཆོས་པ་ཚད་ལྡན་ལས་མིང་ཞུ་བ། བྱིས་པ་དེའི་མ་འོངས་པའི་ལས་དོན་རྣམས་ཀུན་ལ་ཕན་ཐོགས་པ་ཅན་ཞིག་ཏུ་ཡོང་བར་མཆོད་འབུལ་དང་སྦྱིན་གཏོང་། ཚེ་ཐར་སོགས་ཀྱི་ལམ་ནས་ཚོགས་གསོག་པ། ལོ་གསུམ་ལ་ལོན་མཚམས་དམིགས་བསལ་མནོལ་སྟོན་ཞེས་སྐྲ་ཕུད་བླངས་ཏེ་སྟོན་མོའི་བྱེད་སྒོ་ཆེན་པོ་ཞིག་སྤེལ་སྲོལ་ཡོད།
བྱིས་པ་ཚང་མའི་ཐོད་པ། འགྲམ་པ། ཁ་སོགས་ལ་རྒན་པ་ཕོ་མོ་དབྱེ་བ་མེད་པར། གཉེན་ཉེ་ཡིན་མིན་ཚང་མས་འོ་བྱེད་ཅིང། བྱིས་པ་གང་དེར་དམིགས་བསལ་འཆམ་པོ་བྱེད་མཁན་ཚོས་བྱིས་པའི་སྣབས་ལུད་ཚུན་ཁས་འཇིབ་ནས་མར་གཡུགས་པ་ཡིན། ང་ཚོ་འདི་ལྟར་འཚར་ལོངས་བྱུང། ད་ལྟ་ཡང་བྱིས་པ་ཚོ་འདི་ལྟར་འཚར་ལོངས་བྱུང་བཞིན་པ་ཡིན། མདོ་དོན་བྱིས་པ་བཙས་མ་ཐག་ནས་སྐྱེ་བ་ཕྱི་མ་མཐའ་དག་གི་ལས་དོན་ལ་རྩིས་སྐོར་ཏེ། མི་ཚེའི་འགྲོ་སྟངས་བཟོ་ཐུབ་མཁན་ང་ཚོ་བོད་མི་རིགས་ལྟ་བུ་ཤིན་ཏུ་དཀོན། ང་ཚོའི་རིག་གཞུང་ལས་ཚེ་འདིའི་རང་གི་ཁ་རྒྱབ་ཁེབས་ཐུབ་ཙམ་ལ་མགོ་འཁོར་བའི་ལས་དེར་དུད་འགྲོ་དང་གཅིག་པར་བརྩི་བ་ཡིན། ཉུང་མཐར། གཞན་ལ་ཕན་མ་ཐོགས་ཚེ། ལུས་ངག་ཡིད་གསུམ་གྱི་བྱ་བ་གང་གིས་ཀྱང། དངོས་ཤུགས་བརྒྱུད་གསུམ་ནས་གཞན་ལ་གནོད་མི་སྐྱེལ་བའི་དམ་བཅའ་བླངས་ཏེ་རྟག་ཏུ་དྲན་ཤེས་བསྟེན་པ་ཡིན།
༸གོང་ས་༸སྐྱབས་མགོན་ཆེན་པོ་མཆོག་ནི། སེམས་ཅན་ཡོངས་ལ་རང་གི་བརྩེ་བའི་ཨ་མ་ལྟ་བུའི་ལྟ་སྟངས་གཅིག་གྱུར་དང། སྟོང་པ་ཉིད་ཀྱི་དོན་ལ་མི་ལོ་བདུན་ཅུ་ལྷག་རིང་དཔྱད་སྒོམ་དང་འཇོག་སྒོམ་ལ་ཞུགས་པའི་བློ་སྦྱོང་གི་གནས་ཚད། མི་གྲངས་དུར་ཕྱུར་བདུན་ཅུའི་རྩེ་མོར་སླེབས་པའི་ཞི་བདེའི་དེད་དཔོན་ཆེན་པོ་ཞིག་ཡིན། ཁོང་གི་མཛད་འཕྲིན་ལ་གཞི་མེད་ལོག་འགྲེལ་བྱེད་པ་དེས། བོད་མི་དང་ནང་པ་ཙམ་ལ་གནོད་འགྲོ་བ་ཙམ་མིན་པར། སྣོད་བཅུད་གཉིས་ཀ་རྒུད་པའི་ཕྱོགས་སུ་འདེད་པར་སེམས་ཁྲལ་གང་ཡང་མེད་པའི་རང་དོན་ཅན་ཁོ་ནའི་བྱེད་བབ་ཡིན། ལྷག་པར་མིའི་སྤྱི་ཚོགས་སུ་དམག་འཁྲུག་དང། མ་རབས། ལྐོག་ཟ་རུལ་སུངས། གཡོ་བཙོང་། བཀྲ་མི་ཤིས་པ་སྣ་ཚོགས་འདྲེན་པར་བྱེད་པའི་གཞིར་འགྱུར་ངེས་པ་བཤད་མ་དགོས་པས། རྒྱ་གར་གྱི་གསར་ཁང་ NDTV སོགས་ནང་རླབས་ཆེན་གྱི་མི་སྣ་ཁོང་ལྟ་བུའི་མཛད་རྗེས་ལ་གཞི་མེད་འཆལ་གཏམ་ཇེ་མང་དུ་མི་སྤེལ་བའི་རེ་བ་ཞུ་གི་ཡོད།
ལས་དོན་བཟང་ངན་ཆེ་ཆུང་ཅི་འདྲ་ཞིག་བྱས་ཀྱང། དེ་ལ་དཔག་པའི་འབྲས་བུ་ཞིག་སྨིན་རྒྱུ་ཡིན་པ་ཡིད་ཆེས་གཙང་མ་བྱས་ཆོག དཔེར་ན། འཇིག་རྟེན་འདིའི་བྱ་དངོས་ཡོད་ཚད་རྟེན་ཅིང་འབྲེལ་ནས་མ་གྲུབ་པ་ཞིག་ཚན་རིག་པ་ཚོས་ཀྱང་རྙེད་ཀྱི་མེད་པ་འདིས་གསལ་བཤད་བྱེད་ཐུབ་པས། སོ་སོའི་བྱེད་ལས་ལ་ཉིན་ཞིག་རྩིས་རྒྱག་མཁན་ཞིག་ཏན་ཏན་ཡོང་རྒྱུ་ཡིན་པ་གཡོལ་ཐབས་ག་ལ་ཡོད། དེས་ན། གཞན་གྱི་གོམས་གཤིས་དང་རིག་གཞུང། མི་ཚེའི་འགྲོ་སྟངས་ལ་ངེས་པར་དུ་བརྩི་བཀུར་གནང་རོགས། ཁྱོད་ཚོ་མིའི་སྤྱི་ཚོགས་ལ་དངོས་འབྲེལ་ཤ་ཚ་ཡོད་ན། བོད་སོགས་བཙན་འཛུལ་འོག་ཚུད་པའི་དཀའ་ངལ་ཅན་གྱི་གནས་སྟངས་སེལ་ཆེད་གསར་འགྱུར་བཟོ་རོགས། བགྲོ་གླེང་གནང་རོགས་ཞེས་འབོད་སྐུལ་ཞུ་འདོད་བྱུང་།། །།
