རྒྱ་ནག་གི་རྒྱལ་ས་པེ་ཅིན་དུ་འཚོག་འཆར་ཡོད་པའི་ཡུ་རོབ་མཉམ་འབྲེལ་མཐུན་ཚོགས་དང་རྒྱ་ནག་གི་ཚོང་དོན་ལྷན་ཚོགས་ཐོག་འགྲོ་བ་མིའི་ཐོབ་ཐང་གི་གནད་དོན་དཀྱིལ་སྙིང་དུ་བཟུང་ནས་གླེང་མོལ་གནང་དགོས་པའི་རེ་སྐུལ་གནང་འདུག
རྒྱ་ནག་དང་ཡུ་རོབ་མཐུན་ཚོགས་གཉིས་ཀྱི་ཚོང་འབྲེལ་བཙུགས་ནས་མི་ལ་ལྔ་བཅུ་འཁོར་བའི་དུས་དྲན་ཟེར་བ་དང་བསྟུན། ཟླ་འདིའི་ཕྱི་ཚེས་ ༢༤ དང་ ༢༥ སྟེ་ཉིན་གྲངས་གཉིས་རིང་རྒྱ་ནག་གི་རྒྱལ་ས་པེ་ཅིན་དུ། འཛམ་གླིང་གི་ཚོང་ཤག་ཆེ་ཤོས་སུ་གྱུར་བའི་རྒྱ་ནག་དང་ཡུ་རོབ་མཐུན་ཚོགས་ཀྱི་ཚོང་དོན་གྱི་ཚོགས་འདུ་ཞིག་སྐོང་འཚོག་བྱ་རྒྱུ་ཡིན་ཞིང་། སྐབས་དེར་ཡུ་རོབ་དང་རྒྱ་ནག་གཉིས་ཀྱི་མཉམ་འབྲེལ་གྱི་ཚོང་དོན་དཀའ་རྙོག་སེལ་ཐབས་བྱས་ཏེ། ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏོང་ཐབས་བྱ་རྒྱུ་ཡིན་སྟབས། རྒྱལ་སྤྱིའི་བོད་དོན་ལས་འགུལ་ཁང་གིས་ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་གི་གནད་དོན་དཀྱིལ་སྙིང་དུ་བཟུང་ནས་གྲོས་མོལ་བྱ་རྒྱུའི་རེ་སྐུལ་གནང་འདུག་ལ། ལྷན་ཚོགས་དེའི་ཐོག་ཡུ་རོབ་མཐུན་ཚོགས་ཀྱི་ཚོགས་གཙོ་ཨེན་ཐི་ལོ་ཁོ་སི་ཊ་(António Costa)ལགས་དང་། ཡུ་རོབ་ལྷན་ཚོགས་(European Commission) ཀྱི་ཚོགས་གཙོ་ལྕམ་ཨར་སེ་ལ་ཝན་ཌེར་ལེ་ཡན་ (Ursula von der Leyen) ལགས་སོགས་ཀྱིས་རྒྱ་ནག་གི་མགོ་ཁྲིད་ཞི་ཅིན་ཕིན་དང་སྲིད་བློན་ལི་ཆང་སོགས་ལ་ཐུག་འཕྲད་བྱ་རྒྱུ་ཡིན་འདུག
རྒྱལ་སྤྱིའི་བོད་དོན་ལས་འགུལ་ཁང་གིས་ཡུ་རོབ་ལྷན་ཚོགས་ཀྱི་ཚོགས་གཙོ་ལྕམ་ཨར་སེ་ལ་ཝན་ཌེར་ལེ་ཡན་ལགས་སོགས་ཀྱི་མཚན་ཐོག་ཏུ་འཕྲིན་ཡིག་ཅིག་བསྐུར་བའི་ནང་། ཡུ་རོབ་མཐུན་ཚོགས་ཀྱིས་རྒྱ་ནག་དང་འབྲེལ་ལམ་བཙུགས་ནས་མི་ལོ་ལྔ་བཅུ་འཁོར་བའི་དུས་སྐབས་འདིར། ཡུ་རོབ་ཀྱིས་འགྲོ་བ་མིའི་རིན་ཐང་དང་སྤྱི་མང་གི་ཐོབ་ཐང་གི་གནད་དོན་དེར་འདུམ་འགྲིག་གནང་ཐུབ་མེད། རྒྱ་ནག་གཞུང་གིས་ཚོང་དོན་དང་བདེ་སྲུང་གདོང་ལེན་ཟེར་བར་ཁ་གཡར་ནས་ཐག་གཅོད་བྱེད་པ་བཞིན། ཡུ་རོབ་མཐུན་ཚོགས་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་གནད་དོན་ལ་རྡོག་རོལ་གཏོང་བཞིན་པར་གཏིང་ཟབ་ཀྱིས་ཚ་འདྲི་བྱ་དགོས་ལ། རྒྱ་ནག་གཞུང་གིས་གཉའ་གནོན་ནི་རྒྱ་ནག་གཅིག་པུ་མིན་པར་རྒྱལ་མཚམས་ལས་བརྒལ་ནས་འཛམ་གླིང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་བར་ཉེན་ཁ་ཡོད། ཅེས་དང་། ད་ལན་གྱི་ལྷན་ཚོགས་དེའི་ཐོག་འགྲོ་བ་མིའི་ཐོབ་ཐང་གི་གནད་དོན་དཀྱིལ་སྙིང་དུ་བཟུང་ནས་ཚོང་དོན་གྱི་ཐད་ནས་གླེང་མོལ་བྱ་དགོས་པ་མ་ཟད། བོད་ནང་གི་ཆོས་དད་རང་མོས་ཀྱིས་མཚོན་པའི་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཐད་ལ་གླེང་སློང་གནང་དགོས་པའི་རེ་སྐུལ་ཞུས་འདུག
ཡུ་རོབ་མཐུན་ཚོགས་ཀྱི་དྲ་རྒྱའི་ནང་དེ་འབྲེལ་གནས་ཚུལ་སྤེལ་བ་ལྟར་ན། རྒྱ་ནག་གི་རྒྱལ་ས་པེ་ཅིན་དུ་འཚོག་འཆར་ཡོད་པའི་ལྷན་ཚོགས་དེའི་ཐོག ཡུ་རོབ་དང་རྒྱ་ནག་བར་གྱི་མཉམ་ལས་ཚོང་དོན་ཡར་རྒྱས་གཏོང་ཐབས་དང་། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་དང་འབྲེལ་ནས་ས་ཁམས་ཆབ་སྲིད་དང་འབྲེལ་བའི་རྩོད་རྙོག་ཁག་ལ་གདོང་ལེན་བྱེད་ཐབས། ཁོར་ཡུག་དང་གནམ་གཤིས་འགྱུར་ལྡོག་གི་གནས་བབ་སོགས་ཀྱི་ཐད་ལ་གླེང་སློང་བྱ་རྒྱུ་ཡིན་འདུག་ཀྱང་། ཁ་གསལ་གཏིང་གསལ་གྱི་གནས་ཚུལ་གང་ཡང་ཐོན་མེད་པ་རེད།
འདས་པའི་མི་ལོ་ལྔ་བཅུ་ཙམ་གྱི་རིང་ཡུ་རོབ་དང་རྒྱ་ནག་གཉིས་ཀྱིས་ཚོང་འབྲེལ་གྱི་ལས་དོན་གཉེར་ཡོད་ཅིང་། ལྷག་པར་ཕྱི་ལོ་ ༢༠༡༠ ཙམ་ནས་ཕྱོགས་གཉིས་ཀྱི་མ་འཇོག་སོགས་མཚོན་པའི་ཚོང་དོན་མཉམ་འབྲེལ་གྱི་ལས་དོན་ལ་འཕེལ་རྒྱས་ཆེན་པོ་བྱུང་ནས་འཛམ་གླིང་གི་ཚོང་ཤག་ཆེ་ཤོས་སུ་གྱུར་ཏེ། ཕྱོགས་གཉིས་ཀྱི་དཔལ་འབྱོར་ལའང་འཕེལ་རྒྱས་ཆེན་པོ་ཕྱིན་ཡོད་སྟབས། འདི་ལོའི་ཕྱི་ཟླ་ ༥ ནང་རྒྱ་ནག་དམར་ཤོག་ཚོགས་པའི་མགྲིན་པ་ལྟ་བུར་གྱུར་བའི་གོ་ལའི་དུས་བབ་ཀྱིས། རྒྱ་ནག་དང་ཡུ་རོབ་གཉིས་ཀྱི་སྤྲོ་སེམས་ཁོལ་བའི་མི་ལོ་ལྔ་བཅུའི་ཚོང་དོན་མཉམ་ལས་ཁྲོད། ཕྱོགས་གཉིས་ཀྱི་མཉམ་འབྲེལ་ཚོང་དོན་དེ་ཨ་སྒོར་ཐེར་འབུམ་ ༢།༤ ནས་ཐེར་འབུམ་ ༧༨༠ ལ་འཕེལ་རྒྱས་ཕྱིན་ཡོད་ལུགས་བསྒྲགས་ཡོད། རྒྱ་ནག་གཞུང་གིས་གློག་ཆས་རིགས་དང་། བོད་མཐོ་སྒང་གི་རང་བྱུང་ཁམས་ལས་ཐོན་པའི་ཞ་ཉེ་དང་། ཟངས། རག དེ་བཞིན་འབར་མདེལ་བཟོ་བྱེད་ཀྱི་རྫས་རིགས་སོགས་ཡུ་རོབ་མཐུན་ཚོགས་ཀྱི་རྒྱལ་ཁབ་ཁག་ལ་ཕྱིར་ཚོང་དང་། འཕྲུལ་རིགས་དང་། རླངས་འཁོར། སྨན་རིགས། གནམ་གྲུ་སོགས་ནང་འདྲེན་བྱེད་ཀྱིན་ཡོད་འདུག
ཕྱི་ལོ་ ༢༠༢༠ ལོར་རྒྱ་ནག་ཝུའུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་དང་། རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་ཟེར་བའི་སྲིད་ཇུས་འོག་ནས་ཀུ་ཤུ་ཁ་པར་ཚོང་ལས་ཁང་གཙོས་ཕྱིའི་རྒྱལ་ཁབ་ཁག་གི་ཚོང་འབྲེལ་རེ་ཞིག་མཚམས་བཞག་པ་དང་། རྒྱ་ནག་གི་ཚོང་དོན་གྱི་ཞིང་ཆེན་བཅོ་ལྔ་ཡི་རྒྱལ་ས་ཁག་ཚུད་པའི་གྲོང་ཁྱེར་ཁྱོན་ ༧༣ ལྷག་ནང་གི་མི་མང་ས་ཡ་ ༣༡༣ གྱི་འགྲོ་སྐྱོད་སོགས་ལ་བཀག་རྒྱ་བསྡམས་པ་མ་ཟད། ཡུ་རོབ་རྒྱལ་ཁབ་ཁག་དང་རྒྱ་ནག་བར་ཚོང་དོན་གྱི་འབྲེལ་ལམ་ཇེ་ཞན་དུ་གྱུར་ཏེ། རྒྱ་ནག་གི་དཔལ་འབྱོར་ལ་ཉམས་ཆག་ཆེན་པོ་ཕྱིན་ཡོད་སྟབས། འདས་ལོའི་ཕྱི་ཟླ་ ༡ ནང་རྒྱ་ནག་གི་སྲིད་བློན་ལི་ཆང་ཆེད་དུ་ཡུ་རོབ་རྒྱལ་ཁབ་ཁག་ཏུ་ཕྱིན་ནས། ཚོང་གི་འབྲེལ་ལམ་ཡར་སྐྱེད་ཡོང་བར་གོ་ལ་ལྗང་འགྱུར་གྱི་ལས་གཞི། རྒྱ་ནག་དང་ཡུ་རོབ་ཀྱི་འབྲེལ་ལམ། ཤེས་རིག་དང་དེང་རབས་འཕྲུལ་ལས་ཚུད་པའི་ཚོང་དོན་ཐད་སླར་ཡང་གྲོས་མཐུན་འཇོག་དགོས་བྱུང་ཡོད་ལ། འདས་ལོར་རྒྱ་ནག་གཞུང་གིས་ཨ་ཧྥི་རི་ཁའི་རྒྱལ་ཁབ་ཁག་ལ་ཆེད་དུ་འབྱུང་འགྱུར་མི་ལོ་གསུམ་ནང་རྒྱ་སྒོར་ཐེར་འབུམ་ ༣༦༠ (ཨ་སྒོར་ཐེར་འབུམ་ ༥༠།༧༢) ལྷག་བཏང་ནས་རོགས་རམ་བྱ་རྒྱུ་ཡིན་པའི་ཁྲོད། རྒྱ་སྒོར་ཐེར་འབུམ་ ༧༠ ལྷག་ཡུལ་དེར་རྒྱ་ནག་གི་བཟོ་ཚོང་ཁང་འཛུགས་སྐྲུན་དང་དམག་དོན་གྱི་ལས་གཞིའི་ཆེད་བཏང་ཡོད་ཅིང་། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གཞུང་གིས་ཨ་ཧྥི་རི་ཁར་མ་འཇོག་ཆེན་པོ་བྱས་པ་ནི་རྒྱ་ནག་ནང་ཚོང་དོན་གྱི་གྱོང་གུད་ཐེབས་མུས་ཡིན་པ་དེར་ཁ་གསབ་དང་། ཨ་རི་དང་གདོང་ཐུག་འབྱུང་མུས་ཡིན་པའི་ས་ཁམས་ཆབ་སྲིད་ཀྱི་དཀའ་རྙོག་དེ་དག་སེལ་ཐབས། དེ་བཞིན་ཡུ་རོབ་རྒྱལ་ཁབ་ཁག་དང་ཚོང་དོན་གྱི་གྲུབ་འབྲས་མ་ཐོན་ཚེ། ཨ་ཧྥི་རི་ཁའི་ནང་ཚོང་འབྲེལ་རྒྱ་སྐྱེད་ཐབས་ཀྱི་དམིགས་ཡུལ་བཟུང་ཡོད་པའི་ཚོད་དཔག་བྱེད་ཀྱིན་འདུག
ཕྱི་ལོ་ ༡༩༧༥ ནས་ཡུ་རོབ་མཐུན་ཚོགས་དང་རྒྱ་ནག་བར་གྱི་མཉམ་འབྲེལ་ཚོང་ལས་མགོ་བརྩམས་ཤིང་། ཕྱི་ལོ་ ༢༠༡༣ ལོར་བཞག་པའི་ཡུ་རོབ་མཐུན་ཚོགས་དང་རྒྱ་ནག་གི་ཚོང་དོན་མ་འཛུགས་གྲོས་ཆོད་དེས་ཕྱོགས་གཉིས་ཀྱི་ཚོང་དོན་མ་འཛུགས་གོང་འཕེལ་གཏོང་ཐབས་ལ་དམིགས་ཡོད། འདས་པའི་མི་ལོ་ལྔ་བཅུ་ལྷག་གི་རིང་ཕྱོགས་གཉིས་ཀྱིས་ཨ་སྒོར་ཐེར་འབུམ་༧༨༠ ལྷག་གི་ཚོང་དོན་གྱི་མཉམ་འབྲེལ་བྱས་ཡོད་ལ། ཕྱི་ལོ་ ༢༠༢༣ ལོར་ཡུ་རོབ་རྒྱལ་ཁབ་ཁག་གིས་རྒྱ་ནག་གི་ཅ་དངོས་བརྒྱ་ཆ་ ༡༢ ལས་ནང་འདྲེན་བྱས་མེད་ཀྱང་། ཕྱི་ལོ་ ༢༠༢༤ ལོར་བརྒྱ་ཆ་ ༢༡།༨ ནང་འདྲེན་བྱས་ཡོད་པའི་ཁྲོད། ན་ཐར་ལེན་ཌི་རྒྱལ་ཁབ་ནི་རྒྱ་ནག་ནས་ཅ་དངོས་ནང་འདྲེན་མང་ཤོས་བྱེད་མཁན་དུ་གྱུར་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
