དབྱིན་ཇིའི་(Scheherazade)ཐེབས་རྩ་ཁང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་ཐེབས་རྩ་ཁང་དེའི་གསེར་གྱི་གཟེངས་རྟགས་ཕུལ་འདུག
ཁ་སང་ཕྱི་ཟླ་ ༤ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དབྱིན་ཡུལ་གྱི་(Scheherazade)ཐེབས་རྩའི་གསེར་གྱི་གཟེངས་རྟགས་ཤིག་དབྱིན་ཡུལ་སྐུ་ཚབ་དོན་གཅོད་བརྒྱུད་ཕུལ་ཡོད་པ་དབྱིན་ཡུལ་སྐུ་ཚབ་དོན་གཅོད་ལས་ཁུངས་ཀྱི་དྲ་ལམ་དུ་སྤེལ་འདུག་པ་དང་། གསེར་གྱི་གཟེངས་རྟགས་དེ་ནི་༧གོང་ས་རྒྱལ་བ་རིན་པོ་ཆེ་མཆོག་གིས། སྐུ་ཚེ་ཧྲིལ་བོར་གཞན་ཕན་གྱི་མཛད་འཕྲིན་བསྐྱངས་པ་དང་། ཆོས་ལུགས་མཐུན་སྒྲིལ། འཛམ་གླིང་ཞི་བདེ་སོགས་ཀྱི་མཛད་འཕྲིན་རླབས་པོ་ཆེ་བསྐྱངས་གནང་བར་གུས་བཀུར་མཚོན་སླད་དུ་ཕུལ་བ་ཞིག་ཡིན་འདུག
དེ་ཡང་ཁ་སང་ཕྱི་ཚེས་ ༡༤ ཉིན་དབྱིན་ཡུལ་དུ་རྟེན་གཞི་བྱས་པའི་༧གོང་ས་མཆོག་གི་དབྱིན་ཡུལ་སྐུ་ཚབ་དོན་གཅོད་ཁང་དུ་ཐེབས་རྩ་ཁང་གི་བདག་པོའི་བུ་ཏུ་མུར་ཤཱ་ཧ་ (Mr. Timur Shah) ལགས་ཆེད་དུ་ཕེབས་ནས་༧གོང་ས་མཆོག་ལ་ཕུལ་བའི་གསེར་གྱི་གཟེངས་རྟགས་དེ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱི་ལག་ཏུ་ཕུལ་ཡོད་ཅིང་། དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས། ཁོང་ནས་གཟེངས་རྟགས་དེ་བཞུགས་སྒར་དྷ་རམ་ས་ལར་ཆགས་པའི་༧གོང་ས་མཆོག་སྐུ་སྒེར་གྱི་ཡིག་ཚང་དུ་འབུལ་རྒྱུ་ཡིན། ཞེས་གཟེངས་རྟགས་དེ་རྩིས་ལེན་བྱེད་སྐབས་བརྗོད་ཡོད་པ་སྐུ་ཚབ་དོན་གཅོད་ཀྱི་ངོ་དེབ་སྟེང་དུ་བརྙན་ལམ་ནས་སྤེལ་འདུག
གཟེངས་རྟགས་དེ་ནི་འཛམ་གླིང་ནང་བུད་མེད་ནུས་སྟོབས་གོང་སྤེལ་དང་འབྲེལ་བའི་ལས་དོན་སྒྲུབ་མཁན་དང་། རིགས་རུས་སྣ་ཚོགས་འདུས་ཤིང་འཆམ་མཐུན་ལྡན་པའི་གོ་ལའི་སྤྱི་ཚོགས་ཤིག་བསྐྲུན་པར་འབད་བརྩོན་གནང་མཁན། འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་སོགས་ཀྱི་ལས་དོན་སྒྲུབ་མཁན་རྣམས་ལ་ཕུལ་སྲོལ་ཡོད་པ་ཅིང་། དེ་སྔ་གཟེངས་རྟགས་དེ་བྱམས་བརྩེའི་བདག་མོ་ཊུ་རེ་ས་(Mother Teresa)ལགས། ནལ་སན་མན་ཌ་ལ་(Nelson Mandela)ལགས། བྷི་བྷི་སི་གསར་ཁང་གི་དོ་དམ་པ་རྒན་པ་ (Sir David Attenborough) ལགས། དབྱིན་ཇིའི་བརྩམས་སྒྲུང་རྩོམ་པ་པོ་གྲགས་ཅན་ལྕམ་ཌོ་རེ་སི་ (Doris Lessing)ལགས་སོགས་འཛམ་གླིང་གི་གནད་ཡོད་མི་སྣ་ཏག་ཏག་ལ་ཕུལ་མྱོང་འདུག་ལ། ༧གོང་ས་མཆོག་ནི་གཟེངས་རྟགས་དེ་ཐོབ་མཁན་གྱི་མི་སྣ་གསར་ཤོས་ཡིན་པ་ཐེབས་རྩ་ཁང་དེའི་དྲ་རྒྱའི་སྟེང་བཀོད་འདུག
གསར་འགོད་པ། སྐལ་བཟང་སྦྱིན་པ།
ཡི་རངས་དང་དགའ་བསུ་གྲངས་མེད་ཞུ།༠