སྦེལ་ཇམ་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས་རྒྱ་ནག་གིས་པཎ་ཆེན་ཆུང་སྲིད་རིན་པོ་ཆེ་དང་བོད་ཀྱི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་ནས་ཀློད་གྲོལ་གཏོང་དགོས་པ་མ་ཟད། ༧གོང་ས་མཆོག་གི་ཡང་སྲིད་ངོས་འཛིན་ཞུ་ཕྱོགས་ཐད་རྒྱ་ནག་ལ་ཐོབ་ཐང་ཅི་གང་མེད་པའི་སྐྱོན་བརྗོད་བྱས་འདུག
ཟླ་འདིའི་ཕྱི་ཚེས་ ༢༥ ཉིན་༧ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༤ ཕེབས་པའི་འཁྲུངས་སྐར་གཙི་སྲུང་བྱེད་བཞིན་ཡོད་པ་ལྟར། སྦེལ་ཇམ་གྲོས་ཚོགས་འཐུས་མིའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་ཨེལ་སི་ཝན་ཧོ་ཧྤི་ (Els Van Hoof) ལགས་དང་། ཚོགས་གཞོན་སཱ་མུལ་ཁོ་གྷོ་ལ་ཌི་ (Samuel Cogolati) ལགས་གཉིས་ཀྱིས་པཎ་ཆེན་རིན་པོ་ཆེ་མཆོག་གི་འཁྲུངས་སྐར་སྐབས་བསྒྲགས་གཏམ་སྤེལ་ཏེ། ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་དབུས་བོད་ཀྱི་ཆབ་སྲིད་བཙོན་པ་ཡོངས་ཆ་རྐྱེན་གང་ཡང་མེད་པའི་ཐོག་ནས་འཕྲལ་མར་ཀློད་གྲོལ་གཏོང་དགོས་པའི་སྐུལ་མ་གནང་འདུག
གྲོས་ཚོགས་འཐུས་མི་ཁོང་གཉིས་ཀྱི་བསྒྲགས་གཏམ་ནང་། དེ་རིང་༧པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དགུང་གྲངས་ ༣༤ ལ་ཕེབས་ཡོད། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་ཁོང་དགུང་གྲངས་ ༦ ཐོག་རྒྱ་གཞུང་གིས་བཙན་འཁྲིད་བྱས་ནས་ད་དུང་གར་སོང་ཆ་མེད་དུ་གྱུར་ཡོད་པ་དང་། རྒྱ་གཞུང་གིས་རྒྱལ་སྤྱིའི་སྤྱི་ཚོགས་དང་བོད་པའི་ཚོགས་སྡེ་ཁག་ལ་༧གོང་ས་མཆོག་ནས་ངོས་འཛིན་གནང་བའི་པཎ་ཆེན་རིན་པོ་ཆེར་ཐུག་འཕྲད་བྱེད་བཅུག་གི་མེད།
ང་ཚོས་རྒྱ་ནག་གཞུང་ནས་༸ཀུན་གཟིགས་པཎ་ཆེན་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་ད་ལྟ་སྐུ་འཚོ་བཞུགས་ཡིན་པ་དང་སྐུ་གཟུགས་གསལ་ཐང་ཡིན་པ། གང་དུ་འཚོ་བཞུགས་གནང་གི་ཡོད་པའི་བདེན་དཔང་སྤྲོད་དགོས་པའི་འབོད་སྐུལ་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་རྒྱལ་སྤྱིའི་སྟེང་ཁས་ལེན་བྱས་པ་ནང་བཞིན། པཎ་ཆེན་རིན་པོ་ཆེར་འགྲོ་བ་མིའི་གཞི་རྩའི་ཐོབ་ཐང་ཆ་ཚང་ལག་བསྟར་བྱེད་པའི་ཐོབ་ཐང་སྤྲོད་དགོས་པའི་འབོད་སྐུལ་ཡང་ཞུ་བཞིན་ཡོད།
༧པཎ་ཆེན་སྐུ་ཕྲེང་བཅུ་གཅིག་པ་མཆོག་ནི་འཛམ་གླིང་སྟེང་གི་བཙོན་འཇུག་དུས་ཡུན་ཆེས་རིང་བའི་ཆབ་སྲིད་བཙོན་པ་ཆུང་ཤོས་དེ་ཡིན་པས། ཆུང་སྲིད་རིན་པོ་ཆེ་མཆོག་དང་ཁོང་གི་ཕ་མ་གཉིས། བོད་པའི་ཆབ་སྲིད་བཙོན་པ་རྣམས་ཆ་རྐྱེན་ཅི་ཡང་མེད་པའི་ཐོག་ནས་ཀློད་གྲོལ་དགོས་པའི་འབོད་སྐུལ་བྱེད་ཀྱི་ཡོད། ང་ཚོས་རྒྱ་ནག་གཞུང་གི་ཐེ་གཏོགས་གང་ཡང་མེད་པར་བོད་མི་ཚོས་རང་གི་ཆོས་ཕྱོགས་ཀྱི་དབུ་འཁྲིད་འདེམས་རྒྱུ་ནས་བོད་ཀྱི་ཆོས་དང་། རིག་གཞུང་། སྐད་ཡིག་བཅས་ཀྱི་རང་དབང་དང་ཐོབ་ཐང་ལ་བརྩི་བཀུར་དང་རྒྱབ་སྐྱོར་ཤུགས་ཆེན་བྱེད་ཀྱི་ཡོད་པ་མ་ཟད། ང་ཚོས་༧གོང་ས་མཆོག་གི་མ་འོངས་བའི་ཡང་སྲིད་ཐད་རྒྱ་གཞུང་ནས་ཐེ་གཏོགས་བྱས་དང་བྱེད་བཞིན་པར་སྐྱོན་བརྗོད་བྱེད་ཀྱི་ཡོད། ཡང་སྲིད་ངོས་འཛིན་ནི་བོད་ཀྱི་ཐུན་མོང་མ་ཡིན་པའི་ནང་པའི་སྲོལ་རྒྱུན་ཞིག་ཡིན་པས། ༧གོང་ས་རྒྱལ་བ་རིན་པོ་ཆེ་མཆོག་གཅིག་པུ་ལས་གཞན་སུ་ལའང་ཐེ་གཏོགས་བྱེད་པའི་ཐོབ་ཐང་མེད། ཅེས་གསུངས་འདུག
དེ་བཞིན་ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་མི་ཀུ་ལཱ་སི་ཕི་ཁི་སཱ་ (Mikulas Peksa) ལགས་ཀྱིས་སྣེ་ཁྲིད་པའི་གྲོས་ཚོགས་འཐུས་མི་བཅུ་གཅིག་ནས་ཡུ་རོབ་གྲོས་ཚོགས་ཀྱི་ཆེས་མཐོའི་སྐུ་ཚབ་ཇོ་སེབ་བྷོ་རེལ་ (Josep Borrell) མཆོག་གི་མཚན་ཐོག་ཏུ་འཕྲིན་ཡིག་ཞིག་ཕུལ་ཡོད་པའི་ནང་དུ། ཡུ་རོབ་མཐུན་ཚོགས་ནས་རྒྱ་གཞུང་གིས་༧པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་བཏང་བའི་གནད་དོན་ཐད་རྒྱ་གཞུང་ལ་གྲོས་མོལ་བྱས་ཡོད་མེད་དང་། མ་འོངས་བར་འཚོག་འཆར་ཡོད་པའི་ཡུ་རོབ་མཐུན་ཚོགས་དང་རྒྱ་ནག་བར་གྱི་ཐབས་བྱུས་གྲོས་མོལ་སྐབས་སུ་རྒྱ་ནག་གཞུང་དང་མཉམ་དུ་དེའི་སྐོར་གྲོས་མོལ་བྱ་འཆར་ཡོད་མེད། ༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ལངས་ཕྱོགས་ཁ་གསལ་བཟོ་འཆར་ཡོད་མེད་བཅས་ཀྱི་སྐོར་ལ་བཀའ་འདྲི་ཞུས་ཡོད་འདུག
དེ་བཞིན་སི་པན་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་ཀྱང་པཎ་ཆེན་རིན་པོ་ཆེའི་འཁྲུངས་སྐར་དང་བསྟུན་ནས་རྒྱ་གཞུང་གིས་༧པཎ་ཆེན་རིན་པོ་ཆེ་མཆོག་གི་ད་ལྟའི་གནས་སྟངས་ཐད་བདེན་དཔང་བྱེད་དགོས་པའི་འབོད་སྐུལ་གནང་ཡོད་འདུག
གསར་འགོད་པ། བྱམས་པ་ཚེ་རིང་།
